Iñche choyüngen 19 mayo, 1940 tripantu mu Líbano mapu mu, Amiún pingechi huaria mu. Pichi rupachi tripantu mu, Trípoli pingechi huaria mu müleputuiñ. Tañi pu che poyequefi ta Jehová, piuqueyechequei, feimu rume ayüucülequeiñ. Epu peñi niequefun ca cüla lamngen. Tañi pu che cüdauquelai ñi nieal ta plata müten, doi mai eluucülequeingün ñi serfiafiel ta Jehová. Estudiaqueiñ Biblia, trahuluuqueiñ taiñ poyeafiel ta Jehová ca quelluquefiyiñ ta che ñi quimafiel ta Chau Dios.

Tañi trahunche mu, mülefui fentrenque dullinque cristiano. Quiñe peñi Michel Aboud pingequefui. Fei adniequefui feichi trahun “Estudio de libro” taiñ piquefiel. Taiñ peñi Michel quimürpui ti rüf dungu Nueva York huaria mu, ca 1921 tripantu mu empezafi ti amuldungun cüdau Líbano mapu mu. Cüme acordaniefiñ taiñ peñi Michel ñi yamniefiel ca yamquechi quelluquefiel epu lamngenhuen rupan estudialu Galaad pingechi escuela mu, Anne ca Gwen Beavor pingequeingu. Tüfachi epu lamngenhuen, rume cüme hueningerpuingu tañi familia iñchiñ. Rupalu quiñeque tripantu, müna ayühuleneu tañi petufiel taiñ lamngen Anne Estados Unidos mapu mu. Cafei petufiñ ta  Gwen, fütangeturquei Wilfred Gooch engu. Londres huaria mu, cüdaucülefuingu Betel mu.

Pichicalu iñche, pichiquen testigo mülequei Líbano mapu mu. Ca quiñeque loncolechi religioso catrütuquefeiñmu taiñ amuldungunoal. Huelu ayühunquechi enseñalquefiyiñ Biblia caquelu pu che. Petu acordaquen quiñeque dungu tañi rupan.

Quiñe tañi lamngen Sana pingei. Quiñe rupa quiñe edificio mu amuldungumequelu iñchiu, acurumei quiñe sacerdote. Feipingepelai tayu amuldunguyahun. Fei ti sacerdote ngüchatucañmaeneu tañi lamngen, fente tañi illcun ültrenacümfi escalera mu. Feimu tañi lamngen allfüi, fei mütrümngei pu soltau, tüfa engün adcünui ñi quellungeal ta Sana. Presuyefingün ti sacerdote, fei miyahulquei quiñe arma. Feimu ti loncolelu pu soltau mu, ramtufi tati sacerdote: “¿Enseñachequeimi Dios mu? Cam, ¿enseñaquefimi ñi quehuayal engün?”.

Quiñe rupa, taiñ trahunche alquilai quiñe bus tañi amuldungual ca mapu. Com cüme amulefui, huelu quiñe sacerdote allcüi taiñ amuldunguyahun, fei trapümfi fentren che taiñ huesalcayaeteu. Ütrüftueiñmu ta cura mu cütu, feimu allfülngei tañi chau. Petu acordanien tañi chau re mollfüñcülefui tañi ange. Com huiñotuiñ ta bus mu ca huesa duamcülefuiñ, huelu loncontucunien ñi feipin tañi ñuque. Petu ñi liftumequefiel tañi chau ñi ange, ñi ñuque feipi: “Chau Jehová, perdonafinge tañi femün engün, quimlaingün tañi femmequen” pi.

Ca quiñe rupa, pemefilu taiñ pu che, tañi lacu ñi ruca mu mülerquefui quiñe loncolechi religioso. Quimnierquefui tañi chau ca ñuque ñi testigongen. Cayu tripantu müten niefun, huelu tañi yehuelcayaeteu ramtueneu: “¿Chumngelu anta fautizaulaimi?”. Fei huiñoldungufiñ: “Iñche petu pichin, ca tañi fautizahual mülei ñi doi cüme quimafiel ti Biblia ca rüf maneluhual Chau Dios mu” pifiñ. Ayülai chumngechi tañi huiñoldungufiel. Feimu feipifi tañi lacu tañi respetanofiel.

Femngechi huesa rupalu rume quiñeque mu, pequefuiñ fentren cümeque che Líbano mapu mu, ca cüme llouqueiñmu. Feimu amuldunguqueiñ Biblia fentren che, ca enseñalquefuiñ quiñeque che.

Petu pichicalu iñche, quiñe peñi Venezuela mapu tuulu, cüpai Líbano mapu mu. Fei trahuluupai tañi trahunche mu, ca quimuhui iñche tañi lamngen engu, Wafa pingelu. Rupachi tiempo mu, cureyehuingu ca amutuingu Venezuela mapu. Feimu tañi lamngen mandalelfiel mu carta tañi chau, feipifi ñi huiñamtuhual Venezuela mapu mu. Rume echamenoquefui tañi familia. Feula müleputuiñ Venezuela mapu mu.

 1953 tripantu mu, acuiñ Venezuela mapu mu. Müleputuiñ Caracas huaria mu, püllelefuiñ cheu ñi mülen ti presidente. Pichicalu am iñche, rume afmatulequefun pefiel mu ti presidente ñi rupan tañi cüme auto mu tañi chofer engu. Huelu tañi chau, tañi ñuque cüdautufui ñi huimtual engu. Com huengefui ti pais mu: mülefui ca quehun dungun, caquerume huimtun niequefui pu che, ca iyael deumangequei, com caquerumefui. Ca petu huimtulu iñchiñ, contupaeiñmu quiñe huesa dungu.

Tañi chau lefcutranrumei. Cülfünchengefui, cutrantulafui, pequelafuiñ tañi cutrancülen. Feimu afmatulehuequeiñ feipingelu ñi contueteu cancer. Operangefui, huelu quiñe semana rupalu, lai.

Rume hueñancülefuiñ. 13 tripantu müten niefun. Raquiduamquelafuiñ rume ñi layal tañi chau. Chumcaunorume ayüucülehuenoalu troquiuquefuiñ. Tañi ñuque, rume cüdautufui tañi lan tañi chau. Huelu cüdaungefulu rume, Jehová quellueiñmu taiñ amuleal. 16 tripantu nielu iñche, tripan colegio mu. Fei ayüfun ñi quelluafiel tañi pu che ñi nieal tañi duamnieel engün.

Tañi lamngen Sana, niehui Rubén Araujo engu. Rubén hue tripafui Galaad pingechi escuela mu ca huiñotui Venezuela mu. Fei engu eluhuingu ñi amual ta Nueva York. Tañi familia ayüfui tañi amual ta universidad, feimu amun ta Nueva York. Üye mu, mülerpun tañi lamngen, tañi ngillañ iñchiñ. Tañi lamngen ca tañi ngillañ rume quellueneu tañi doi cüme hueniyeafiel ta Jehová. Conquefuiñ quiñe trahunche mu huincadungun mu. Üye mu mülefui fentrenque peñi, lamngen cüme hueniyefilu ta Jehová. Tüfa engün ca rume quellueneu. Quimürpufiñ epu peñi: Milton Henschel ca Frederick Franz pingelu. Tüfa engu cüdauquefui Betel, Brooklyn huaria mu.

Epe aflu ñi hunen tripantu universidad mu, ramtuhun: “¿Chummequen am tañi mongen mu?”. Papeltun quiñeque troquiñ ti revista Ti Huerquen mu, tüfa raquiduameleneu ñi doi cüdahuelafiel ta Jehová. Tañi trahunche mu pequefun pu hunelequelu amuldungun mu ca pu betelita ñi rume ayüucülequen engün, feimu cüpa inayentufiñ. Huelu petu fautizaulafun rume, duamniefun ñi hultucual ñi mongen Jehová mu. Feimu fautizahun 30 marzo, 1957 tripantu mu.

Fautizaulu iñche, ayüfun ñi precursorngeal. Rume ayülefun ñi femal, huelu cüdaungefui. “Estudiali universidad mu, precursorngelayafun” pifun. Tañi familia iñchiñ müna mandaleluuqueiñ carta, fei feipifiñ engün ñi estudiahuenoal universidad mu ca ñi huiñotual Venezuela mu, femngechi ñi precursorngerpual.

 1957 tripantu mu, huiñotun ta Caracas mu. Huelu tañi familia nehue cüme felelafui, duamniefui ñi quellungeal plata mu. “¿Chumngechi quelluafun?” pin. Fei elungefun ñi cüdahual banco mu. Huelu rume ayülefun ñi precursorngeal. Feimu eluhun ñi cüdahual banco mu ca ñi precursorngeal. ¡Rume cansalefun! Huelu ca femngechi ayüucülefun.

Ca femngechi rume ayühuleneu ñi quimfiel ta Sylvia, tüfa quiñe cüme lamngen poyequefi ta Jehová. Alemania mapu tuhun-ngei. Huiñamtuhui tañi pu che engün Venezuela mapu mu. Rupachi tiempo mu, niehuiyu ca nierpuyu quiñe fotüm ca quiñe ñahue. Tañi fotüm Michel pingefui, pero Mike pingequei. Ca tañi ñahue, Samira pingei. Ca feipifiyu tañi ñuque ñi müleal iñchiñ mu, femngechi taiñ cuidayafiel. Elcünun tati precursorado ñi eluafiel tañi pu che com tañi duamnieel. Femfun rume, com tañi piuque mu amuldunguquefun. Vacacion mu, Sylvia iñchiu eluucülequefuyu tayu precursor auxiliarngeal.

Feichi ramtuulu iñche chumngechi ñi troquieteu tañi pu vecino, petu pichicai tañi fotüm ca tañi ñahue, escuela mu amuquefui. Cüme mongen niequefun ca quiñeque che cüdauquelu caquelu banco mu, respetaquefeneu. Femngechi felelu rume, ayülefun tañi doi quimngeal tañi serfiniefiel ta Jehová. Tüfa rume raquiduameleneu. Feimu Sylvia iñchiu eluhuiyu tayu nentucuentayal. Fentecünuli ñi cüdahual banco mu, “elungeafun fentren plata” pifun. Defelafuiñ plata, feimu adcünuiñ taiñ mongen taiñ mongeluhual feichi plata mu.

Cüdaungefui ñi femngechi femal. Huelu tañi domo ca tañi ñuque, rume quelluntucueneu. Fei, “ca huiño precursorngeafun” pifun. Rume ayüucülefun, ayühui tañi piuque. Com cüme amulefui tañi precursorngeal. Huelu ca acurumefui quiñe cüme dungu.

Quiñe antü, taiñ doctor feipieiñmu Sylvia ñi niepüñeñcülen. Afmatulehueiñ, rume ayühuiyu. Huelu iñche petu raquiduamcülefun ñi precursorngeal. Müchai müten com piuque mu esperalefuiñ taiñ hue pichiche. Huelu, “¿petu precursorngepeafun mai?” ramtuuquefun.

 Huiño nütramcahuiyu chem taiñ femal. Fei eluhun müten ñi precursorngeal. Tayu fotüm, Gabriel pingelu, choyüi abril 1985. Fei junio feichi tripantu mu, fentecünun ñi cüdahual banco mu, ca precursorngerpun. Rupalu chi tiempo, mangelngen ñi coneltual ti troquiñche adcünuquelu Betel tañi pais mu. Betel 80 kilometro camapulei Caracas. Fei amuquefun epu rupa cam cüla rupa semana mu.

Betel inafülcülefui quiñe pichi huaria mu, La Victoria pingelu, fei huiñamtuhuiyiñ üye mu. Tañi lamngen Baha pingelu, eluhui ñi cuidayafiel tañi ñuque. Mike deu cureyeufui. Huelu Samira ca Gabriel petu mülefui iñchiu mu. Feimu müte pehuelayafui tañi pu hueni Caracas mu. Cafei tañi saquin domo, mülefui ñi huimtual feichi pichi huaria mu. Ca com iñchiñ mülefui taiñ huimtual quiñe doi pichi ruca mu. Fei rume cambiatui taiñ mongen. Rume mañumniefiñ tañi familia ñi eluucülen ñi huiñamtuhual engün.

Rupachi tiempo mu, doi cambiatui taiñ mongen. Gabriel niehui Ambra engu. Ca Samira huiñamtuhui. Fei mülehuelafuingu iñchiu mu. 2007 tripantu mu, Sylvia iñchiu mangelngeyu tayu conal Betel mu. Fantepu mu, fau müleyu. Tayu hunen fotüm, Mike, loncolei tañi trahunche mu. Ca tañi domo Mónica engu, precursorngeingu. Gabriel ca loncolei tañi trahunche mu, ca tañi domo engu, mülei Italia mu. Ca Samira precursorangei, ca quelluntucuquei Betel mu.

Fentren rupa mülefui tañi dullial chem chumal tañi mongen mu. Fei falinque dungu femün. “Chumngechi ñi femel ta cuifi, ca femngechi femafun fachantü” piquen. Rume mañumcülen fill cüdau tañi elueteu Jehová. Rupayechi tripantu mu, ngüneduamürpun fente falin-ngei cüme hueniyeafiel ta Jehová. Chem dungu rume dullifuliyiñ, pichiquen dungu, alüquen dungu rume, Jehová elunieaiñmu taiñ tüngcüleal (Filip. 4:6, 7). Sylvia iñchiu rume ayüucüleyu tayu cüdahuelafiel ta Jehová Betel mu. Iñchiu siempre doyümquefiyu ta Jehová, feimu cümelcaeyumu chem dungu taiñ dulliel taiñ mongen mu.