Tañi chau loncolefui tati Iglesia Unida de Canadá. Feimu fillque domingo pulihuen huercüqueiñmu iñche ca tañi lamngen tayu quimeltulelngeal Biblia caquelu pichique che engün. Fei epe rangi antülu, amuquefuiñ tañi chau iñchiñ culto mu. Tarde mu, amuquefuiñ taiñ ñuque iñchiñ pu testigo ñi trahun mu. Quimtucuiñ ñi trürngenon ti epu religion.

Tañi ñuque nütramelfi chem tañi quimeltungeel epu tañi cümeque hueni, fei testigongerpuingu. Bob ca Marion Hutcheson pingeingu. Nueva York huaria mu 1958 tripantu mu, femngei quiñe fütra trahun pura antüngelu, “Chau Dios ñi ayünieel” pingefui. Fei Bob ca Marion yeeneu tañi cüla fotüm engün. Feula quimün fente ñi cüdautun engu tañi yeaeteu, feimu mañumcülen. Rume falintufiñ feichi antü.

Huechengelu iñche, rume ayüquefun ñi dapiafiel pu culliñ mülelu tañi lelfün mu. Feimu raquiduamquefun ñi veterinariongeal. Tañi ñuque quimelelfi quiñe loncolelu ti trahunche mu chem tañi raquiduamquen. Fei piuqueyenquechi nütramcaeneu: “Epe puucülei ñi afal mapu müleyechi dungu” pieneu (2 Tim. 3:1). Fei ramtueneu: “Conülmi universidad mu, ¿quellupeafeimu mai tami doi hueniyeafiel ta Chau Jehová?”. Raquiduamcülehuen, fei amulayan pin.

 ¿Chumafun cai tripali liceo mu? ramtuuquefun. Fillque fin de semana tripaquefun tañi amuldungucheal, huelu müte ayüquelafun. Turpu precursorngerpulayan piquefun. Tañi chau ca tañi malle testigongelafuingu. Fei ayüquefuingu iñche ñi cüdahual quiñe fütra empresa Toronto huaria mu. Tañi malle niefui falin cüdau feitichi empresa mu, fei iñche llohun ti cüdau.

Tiye mu com antü cüdauquefun. Hualloñmaniequefeneu testigongenolu. Feimu nehue amuquelafun trahun ca amuldungun mu. Feichi mu mülequefun tañi lacu iñchiu, testigongelafui. Fei lalu, mülefui tañi huiñamtuhual.

Feiti peñi ca lamngen tañi yeeteu ti fütra trahun 1958 tripantu mu, Bob ca Marion pingelu engu, chau ca ñuque troquifiñ. Mangeleneu ñi müleal tañi ruca mu engu ca quellueneu ñi doi cüme hueniyeafiel Jehová. Fautizahun 1960 tripantu mu, quiñe tañi pu fotüm engu, John pingei. John precursorngetui, fei yafültucueneu ñi doi amuldungual. Pu peñi ngüneduamüñmaeneu ñi cüme cüdahun, feimu loncocünungen feiti Chillcatuhue ta Amuldungual Ngünechen ñi Dungu. a

Niehuiyu Randi Berger iñchiu 1966 tripantu mu. Precursorangefui ca ayühun mu amuldunguchequefui. Ayüquefui ñi amuldungual cheu ñi doi duamniengeel quellu. Ti huitran-ngepaquechi loncolelu yafültucueiñmu taiñ huiñamtuhual Orillia pingechi mapu mu, Ontario mu. Pepicafiyu com tañi nieel, fei tripayu.

Randi ayühun mu amuldunguchequefui. Feimu puulu Orillia mu, eluhun tañi precursorngeal ca tañi doi cüme quimeltuchefengeal. Quimeltulelfiñ pu che ti rüf dungu Biblia mu. Tüfa rume ayühulqueneu. Feitichi mapu mu quellufiyu quiñe huentru tañi domo engu ñi cüme elcünutual tañi mongen, fei serfifingu ta Chau Jehová. ¡Rume ayühun!

Amulu Toronto huaria mu, quimfiñ ti peñi Arnold MacNamara, quisu loncolefui Betel mu.  ¿Ayüpeafuimu mai tamu precursor especialngeal? pieneu. Raquiduamlan rume, fei feipifiñ: “Mai, felei tati. Huelu Quebec mapu mu no”. Pu Canadá che gringo dunguquelu illamcaquefi tati pu frances dunguquelu Quebec mu mülelu. Tüfa hueluraquiduameleneu. Feichi mu, pu che chaftuquefui ti gobierno, ayüquefui ñi quisu ngünehual Quebec mapu.

Peñi Arnold huiñoldungueneu: “Quebec mapu mu müten huercüngequei pu precursor especial”. Feimeu müten amuayu pifiñ. Quimniefun tañi domo ayülefui ñi amuldungual üye mu. Rupachi tripantu quimtucuyu taiñ fente cüme dulliel.

Quechu semana quimeltungeyu frances quehun, fei huercüngeyu Rimouski huaria mu, 540 kilometro alütripalei Montreal huaria mu. Ca huercüngei cangelu curehuen. Quiñe trahun meu, quimfalngefui tañi cüme dunguquenon frances. Mülefun ñi feipial cüpalechi fütra trahun müleai fentren “austriaco huitran”, huelu feipin müleai fentren “choique huitran”. ¡Ahuem fotrü!

Iñchiu ca ti cangelu curehuen müten mülequelafuyu ruca mu Rimouski huaria mu. Ti familia Huberdeau, epu ñahue nielu, arrendafi quiñe fütra ruca regle pieza nielu. Üye mu mülequefui feichi familia, iñchiu, ti cangelu curehuen ca meli lamngen fütangenolu. Fei engün rume amuldunguchequefuingün. Com quelluntucuquefuiñ ñi cullial ti arriendo. Lingarcülelu ti ruca ca ti pu orcon, feimu “la Casa Blanca” üitucungei. Quiñeque mu mari epu chengequefuiñ, ca quiñeque mu mari meli chengeiñ feitichi ruca mu. Iñche ca tañi domo precursor especialngefuyu, feimu com antü amuldunguquefuyu. Puquem meu hutrengefulu rume, compañngequefuyu tayu amuldungual, feimu rume mañumcüleyu.

Rume cüme yeuquefuyu feiti pu precursor iñchiñ. Quiñe familia reque felefuiñ. Müna cüme rupaquefuiñ inacütral mu ca elantücünuquefuiñ taiñ quiñentrür pepicayal iyael. Quiñe peñi mülelu fei mu entuquefui ül. Feimu fentren sabado pun meu ülcantuquefuiñ ca puruquefuiñ.

Fentrenque che Rimouski mapu mu ayüquefuingün ñi chillcatuafiel ti Biblia. Puulu quechu tripantu fentren che fautizahurpui, fei 35 amuldunguquelu mülerpui ti trahunche mu. Rume ayühun-ngei com tüfa.

Mülepun mu Quebec mapu mu, fentren dungu quimürpuiñ. Quellueiñmu taiñ doi cüme amuldungucheal, ngüneduamiyu chumngechi Chau Jehová quellueiñmu taiñ amuldungual ca eluqueiñmu com taiñ duamnieel. Cafei doi quimürpufiyiñ tati pu che frances dunguquelu, fei piuqueyefiyiñ tañi quehun ca tañi huimtun engün. Tüfa quellueiñmu taiñ piuqueyeafiel tati pu che ca tuhun nielu (2 Cor. 6:13).

Rupachi tripantu, Betel ramtueyumu: “¿Huiñamtuhuafuimu Tracadie huaria mu?”. Feiti huaria mülei Nueva Brunswick mu lafquen mapu püle. Ahuem piyu nga. Hue huirintucufiyu quiñe papel tayu arrendayafiel quiñe hue ruca. Ca iñche rangiñ antü cüdauquefun quiñe escuela mu. Cafei quiñeque che taiñ quimeltulelfiel Biblia hue eluhuingün ñi amuldungucheal ca petu deumangei quiñe hue Trahunhue Ruca. Quimlafuyu tayu chumal. Rume cüdaungefui tayu amutual.

Com antü afchi semana mu llellipuniefiyu ta Chau Jehová. Pemefiyu Tracadie huaria, fei quimtucuyu ñi trürngenon ta Rimouski huaria mu. Huelu raquiduamtucuyu Chau Jehová ayüniei  tayu müleal fei mu. Feimu femayu tayu huercüeteu piyu nga. Quellumuyu pifiyu ta Chau Jehová, fei quisu com cüme adcünui ñi cüme tripayal tayu dungu (Mal. 3:10). Tañi domo cüme hueniyefi ta Chau Jehová, quisutu duamuuquelai ca ayelcaqueeneu. Com tüfa yafültucueneu tañi huiñamtuhual.

Tracadie huaria mu mülefui ti peñi Robert Ross ca tañi domo Linda. Fei engu puhuingu üyeu tañi precursorngeal engu. Huelu choyüngelu tañi hunen fotüm, mülenagingün ti huaria meu. Feiti peñi müten loncolei üye meu. Cüdautumequefulu rume ñi dapingeal tañi pichiche engu, müna yafültucueyumu, cüme llouqueyumu ca fentecünuquelaingu tañi amuldungual ayühun mu.

Epu tripantu yenielu Tracadie huaria mu, mangelcünungeyu tayu conal quiñe hue cüdau mu: huitrañmayafiel fillque trahunche. Afmatulehueyu. Regle tripantu huitrañmafiyu trahunche gringo dunguquelu. Fei hula huercüngeyu ta Quebec tayu huitrañmayafiel pu frances dunguquelu. Cangelu huitran-ngepaquechi loncolelu, Léonce Crépeault pingelu, saquiquefeneu hueupin mu iñche. b Huelu ramtuquefeneu: “¿Chumafuimi ñi doi quellucheal tami hueupin?”. Tañi quellun meu feula tañi hueupin doi adümfalngei ca quelluchequei.

Ayühun mu loncontucuniefiñ ti fütra trahun “Taiñ feyentun Ngünechen meu hueuquei” pingei. Femngei 1978 tripantu Montreal huaria mu. Elfalcünungen ñi eluafiel iyael tati pu che. Feipingen ñi trahuluhual 80.000 che. Cacünungetui chumngechi taiñ cüdahual Fei mu mülei hueque maquina, hueque iyael taiñ pepicayafiel ca cambiangetui chumngechi taiñ deumayafiel. Niequefuiñ epu mari fütraque refrigerador ñi füshcüleal ta iyael, huelu quiñeque mu cüme füshcümquelafi. Quiñe antü faltalu ti fütra trahun meu, ti estadio mu femngei quiñe fütra partido. Feimu elungeiñ conpual rupan rangipun. Nielafuiñ tiempo ñi pepicayafiel com ñi duamniengeel. Mülefui taiñ üyümafiel ti horno petu tañi hunnon. Rume cansalefuiñ, huelu pu peñi, pu lamngen rume cüdahuingün, quimchengeingün ca ayelcachequefuingün. Falinque dungu quimeltueneu engün. Feichi cüdau quellueiñmu taiñ doi  quiñeucüleal. Petu hueniyeniefiñ engün. Quebec mapu mu 1940 ca 1960 tripantu püle, huesa caiñetungeiñ. Feimu rume falin-ngefui nieal tüfachi falin trahun üye mu.

Femngelu fütraque trahun Montreal huaria mu, quimün fentren cümeque dungu caquelu huitran-ngepaquechi loncolelu mu. David Splane, coneltulelu ti Troquiñ Adniechequelu, loncolefui quiñe fütra trahun meu üye mu. Cangelu fütra trahun meu iñche coneltun feichi falin cüdau mu, fei David rume quellueneu.

Tañi domo iñchiu 36 tripantu mu huitrañmafiyu fillque trahunche. Huelu 2011 tripantu mu, elfalcünungen ñi quimeltucheal ti Escuela ñi Pepicangeam pu Loncolelu Trahunche mu. Epu tripantu meu müten, tañi domo iñchiu rupayu 75 cahuitu mu. Rume cüdaungefui, huelu falintufiyu. Dehun mu ti escuela, pu loncolelu mañumcülequeingün. Quimnieingün ti Troquiñ Adniechequelu ayüniei ñi cüme hueniyeafiel engün ta Chau Jehová.

Fei hula elfalcünungen ñi quimeltucheal ti Escuela ñi Pepicangeam pu Amuldunguquelu Ngünechen ñi Gobierno. Fentren cüdau niei ñi pu chillcatuquelu. Fill antü müleingün regle hora clase mu, cüla hora femqueingün tañi tarea ca fillque semana mülei ñi pepicayafiel meli cam quechu hueupin. Feimu rume ürcüqueingün. Femnoalu troquiuqueingün. Iñche ca ti cangelu quimeltuchefe feipiquefiyu: “Chau Jehová ñi quellun mu müten femaimün”. Pu chillcatuquelu recüluulu Chau Jehová mu, femquefuingün fillque dungu tañi raquiduamnon rume. Turpu ngoimalayan fente ñi afmatulehuen engün.

Tañi ñuque piuqueyechequefui, femngechi quellufi tati pu chillcatuquelu Biblia ñi serfiafiel ta Chau Jehová ca quellufi tañi chau ñi doi falintuafiel ti rüf dungu. Cüla antü rupalu ñi lan tañi ñuque, tañi chau amui trahunhue ruca mu ñi allcütual ti hueupin. Afmatulehuei. Feichi mu, fentecünulai tañi trahuluuquen 26 tripantu meu. Fautizaulai, huelu pu loncolelu feipieneu tañi chau hunelu acuquefui ti Trahunhue Ruca meu.

Iñche ca tañi cüla lamngen inayentuquefiyiñ taiñ ñuque. Tañi cüla lamngen ca tañi pu füta serfiquefingün ta Jehová. Epu tañi pu lamngen cüdaumequei Betel mu, quiñe Portugal mu, cangelu Haití mu.

Tañi domo iñchiu precursor especialngeyu Hamilton huaria mu, Ontario mapu meu. Huitrañmafilu iñchiu fillque trahunche, compañquefuyu pu peñi, pu lamngen ñi huiñopemetuafiel ca ñi chillcatulafiel tati Biblia tati pu che. Rume ayüquefuyu. Huelu feula rume ayüucüleyu, iñchiñ llemai chillcatulelquefiyiñ Biblia tati pu che ca quelluquefiyiñ ñi serfiafiel Jehová. Cafei doi cüme quimquefiyu pu peñi, pu lamngen trahunche meu ca ngüneduamquefiyu chumngechi Chau Jehová quelluquefi engün chem rupale rume.

Tañi domo iñchiu raquiduamqueyu fentren che tayu piuqueyeteu, feimu rume mañumcüleyu. Iñchiu ca yafüluhuiyu tayu piuqueyecheal. Feimu yafültucuquefiyiñ ta caquelu ñi doi serfiafiel ta Chau Jehová (2 Cor. 7:6, 7). Quimfiyu quiñe familia. Ti ñuque, ti fotüm ca ti ñahue precursorngeingün. Fei ramtufiñ ti chau: “Eimi cai, ¿precursorngeafuimi?”. “Deu quelluntucuniefiñ cüla precursor” pieneu. Fei ramtufiñ: “¿Chau Jehová doi cüme cuidapelayafi am tami pu che?”. Yafültucufiñ ñi precursorngeal tañi pu che reque. Fei cayu cüyen rupalu, precursorngerpui.

Tañi domo iñchiu nütramcanieafiyu pu huecheque che Chau Jehová ñi afmatufalchi dungu meu. Ayüleyu pu huechequeche ñi serfiafiel ta Chau Jehová ayühun mu, chumngechi femqueyu iñchiu (Sal. 71:17, 18).