1. ¿Chem ayüquei Jehová ñi femngeal com mapu püle?

 FACHANTÜ Jehová ayüquei ñi com püle ñi amuldungungeal ti cümeque dungu (Mar. 13:10; 1 Tim. 2:3, 4). Fei ta Jehová ñi cüdau, feimu elfalcünufi ta Jesús ñi adnieafiel ti amuldungun cüdau. Feimu cüme quimnieiñ ñi amuldungungeal com mapu püle petu ñi afnon com huesaque dungu, chumngechi ñi ayüqueel ta Jehová (Mat. 24:14).

2. ¿Chem peaiñ tüfachi troquiñ mu?

² Tüfachi troquiñ mu peaiñ Jesús ñi adniefiel ti “quim manelfal cona” (esclavo fiel y prudente). ¿Chumal? Ñi hulal ngülam Biblia mu cüpalu ca ñi adnieafiel ti amuldungun cüdau (Mat. 24:45). Ca peaiñ chumngechi iñchiñ quelluntucuafuiñ ta Jesús ca tati quim manelfal cona.

3. ¿Chem dungu mu elungei autoridad ta Jesús?

³ Jesús adniefi tati amuldungun cüdau, ¿chumngechi quimiyiñ tüfa? Petu tañi amutunon ta huenu mu ta Jesús, trapümfi quiñeque tañi pu discipulo, fei feipifi: ‘Ngünechen ta elueneu com pepiluhun huenu ca ti mapu meu’. Ca feipifi: ‘Amumün, com mapu müleyechi pu che meu. Ca quimeltuafimün femngechi tañi quimaeteu engün ca iñche ñi discipulongeal engün’ (Mat. 28:18,  19). Feimu feipiafuiñ Jesús elungei autoridad ñi adnieafiel ti amuldungun cüdau.

4. ¿Chemu feipiafuiñ Jesús tañi petu ngüneniefiel ti amuldungun cüdau fachantü?

⁴ Jesús feipi ti amuldungun cüdau ñi femngeal com mapu püle. Ca feipi fill antü ñi müleal tañi pu inanieteu engün fente puule hula com huesaque dungu mapu meu (Mat. 28:20). ¿Chem enseñaleiñmu Jesús tañi feipicünuel? Jesús amulei tañi ngüneniefiel feitachi cüdau famülque mu.

5. ¿Chumqueiñ iñchiñ ñi huechurpual ñi feipin ti Salmo 110:3?

⁵ Jesús raquiduamlafui rume ñi mülenoal ta che amuldungualu, quisu cüme quimniefui ñi huechurpual ñi feipicünuel ti Salmo 110:3. Feipi: “Tami pu che ayühun mu eluhuai puule ti antü ñi hueichayal tami pu hueichafe”. Eimi amuldungulelmi, coneltuleimi ñi huechurpual feitachi profecia. Ca femngechi quelluntucuquefimi ta Jesús ca ti quim manelfal cona. Feitachi cüdau amulei, huelu quiñeque mu cüdaungeafui. ¿Chumngelu? Peafiyiñ.

6. Famülque mu, ¿chumngelu cüdaungeafui taiñ amuldungucheal?

⁶ Quiñeque mu pu amuldunguquelu caiñetungequeingün. Pu apostata, pu loncolechi religioso ca pu politico coilaque dungu feipiquei ñi femqueel pu Dunguquelu Ineingen Jehová. Taiñ pu pariente cam quiñeque che taiñ quimel feyentufile tañi feipingequeel iñchiñ mu, feipiafeiñmu taiñ cüdahuelhuenoafiel Jehová ca taiñ amuldunguhuenoal. Caqueñpüle quiñeque taiñ pu peñi ca pu lamngen aneltungequei, hulelcangequei ca carceltucungequei. Afmatulayaiñ taiñ femngen mu. Jesús feipicünui taiñ femngeal, quisu feipi: ‘Com che ta üdeaimünmeu iñche tañi duam mu’ (Mat. 24:9). Feimu taiñ üdeeteu mu pu che pengeli iñchiñ taiñ inaniefiel ta Jesús ca taiñ ayühuelfiel ta Jehová (Mat. 5:11, 12). Huecüfü llemai ngüchaltucuquefi reque pu che taiñ caiñetuaeteu. Huelu Jesús doi nehuen-ngei Huecüfü mu. Jesús tañi quellun mu, com mapu püle amuldungulelngequei ta che.

7. ¿Chem pimi? ¿Chumngelu feipiafuimi ñi huechurpumequen Apocalipsis 14:6, 7?

⁷ Huelu ca dungu mülei. Famülque mu com mapu mu caque rume quehun mülei, feimu cüdautuafuiñ taiñ amuldungual. Femfulu rume, Jesús feipicünui com che ñi amuldungulelngeal chem quehun dungufule rume (papeltunge Apocalipsis 14:6, 7). ¿Chumngechi femtripamequei ñi feipicünuel ta Jesús? Taiñ sitio jw.org mülei doi mil quehun mu, fei fentren pu che papeltuafui Biblia ñi dungu quisu ñi quehun mu engün. Cafei ti lifru ¡Rumel ayüucüleaimi! pingelu, rulpangei doi 700 quehun mu, tüfa tati doi falin lifru taiñ enseñacheal. Cafei video mu enseñalngequei Jehová ñi dungu tati pu pilungelu. Ca femngechi braille mu enseñalngequei tati pu trauma. Quimfali ñi huechurpumequen tañi feipicünuel ta Biblia. Famülque mu, fentren che fillque quehun dungulu quimeltulngequei Biblia ñi rüf dungu, femngechi adümürpuqueingün tati “lifngechi dungun” (Sof. 3:9; Zac. 8:23). Jesús tañi quellun mu femngequei tüfachi cüdau.

8. ¿Chumngechi tripaquei taiñ amuldungun?

 ⁸ Famülque mu, iñchiñ Jehová ñi troquiñche, 240 troquiñ mapu mu mülefuiñ ca doi 8 millones chengeiñ. Cafei fill tripantu fentrenque che fautizauquei. Afmatufali tüfa, huelu doi falin-ngefui feitachi pu che inayentuquefingün Chau Jehová ñi chumngen (Col. 3:8-10). Fentren pu che famentuqueingün ti huesa mongen ñi niequefel ta cuifi, quehuatuchefengehuelai, illamcachehuelai ca mallmauhuelai tañi tuhun mu. Cafei fentren che enseñalngequei tañi hueichanoal, femngechi femtripamequei ñi feipin Isaías 2:4. Iñchiñ am inayentuquefilu Jehová tañi chumngen, feimu fentrenque che fülconquei Jehová tañi troquiñche mu. Ca femngechi pengelqueiñ taiñ inayentuquefiel ta Jesús (Juan 13:35; 1 Ped. 2:12). Com feitachi dungu rupaquei Jesús taiñ quelluqueteu mu.

9. Jesús, ¿chem feipicünui ñi rupayal ti afaelchi antü meu? (Mateo 24:45-47).

⁹ (Papeltunge Mateo 24:45-47, TNM). Jesús feipicünui, ti afaelchi antü meu, elfalcünuafi tati quim manelfal cona ñi quimeltuafiel Jehová ñi pu che Biblia ñi dungu. Feitachi quim manelfal cona nehuentu cüdaucülequei fachantü. Jesús adniefi quiñe pichi troquiñ dullinque cristiano ñi quimeltuafiel Biblia ñi dungu Chau Jehová ñi pu che puuchi antü meu. Feitachi pu huentru ngencauquelai caquelu cristiano ñi feyentun mu (2 Cor. 1:24). Huelu mai, quimnieingün Jesús ñi ‘loncolen ca ñidolcülen’ tañi troquiñche mu (Is. 55:4).

10. Tati lifru pengelqueel ti adentun mu, ¿tuchi quellueimu tami serfiafiel Jehová?

 ¹⁰ 1919 tripantu ca fantepu meu, ti quim manelfal cona pepicaquefi fentren lifru ñi quelluafiel pu che quimafiel Biblia ñi dungu. 1921 tripantu mu ti quim manelfal cona entui ti lifru El Arpa de Dios gringodungun mu. Tüfachi lifru mu quellungei pu che ñi adümafiel ti doi falinque quimeltun mülelu Biblia mu. Rupachi tripantu mu entungei caquelu lifru, tripai ti lifru “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, Tati Biblia ñi rüf kimeltukeel, ¿Chem kimeltukey Biblia? Ca ti inan lifru feita ¡Rumel ayüucüleaimi! pingei. Eimi, ¿chem lifru quellueimu tami quimafiel ca piuqueyeafiel ta Jehová? Feitachi lifru pepicangei taiñ quelluafiel pu che ñi discipulongerpual. Entungelu caque quiñeque lifru, tüfa tañi duamnieel piquefuiñ.

11. ¿Chumngelu fente falin-ngei taiñ doi cüme quimafiel ta Jehová ca Biblia ñi feipin?

¹¹ Com iñchiñ duamnieiñ taiñ doi cüme quimafiel ta Chau Jehová ca Biblia ñi dungu. Ti apostol Pablo feipi tati nehuencülelu ñi feyentun duamniei fütaqueche ñi iyael. Ca feipi inafiliyiñ Biblia ñi feipin, quim ngüneduamaiñ chem ñi cümen ca chem ñi cümenon (Heb. 5:14). Famülque mu, fentren che huesa mongen yeniequei, feimu iñchiñ cüdautuafuiñ taiñ inayafiel Jehová ñi feipin. Huelu Jesús quelluqueiñmu ñi nehuencüleal taiñ feyentun. Com taiñ eluqueteu Jesús Biblia mu cüpai. Fei Jesús ñi duam mu, ti quim manelfal cona pepicaquefi fillque quellu femngechi taiñ doi cüme hueniyeafiel ta Jehová.

12. Jesús reque, ¿chumngechi püramyequefiyiñ Chau Dios ñi üi?

 ¹² Jesús reque iñchiñ rume püramyequefiyiñ Jehová tañi üi (Juan 17:6, 26). Quiñe ejemplo, 1931 tripantu mu pu Dunguquelu Ineingen Jehová pingetuiñ. Taiñ femün mu pengelqueiñ tunte falintuquefiyiñ Jehová ñi üi. Ca femngechi quimngequeiñ taiñ yenieel Chau Dios ñi üi (Is. 43:10-12). Octubre 1931 tripantu ta fantepu meu, huirintucungequei Jehová tañi üi ti hunen pagina mu Ti Huerquen pingechi revista mu. Cafei La Biblia. Traducción del Nuevo Mundo mu huiño tucungetui Chau Dios ñi üi cheu ñi mülequefel. Femngechi femquelai caquelu pu iglesia, fei engün ellcaquefingün Chau Dios ñi üi ñi tripanoal Biblia mu.

13. ¿Chumngelu feipiafuimi Jesús ñi adniefiel ti quim manelfal cona? (Juan 6:68).

¹³ Ti quim manelfal cona mu Jesús adcünufi tañi pu inanieteu ñi cüme poyeafiel ta Jehová. Eimi, ¿chum duamcüleimi tami coneltulen Jehová ñi troquiñche mu? Pedro reque duamqueimi chi, quisu feipifi ta Jesús: “Ñidol, ¿inei meu cai amuafuiñ? Eimi tami dungun ta rumel mongen dungun” (Juan 6:68). ¿Cheu chi müleafuiñ quimnofuliyiñ Jehová tañi troquiñche? Ñampiyahuafuiñ chi. Feitachi troquiñche mu Jesús eluqueiñmu com taiñ duamnieel taiñ püntütripanoal Jehová mu. Cafei pepicaqueiñmu taiñ cüme amuldungucheal, ca quelluqueiñmu taiñ inayentuafiel ñi chumngen ta Jehová femngechi taiñ ayühuelafiel (Efes. 4:24).

14. Aculu ti COVID-19, ¿chumngechi quellueiñmu Jehová ñi troquiñche?

 ¹⁴ Jesús cüme adniequeiñmu rupan mu huesaque dungu mu. Por ejemplo, aculu ti huesa cutran COVID-19 rume quellungequeiñ. Fentren che quimlafui tañi chumal, huelu Jesús pürüm feipieiñmu chumngechi taiñ cuñiutucuhual. Feipingeiñ taiñ püneal mascarilla ca taiñ müte fülmaucülenoal caquelu che mu. Pu loncolelu ca feipingei ñi rumel nütramcaleal pu peñi ca pu lamngen engün, femngechi quimtucuafuingün chem duamniefui ti trahunche ñi cümelcaleal ca ñi fülmaucüleal Jehová mu (Is. 32:1, 2). Cafei fill cüyen mülei hueque dungu ñi feipial ti Troquiñ Adniechequelu (Cuerpo Gobernante), fei ta mu llouqueiñ ngülam ca yafüluhun.

15. Aculu ti huesa cutran, ¿chem feipingeiñ taiñ femal? Ca ¿chum tripai taiñ cüdau?

¹⁵ Aculu ti huesa cutran ca feipingeiñ chumngechi taiñ trahuluhual ca amuldungual. Pürüm coneltuleiñ ti trahun ca fütraque trahun mu internet mu. Epe com taiñ amuldungun pünequefuiñ ti carta ca ti telefono. Jehová cümelcaquefi com taiñ cüdau mülelu ti pandemia. Fentren Betel ruca feipingün ñi doi mülen che amuldunguquelu. Fentren pu peñi ca pu lamngen feipingün ñi cüme tripan tañi cüdau engün (inaduamnge ti huichulechi dungu “ Jehová cümelcaquefi ti amuldungun cüdau”).

16. ¿Chem mu maneluucüleiñ?

¹⁶ Mülelu ti tul cutran Jehová ñi troquiñche ngülamtueiñmu chumngechi taiñ cuñiutucuhual. Huelu quiñeque che feipingün chi ¿feingepei mai taiñ doi cuñiutucuhual? Huelu fentren rupa mu pengelcünungeiñ taiñ cüme adnieteu Jehová ñi troquiñche (Mat. 11:19). Felei llemai, Jehová ca Jesús adniequeiñmu iñchiñ fachantü. Feimu chem dungu rupale rume cüpalechi antü meu, maneluuqueiñ taiñ quisucünunoaeteu engu (papeltunge Hebreos 13:5, 6).

17. ¿Chum duamqueimi tami adnieteu ta Jesús?

¹⁷ Chem tuhun, quehun nieliyiñ rume, com quiñeucüleiñ Jehová ñi troquiñche. Enseñalngequeiñ Biblia ñi dungu ca pepicangequeiñ taiñ doi cüme amuldungual. Ca feipingequeiñ chumngechi inayentuafiel Jehová ñi chumngen ca taiñ hueluconque piuqueyehual. Feimu llemai, rume ayüucüleiñ taiñ adnieteu ta Jesús fachantü.