FÜTRA cuifi, pu israelita hulqueingün plata tañi quelluntucual Jehová tañi dungu. Jesús ñi antü mu, pu judio culliqueingün fentren impuesto, feimu rume cüdautuquefuingün tañi nieal plata.

Cuifi mu, pu judio niefui quiñe moneda siclo pingelu ca quiñe moneda dracma pingelu. Quiñe siclo trürcülefui 4 dracma mu. Fei com pu judio huentru mülefui ñi cullial engün rangiñ siclo cam epu dracma, femngechi quelluntucuqueingün ngillatuhue ruca mu. Jesús ñi antü mu, feichi plata pünengequei ñi femngeal sacrificio ca ñi cullingeal chi cüdau femngequeel ngillatuhue ruca mu. Quiñe antü, Pedro ramtungei: ‘¿Chem raquiduamquei Jesús tüfachi impuesto mu?’. Jesús feipi: ‘Huesa dungu no tati tañi cullial ti impuesto’. Jesús feipifi Pedro: ‘Yemenge quiñe moneda ñi cullial chi impuesto’ (Mat. 17:24-27).

Feichi antü mu, pu judio culliquei cangelu impuesto, diezmo pingelu. Mülei tañi cullial mari troquiñ tañi cosechael engün ca com tañi llouqueel engün (Lev. 27:30-32; Núm. 18:26-28). Pu loncolechi religioso doi amulelquefingün pu judio ñi cullial. Feipiquei ca quiñeque chi tucucan mu com ñi cullial engün. Ca feipiqueingün tañi cullial mari troquiñ tati menta, anis ca tati comino mu. Jesús ‘cümelai ñi cullingeal’ pilai. Doi mai feipi pu loncolechi religioso inaquelafingün doi falin-ngechi dungu ñi feipin chi ley dungu (Mat. 23:23).

Feichi antü mu, pu judio ngüneniequeyu pu romano. Feimu mülefui tañi cullial impuesto engün. Feimu nielu mapu mülefui ñi cullial, plata ngeafui rume ca tañi hulqueel tañi mapu. Tati cosecha mu entule 100 kilo, chem ngefule rume, mülefui ñi eluafiel 20, 25 kilo tati pu romano. Ca femngechi cangelu impuesto mülefui. Caque quisuque che mülefui tañi culliafiel. Tüfachi impuesto mu, Jesús ramtungei: “¿Cümei am tañi cullingeal impuesto ta César, cam cümelai?”. Jesús lloudungufi engün: “Elufimün tati emperador quisu tañi coneltuleel, ca elufimün ñi coneltuleel ta Ngünechen” (Mat. 22:15-22).

Mülei cangelu impuesto. Fillem producto yengele cañpüle, mülei ñi cullial impuesto engün. Ca femngechi cüpal-le engün, ca mülefui ñi cullial impuesto engün. Tüfachi impuesto cullingequei puerto mu, ca puente mu, ñi conpual huaria mu, mercado mu.

Fentren impuesto mülefui, feimu müna cüdautufui pu judio ñi culliafiel pu romano. Feimu quiñe historiador romano feipi: “Jesús ñi antü mu, pu che mülequelu Siria mu ca Judea pepi cullilaingün ti impuesto, feimu feipifingün pu romano ñi doi pichin culliafiel”.

Tati pu judio mülefui ñi culliafiel tati cofraquelu impuesto. Tüfa engün doi cofraquefingün tati pu judio, fei ñi doi nieal plata. Quiñeque tüfachi cofraquelu impuesto niequeingün cüdaufe tañi cofrayal chi impuesto. Tüfachi pu cüdaufe ca allmalltuquefuingün tañi cofrayal. Quiñe huentru Zaqueo pingelu, niequefui femngechi cüdaufe ñi cofrayafiel ti impuesto (Luc. 19:1, 2). Felei llemai, tati pu cofraquelu impuesto rume allmalltuquefuingün, feimu üdequeyu tati pu che.