1. ¿Chem quimürpuimi chillcatulu eimi Biblia?

 ¿CHEM quimürpuimi hue chillcatulu Biblia eimi? ¿Afmatupelaimi quimürpulu eimi Chau Dios ñi nien quiñe üi? ¿Tüngcülehuepelaimi quimfiel Chau Dios ñi cutrancaquenofiel pu che cütral mapu mu? Quimürpulu eimi tami piuqueyen che lalu ñi huiñomongetual engün, ¿rume ayüupelaimi?

2. Chillcatulu Biblia eimi, ¿chem dungu femürpuimi? (Efesios 5:1, 2).

² Chillcatumequelu eimi Biblia, doi piuqueyerpufimi ta Jehová. Feimu inafimi tami quimürpuel. Ca inafimi Biblia ñi ngülam, femngechi tami cüme femal. Norcünutuimi tami mongen ca tami raquiduam, femngechi tami ayühuelafiel Jehová. Ca femngechi eimi inayenturpufimi Jehová chumngechi quiñe pichiche inayentuquefi tañi chau (papeltunge Efesios 5:1, 2).

3. ¿Chem mülei taiñ ramtuhual?

³ Ramtuhuaiñ: “Feichi antü tañi fautizahun ca fantepu mu, ¿doi piuqueyerpufiñ ta Jehová? ¿Doi piuqueyepefiñ mai tañi pu peñi ca pu lamngen Jehová reque?”. Ngüneduamülmi tami fente piuqueyehuenofiel Jehová ca tami pu peñi ca pu lamngen, huesa duamcülelayaimi. Femngechi dungu mu rupaingün pu hunenque cristiano, huelu Jesús quiñepülecünulafi engün, iñchiñ mu ca femlayai (Apoc. 2:4, 7). Huelu Jehová quimniei taiñ huiño rume piuqueyetuafiel ta Jehová ca taiñ pu peñi ca pu lamngen, chumngechi taiñ femquefel cuifi hue quimlu ti rüf dungu.

4. ¿Chem ngüneduamaiñ tüfachi troquiñ mu?

 ⁴ Tüfachi troquiñ mu ngüneduamaiñ chumngechi taiñ doi piuqueyeafiel ta Jehová ca taiñ pu peñi ca pu lamngen. Ca peaiñ femliyiñ tüfa, quisutu cümelcahuaiñ ca cümelcayafiyiñ caquelu pu che.

5, 6. 1) Tañi cüdahuelniefiel Jehová, ¿chem cüdaungechi dungu mu rupai Pablo? 2) ¿Chem quellueyu Pablo ñi cüdahuelnieafiel Jehová?

⁵ Ti apostol Pablo ayühunquechi serfiquefui Jehová, huelu quiñeque mu cüdaungechi dungu mu rupai. Fentrenque rupa, mülefui ñi amual fütra camapu, ca quiñeque mu cümelcalequelafui ti rüpü. Cafei Pablo cuñihun dungu mu rupai lafquen mu ca pu hueñefe ñi duam mu. Cafei tañi pu caiñe rume huesalcaeyu (2 Cor. 11:23-27). Ca quiñeque mu tañi pu peñi cütu mañumquelafuingün com ñi femquefel Pablo (2 Cor. 10:10; Filip. 4:15).

⁶ ¿Chem quellueyu Pablo ñi cüdahuelnierpuafiel ta Jehová? Pablo papeltuquefui Chau Ngünechen ñi huirintucuel, femngechi cüme quimnierpufi. Ca com ñi rupan ñi mongen mu, doi cüme quimürpufi Jehová. Feimu cüme quimniefui ñi piuqueyenieteu Jehová (Rom. 8:38, 39; Efes. 2:4, 5). Ca Pablo rume piuqueyerpufi ta Jehová, feimu serfiniefi tañi pu chaf feyentulelu (Heb. 6:10).

7. ¿Chumafuiñ taiñ doi piuqueyenieafiel Jehová?

⁷ Taiñ doi piuqueyeafiel Jehová, mülei taiñ cüme chillcatuafiel Biblia. Petu papeltumequefiliyiñ Biblia, raquiduamaiñ chem quimeltueiñmu Jehová mu. Ramtuhuaiñ: “¿Chumngechi pengeli tüfachi huirintucun ñi piuqueyenieteu Jehová? ¿Chumngechi quelluqueneu doi piuqueyeafiel Jehová?”.

8. ¿Chumngechi quelluafeiñmu taiñ llellipun taiñ doi piuqueyeafiel Jehová?

⁸ ¿Ca chem quelluaiñmu taiñ doi piuqueyeafiel Jehová? Fill antü nülanentulelafiyiñ taiñ piuque llellipun mu (Sal. 25:4, 5). Femngechi Jehová huiñoldungulelaiñmu taiñ llellipun (1 Juan 3:21, 22). Quiñe lamngen Asia mapu mu mülelu, Khanh b pingelu, feipi: “Quimfilu ta Jehová, piuqueyerpufiñ. Huelu feula pelu iñche chumngechi huiñoldunguqueneu, doi piuqueyerpufiñ. Feimu eluucülen ñi femal tañi ayüqueel quisu”.

9. ¿Chem pengeli Timoteo ñi fente piuqueyeniefiel pu peñi ca pu lamngen?

⁹ Rupalu quiñeque tripantu ñi cristianongerpun Pablo, quimfi ti hueche huentru Timoteo. Timoteo rume piuqueyequefui Jehová ca pu peñi ca pu lamngen. Feimu Pablo feipifi pu Filipos che: “Nielan inei no rume Timoteo reque. Raquiduamcülequei tamün duamnieelchi dungu meu” (Filip. 2:20). Tüfa mu Pablo feipilai Timoteo ñi cüme hueupifengen, huelu mai fente ñi piuqueyefiel pu peñi ca pu lamngen. Tüfa doi falintuquefui Pablo. Feimu pu trahunche, ¿rume ayüquepelafuingün ñi pemeaeteu Timoteo? (1 Cor. 4:17).

10. ¿Chumngechi am pengelingu Anna ca tañi füta ñi piuqueyeniefiel pu peñi ca pu lamngen?

¹⁰ Iñchiñ ca quintuqueiñ chumngechi taiñ quelluafiel pu peñi ca pu lamngen (Heb. 13:16). Ngüneduamaiñ ñi rupan Anna, taiñ nütramcael rupachi troquiñ mu. Rupalu quiñe cürüftucu  mahun, quisu ca tañi füta pemefingu quiñe familia testigongelu. Puulu engu, pefingu ñi teifücahun ti techo. Feimu ti familia nielafuingün tacun ñi tucutuhual, com cülchaflu cai. Anna feipi: “Yetufiyu ti ropa ca cüchafiyu, fei lifcülen ca pihulen huiñoleltufiyiñ. Fütra dungu no fel, huelu tayu femün mu doi cüme hueniyerpufiyu ti familia”. Anna ca tañi füta fente ñi piuqueyefiel mu pu peñi ca pu lamngen, eluhuingu ñi quelluafiel tüfachi familia (1 Juan 3:17, 18).

11. 1) ¿Chum duamnagquei caquelu pu che pengelfiliyiñ taiñ piuqueyeniefiel? 2) Ñi feipin Proverbios 19:17, ¿chumquei Jehová piuqueyecheliyiñ?

¹¹ Piuqueyefiliyiñ taiñ pu peñi ca pu lamngen, inayentuafiyiñ ta Jehová. Ca taiñ pu peñi ca pu lamngen rume falintuaingün chumngechi taiñ quelluquefiel mu. Taiñ lamngen Khanh, taiñ nütramcapeel, rume falintuquefi chumngechi ñi quellueteu pu peñi ca pu lamngen. Taiñ lamngen feipi: “Rume mañumniefiñ quiñeque lamngen yequefeteu ñi amuldungual. Rume piuqueyechefengeingün. Yepaquefeneu engün, mangelquefeneu taiñ quiñentrür yafütual ca elpaquefeneu tañi ruca mu. Feula raquiduamün fei engün fentren dungu femquefuingün iñche mu, huelu ayühunquechi femquefuingün”. Khanh ca feipi: “Ayüafun tañi huiñoleltuafiel engün chumngechi ñi quellueteu engün huechengelu iñche, huelu quimlan cheu ñi mülen engün. Huelu Jehová quimniei, feimu llellipuquefiñ tañi füreneafiel engün”. Rüf feingei, Jehová com peniequei chumngechi taiñ quelluquefiel pu peñi ca pu lamngen, pichin-ngefule rume. Jehová rume falintuquei  com taiñ femquen ca ayüniei taiñ cullituaeteu reque (papeltunge Proverbios 19:17).

12. Pu peñi, ¿chumngechi pengelafui ñi piuqueyefiel ti trahunche? (Ca inaduamnge ti adentun).

¹² Eimi peñi, ¿chumngechi pengelafuimi tami piuqueyeniefiel ti trahunche? Eluunge tami quelluntucual. Quiñe hueche Jordan pingelu, ramtufi quiñe loncolelu chumngechi doi quelluntucuafui trahunche mu. Ti loncolelu saquieyu chumngechi ñi cüdaucülen trahunche mu ca elueyu quiñeque ngülam. Feipieyu ñi doi temprano puhual Trahunhue Ruca mu ca ñi chaliafiel caquelu peñi ca lamngen. Cafei tañi huiñoldungual trahun mu, ñi amuldungual tañi grupo de servicio mu ca ñi ngüneduamal chumngechi ñi doi quelluafiel pu peñi ca pu lamngen. Jordan eluhui ñi femal com tüfachi dungu ca pepicahui, huelu doyelchi mai eluhui ñi doi piuqueyeafiel pu peñi ca pu lamngen. ¿Chem quimürpui Jordan? Quiñe peñi ayüle ñi siervo ministerialngeal, hune eluupe ñi quelluafiel pu peñi ca pu lamngen. Fei hula siervo ministerialngele, amulepe tañi quelluchequen (1 Tim. 3:8-10, 13).

13. ¿Chem quellufi taiñ peñi Christian ñi huiño loncoletual trahunche mu?

¹³ Loncolelungefuimi cam siervo ministerialngefuimi trahunche mu cuifi, Jehová ngoimaquelai chumngechi tami com piuque mu cüdauquefel cuifi (1 Cor. 15:58). Ca ngüneduammequei chumngechi tami cüdaumequen fachantü. Quiñe peñi Christian pingelu, rume huesa duamnagi loncolehuenolu trahunche mu. Huelu feipi: “Loncolehuenoli rume trahunche mu, fente tañi piuqueyeniefiel ta  Jehová eluhun com piuque mu tañi serfinieafiel”. Rupachi antü mu, taiñ peñi ca huiño loncoletui trahunche mu. Christian feipi: “Feipingelu iñche tañi ca huiño loncoletual trahunche mu, pichi raquiduamcülefun. Huelu iñche rume piuqueyefiñ ta Jehová ca tañi pu peñi, pu lamngen, feimu Jehová ayüle tañi huiño loncoleal trahunche mu, feman müten”.

14. Ñi feipin Elena, ¿chem quimeltueiñmu?

¹⁴ Iñchiñ ca piuqueyefiyiñ pu che testigongenolu (Mat. 22:37-39). Quiñe lamngen Elena pingelu, Georgia mapu mu mülelu, feipi: “Cuifi mu, amuldunguquefun tañi piuqueyeniefiel mu Jehová müten. Huelu doi piuqueyefilu Jehová iñche, ca piuqueyerpufiñ tati pu che. Raquiduamquen chem huesaque dungu chaftuniefingün ca chem cüpa nütramcafuingün. Femngechi doi cüpa quelluniefiñ engün” (Rom. 10:13-15).

15, 16. Chumngechi ñi pengelün ti adentun, ¿chumngelu am cümei taiñ pengelal piuqueyehun?

¹⁵ Pengelfiliyiñ piuqueyehun taiñ pu peñi ca pu lamngen, femngechi fei engün ca quelluntucuafi caquelu pu che. Peafiyiñ ñi femün quiñe peñi Paolo pingelu ca tañi domo aculu ti pandemia COVID-19. Fei engu quellufingu quiñeque cusheque lamngen ñi pepilafiel ti electronico chemcün tañi amuldungual. Quiñe tüfachi cushe lamngen rume cüdautui, huelu pepilfi. Feimu mangelfi tañi pu pariente  ñi acordayafiel Jesús ñi lan. 60 che coningün internet mu. Feimu tüfachi cushe lamngen ca tañi pu pariente rume quellueyu ñi femün Paolo ca tañi domo. Rupachi antü mu, tüfachi cushe lamngen feipifi ta Paolo: “Rume mañumuhuiyiñ taiñ quellumufiel mu. Iñche turpu ngoimalayan Jehová taiñ piuqueyeteu ca eimu tamu afeluunon iñchiñ mu”.

¹⁶ Paolo quimürpui pengelal piuqueyehun doi falin-ngei tañi adümuhual. ¿Chumngelu? Quisu feipi: “Cuifi iñche superintendente de circuitongequefun. Pu peñi ca pu lamngen, ¿acordaquepeafuingün chi tañi hueupiquefel? Huelu ngoimaquelaingün chumngechi tañi quellufiel engün”.

17. Pengel-liyiñ piuqueyehun, ¿chumngechi cümelcauqueiñ?

¹⁷ Pengelelfiliyiñ piuqueyehun caquelu pu che, ca quisutu cümelcauqueiñ. Peaiñ ñi rupan Jonathan mülelu Nueva Zelanda mapu mu. Quiñe sabado antü rume arengefui, huelu pefi quiñe precursor quisu amuldunguyaulu, feimu eluhui ñi compañafiel fill sabado. Quisu inaduamlafui tañi femün mu quisutu ñi doi cümelcahual. Jonathan feipi: “Iñche müte ayüquelafun tañi amuldungual. Huelu pefiel mu ti precursor ñi cüme quimeltuchequen ca ñi cüme tripalen tañi amuldungun, iñche ca ayürpufiñ. Ca cüme hueniyerpuhuiyu tañi peñi iñchiu. Quisu quelluquefeneu tañi amuldungual ca cüme fülcüleal Jehová mu”.

18. ¿Chem ayüniei Jehová taiñ femal?

¹⁸ Jehová ayüniei taiñ doi piuqueyenierpuafiel quisu ca caquelu pu che. Chumngechi taiñ peel, ¿chem chumafuiñ taiñ doi piuqueyenierpuafiel Jehová? Mülei taiñ papeltuafiel Biblia ca raquiduamal taiñ chillcatuel mu ca rumel ngillatuafiel. ¿Chumafuiñ taiñ doi piuqueyerpuafiel taiñ pu peñi, pu lamngen? Eluucüleaiñ taiñ quelluafiel. Com tüfa femliyiñ, doi fülconcüleaiñ Jehová mu ca taiñ pu peñi pu lamngen mu. Ca rumel huenihuen-ngeaiñ.