TROQUIÑ ÑI CHILLCATUNGEAL 29
ÜLCANTUN 121 Duamnieiñ taiñ ngüneniehual
Cuñiutucuhuaiñ taiñ connoal culpan mu
“Trepeluucülemün ca llellipulemün tamün famconnoal culpan mu” (MAT. 26:41).
¿CHEM QUIMAIÑ?
Com taiñ nehuen mu eluucüleaiñ taiñ culpanoal, ca famentuafiyiñ com taiñ yeafeteu taiñ culpayal.
1, 2. 1) ¿Chem feipifi Jesús tañi pu discipulo? 2) ¿Chumngelu am pu discipulo quisucünufingün ta Jesús? (Ca inaduamnge ti adentun).
JESÚS feipi: “Quiñe huentru tunte ayüfule rume ñi femal chem dungu rume, tañi cuerpo nehuen-ngelayafui” (Mat. 26:41b). Jesús cüme quimniefui taiñ culpan chengen, feimu feipieiñmu taiñ quisutu maneluucülenoal iñchiñ mu. Feichi pun ñi feipiel Jesús, tañi pu discipulo feipicünueyu tañi turpu quisucünunoaeteu (Mat. 26:35). Fei engün rüf piuque mu feipifingün ta Jesús, huelu raquiduamlaingün ruparumele huesaque dungu, cüdautuafuingün tañi cüme femal. Feimu Jesús feipieyu: “Trepeluucülemün ca llellipulemün tamün famconnoal culpan mu” (Mat. 26:41a).
2 Huelu pu discipulo inalafingün ñi feipieteu Jesús. Feimu, ¿chumingün presuntucungelu Jesús? Cuñiutucuucülenolu engün am, huesa femingün. Femlaingün tañi feipicünuel engün, feimu quisucünufingün ta Jesús (Mat. 26:56).
Jesús feipifi tañi pu discipulo ñi trepeluucüleal ca cuñiutucuhual, femngechi ñi connoal culpan mu. Huelu fei engün quisucünueyu. (Inaduamnge parrafo 1, 2).
3. 1) ¿Chumngelu maneluucülelayaiñ iñchiñ mu taiñ püntütripanoal Jehová mu? 2) ¿Chem peaiñ feitachi troquiñ mu?
3 Iñchiñ quisutu maneluulayaiñ. Com iñchiñ eluucüleiñ taiñ femnoal chem dungu rume taiñ püntünentunoaeteu Jehová mu, huelu quimnieiñ taiñ culpafe chengen ca femürpuafuiñ huesaque dungu pinofuliyiñ rume (Rom. 5:12; 7:21-23). Conrumeafuiñ huesaque dungu mu, feimu mülei taiñ inayafiel Jesús tañi ngülam: rumel trepeluucüleaiñ taiñ püntütripanoal Jehová ca Jesús mu. Tüfachi troquiñ müna quelluaiñmu. Hune, ngüneduamaiñ chem dungu mu taiñ cuñiutucuucüleal. Epu, chumngechi cuñiutucuhuaiñ taiñ connoal culpan mu. Ca cüla, chumaiñ taiñ rumel trepeluucüleal.
¿CHEM DUNGU MU DOI CUÑIUTUCUHUAIÑ?
4, 5. ¿Chumngelu cuñiutucuhuaiñ taiñ culpanoal pichiquen dungu mu rume?
4 Pichi culpafuliyiñ rume, fütra culpafuliyiñ rume, püntünentuafeiñmu Jehová mu. Pichi culpafuliyiñ rume, yeafeiñmu taiñ femal doi huesaque dungu.
5 Caquerumechi dungu chaftuquefiyiñ taiñ culpanoal, huelu quiñeque dungu doi cüdautuafuiñ. Quiñeque peñi, lamngen, doi cüdautuafui tañi fütra culpanoal. Por ejemplo, ñi connoal pod cudumuhun mu. Ca quiñeque cüdautuafui ñi connoal huesaque huimtun mu, penoal podngechi dungu ca tañi quisutu malütuumequenoal. Ca quiñeque cüdautuafui ñi illcufemnoal, mallma piuquengenoal. Ca cüdautuafui ñi femal cüme dungu tañi llicaniefiel mu pu che. Rüfngei Santiago ñi feipin: “Caque quiñeque che ngüchaltucuqueyu quisu tañi illutuqueel” (Sant. 1:14).
6. ¿Chem mülei taiñ quimtucual?
6 ¿Chem dungu doi cüdautuqueimi tami chaftuafiel? Cümeafui tami ngüneduamuhual. Feipilayaimi: “Iñche nehuencülen, chem huesa dungu rume famentuafiñ”. Femngechi raquiduamliyiñ, cuñihun-ngeafui (1 Juan 1:8). Pablo feipi pu peñi ‘eluucülelu ñi adnieaeteu Chau Ngünechen ñi nehuen’ ca mülefui ñi trepeluucüleal, femngechi ñi connoal huesaque dungu mu (Gál. 6:1). Feimu llemai, quisutu ngünencaulayaiñ. Quimtucuaiñ quiñeque dungu doi cüdautuafuiñ ñi chaftuafiel (2 Cor. 13:5).
7. ¿Chem dungu mu doi cuñiutucuhuaiñ? Feipinge quiñe ejemplo.
7 Quimliyiñ chem dungu doi cüdautuqueiñ, ¿chumaiñ? Nehuentuleaiñ taiñ chaftuafiel. Raquiduamnge tüfa mu: cuifi mu tati huaria hualloñmaniequefeyu quiñe fütra malal. Huelu ti puerta doi cuñiutucufalfui, feimu mülefui quiñeque huentru llihuatulequelu ñi cuñiutucuafiel ti huaria. Ca femngechi iñchiñ mülei taiñ llihuatuleal, femngechi taiñ cüme chaftuafiel taiñ cüdautuqueelchi dungu (1 Cor. 9:27).
¿CHUMNGECHI CUÑIUTUCUHUAIÑ TAIÑ CONNOAL CULPAN MU?
8, 9. ¿Chem mülefui ñi femal ti hueche ñi fütra culpanoal? (Proverbios 7:8, 9, 13, 14, 21).
8 ¿Chumngechi cuñiutucuhuafuiñ? Peaiñ ñi feipin Proverbios capitulo 7. Tüfa nütramcai quiñe hueche, coni pod cudumuhun mu. Versiculo 22 feipi ti hueche “amurumei” cheu ñi mülen quiñe domo. Rupachi versiculo mu, pengeli feitachi hueche confemlai pod cudumuhun mu. Tañi femün, ñochiquechi yeeyu ñi fütra culpayal.
9 ¿Chem dungu femi ti hueche ñi conal pod cudumuhun mu? Hunelu, pun meu “miyahurquefui feichi rüpü meu inafülcülelu tüfachi domo meu”, fei amui ti domo ñi ruca mu (papeltunge Proverbios 7:8, 9). Pefilu ti domo, püntünentuulai, eluhui tañi truruaeteu (trepetuaeteu) ca tañi nütramcayaeteu. Ti domo feipifi ti hueche ñi hulmepen chalintucun Jehová mu, femngechi ¿ayüpelafui ñi pengelelafiel ñi cüme domongen? (papeltunge Proverbios 7:13, 14, 21). Ti hueche femnofule com tüfachi dungu, fütra culpalayafui.
10. Quiñe peñi, quiñe lamngen, ¿chumngechi am fütra culpayafui?
10 Chem peñi, chem lamngen rume rupayafui femngechi dungu mu. Quiñe che fütra culpale, fei inaduamlan rume chumngechi ñi rupan piafui. Huelu, ¿rüfngepei mai? Femlai. Mülei ñi ngüneduamal chem yeeyu ñi fütra culpayal. Niefui chi huesaque hueni, cüme rupafui huesaque dungu mu, pequefui internet mu huesaque dungu, ca amufui chi cheu ñi amunoafel pu cristiano. Cafei llellipuhuelai chi, papeltuhuelai ta Biblia, amuhuelai trahun mu cam amuldunguhuelai. Chumngechi ñi rupan ti hueche Proverbios mu, com tañi femün yeeyu ñi fütra culpayal.
11. Ayünoliyiñ taiñ culpayal, ¿chumafuiñ?
11 ¿Chem quimeltueiñmu tüfa? Eluucüleaiñ taiñ femnoal huesaque dungu. Fei ca müten no, ca femlayaiñ chem dungu rume taiñ yeafeteu ñi culpayal. Feita quimfalcünui Salomón nütramcalu ti hueche ca ti huesa domo. Salomón feipi ti domo mu: “Ñihuiyauquilnge quisu ñi rüpü mu” (Prov. 7:25). Ca feipi: “Camapu püntünentuucüleaimi feichi domo mu ca fülconquilnge tañi conhue ruca meu” (Prov. 5:3, 8). Feimu taiñ culpanoal, ¿chumaiñ? Püntütripayaiñ chem dungu mu rume taiñ yeafeteu taiñ huesa femal. a Huesa dungungenofule rume, huelu ngüneduamliyiñ taiñ yeafeteu ñi culpayal, famentuafiyiñ (Mat. 5:29, 30).
12. ¿Chem feipicünuhui Job? Ca, ¿chumngechi quellueyu ñi cuñiutucuhual? (Job 31:1).
12 Taiñ culpanoal, eluucüleaiñ taiñ cuñiutucuhual Job reque. Quisu ‘eldungucünui tañi nge engu’, femngechi ñi illutunoafiel ca domo (papeltunge Job 31:1). Job femle tañi feipicünuel, conlayafui pod cudumuhun mu. Iñchiñ ca femafuiñ, eluhuaiñ chem no rume taiñ yenoaeteu ñi fütra culpayal.
13. ¿Chumngelu cuñiutucuhuaiñ chem taiñ raquiduamqueel? (Ca inaduamnge ti adentun).
13 Ca cuñiutucuhuaiñ chem taiñ raquiduamqueel mu (Éx. 20:17). Quiñe che feipiafui: “Iñche raquiduamquen müten ñi femal huesaque dungu, huelu femquelan, feita huesa dungu no fel” piafui. ¿Rüfngepei mai? Femlai. Doi raquiduamiyiñ taiñ femal huesaque dungu, doi ayüaiñ taiñ femal. Femfuliyiñ, doi cüdautuafuiñ taiñ femnoal huesaque dungu. Quiñeque mu, huesaque raquiduam conrumepayafui taiñ lonco mu, huelu pürüm famentuafiyiñ. Fei re cümeque raquiduam tucuaiñ taiñ lonco mu. Feimu, famentuafiyiñ huesaque raquiduam, femngechi taiñ huesa illurpunoal ca taiñ fütra culpanoal (Filip. 4:8; Col. 3:2; Sant. 1:13-15).
Famentuafiyiñ com taiñ yeafeteu taiñ culpayal. (Inaduamnge parrafo 13).
14. ¿Ca chem quelluafeiñmu taiñ culpanoal?
14 ¿Ca chem quelluafeiñmu taiñ culpanoal? Piuquentucuaiñ tüfa, taiñ feyentufiel Jehová rume cümelcaqueiñmu. Jehová ayüquei taiñ nieal cüme raquiduam ca ayürpuafiel cümeque dungu. Quiñeque mu cüdautuafuiñ taiñ femal, huelu chaftufiliyiñ, rüf ayüucüleaiñ.
15. Ayürpuliyiñ ñi femal cüme dungu, ¿chumngechi quelluafeiñmu taiñ culpanoal?
15 Rume falin-ngei ayürpuafiel cümeque dungu taiñ piuque mu. Eluuliyiñ taiñ ‘üdeafiel ti huesa dungu ca piuqueyeafiel ti cüme dungu’, doi eluhuaiñ taiñ femal cümeque dungu ca famentuafiyiñ chem dungu rume taiñ yeafeteu ñi fütra culpayal (Amós 5:15). Ca nehuencüleaiñ taiñ culpaconnoal ruparumefule chem huesa dungu rume.
16. Fill dungu femliyiñ taiñ serfiafiel Jehová, ¿chumngechi quelluafeiñmu? (Ca inaduamnge ti adentun).
16 ¿Chem femafuiñ taiñ ayürpuafiel cümeque dungu? Fillque dungu femaiñ taiñ doi piuqueyeafiel ta Jehová. Amuliyiñ trahun mu ca amuldunguliyiñ, doi eluucüleaiñ taiñ ayühuelafiel Jehová. Fei mu chaftuquelafiyiñ huesaque dungu yeafeteu taiñ culpayal (Mat. 28:19, 20; Heb. 10:24, 25). Papeltuliyiñ Biblia ca raquiduamliyiñ, doi piuqueyeafiyiñ cümeque dungu ca üdeafiyiñ huesaque dungu (Jos. 1:8; Sal. 1:2, 3; 119:97, 101). Ca inayafiyiñ Jesús ñi ngülam: “Llellipulemün tamün famconnoal culpan mu” (Mat. 26:41). Llellipufiel mu ta Jehová, quisu quelluqueiñmu. Ca femngechi doi eluucüleiñ taiñ ayühuelafiel (Sant. 4:8).
Fill dungu femmequeliyiñ taiñ poyeafiel Jehová, quelluaiñmu taiñ culpanoal. (Inaduamnge parrafo 16). b
AMULEPE TAIÑ CUÑIUTUCUUCÜLEAL
17. ¿Chem dungu cüdautuquefui Pedro?
17 Quiñeque dungu ngüneuqueiñ taiñ femnoal, huelu caquelu dungu cüdautuqueiñ taiñ ngünehual. Femngechi rupai apostol Pedro. ¿Chem dungu cüdautui Pedro? Fei llicaquefui pu che chem tañi feipiaeteu. Feimu cüla rupa quimlafiñ ta Jesús pi (Mat. 26:69-75). Rupachi antü mu, Pedro llicanon mu amuldungulelfi pu juez Sanedrín mu. Feimu, ¿llicahuelai piafuiñ? Femlai (Hech. 5:27-29). Quiñeque tripantu rupalu, tañi llicafiel mu pu circuncidalelu Pedro püntühui pu cristiano judiongenolu (Gál. 2:11, 12). Pedro ca huiño huelulcahui, ngüneulai. ¿Rumel niequepelafui feichi raquiduam tañi piuque mu? Feimu cüdautuquefui tañi famentuafiel.
18. Huesaque huimtun taiñ niequefel, ¿chem rupayafui?
18 Pedro reque, quiñeque dungu taiñ femquefel cuifi deu famentufilu troquihuafuiñ. Huelu quiñeque mu, acurumeafui huesaque raquiduam taiñ lonco mu. Quiñe peñi feipi: “Mari tripantu rupafui tañi pehuenofiel pornografia. Deu famentufilu feitachi huesa huimtun troquiufun. Huelu femlai. Feitachi huesa huimtun quiñe auca culliñ reque, lefconturumequeneu quiñeque mu”. Taiñ peñi fentecünulai tañi chaftuafiel feitachi huesa huimtun. Quimtucui tañi conhuenoal feitachi huesa huimtun mu, fill antü mülei tañi chaftuafiel, com tañi mongen mu chi. Tañi domo ca ti pu loncolelu quelluqueyu tañi cuñiutucuhual ca ñi famentunieafiel feitachi huesa huimtun.
19. Cüdautuliyiñ taiñ chaftuafiel quiñe huesa huimtun, ¿chumafuiñ?
19 Petu chaftufiliyiñ quiñe huesa huimtun, ¿chumafuiñ taiñ culpanoal? Femaiñ Jesús taiñ feipieteu. Trepeluucüleaiñ, fei cuñiutucuhuaiñ taiñ famconnoal culpan mu. Nehuencülelu troquiuliyiñ rume, famentunieafiyiñ chem dungu rume taiñ yeafeteu culpayal (1 Cor. 10:12). Eimi deu femqueimi chi quiñeque dungu tami famentuhual huesaque dungu mu, fentecünulayaimi tami femal. Proverbios 28:14 feipi: “Tati huentru rumel llihuatulelu ayüucülequei” (2 Ped. 3:14).
CUÑIUTUCUULIYIÑ, ¿CHUMNGECHI QUELLUAIÑMU?
20, 21. 1) Eluuliyiñ taiñ connoal culpan mu, ¿chumngechi cümelcayaiñmu? 2) Com taiñ nehuen mu eluuliyiñ taiñ connoal culpan mu, ¿chumai Jehová iñchiñ mu? (2 Corintios 4:7).
20 Eluuliyiñ taiñ connoal culpan mu, rume cümelcayafeiñmu. Culpaliyiñ, cüme rupayafuiñ chi pichiñma mu müten. Huelu yenieliyiñ taiñ mongen chumngechi ñi ayüqueel ta Jehová, doi ayüucüleaiñ (Sal. 19:8; Heb. 11:25). ¿Chumngelu? Jehová am deumaeteu iñchiñ ñi inayafiel tañi feipin (Gén. 1:27). Femliyiñ, lifcüleai taiñ raquiduam ca pichiñma mu llohuaiñ rumel mongen (1 Tim. 6:12; 2 Tim. 1:3; Jud. 20, 21).
21 Tunte ayüfuliyiñ rume taiñ chaftuafiel huesaque dungu, quiñeque mu nehuen-ngehuelayafuiñ. Huelu Jehová ta quelluaiñmu (papeltunge 2 Corintios 4:7). Fei eluqueiñmu quisu tañi nehuen, feitachi nehuen caquelu che niequelafi. Huelu quisuque iñchiñ com taiñ nehuen mu eluucüleaiñ taiñ culpanoal. Femliyiñ, Jehová allcütuñmayaiñmu taiñ llellipufiel, fei eluaiñmu doi nehuen (1 Cor. 10:13). Feimu llemai, Jehová ñi quellun mu cuñiutucuhuaiñ taiñ culpanoal.
ÜLCANTUN 47 Fill antü ngillatufinge ta Jehová
a Quiñe che huesa culpale peafui ti lifru ¡Rumel ayüucüleaimi! quimeltun 57 troquiñ 1-3 ca ti troquiñ “Rakiduamyenieafiyiñ küpalechi antü” tripalu Ti Huerquen, noviembre 2020 tripantu pag. 27-29, parr. 12-17.
b ¿CHEM PENGELI TI ADENTUN? Quiñe peñi papeltumequei ti texto diario pulihuen. Papeltufi Biblia petu yafütulu rangiantü. Ca amui trahun mu pun mu.
