1, 2. ¿Chem epu dungu mülei taiñ femal? (1 Corintios 15:58).

 TOKIO huaria Japón mapu mu deumangei quiñe edificio alüpüralu 1978 tripantu mu. Fentren che pefiel mu ñi fente alüpüralen tüfachi edificio, ¿aguantapeafui mai cüparumele quiñe fütra nüyün? ramtuuquefuingün. Huelu feitachi edificio turpu tranapuulai, ¿chumngelu? Feitachi edificio am cüme deumangelu tunte nengümcaufule rume, tranapuulayafui. Iñchiñ taiñ cristianongen feitachi edificio reque feleiñ. ¿Chumngelu feipiqueiñ?

² Feitachi edificio reque, iñchiñ nehuencüleiñ taiñ inayafiel Jehová ñi huercün dungu (papeltunge 1 Corintios 15:58). Eluhuaiñ taiñ femal Chau Dios tañi feipiel ca turpu famentulayafiyiñ. Huelu quiñeque mu duamfalngele, mülei taiñ ngünefalngeal (Sant. 3:17). Feimu nehuencüleaiñ taiñ inayal Jehová ñi feipin ca ngünefalngeaiñ. Femngechi falintuafiyiñ Jehová ñi feipin ca dicümtuculayafiyiñ caquelu pu che ñi raquiduamal iñchiñ reque. Tüfachi troquiñ mu peaiñ chem dungu mu mülei taiñ nehuentuleal. Ca peaiñ quechu dungu ñi femquen ta Huecüfü taiñ huelulcayaeteu, ca chem femafuiñ taiñ cüme tripayal.

3. ¿Chem huercün dungu elueiñmu Jehová Hechos 15:28, 29 mu?

³ Jehová müten mülei taiñ feipiaeteu taiñ chumal, ca tañi huercün dungu adümfalngei (Is. 33:22). Por ejemplo, hunen siglo mu ti cuerpo gobernante feipi cüla dungu ñi femal pu cristiano: 1) mülei ñi poyenoafiel coilaque dios ñi adentun ca ñi poyeafiel Jehová müten, 2) ñi yamnieafiel ti mollfüñ, ca 3) ñi connoal engün pod cudumuhun mu (papeltunge Hechos 15:28, 29). ¿Chumngechi  iñchiñ taiñ cristianongen feyentuafuiñ tüfachi cüla huercün dungu?

4. ¿Chumngechi am pengelqueiñ taiñ poyequefiel Jehová müten? (Apocalipsis 4:11).

⁴ Famentuquefiyiñ coilaque dios ñi adentun ca poyequefiyiñ Jehová müten. Jehová huercüfi pu Israel che ñi poyengeal quisu müten (Deut. 5:6-10). Huecüfü cüpa ngünencafilu ta Jesús, feipieyu Jehová müten tañi poyengeal (Mat. 4:8-10). Feimu poyequelafiyiñ coilaque adentun. Ca dios reque troquiquelafiyiñ caquelu pu che: loncolechi religioso, pu politico, pu deportista, pu actor ca pu musico. Jehová müten inaquefiyiñ ca poyequefiyiñ, quisu am deumafilu com tati mülelu (papeltunge Apocalipsis 4:11).

5. ¿Chumngelu am yamquefiyiñ ti mollfüñ ca tati mongen?

⁵ Iñchiñ yamquefiyiñ tati mollfüñ ca tati mongen. Ti mollfüñ adentulei ta mongen Jehová taiñ elueteu (Lev. 17:14). Jehová elufilu ti pu che ñi iyafiel ti ilo, feipifi ñi inoafiel tañi mollfüñ (Gén. 9:4). Ca femngechi feipi Moisés tañi ley mu (Lev. 17:10). Ca hunen siglo mu, ti cuerpo gobernante feipifi pu cristiano ñi famentuafiel ti mollfüñ (Hech. 15:28, 29). Iñchiñ inaquefiyiñ tüfachi huercün dungu, femngechi taiñ cüme dullial chem tratamiento taiñ lahuentuhual. b

6. ¿Chumaiñ taiñ connoal pod cudumuhun mu?

⁶ Eluuqueiñ taiñ connoal pod cudumuhun mu (Heb. 13:4). Ti apostol Pablo feipieiñmu: “Com quiñepülecünuafimün tamün cuerpo ñi illutuel”. Feimu nehuencüleaiñ taiñ famentuafiel huesaque raquiduam. Ca adquintuquelaiñ ca femquelaiñ chem huesa dungu no rume, femngechi taiñ connoal pod cudumuhun mu (Col. 3:5; Job 31:1). Feimu conpan mu huesaque raquiduam taiñ lonco mu, pürüm famentufemafiyiñ ca femlayaiñ chem no rume tañi püntünentuaeteu Jehová mu.

7. ¿Chem eluhuaiñ taiñ femal ca chumngelu femaiñ?

⁷ Jehová ayüquei taiñ ‘com piuque mu feyentuleal’ (Rom. 6:17). Com taiñ feipieteu Jehová cümelcaqueiñmu ca tañi ley dungu cambiangequelai (Is. 48:17, 18; 1 Cor. 6:9, 10). Eluuqueiñ taiñ ayühuelafiel ta Jehová ca ti salmista reque feipiqueiñ: “Eluucülen tañi rumel feyentuafiel tami ngülam, fente puule hula ñi mongen” (Sal. 119:112). Huelu Huecüfü ayülei taiñ huelulcayaeteu. ¿Chumngechi am ta femquei? Peafiyiñ.

8. ¿Chem mu inacaqueiñmu Huecüfü?

⁸ Inacangequeiñ. Huecüfü ayülei taiñ huesalcayaeteu ca taiñ huesa duamelaeteu, femngechi taiñ nehuencülehuenoal. Fei quintuyahulquei taiñ püntünentuaeteu Jehová mu (1 Ped. 5:8). Hunen siglo mu, pu cristiano tañi feyentuniefiel mu Jehová, aneltungeingün, hulelcangeingün ca langümngeingün cütu (Hech. 5:27, 28, 40; 7:54-60). Ca femngechi Huecüfü inacaqueiñmu fachantü. Taiñ pu peñi ca pu lamngen Rusia mapu mu ca caquelu pais mu rume huesalcangequeingün. Ca fill püle pu testigo caquerumei chumngechi tañi caiñetungequen.

9. ¿Chumngelu mülei taiñ cuñiutucuhual Huecüfü ñi ngünencan mu? Feipinge ñi rupan Roberto.

⁹ Cüpa ngünencaqueiñmu. Quiñeque mu Huecüfü caiñetuquelaeiñmu, huelu ayüquei taiñ huelulcayaeteu taiñ ngüneduamnon mu rume (Efes. 6:11). Peafiyiñ ñi  rupan taiñ peñi Roberto. Pitalconcülelu, feipingei tañi operangeal. Fei quisu feipifi tati pu doctor ñi tuculelngenoal mollfüñ. Ti doctor feipieyu tañi tuculelngenoal ta mollfüñ. Feichi pun petu ñi operangenon Roberto, amutulu tañi familia pemeyu cangelu doctor. Feiti doctor cafei feipieyu ñi tuculelngenoal mollfüñ, huelu pepicangeaiñ pichin mollfüñ chem dungu rume rupafule pingei Roberto. Ti doctor raquiduampelafui quisulele Roberto, cacünutuafui chi ñi raquiduam. Huelu Roberto nehuencünuhui, chem dungu rume rupafule tuculelngelayan mollfüñ pi.

10. ¿Chemu am cuñihun-ngei ñi raquiduamquen pu serfiquenofilu Jehová? (1 Corintios 3:19, 20).

¹⁰ Ñi raquiduamquen pu poyequenofilu Jehová. Raquiduamliyiñ fei engün reque, püntütripayafuiñ Jehová mu ca inahuelayafuiñ tañi huercün dungu (papeltunge 1 Corintios 3:19, 20). Pu che inaquefilu tüfachi “mapu mülechi quimün” feyentuquelafi Chau Dios ñi feipin. Peafiyiñ ñi rupan cuifi mu Pérgamo ca Tiatira trahunche mu. Feichi mu pu che conquefui pod cudumuhun mu ca poyequefuingün coilaque dios, fei quiñeque cristiano inayenturpueyu engün. Feimu Jesús nehuentu ngülamtueyu engün tañi famentunofiel mu ti pod cudumuhun (Apoc. 2:14, 20). Famülque mu, pu che poyequenofilu Jehová huelulcayafeiñmu tañi raquiduamürpual fei engün reque. Quiñeque mu taiñ familia cam caquelu che feipiafeiñmu taiñ inayal quisu taiñ ayüqueel ca taiñ inanoafiel Jehová ñi huercün dungu. Feipiafeiñmu taiñ conal müten pod cudumuhun mu, huesa dungu no piafeiñmu ca ñi feipin Biblia serfihuelai fachantü, cuifi am huirintucungelu piafui chi.

11. ¿Chem ngelai taiñ femal?

¹¹ Quiñeque mu raquiduamafuiñ Jehová com feipilaeiñmu taiñ chumal. Feimu doi amulcünuafuiñ taiñ huercüeteu Jehová, huelu tüfa cümelai (1 Cor. 4:6). Femngechi femingün pu loncolechi religioso Jesús ñi antü mu. Mülelu rume Moisés ñi ley, fei engün doi ley tucuquefuingün, feimu pu che cüdautuquefui tañi inayafiel (Mat. 23:4). Biblia mu ca tañi troquiñche mu Jehová eluqueiñmu huercün dungu, doi amulcünulayafiyiñ taiñ huercüqueteu Jehová (Prov. 3:5-7). Feimu llemai, doi amulcünulayafiyiñ tañi feipin Biblia ca feipilayafiyiñ ñi chumal pu peñi ca lamngen tripanole Biblia mu.

12. Huecüfü, ¿chumngechi ngünencaqueiñmu?

¹² Coilaque raquiduam. Huecüfü ngünencaquefi ti pu che “coilaque raquiduam” mu cafei ti “mapu müleyechi dungu mu”, femngechi ñi quiñeucülenoal ta pu che (Col. 2:8). Hunen siglo mu, inangequefui che ñi quimün ca inangequefui pu judio ñi quimeltun cüpanolu Chau Dios ñi Dungu mu. Cafei feipingequefui pu cristiano ñi inayafiel Moisés tañi ley. Com tüfa coilaque raquiduamfel, pu che inaquelu tüfachi raquiduam allcütuquelafuingün ti rüfngechi quimün cüpalu Jehová mu. Fachantü ca femngechi femquei Huecüfü. Television mu, radio ca internet mu feipifeipingequei coilaque raquiduam cüpalu pu politico mu. Aculu ti pandemia COVID-19, fentren coilaque dungu ta feipingequefui. c Pu che allcütuquefilu tüfachi dungu huesa duamcülequefuingün, huelu pu testigo allcütuquefilu ñi chem pin Jehová ñi troquiñche tüngcülequefuingün (Mat. 24:45).

13. ¿Chumngelu cuñiutucuhuaiñ taiñ huelulcanoaeteu Huecüfü?

 ¹³ Huecüfü cüpa hueluraquiduamelqueiñmu. Eluucüleaiñ taiñ femal “tati doi falin-ngelu” (Filip. 1:9, 10). Huelulcaeliyiñmu Huecüfü, nielayaiñ tiempo ca nehuen taiñ femal doi falinque dungu. Doi falintufiliyiñ taiñ cüdau, taiñ iyal, putual cam taiñ cüme rupaleal, huelulcahuafuiñ (Luc. 21:34, 35). Fachantü allcütuqueiñ müten tati protesta cam ñi feipin pu politico, eluulayaiñ feitachi dungu taiñ huelulcayaeteu. Cuñiutucuunoliyiñ, tüfachi dungu conafui taiñ piuque mu ca taiñ raquiduam mu. Deu peiñ quechu dungu ñi femquen ta Huecüfü, femngechi taiñ feyentunoafiel Jehová. Huelu, ¿chumafuiñ taiñ nehuentuleal ca taiñ chaftuafiel Huecüfü? Peafiyiñ.

14. ¿Chem quelluaiñmu taiñ püntütripanoal Jehová mu?

¹⁴ Raquiduamafuiñ chumngelu hultucuiñ taiñ mongen Jehová mu ca fautizahuiyiñ. Femiyiñ taiñ quelluntucuafiel ta Jehová. Raquiduamnge chumngelu quimimi tami mülen ti rüf dungu mu. Cüme quimürpufimi ta Jehová, yamnierpufimi ca piuqueyerpufimi. Cafei doi feyentufimi ta Jehová ca repentiuhuimi tami culpan mu. Famentufimi com tañi üdequeel ta Jehová. Femimi Jehová tañi ayüqueel. Doi cüme duamtuimi perdonaeteu ta Jehová ta eimi (Sal. 32:1, 2). Ca eluhuimi tami amual trahun mu ca tami amuldungual. Hulcünulu eimi tami mongen Jehová mu ca fautizaulu eimi, feimu conimi ti cüme rüpü mu, turpu elcünulayafimi (Mat. 7:13, 14).

15. Papeltufiliyiñ Biblia ca raquiduamliyiñ tañi feipin mu, ¿chumngechi quelluafeiñmu?

¹⁵ Papeltuafiyiñ Jehová tañi Dungu ca raquiduamaiñ taiñ papeltuel mu. Quiñe anümca mülei ñi alüconal tañi folil tañi nehuencüleal. Ca femngechi iñchiñ cüme feyentuleliyiñ Jehová mu, nehuencüleaiñ. Tremün mu quiñe anümca, doi foliluucülequei. Papeltuliyiñ Biblia ca raquiduamliyiñ taiñ papeltuel mu, doi maneluhuaiñ Jehová mu ca tañi huercün  dungu mu (Col. 2:6, 7). Raquiduamaiñ cuifique che poyequefilu Jehová ca inaquefilu tañi huercün dungu. Tañi femün mu engün, rume quellueyu engün. Peafiyiñ ñi femün Ezequiel. Quiñe vision mu, Ezequiel leliniefi quiñe cüme püllü chumngechi ñi medifiel ti templo. Tañi peel ta Ezequiel müna yafültucueyu. ¿Iñchiñ cai? ¿Chumngechi quelluafeiñmu? Estudiafiliyiñ, quimeltuafeiñmu taiñ inayafiel ñi feipin ta Jehová chumngechi tañi poyengeal (Ezeq. 40:1-4; 43:10-12). d Iñchiñ inaduamfiliyiñ cüdaungechi dungu tañi feipin Biblia ca raquiduamliyiñ tüfa mu, rume quelluaiñmu.

16. ¿Chumngechi quellueyu Roberto nehuencünulu ñi piuque? (Salmo 112:7).

¹⁶ Nehuencülepe taiñ piuque. Quiñe ülcantun mu David feipifi ta Jehová: “Nehuencülei ñi piuque, ahuem Chau Dios” (Sal. 57:7). Femngechi pengeli tañi rumel piuqueyenieafiel ta Jehová. David reque, iñchiñ ca nehuencünuhuafuiñ taiñ piuque taiñ maneluhual Jehová mu (papeltunge Salmo 112:7). Taiñ peel parrafo 9 mu, taiñ peñi Roberto ca nehuencünufui tañi piuque. Duamfalngefule müten tuculeluhuayiñ ta mollfüñ pingei taiñ peñi. ¿Chem pi ta quisu? Eluulayan tañi tuculelngeal ta mollfüñ, femülmün pürüm amutuan pi. Rupalu tüfachi dungu, taiñ peñi Roberto feipi: “Cüme quimniefun tañi chumal, raquiduamlafun rume chem tañi rupayafel”.

17. ¿Chem quimeltueiñmu ñi femün ta Roberto? (Ca inaduamnge ti adentun).

¹⁷ Roberto, ¿pitalconcülelu müten nehuencünuhui ñi piuque? Femlai. Petu ñi pitalconcülenon, deu nehuencünufui ñi piuque. ¿Chumi? Hunelu mu, ayüfui tañi ayühuelafiel ta Jehová com dungu mu. Epu, papeltui ta Biblia ca quintui quiñeque publicacion nütramcalu ñi yamfalngen ti mollfüñ ca ti mongen. Ca quisu quimniefui inafile Jehová tañi huercüeteu, quisu cümelcayaeyu. Roberto reque, iñchiñ ca nehuencüleafui taiñ piuque, femngechi chaftuafuiñ chem huesaque dungu rume.

18. ¿Chem quimeltueiñmu tañi rupan ta Barac? (Inaduamnge ti adentun hunen pagina mu).

 ¹⁸ Maneluhuaiñ Jehová mu. Peafiyiñ ñi femün ti Juez Barac ca chumngechi ñi inafiel tañi huercüeteu ta Jehová. Feichi mu pu Israel che pepicaucülelafuingün tañi hueichayal engün, chem hueichahue rume nielafuingün tañi quehuayal. Femfulu rume, Jehová feipifi ta Barac tañi hueichameafiel pu Canaán che. Tüfa ta Sísara ca tañi ejercito. Quisu engün queta pepicaucülefuingün, niefuingün fentren arma (Juec. 5:8). Barac ca tañi pu hueichafe mülefuingün ti huincul Tabor pingelu, fei ti profetisa Débora feipifi ta Barac ñi nagpayal huincul mu, fei laf mapu mu ñi quehuayafiel ta Sísara ca tañi 900 carro. Feitachi laf mapu mu tati pu nielu carro cüdautulayafuingün tañi huehuafiel pu Israel che. Femfulu rume, Barac inafi tañi huercüeteu ta Jehová. Fei, ¿chem rupai? Petu nagcülelu huincul mu engün, Jehová quiñe fütra mahun cüpali. Fente tañi mahunün, re fotralehuetui. Feimu pu Canaán che ñi carro pepi nengümulafuingün ti fotra mu. Femngechi Jehová quellufi ta Barac ñi huehual (Juec. 4:1-7, 10, 13-16). Famülque mu, iñchiñ ca femngechi maneluhuaiñ Jehová mu ca inayafiyiñ taiñ huercüeteu tañi troquiñche mu, femngechi quelluaiñmu taiñ hueutripayal reque (Deut. 31:6).

19. Eimi, ¿chumngelu am ayüqueimi tami nehuencüleal?

¹⁹ Famülque mu, rumel mülei taiñ nehuencüleal (1 Tim. 6:11, 12; 2 Ped. 3:17). Nehuencüleaiñ inacangeliyiñ ca cüpa ngünencaeliyiñmu Huecüfü. Conquilpe taiñ lonco mu ñi raquiduamquen pu poyequenofilu Jehová ca ti coilaque raquiduam. Ca eluulayaiñ Huecüfü taiñ hueluraquiduamelaeteu (Efes. 4:14). Eluucüleaiñ taiñ piuque mu taiñ piuqueyenieafiel Jehová ca taiñ inayafiel ñi huercün dungu. Huelu quiñeque mu mülei taiñ ngünefalngeal, femngechi ñi cacünutual taiñ raquiduam, ¿chumngechi am tüfa? Cangelu troquiñ mu peafiyiñ. Ca peafiyiñ ñi chumquen ta Jehová ca Jesús tüfachi dungu mu.