TROQUIÑ ÑI CHILLCATUNGEAL 28
ÜLCANTUN 123 Cüme llounieafiyiñ Chau Dios ñi Ngünenien
¿Quimquefimi ti coila dungu ca ti rüf dungu?
“Tamün nehuentuleal, trarihue reque tucutuhuaimün tati rüf dungu” (EFES. 6:14).
¿CHEM QUIMAIÑ?
Chumngechi quimafuiñ ti rüf dungu cüpalu Jehová mu, ca ngünencalayaiñmu Huecüfü ca taiñ pu caiñe ñi coilatun dungu.
1. ¿Chum duamelqueimu ti rüf dungu?
CHAU Dios tañi pu che piuqueyeñmaquefiyiñ tañi rüf dungu mülelu Biblia mu, com taiñ feyentuqueel mülei Biblia mu (Rom. 10:17). Quimnieiñ Jehová elcünufi ti trahunche ñi ‘quelluntucuafiel ca nehuentucuafiel ti rüf dungu’ (1 Tim. 3:15). Fei ayühunquechi feyentuquefiyiñ pu loncolelu, quisu engün feipiqueiñmeu ti rüf dungu mülelu Biblia mu, ca adniequeiñmu taiñ femal Jehová ñi ayüqueel (Heb. 13:17).
2. Jehová tañi pu che, ¿chem mu mülei taiñ cuñiutucuucüleal? (Santiago 5:19).
2 Iñchiñ feyentuqueiñ ti rüf dungu meu, quimnieiñ taiñ inayafiel chem taiñ feipieteu Jehová ñi troquiñche. Femfuliyiñ rume, mülei taiñ cuñiutucuucüleal taiñ püntünentungenoal ti rüf dungu meu (papeltunge Santiago 5:19). Huecüfü ayüniei taiñ maneluuhuenoal Biblia meu ca taiñ inanoafiel ñi chem pieteu Jehová ñi troquiñche (Efes. 4:14).
3. ¿Chumngelu mülei taiñ cüme nüucüleal ti rüf dungu mu? (Efesios 6:13, 14).
3 (Papeltunge Efesios 6:13, 14). Epe puucülei Huecüfü ñi feipial fill huesaque dungu, femngechi com pu che ñi caiñetuafiel ta Chau Jehová (Apoc. 16:13, 14). Ca quimnieiñ Huecüfü doi cüdaucüleai ñi ngünencanieafiel Jehová ñi pu che (Apoc. 12:9). Feimu rume falin-ngei taiñ cüme quimafiel ti rüf dungu ca ti coila dungu, ca taiñ feyentuafiel ti rüf dungu (Rom. 6:17; 1 Ped. 1:22). Fei tüfa mülei taiñ femal taiñ mongetripayal ti fütra cutrancahun mu.
4. ¿Chem peaiñ tüfachi chillcatun mu?
4 Tüfa mu peaiñ epu dungu taiñ quelluaeteu, femngechi taiñ quimafiel ti rüf dungu mülelu Biblia mu, ca taiñ cüme llohuafiel taiñ feipieteu Jehová ñi troquiñche, ca peaiñ cüla dungu chem taiñ femal ñi püntütripanoal ti rüf dungu mu.
CHEM DUAMNIEIÑ TAIÑ CÜME QUIMAFIEL TI RÜF DUNGU
5. Yamniefiliyiñ Jehová, ¿chumngechi quelluaiñmu taiñ ngüneduamal ti rüf dungu?
5 Yamnieafiyiñ Jehová. Yamniefiliyiñ Jehová, fente taiñ piuqueyeniefiel femlayaiñ chem no rume tañi ayüquenoel. Ayünieiñ taiñ quim ngüneduamal chem ñi cümen ca chem ñi cümenon, ti coila dungu ca ti rüf dungu, femngechi taiñ cüme tuteafiel taiñ Chau Jehová (Prov. 2:3-6; Heb. 5:14). Pu che ayüquei ñi femal huesaque dungu Jehová ñi ayüquenoel, feimu ngelai taiñ llicayafiel engün. Iñchiñ piuqueyeniefiliyiñ Jehová, llicalayafiyiñ pu huentru.
6. ¿Chumi tati mari lloftumapufe tañi llicafiel pu Canaán huentru?
6 Mülei taiñ rume yamnieafiel ta Jehová, llicalayafiyiñ pu huentru. Huelu doi llicafiliyiñ pu huentru, püntütripayafuiñ ti rüf dungu mu. Peaiñ ñi rupan cuifi Israel mu. Mari epu loncolelu amuingün ñi lloftumafiel ti mapu Jehová ñi feipicünufiel pu Israel che. Tachi mari lloftumapufe rume llicafi pu Canaán che, feimu feipingün: “Pepi quehualayafiyiñ tüfachi pu che, doi nehuen-ngeingün ta iñchiñ meu”, femngechi pengeli engün ñi maneluunon Jehová mu (Núm. 13:27-31). Feingei, pu Canaán che doi nehuen-ngei pu Israel che mu. Huelu pu Israel che raquiduamlu engün ñi hueunoafel tañi pu caiñe, pengelingün tañi maneluunon Jehová mu. Pu Israel che mülefui ñi piuquentucual Jehová ñi feipieteu müten, ca loncontucual chem ñi femün Jehová quisu engün mu, femngechi llicalayafuingün pu Canaán che, Jehová am doi nehuen-ngelu pu Canaán che mu. Huelu Josué ca Caleb maneluhui Jehová mu engu. Fei engu duamquefui ñi femal Jehová ñi ayüqueel, feimu feipifi engu tati pu che: “Tutefiliyiñ ta Jehová, rüf meu yeaiñmu tüfachi mapu meu, fei eluaiñmu” (Núm. 14:6-9).
7. ¿Chem quelluafeiñmu taiñ doi yamnieafiel Jehová? (Ca inaduamnge ti adentun).
7 Taiñ doi yamnieafiel ta Chau Jehová, petu ñi femnon quiñeque dungu, raquiduamaiñ chem ayüquei ta Jehová (Sal. 16:8). Papeltufilmi Biblia, ramtuunge: “Iñche müleli feichi mu, ¿chumafun?”. Raquiduamnge eimi allcütumequefilmi ñi feipin pu mari lloftumapufe, ¿feyentuafuimi ñi feipin engün? ¿Llicaleafuimi? ¿Cam doi piuqueyenieafimi ta Jehová ca ayüafuimi ñi femal quisu ñi ayüqueel? Com pu Israel che feyentulafingün Josué ca Caleb ñi feipin rüf dungu, feimu elungelaingün ñi conal Jehová ñi Feipicünuelchi Mapu mu (Núm. 14:10, 22, 23).
Eimi, ¿inei feyentuafuimi? (Inaduamnge parrafo 7).
8. ¿Chumngechi chengeaiñ ca chumngelu?
8 Ñom piuquengeaiñ. Jehová quimelelquefi tañi rüf dungu pu ñom piuquengelu (Mat. 11:25). Hue quimfilu ti rüf dungu iñchiñ, ñom piuquecünuhuiyiñ, cüme lloufiyiñ taiñ quellungeal (Hech. 8:30, 31). Huelu mülei taiñ cuñiutucuucüleal taiñ mallma piuquengenoal. Mallma piuquengeliyiñ, doi falintulayafuiñ Chau Jehová ñi cümeque ngülam ca taiñ feipingeel trahunche mu, iñchiñ taiñ raquiduam ca femngechi fali piafuiñ.
9. ¿Chem quelluaiñmu taiñ rumel ñom piuquengeal?
9 ¿Chem quelluaiñmu taiñ amuleal taiñ ñom piuquengen? Loncontucuaiñ iñchiñ trürlaiñ Jehová mu, Jehová doi alüpüralei iñchiñ mu (Sal. 8:3, 4). Ca llellipuafiyiñ Jehová taiñ doi ñom piuquengeal ca taiñ eluucüleal taiñ quimeltungeal. Jehová quelluaiñmu taiñ doi falintuafiel quisu ñi raquiduam, taiñ quimeltueteu Biblia mu ca tañi troquiñche mu, femngechi doi falintulayafiyiñ iñchiñ taiñ raquiduam. Papeltuliyiñ Biblia, cüme ngüneduamaiñ Jehová ñi piuqueyeniefiel pu ñom piuquengelu, huelu üdequefi pu mallma piuquengelu, pu checahun-ngelu ca rume falintuuquelu. Doyelchi mai, cuñiutucuhuaiñ taiñ ñom piuquengeal elungeliyiñ falinque cüdau.
¿CHUMAIÑ TAIÑ NÜUCÜLEAL TI RÜF DUNGU MU?
10. ¿Inei am elcünufi Jehová ñi adnieafiel tañi pu che?
10 Amulepe taiñ maneluhun taiñ feipieteu Jehová ñi troquiñche. Cuifi Israel mu, Jehová elcünui Moisés ca Josué ñi adnieafiel tañi pu che (Jos. 1:16, 17). Pu Israel che mülefui ñi maneluhual tüfachi epu huentru Jehová ñi huercüeteu. Femngechi femlu engün, cümelcangequefuingün. Fentren tripantu rupalu, Jehová elcünui pu mari epu apostol ñi adnieafiel ti cristiano trahunche (Hech. 8:14, 15). Rupachi antü ca conelturpuingün caquelu loncolelu Jerusalén mu mülelu. Pu peñi ca lamngen inaquefuingün ñi feipin pu loncolelu, “feimu llemai, tati pu trahunche doi nehuentui ñi feyentun engün. Cafei fill antü conquei che ti trahunche mu” (Hech. 16:4, 5). Famülque mu, Jehová ca cümelcaqueiñmu inanieñmafiliyiñ taiñ adnieaeteu quisu ñi troquiñche. Huelu ¿chum duamafui Jehová feyentunofiliyiñ pu loncolelu tañi elcünuel? Taiñ quimal, ngüneduamaiñ chem dungu rupai amulelu pu Israel che ñi puhual ti Feipicünuelchi Mapu mu.
11. Feichi pu che chaftufilu Jehová ñi dullielchi huentru, ¿chem rupaingün? (Ca inaduamnge ti adentun).
11 Amulelu rüpü mu pu Israel che, quiñeque falin huentru chaftufingün ta Moisés, Jehová elulaeyu ñi loncoleal pingün. Feipingün: “Com ti troquiñche huichucünungei Ngünechen mu, ca Jehová mülei com quisu engün mu” (Núm. 16:1-3). Feingei ñi huichucünufiel Jehová com pu Israel che, huelu dullifi Moisés müten tañi adnieafiel com pu Israel che (Núm. 16:28). Huelu tüfachi pu huentru chaftufilu Moisés, Jehová mai chaftufingün. Raquiduamlaingün Jehová ñi ayüelchi dungu, quisu ñi dungu mu raquiduami engün. Ayüfuingün ñi doi falin chengeal engün. Jehová langümfi tüfachi huentru ca tañi pu quellueteu. Rume fentren Israel che laingün (Núm. 16:30-35, 41, 49). Feimu cüme quimnieiñ Jehová ayüquelafi feichi pu che yamquenofilu ñi feipin tañi troquiñche.
Eimi cai, ¿inei inayafuimi? (Inaduamnge parrafo 11).
12. ¿Chumngelu am mülei taiñ maneluhual Jehová ñi troquiñche mu?
12 Amulepe taiñ maneluhun Jehová ñi troquiñche mu. ¿Chumngelu? Ti Troquiñ Adniechequelu cüme ngüneduamle ñi cacünungetual quiñeque taiñ quimqueelchi dungu Biblia mu, cacünutuquefi müten. Ca quimtucule ñi doi cüme adcünungeal taiñ cüdau, femquei müten ñi cacünutuafiel (Prov. 4:18). Quisu engün mu rume falin-ngei ñi ayühuelafiel ta Jehová. Rume yafüluuqueingün ñi quintuafiel Biblia mu, fei ñi cüme dullial tañi chumal engün. Com pu cristiano mülei ñi femal, inayafiel Biblia ñi feipin.
13. ¿Chem am tati rüf dungu taiñ quimeltungeel? Ca, ¿chem mülei taiñ femal?
13 Inanieafiyiñ ti rüf dungu taiñ quimeltungeel. 2 Timoteo 1:13 feipilei: “Ti rüf dungu ñi quimeltuel iñche, elcünui quiñe inayentufalchi dungu. Eimi inaniefinge”. ¿Chem am tati rüf dungu taiñ inanieafiel? Tüfa tati rüf cristiano quimeltun tripalu Biblia mu (Juan 17:17). Tüfachi quimeltun mu nüucülei com taiñ feyentuqueel. Jehová tañi troquiñche adnieiñmu inanieafiel feichi quimeltun. Com taiñ feyentuqueel nüucülele tüfachi rüf dungu meu, cüme amuleaiñ.
14. ¿Chumngelu quiñeque cristiano inahuelafingün ti rüf dungu ñi quimeltungeel?
14 Inanienofiliyiñ ti rüf dungu taiñ quimeltungeel, ¿chem rupayafuiñ? Peaiñ chem ñi rupan hunen siglo mu. Quiñeque cristiano feipiyahuingün deu acui Jehová ñi antü. ¿Mülepei mai quiñe carta ñi feipin tüfa? Quiñeque feipifuingün chi Pablo ñi huirintucuel. Quiñeque cristiano Tesalónica mu cüme ngüneduamlafingün chem tañi feipiyahun. Re feyentufemingün müten ca hueludunguyahuingün. Huelu cüme ngüneduamfile Pablo ñi quimeltun, ngünencangelayafui engün (2 Tes. 2:1-5). Pablo ngülamtueyu engün ñi feyentufemnoafiel com tañi allcütuel. Ca femngechi fentepui tañi carta: “Iñche Pablo, huirintucun tüfachi chalin quisu tañi cuhu meu. Femngechi femquen com tañi fillque carta meu, fei tamün quimal iñche ñi huirintucufiel”. Femngechi feipi Pablo tañi huiño ngünencangenoal engün (2 Tes. 3:17).
15. ¿Chumngechi cuñiutucuhuaiñ taiñ ngünencanoaeteu coilaque dungu? Feipinge ñi rupan Unión Soviética mu (ca inaduamnge ti adentun).
15 ¿Chem quimeltueiñmu Pablo ñi huirintuculelfiel pu Tesalónica che? Allcüturumefiliyiñ quiñe afmatun dungu, ca feipingeliyiñ quiñeque dungu coneltulenolu taiñ quimeltungeel Biblia mu, mülei taiñ cuñiutucuucüleal. Peaiñ ñi rupan cuifi Unión Soviética mu. Taiñ pu caiñe elufi taiñ pu peñi quiñe carta cüpalu fütra Betel mu reque. Tüfachi carta mu yafültucungei quiñeque peñi ñi huichucünuhual, femngechi quisutu ngünehual engün. Ti carta rüfngelu troquifali, huelu pu peñi cüme feyentulelu ngünencangelaingün. Ngüneduamingün chem pilelu ti carta quimfali ñi feingenon tañi quimeltungeel engün. Fachantü, taiñ pu caiñe quiñeque mu pünefi internet, redes sociales mu taiñ huelulcayaeteu, fei taiñ püntünentuhual. ¿Chumafuiñ taiñ hueluraquiduamelnoaeteu? Cüme ngüneduamaiñ taiñ allcütuel ca papeltuel ñi nüucülepen mai ti rüf dungu tripalu Biblia mu taiñ quimeltungeel (2 Tes. 2:2; 1 Juan 4:1).
Ngünencangelayaimi coilaque dungu rüfngechi dungu reque felelu. (Inaduamnge parrafo 15). a
16. Ñi feipin Romanos 16:17, 18, ¿chumaiñ pu chaftufilu ti rüf dungu mu?
16 Rumel fülconcüleaiñ pu poyequefilu Jehová mu. Jehová ayüquei com taiñ pu peñi, pu lamngen quiñehun taiñ püramyenieafiel. Nüucüleliyiñ ti rüf dungu mu, femngechi müten rumel quiñeucüleaiñ. Quiñeque che chaftufilu ti rüf dungu püntülcayafi trahunqueche. Feimu Chau Dios feipieiñmu taiñ püntütripayal quisu engün meu (papeltunge Romanos 16:17, 18).
17. Quimfiliyiñ ca nüniefiliyiñ ti rüf dungu, ¿chumngechi quelluaiñmu?
17 Quimfiliyiñ ca nüniefiliyiñ ti rüf dungu, püntütripalayaiñ Jehová mu (Efes. 4:15, 16). Turpu ngünencalayaiñmu Huecüfü ñi coilaque dungu. Acule ti fütra cutrancahun, Jehová cuñiutucunieaiñmu. Feimu llemai, nüucüleaiñ ti rüf dungu mu, “fei Chau Ngünechen, feichi hulquelu cüme tüngün” afcadileai ta iñchiñ meu (Filip. 4:8, 9).
ÜLCANTUN 122 ¡Amulepe taiñ nehuentuleal!
a ¿CHEM PENGELI TI ADENTUN? Adentulei chem ñi rupan cuifi Unión Soviética mu. Pu peñi llohuingün quiñe carta Betel mu cüpalelu reque, huelu pu caiñe huirintucuingün tüfachi carta. Cafei taiñ antü meu taiñ pu caiñe feipi coilaque dungu internet mu Jehová ñi troquiñche mu, femngechi taiñ ngünencayaeteu.
