1. ¿Chem pengeli Jehová taiñ piuqueyenieteu?

ITROCOM iñchiñ Chau Jehová cüpaleiñmu quisu mu (Juan 6:44). Raquiduamnge tüfa: fentren che mülelu  rume, Chau Jehová ngüneduameimu eimi tami cüme piuquengen ca tami cüpa poyequefiel. Jehová mu, tüfa doi fali (1 Crón. 28:9). Jehová quimnieimu, entendequeimu ca piuqueyenieimu. Tüfa, ¡müna yafüluhun-ngei!

2. Jesús, ¿chumngechi quimfalcünui Jehová taiñ piuqueyenieteu?

² Chau Jehová caque quiñeque iñchiñ piuqueyenieiñmu. Fei Jesús trürümfi ta Jehová quiñe cuidaufisaquelu mu. Ñamümle quiñe tañi ufisa, ti cuidaufisaquelu elcünuafi tati quechan ufisa fei quintumeafi tati ñamquiyaulu. Petufile, illcutulayafi. Huelu mai, ayüucüleai. ¿Chem quimeleiñmu tüfa? Iñchiñ ufisa reque felelu, caque quiñeque iñchiñ falintunieiñmu Jehová. Fei Jesús feipi Chau Jehová “ayülelai tañi ñamal quiñe no rume” tañi pu poyequeteu (Mat. 18:12-14).

3. ¿Chem inaduamaiñ tüfachi troquiñ mu?

³ Mateo capitulo 18 mu, Jesús ca nütramcai quiñeque “pichiqueche” reque felelu. Fei tüfachi troquiñ mu, peaiñ inei am ta tüfa engün. Cafei peaiñ chumafuiñ taiñ huesa duamelnoafiel taiñ pu peñi ca pu lamngen. Cafei quiñe taiñ pu peñi cam quiñe lamngen huesa femeliyiñmu, ¿chumafuiñ? Ca peaiñ tüfa.

4. ¿Inei engün am tati pu pichiqueche reque felelu?

⁴ Tüfachi pichiqueche reque felelu, fei ta com Jesús tañi pu inanieteu. ¿Chumngelu feipiqueiñ? Chumten tripantu niefule engün rume, eluuqueingün tañi enseñalngeal  (Mat. 18:3). Caquerumefule engün rume, com feyentuleingün Jesús mu. Fei Jesús ca femngechi piuqueyenieyu engün (Juan 1:12).

5. Huesalcangele quiñe tañi pu che, ¿chum duamquei Jehová?

⁵ Com tüfachi pichiqueche reque felelu, Jehová falintuqueyu. Raquiduamaiñ tüfa: iñchiñ incaquefiyiñ ca cuidaquefiyiñ pu pichiqueche, ¿chumngelu? Fütache tañi nehuen ca ñi quimün nielaingün. Iñchiñ ayüquelaiñ taiñ peafiel ñi huesalcangeal ta che. Huelu huesalcangele quiñe pichiche, iñchiñ doi illcuqueiñ. Jehová ca femngechi femquei, cuidaniequefi tañi pu poyequeteu. Feimu quiñe ta huesalcangele, Jehová rume huesa duamquei, illcuquei cütu (Is. 63:9).

6. Ñi feipin 1 Corintios 1:26-29, ¿chumngechi troquiqueiñmu pu che?

⁶ Tati pu che doi falintuquefi tati pu ricungelu, tati pu famoso ca feiti doi nielu poder. Huelu epe com Jesús tañi pu discipulo, femngechi chengelaingün. Feimu illamcangequei ca falintungequelaingün, pichiqueche reque felelu troquieyu pu che (papeltunge 1 Corintios 1:26-29). Huelu Jehová femquelai. Falintuquefi tañi pu che.

7. ¿Chumngechi ayüquei Jehová taiñ troquiafiel taiñ pu peñi, pu lamngen?

⁷ Jehová piuqueyeniefi com tañi pu che, chumten tripantu yeniefule rume tañi serfieteu engün. Jehová mu itrocom taiñ pu peñi, pu lamngen falin-ngei. Fei iñchiñ ca femngechi falintuafiyiñ engün. Piuqueyeafiyiñ com taiñ pu peñi ca pu lamngen, quiñeque müten no (1 Ped. 2:17). Chem meu no rume huesa duamel-layafiyiñ engün. Doi mai, cüme troquiafiyiñ engün, femngechi piuqueyeniengelu troquihuaingün. Huesa duamelfiliyiñ quiñe taiñ pu peñi, pu lamngen, chem dungu no rume rupanolu troquiulayaiñ. Ca femngechi “fei ta chem pifal-lai rume” pilayaiñ. ¿Chemu huesa duamafui quiñe taiñ peñi cam lamngen? Pichilu engün, müte falintungequelafui chi. Feimu tremlu engün falintuuquelai. Caquelu hue coni Jehová ñi troquiñche mu, feimu müte quimtucuquelai caquelu peñi, lamngen ñi ca huelulcauquen. Feimu cüdautuquei ñi perdonayafiel engün. Feimu, quiñeque mu huesa duamelafuiñ chi taiñ pu peñi, pu lamngen. Cam iñchiñ ta huesa duamelafeiñmu. Femfule rume, mülei taiñ cümelcautual. Huelu, ¿pichi piuquengeliyiñ cai? ¿Chem mülei taiñ femal? Quimtucuaiñ, cümelai taiñ pürüm illcufemal. Eluuliyiñ taiñ pürüm illcufemnoal, doi ayüucüleaiñ ca cüme yeucüleaiñ taiñ pu peñi, pu lamngen iñchiñ.

8. Jesús tañi pu inanieteu, ¿chumngechi ayüquefuingün ñi troquingeal?

⁸ Jesús, ¿chemu nütramcai feitachi pichiqueche reque felelu? Tañi pu inanieteu ramtueyu engün: “¿Inei anta doi saquifali ta Ngünechen tañi ülmen mülehue meu?” (Mat. 18:1). Feichi mu, pu judio ayüquefuingün ñi doi cümelu troquituaeteu caquelu pu che. Quiñe huentru feipi: “Pu judio quintuquefuingün ñi saquiaeteu ca püramyeaeteu caquelu pu che” pi ti huentru.

9. Jesús tañi pu inanieteu, ¿chem raquiduam mülefui ñi nieal engün?

⁹ Jesús quimniefui tati pu judio ayüquefuingün ñi doi cümelu troquingeal. Feimu Jesús tañi pu inanieteu mülelafui ñi nieal femngechi raquiduam. Fei Jesús feipieyu engün: “Tati hunen-ngelu eimün meu, ti doi inan-ngelu reque felepe. Ca tati loncolelu, ti serfiquelu reque felepe” (Luc. 22:26, TNM). Taiñ inayal Jesús  tañi feipin, doicülelu troquiafiyiñ caquelu pu che (Filip. 2:3). Femngechi raquiduam nieliyiñ, huesa duamel-layafiyiñ taiñ pu peñi, pu lamngen.

10. ¿Chem ngülam ñi feipiel Pablo mülei taiñ piuquentucual?

¹⁰ Loncontucuaiñ: quiñeque dungu mu, taiñ pu peñi, pu lamngen doi adümuucülequeingün iñchiñ meu. ¿Chem quelluafeiñmu taiñ loncontucual tüfa? Ngüneduamaiñ taiñ pu peñi, pu lamngen ñi cüme chengen. Piuquentucuafiyiñ tüfachi ngülam ñi feipiel Pablo. Feipi: “¿Chumngelu am doi cümelu caquelu meu troquiucüleimün? Com tamün nieel Ngünechen tamün elueteu. Eimün quisutu nielaimün chem rume, fei ¿chumngelu am fente mallmaucüleimün?” (1 Cor. 4:7). Feimu cuñiutucuhuaiñ. Quintulayaiñ taiñ saquiaeteu pu che ca doi cümelu troquiulayaiñ caquelu che mu. Por ejemplo, quiñe peñi cümeque hueupin hulafui trahun mu. Ca femngechi quiñe lamngen fentren che enseñalafui Biblia. Huelu, ¿chem raquiduam mülei ñi nieal? Jehová müten ñi quellueteu. Fei müten mülei ñi püramyengeal.

11. ¿Chem quimeltueiñmu Jesús tañi pengelün dungu?

¹¹ Jesús feipifi tañi pu inanieteu ñi huesa duamelnoafiel tañi pu peñi ca pu lamngen. Fei pichi rupalu, entui quiñe pengelün dungu nütramcalu quiñe rey ca quiñe esclavo mu. Ti esclavo fentren plata defeniefi tati rey, huelu turpu cullilayafui. Femfulu rume, ti rey rulpacünuleleyu ñi defen. Pichi rupalu, feiti esclavo pefi cangelu esclavo ñi defenieteu pichin plata müten. Huelu pilai ñi rulpacünulelafiel ti defen. Fei ti rey nütramelngei ñi femün feitachi huesa esclavo, fei carceltucufi. ¿Chem quimeltueiñmu tüfa? Iñchiñ ca femngechi femaiñmu ta Jehová com piuque mu perdonanofiliyiñ taiñ pu peñi ca pu lamngen (Mat. 18:21-35).

12. Eluuliyiñ taiñ perdonachenoal, ¿chem dungu rupayafui?

¹² Ñi femün mu tüfachi huesa esclavo, quisu huesalcahui ca huesalcafi ta caquelu che. Feiti huesa esclavo, cuñill-lafi tañi chaf esclavo. Fei mandafi ñi carceltucungeal, fei ñi cullingeal com tañi defenieteu. ¿Ca chem rupai? Jesús feipi: ‘Tüfachi dungu meu rume cutrantupiuquei tati caquelu pu esclavo’. Fei, ¿iñchiñ cai? Huesa femngeliyiñ ca perdonanofiliyiñ taiñ huesa femeteu, ¿chem dungu rupayafui? Perdonanofiliyiñ, huesa duamelafuiñ taiñ huesa femeteu, chalihuelayafuiñ ca lelihulhuelayafuiñ rume. Cafei inaduamle ta caquelu peñi, lamngen taiñ cüme yeucülenon feichi che iñchiñ, huesa duamafuingün.

13. ¿Chem quimeltueiñmu ñi rupan quiñe lamngen?

¹³ Iñchiñ perdonafiel mu taiñ pu peñi, pu lamngen, cüme duamcületuiñ ca quellufiyiñ ta caquelu ñi cümelcaleal. Femngechi dungu rupai quiñe lamngen precursorangelu. Taiñ lamngen huesa duameleyu cangelu lamngen, fei feipi: “Ñi feipin chüngarquefeneu reque quiñe cuchillo mu, rume cutrantuquefun. Iñche ayüquelafun rume ñi amuldungual fei iñchiu. Niehuelafun ta ayühun” pi taiñ lamngen. Taiñ lamngen rüfngei tañi huesa duamelngeel. Femngefulu rume, illcutunielafi tañi huesa femeteu. Quisu mu müten raquiduamlai. ¿Chumngelu femi? Taiñ lamngen papeltui ti troquiñ “Perdonemos de corazón” tripalu La Atalaya 15 octubre, 1999 tripantu. Fei tañi ñom piuquengen mu, feimu inafi ti ngülam ca perdonafi ti lamngen  tañi huesa femeteu. Taiñ lamngen ca feipi: “Iñche quimtucun, com iñchiñ nehuentuuqueiñ taiñ doi cüme cristianongeal. Ca Jehová eluucülei taiñ perdonayaeteu fill antü. Feula ta doi cüme duamcületun ca nietun ayühun” pi taiñ lamngen.

14. 1) Ñi feipin Mateo 18:21, 22, ¿chem dungu cüdautuquefui chi ñi femal ta Pedro? 2) Cüdautuliyiñ taiñ perdonacheal, ¿chem quelluafeiñmu?

¹⁴ Iñchiñ quimnieiñ mülei taiñ perdonacheal. Huelu quiñeque mu, cüdaungeafui taiñ femal. Ti apostol Pedro ca cüdautupelafui ñi perdonacheal (papeltunge Mateo 18:21, 22). ¿Iñchiñ cai? ¿Chem quelluafeiñmu taiñ perdonacheal? Ngüneduamaiñ cüla dungu. Quiñe, raquiduamaiñ ta Jehová fentrenque rupa ta perdonaqueiñmu (Mat. 18:32, 33). ¿Inei ürque anta iñchiñ taiñ perdonayaeteu Jehová? Huelu ca femngechi perdonaqueiñmu (Sal. 103:8-10). Cafei ti Biblia mandaqueiñmu taiñ “hueluconquechi piuqueyehual”. Ngelai taiñ raquiduamal taiñ perdonayafiel chi cam perdonanoafiel taiñ pu peñi ca pu lamngen. Rumel mülei taiñ femal (1 Juan 4:11). Epu, raquiduamaiñ chumngelu fente cümei taiñ perdonacheal. Perdonacheliyiñ, quelluafiyiñ taiñ huesa femeteu ca quelluntucuaiñ ñi quiñeucüleal ti trahunche. Cafei cuidanieafiyiñ taiñ hueniyeniefiel Jehová ca doi cüme duamcüleaiñ (2 Cor. 2:7; Col. 3:14). Cüla, llellipunieafiyiñ ta Jehová. Duamnieiñ ñi quellun ñi quiñeucüleal ti trahunche. Fei llellipuliyiñ, eluñmalayafiyiñ ta Huecüfü taiñ püntünentuaeteu taiñ pu peñi, pu lamngen mu (Efes. 4:26, 27).

15. Ñi feipin Efesios 4:32, ¿chumafuiñ huesa duameleliyiñmu quiñe peñi cam quiñe lamngen?

¹⁵ Quiñe peñi cam quiñe lamngen ñi feipin cam femün mu huesa duameleliyiñmu,  ¿chumafuiñ? Llellipun mu feipiafiyiñ ta Jehová chem mülen taiñ piuque mu. Pediafiyiñ Jehová taiñ quelluaeteu, femngechi taiñ peal ñi cüme piuquengen taiñ huesa duameleteu. Ca feipiafiyiñ Jehová ñi quelluafiel (Luc. 6:28). Huelu upenofiliyiñ ñi femün cam ñi feipin feiti peñi cam ti lamngen, ¿chumafuiñ? Quintuaiñ chumngechi taiñ nütramcayafiel. Cümeafui taiñ famngechi raquiduamal: “Feiti che ayülafui tañi huesa duamelaeteu” piaiñ (Mat. 5:23, 24; 1 Cor. 13:7). Fei nütramcayafiyiñ ti che. Huelu pinole ñi allcütual, mülei taiñ poyenieafiel müten. Mülei taiñ nieal ta paciencia, ca femngechi maneluucüleaiñ ñi cümelcautual (papeltunge Efesios 4:32). Ngelai taiñ illcutunieafiel. Femliyiñ, Jehová hueniyehuelayafeiñmu. Eluulayaiñ chem no rume taiñ huelulcayaeteu, femngechi pengelcünuaiñ taiñ doi piuqueyeniefiel Jehová (Sal. 119:165).

16. ¿Chem mülei taiñ femal com iñchiñ?

¹⁶ Rume mañumniefiyiñ ta Jehová taiñ quiñentrür cüdaucülequen taiñ pu peñi ca pu lamngen iñchiñ (Juan 10:16). Ti lifru Organizados para hacer la voluntad de Jehová, pagina 165 feipi: “Com iñchiñ mülei taiñ quellual fei ñi quiñeucüleal ti trahunche”. Ca feipi: “Jehová reque, cüme raquiduam mu pefiliyiñ taiñ pu peñi, pu lamngen, cüme yeucüleaiñ”. Jehová pichiqueche reque penieiñmu, feimu falintuqueiñmu. Ca femngechi peafiyiñ taiñ pu peñi, pu lamngen. Chem dungu rume femliyiñ taiñ cuidayafiel ca quelluafiel engün, Jehová rume falintuquefi (Mat. 10:42).

17. ¿Chem eluucüleiñ taiñ femal?

¹⁷ Rume piuqueyeniefiyiñ taiñ pu peñi ca pu lamngen. Feimu eluucüleaiñ taiñ huesa duamelnoafiel engün (Rom. 14:13). Raquiduamaiñ tañi doicülen iñchiñ mu, cafei perdonanieafiyiñ com piuque mu. Eluucüleaiñ taiñ huelulcanoaeteu quiñeque mu ñi femquen ca ñi feipiquen taiñ pu peñi, pu lamngen. Feimu femaiñ chem rume taiñ cüme yeucüleal ca taiñ hueluconquechi yafültucuhual (Rom. 14:19).