1, 2. ¿Inei fel am ta Sadoc? (1 Crónicas 12:22, 26-28).

 RAQUIDUAMNGE tüfa, doi 340.000 huentru trahuluhuingün ñi reycünuafiel ta David. Cüla antü mu huincul mu müleingün, inafül Hebrón mapu mu. Ayecamequeingün, nütramcamequeingün ca ülcantumequeingün ñi püramyeafiel ta Chau Jehová (1 Crón. 12:39). Feita mu mülefui quiñe hueche huentru Sadoc pingelu. Fentrenque che inaduamlafuingün rume tañi mülen fei mu, huelu Jehová quimniefui. Jehová ayüfui iñchiñ taiñ quimal Sadoc ñi mülen ta fei mu (papeltunge 1 Crónicas 12:22, 26-28). ¿Inei fel am ta Sadoc?

² Sadoc sacerdotengefui. Inafül cüdauquefui ti hunen lonco sacerdote Abiatar mu. Jehová elueyu fentren quimün ca elueyu ñi adümafiel Chau Dios ñi piel (2 Sam. 15:27). Fentrenque che amuquefui Sadoc mu ñi ngülamtuaeteu. Feitachi troquiñ mu peaiñ chumngechi pengelquefui tañi llicaquenon.

3. 1) ¿Chumngelu Jehová tañi pu che duamniei ñi nehuen piuquengeal? 2) ¿Chem peaiñ tüfachi troquiñ mu?

³ Taiñ mülen afaelchi antü mu Huecüfü doi caiñetufi Chau Dios tañi pu che (1 Ped. 5:8). Feimu duamnieiñ taiñ nehuen piuquecünuhual petu ñi apümnofiel Jehová Huecüfü ca tañi ngünenieel (Sal. 31:24). ¿Chumngechi inayentuafuiñ Sadoc ñi llicanon? Peafiyiñ cüla dungu ñi femün ta Sadoc.

QUELLUNTUCUAIÑ JEHOVÁ TAÑI GOBIERNO

4. ¿Chumngelu duamnieiñ taiñ nehuen piuquengeal ñi quelluntucuafiel Jehová ñi Gobierno? (Ca inaduamnge ti adentun).

⁴ Jehová ñi pu che duamnieiñ taiñ nehuen piuquengeal ñi quelluntucuafiel Jehová ñi Gobierno müten (Mat. 6:33). ¿Chem mu duamnieiñ taiñ nehuen piuquengeal?  Taiñ inayafiel Jehová ñi huercün dungu ca ñi amuldungual ti cümeque dungu Chau Dios ñi Gobierno mu (1 Tes. 2:2). Fachantü fentren pu che quiñeucülehuelai politica dungu mu, feimu mülei taiñ nehuencüleal taiñ coneltunoal politica dungu mu (Juan 18:36). Fentren testigo müte niequelaingün plata ca quiñeque hulelcangequeingün ca presuntucungequeingün tañi coneltunon mu politica dungu mu cam ejercito mu.

5. ¿Chumngelu Sadoc duamniefui nehuen piuquecünuhual ñi quelluntucuafiel ta David?

⁵ Loncocünungelu David, Sadoc amulai ñi fiestañmayafiel müten, doi mai yeniefui tañi hueichahue ca pepicaucülefui chem dungu rupafule rume (1 Crón. 12:38). Cheu rume amufule ñi hueichayal ta David, Sadoc eluucülequefui tañi amual ca ñi incañpeafiel tati pu Israel che tañi pu caiñe mu. Müte adümuulafui chi ñi hueichayal, huelu llicaquelafui.

6. David ñi femün, ¿chumngechi quellufi ta Sadoc ñi llicanoal? (Salmo 138:3).

⁶ ¿Chemu Sadoc fente nehuen piuquecünuufui? Hualloñmaquefeyu fentren huentru nehuen-ngelu ca llicaquenolu. Quiñe fei ta David. David am nehuen piuque mu adniequefilu pu hueichafe, feimu com pu Israel che ayüniefui ñi lonco ülmencünuaeteu (1 Crón. 11:1, 2). David rumel maneluucülefui Jehová mu ñi hueichayafiel tañi pu caiñe (Sal. 28:7; papeltunge Salmo 138:3). Sadoc ca quellueyu caquelu huentru llicaquenolu, Jehoiadá ca tañi fotüm Benaya ca tati pu 22 loncolelu quelluntucufilu ta David (1 Crón. 11:22-25; 12:26-28). Com engün ayüfuingün ñi quelluntucuafiel ta David tañi lonco ülmen-ngen.

7. 1) Taiñ antü mu, ¿inei engün am inayentuafuiñ taiñ nehuen piuquengeal? 2) Tami peel video mu, ¿chem quimeltueimu ñi femün peñi Nsilu?

⁷ ¿Chem quelluafeiñmu taiñ nehuen piuquecünuhual? Raquiduamaiñ ñi  chumün Jehová ñi pu che ñi quelluntucuafiel Jehová ca tañi Gobierno. Taiñ lonco ülmen Jesús coneltulai Huecüfü ñi ngünenieel mu (Mat. 4:8-11; Juan 6:14, 15). Jesús rumel maneluuquefui Jehová mu tañi eluaeteu ta nehuen. Iñchiñ taiñ antü meu ca mülei inayentufalchi pu hueche coneltunolu politica dungu meu cam ejercito mu. Cümeafui tami quintual jw.org mu tañi rupan engün. a

QUELLUAFIYIÑ PU PEÑI, PU LAMNGEN

8. ¿Chumngelu pu loncolelu mülefui ñi nehuen piuquecünuhual engün ñi quelluafiel pu peñi, pu lamngen?

⁸ Jehová tañi pu che ayüquei tañi hueluconque quelluhual engün (2 Cor. 8:4). Huelu quiñeque mu duamfali taiñ nehuen piuquecünuhual. Mülen mu hueichan, pu loncolelu quimnieingün tañi pu peñi, lamngen duamnieingün tañi quellungeal engün ca ñi yafültucungeal. Duamniefuingün chi quiñe Biblia ca publicacion, iyael, tacun ca cheu ñi müleal engün. Tati pu loncolelu am piuqueyeniefilu pu peñi ca pu lamngen, fei eluucülequefuingün tañi quelluafiel cuñihun-ngefule rume, femngechi pengelingün tañi nehuen piuquengen Sadoc reque (Juan 15:12, 13).

9. David, ¿chem feipifi ñi femal ta Sadoc? (2 Samuel 15:27-29; ca inaduamnge ti adentun).

⁹ Peaiñ chumngechi Sadoc quellufi tañi pu peñi rupalu cuñihun-ngechi dungu mu. Absalón, David ñi fotüm, ayüniefui ñi langümafiel tañi chau, femngechi ñi lonco ülmencünuhual (2 Sam. 15:12, 13). David mülefui ñi pürüm tripayal Jerusalén mu, feipifi tañi pu cüdaufe: “¡Amutuaiñ, lefmahuaiñ! Femnoliyiñ, ¡quiñe no rume montulayafui Absalón mu!” (2 Sam. 15:14). Deu amutulu  engün, David raquiduami quiñe che ñi mülenagal Jerusalén mu. Femngechi quimafui ñi chumal ta Absalón. Feimu huiñoltufi ta Sadoc ca caquelu sacerdote, femngechi ñi feipiaeteu ñi chumal ta Absalón (papeltunge 2 Samuel 15:27-29). Mülefui ñi cuñiutucuhual engün, rume cuñihun-ngei tañi feipieteu ta David, langümngeafuingün cütu. Absalón rume huesa chengefui, quehuafengefui, quisutu duamuuquefui, tañi chau cütu caiñetufi. Feimu, ¿chumafui chi quimfule feichi pu huentru ñi huercüeteu ta David?

10. Sadoc ca caquelu sacerdote, ¿chumngechi quellufingün ta David?

¹⁰ David feipifi ta Sadoc ca tañi cüme hueni Husái pingelu, tañi chumal engün (2 Sam. 15:32-37). Sadoc ca Husái cüme inafi ñi feipieteu ta David. Husái hueniyeufaluufi ta Absalón. Fei feipifi ta Absalón chumngechi ñi lefcontuafiel ta David, femngechi David eluhuafui tañi pepicahual. Fei hula, Husái feipifi ta Sadoc ca Abiatar ñi chumal ta Absalón (2 Sam. 17:8-16). Fei engu feipifalfi ta David ñi chumal ta Absalón (2 Sam. 17:17). Jehová tañi quellun mu Sadoc ca caquelu sacerdote montulfingün ta David (2 Sam. 17:21, 22).

11. ¿Chumngechi inayentuafuiñ ta Sadoc quellufiliyiñ taiñ pu peñi ca pu lamngen?

¹¹ Feipingeliyiñ taiñ quelluafiel taiñ pu peñi ca pu lamngen rupalu cuñihun-ngechi dungu mu, ¿chumngechi nehuen piuquengeafuiñ Sadoc reque? 1) Cüme inayaiñ taiñ chem pingen. Cuñihun-ngechi dungu mu rupaliyiñ, mülei taiñ feyentuleal, femngechi taiñ quiñeucüleal pu peñi, pu lamngen iñchiñ. Feimu eluhuaiñ taiñ feyentuafiel pu peñi Betel mu (Heb. 13:17). Pu loncolelu feipingequei chumngechi pepicaucüleal engün ca ñi chumal rupan mu fütraque huesaque dungu.  Feimu pu loncolelu mülei tañi inaduammequeafiel engün com tañi feipingeel (1 Cor. 14:33, 40). 2) Llicalelayaiñ, huelu cuñiutucuucüleaiñ (Prov. 22:3). Cüme raquiduamaiñ taiñ femal, cuñiutucuhuaiñ. 3) Maneluhuaiñ Jehová mu. Jehová ayüquei taiñ com cüme feleal. Quisu quelluqueiñmu taiñ ca femngechi quelluafiel pu peñi, pu lamngen.

12, 13. ¿Chem quimeltueiñmu ñi femün Víktor ca Vitali? (Ca inaduamnge ti adentun).

¹² Peaiñ ñi chumün epu loncolelu Víktor ca Vitali. Feipingeingu ñi yelelafiel iyael ca co pu peñi ca pu lamngen Ucrania mu. “Com püle quintunierpufiyu cheu ñi mülen ta iyael” pi Víktor. “Inafül müchaique allcüquefuyu chumngechi ñi tralcatumequen ta che. Quiñe peñi ta elueiñmu iyael tañi guardanieel. Fei iñchiñ elufiyiñ pu peñi, pu lamngen, femngechi fentren engün niefuingün iyael tañi mongeluhuam. Petu püramfilu tati iyael taiñ auto mu, trananagi quiñe bomba 20 metro cheu tayu mülen, huelu troflai. Llicalefun, com antü llellipufiñ ta Jehová, femngechi tañi nehuentucuaeteu ñi quelluafiel pu peñi, pu lamngen”.

¹³ Taiñ peñi Vitali feipi: “Duamniefuyu tayu nehuen piuquengeal. Feichi hunen rupa tañi quellumefiel pu peñi, 12 hora mu puhun cheu ñi mülen engün. Com feitachi 12 hora llellipuniefiñ ta Jehová”. Vitali nehuen piuquengefui, huelu cuñiutucuquefui. Ca feipi: “Fentecünulan tañi feipiafiel ta Jehová ñi eluaeteu ta quimün ca ñi cüme raquiduamal, femngechi cuñihun mu tucunoal ñi mongen. Miyaufun cheu tañi feipin tati gobierno müten. Nehuentucueneu pefiel mu pu peñi, pu lamngen quiñentrür cüdaumequelu engün. Liftuniequefuingün tati rüpü, trapümfingün iyael, tacun ca caquelu chemcün ca tucufingün camion mu. Víktor iñchiu ca elungefuyu iyael ca cheu ñi umayal”.

PÜNTÜTRIPALAYAIÑ JEHOVÁ MU

14. Taiñ piuqueyenieelchi che püntütripale Jehová mu, ¿chum duamqueiñ?

¹⁴ Quiñeque taiñ pu familia cam pu hueni püntütripale Jehová mu, rume hueñancülafeiñmu (Sal. 78:40; Prov. 24:10). Doi quiñeucüleliyiñ feichi che iñchiñ, doi cutrantupiuquelafeiñmu. Eimi, ¿femngechi dungu rupaimi? Tañi femün ta Sadoc rume yafültucuafeiñmu.

15. ¿Chumngelu Sadoc duamniefui ñi nehuen piquengeal ñi püntütripanoal Jehová mu? (1 Reyes 1:5-8).

¹⁵ Sadoc ñi hueni Abiatar pingelu püntütripai Jehová mu, huelu Sadoc turpu femlai. David epe puulu tañi layal, tañi fotüm Adonías ayüfui tañi reycünuhual. Huelu Jehová feipifui Salomón ñi lonco ülmen-ngeal (1 Crón. 22:9, 10). Fei Abiatar quelluntucufi ta Adonías (papeltunge 1 Reyes 1:5-8). Abiatar famentuhui David mu ca püntütripai Jehová mu. ¿Müna huesa duampelafui ta Sadoc? Sadoc ca Abiatar tañi sacerdotengen mu, doi 40 tripantu quiñentrür cüdaufuingu (2 Sam. 8:17). Mür cuñiutucuquefingu “Chau Dios ñi falin caja” (2 Sam. 15:29). Mür engu quelluntucuquefui ta David ca fentrenque dungu femingu tañi poyeafiel ta Jehová (2 Sam. 19:11-14).

16. ¿Chem quellueyu ta Sadoc tañi püntütripanoal Jehová mu?

¹⁶ Huesa femlu rume ta Abiatar, Sadoc püntütripalai Jehová mu. David cüme quimniefui ñi maneluhual Sadoc mu. Feipingelu ta David ñi chumal ta Adonías, feimu David feipifi ta Sadoc, Natán  ca Benaya ñi loncocünuafiel ta Salomón (1 Rey. 1:32-34). Sadoc, ¿rume yafültucupelaeyu ñi femün caquelu serfiquefilu ta Jehová Natán reque? Fei engün püntütripalai Jehová mu ca quelluntucufingün ti lonco ülmen David (1 Rey. 1:38, 39). Loncocünungelu ta Salomón, elufi tati sacerdote Sadoc ti cüdau tañi niequefel ta Abiatar (1 Rey. 2:35).

17. Quiñe tami pu che püntütripale Jehová mu, ¿chumngechi inayentuafuimi Sadoc?

¹⁷ ¿Chumngechi inayentuafuimi ta Sadoc? Quiñe tami piuqueyenieelchi che püntütripale Jehová mu, pengelelafimi ta Jehová tami püntütripanoal quisu mu (Jos. 24:15). Jehová eluaimu ta nehuen tami duamnieel. Llellipunieafimi ta Jehová ca fülconcüleaimi Jehová tañi pu serfiqueteu. Jehová falintuai tami piuqueyefiel, fei cümelcayaimu (2 Sam. 22:26).

18. ¿Chem quimeltueiñmu ñi rupan Marco ca Sidse?

¹⁸ Peafiyiñ ñi rupan Marco ca Sidse. Tañi epu ñahue tremlu engu, püntütripaingu Jehová mu. Marco feipi: “Choyüngelu müten taiñ pichiqueche, rume piuqueyefiyiñ. Iñchiñ com femqueiñ taiñ cuñiutucuafiel. Feimu püntütripalu Jehová engu, rume cutrantupiuquequeiñmu, huelu Jehová quisucünulaeiñmu. Huesa duamcülelu tañi domo, Jehová ñi duam mu iñche nehuencülequen. Ca femngechi iñche hueñancüleli, tañi domo nehuencülequei”. Sidse feipi: “Jehová tañi duam mu müten nehuencülequeyu. Huesa duamcülequefun. Iñche tañi duam mu, tañi epu püñeñ elcünufingu ta Jehová pifun. Feimu feipifiñ ta Jehová tañi chum duamcülen. Rupachi antü mu, fülcontueneu quiñe lamngen cuifi tañi pehuenofiel, chapadchapadtuñmaeneu tañi llanca foro ca lelinieneu. Fei feipieneu: ‘Loncontucuaimi, eimi culpalelaimi tañi chumün mu tami epu püñeñ’. Jehová tañi quellun mu ayühunquechi serfiniefiñ ta Jehová”.

19. ¿Chem eluucüleimi tami femal?

¹⁹ Jehová ayüquei com tañi pu che ñi nehuen piuquengeal Sadoc reque (2 Tim. 1:7). Huelu ayüquelai taiñ maneluhual iñchiñ taiñ nehuen mu, doi mai Chau Jehová ñi nehuen mu. Rupalmi quiñe cüdaungechi dungu mu, llellipuafimi ta Jehová tami eluaeteu ta nehuen. Jehová rüf quelluaimu tami nehuen piuquengeal Sadoc reque (1 Ped. 5:10).