1. ¿Chem feipi ti rey Salomón? (Eclesiastés 7:20).

 TI REY Salomón feipi: “Mapu meu tunte norngele rume quiñe che, rumel femquelai cümeque dungu ca culpaquei” (Ecl. 7:20). Tüfa rüfngei, com huelulcauqueiñ (1 Juan 1:8). Culpan chengelu am iñchiñ feimu duamnieiñ taiñ perdonayaeteu Jehová ca caquelu pu che.

2. ¿Chum duamqueimi perdonaelmu quiñe hueni?

² Tami mongen mu, ¿quiñeque mu huesa duamelquefimi tami hueni? Femfulmi, ayüniefuimi tamu cümelcautual. Feimu huiñoduamtuen feipifimi com tami piuque mu. Fei tami hueni huiñoduamtueimu. Femün mu tüfa, ¿cüme duampelaimi?

3. ¿Chem peaiñ feula?

³ Com iñchiñ ayünieiñ taiñ hueniyeafiel Jehová, huelu quiñeque mu huesa duamelafuiñ taiñ feipin mu ca taiñ femün mu. Huelu Jehová ayüniei taiñ perdonayaeteu. ¿Chumngechi quimiyiñ tüfa? ¿Chumngelu trürümfalngelai Jehová chumngechi tañi perdonachequen ca iñchiñ taiñ perdonachequen mu? ¿Inei am perdonaquefi Chau Ngünechen? Com tüfa peaiñ feula.

4. ¿Chumngechi quimiyiñ Jehová eluucülei tañi perdonacheal?

⁴ Biblia mu feipilei Jehová eluucülei taiñ perdonayaeteu. Por ejemplo, quiñe huerquen püllü mu  Jehová feipilelfi ta Moisés: “Jehová, Jehová, quiñe Ngünechen cutranduamyechequelu, cutranpiuqueyechequelu, ca lladcüfemquenolu, rume piuqueyechequelu ca rüfngelu, nor piuqueyequefilu ta huarancaquechi pu che, huiñoduamtuquefilu huelulcan, huesa femün ca ti culpan” (Éx. 34:6, 7). Felei, Jehová rume piuqueyechequei ca cutranpiuqueyechequei. Feimu quiñe che huesa femle huelu rüf repentiutule, Jehová eluhuai tañi perdonayafiel (Neh. 9:17; Sal. 86:15).

5. Cüme quimnieiñmu Jehová, feimu ¿chumquei? (Salmo 103:13, 14).

⁵ Jehová deumaeiñmu feimu cüme quimnieiñmu. ¡Afmatufali! Jehová fente cüme quimniei ñi chumngen caque quiñeque che (Sal. 139:15-17). Feimu cüme quimniei chem mu huelulcauqueiñ. Doi mai, cüme quimniei com taiñ rupan taiñ mongen mu, feimu quimniei taiñ chumngechi chengen ca chumngelu femqueiñ quiñeque dungu. Taiñ cüme quimnieteu Jehová, ¿chumquei? Cutranpiuqueyequeiñmu (Sal. 78:39; papeltunge Salmo 103:13, 14).

6. ¿Chumngechi pengeli Jehová ñi ayünieel taiñ perdonayaeteu?

⁶ Jehová cüme quimniei culpalu mu ta Adán com iñchiñ culpafe chengeiñ ca laqueiñ (Rom. 5:12). Ngelai chem no rume taiñ femal femngechi taiñ culpanoal ca lanoal (Sal. 49:7-9). Huelu Jehová cutranpiuqueyeiñmu ca lifrecünueiñmu. ¿Chumi? Chumngechi feipi Juan 3:16, Jehová huercüfi tañi Fotüm ñi lapayal iñchiñ taiñ duam mu (Mat. 20:28; Rom. 5:19). Jesús lapai ñi lifrecünuafiel com pu pengelquelu maneluhun quisu mu (Heb. 2:9). Jehová pefiel ñi lan tañi Fotüm, ¿rume cutrancaupelai? Femün mu tüfa pengeli Jehová ayüniefui taiñ perdonayaeteu.

7. Chumngechi pefiyiñ, ¿inei perdonafi Jehová?

⁷ Biblia mu nütramcangei Jehová ñi perdonafiel fentren che (Efes. 4:32). ¿Inei mu am raquiduamafuiñ? ¿Ti rey Manasés peno? Tüfachi huentru fütra culpai Jehová ñi adquiñ mu. Poyefi  coilaque dios ca feipifi caquelu che ñi ca femngechi femal. Langümfi tañi pu yall ca chalintuculelfi tañi pu dios. Ca femngechi tucui quiñe adentun Jehová tañi ngillatuhue ruca mu. Biblia feipi Manasés femlu fentren huesaque dungu lladcülcafi ta Jehová (2 Crón. 33:2-7). Femün mu rume tüfa, Manasés repentiutui com tañi piuque mu. Fei Jehová huiñoduamtueyu ca elcünufi tañi ngünenietual Jerusalén mu (2 Crón. 33:12, 13). Ca raquiduamafuiñ David mu, quisu ca rume fütra culpai. Por ejemplo, cudumuhui ca huentru ñi domo ca langümfalfi tañi füta. Huelu David huiñoduamtui ngüneduamlu tañi fütra culpan mu, fei Jehová perdonaeyu (2 Sam. 12:9, 10, 13, 14). Feimu, iñchiñ maneluuqueiñ Jehová ñi eluucülen taiñ perdonayaeteu. Feula peaiñ chumngechi perdonachequei Jehová trürümfalngelai iñchiñ mu.

8. Jehová ñi Juez ngen, ¿chumquei ñi perdonacheal?

⁸ Jehová ti “doi fütra Juez mülelu com mapu meu” (Gén. 18:25). Quiñe cüme juez mülei ñi cüme adümafiel ti ley dungu. Jehová müten femngei. Quisu iñchiñ taiñ Juez, hulquelu ti ley dungu ca cüme adümquefilu (Is. 33:22). Jehová müten fente cüme quimniei chem ñi cümelcalen ca chem ñi cümelcalenon. ¿Ca chem mülefui ñi femal quiñe cüme juez? Petu ñi juiciantucunofiel quiñe che, mülefui ñi quimtucual com ñi rupan. Jehová ca com cüme quimniei ñi rupan, feimu cüme Juez ngei.

9. ¿Chem pequei Jehová quiñe che mu tañi perdonayafiel?

⁹ Jehová cüme quimniei com taiñ rupaquen, huelu pu juez femquelaingün (Gén. 18:20, 21; Sal. 90:8). Pu che juzgaquei tañi pequeel ca tañi allcüqueel mu müten. Huelu Jehová cüme quimniei ñi chumngen ti che, chumngechi ñi tremümngen, inei engün mülequei, inei hueniyequefi. Ca femngechi quimniei ñi chumlen tañi raquiduam pu che. Jehová ca quimniei pu che chem fillque raquiduam niei tañi piuque mu. Chem no rume ellcalayafuiñ Jehová ñi adquiñ mu (Heb. 4:13). Feimu, Jehová perdonaquefi quiñe che cüme quimlu cai com ñi rupan.

10. ¿Chumngelu feipiafuiñ Jehová nor dungu mu juzgaquei? (Deuteronomio 32:4).

¹⁰ Jehová juzgaquefiel mu quiñe che, nor dungu mu femquei. ¿Chumngelu feipiafuiñ? Quisu dullichequelai. Jehová ñi perdonacheal ngüneduamquelafi ñi adngen, ñi ricungen cam ñi nieel fentren adümuhun (1 Sam. 16:7; Sant. 2:1-4). Inei no rume obligalayafui ta Jehová ñi femal quiñe dungu ca eluucülelai ñi elungeal plata femngechi ñi rulpacünual ti huesa dungu (2 Crón. 19:7). Jehová illcunquechi femlayai chem no rume, ca duamfalngele ñi femngeal quiñe dungu, ngüneulayai ñi femal (Éx. 34:7). Felei, Jehová tati doi cüme Juez, com cüme quimnielu iñchiñ mu (papeltunge Deuteronomio 32:4).

11. ¿Chumngelu trürümfalngelai Jehová tañi huiñoduamtuchequen?

¹¹ Pu huentru huirintuculu ti Hebreo Huirintucun quimtucuquefuingün Jehová ñi perdonachequen trürümfalngelai.  ¿Chumngelu quimiyiñ tüfa? Quiñeque rupa mu, pünequeingün quiñe dungun hebreo quehun mu, tüfa pengeli Jehová müten ñi pepi perdonayafiel quiñe che culpalu. Felei llemai, Jehová müten niei tati autoridad ñi huiñoduamtuafiel quiñe che culpalu huelu rüf repentiulu. Feula peaiñ, ¿chem rupaquei taiñ perdonaeteu mu Jehová?

12, 13. 1) Perdonaeliyiñmu Jehová, ¿chum duamqueiñ? 2) Culpalu iñchiñ huelu repentiuliyiñ, ¿acordaniequefi Jehová taiñ culpan? ¿Chumngelu?

¹² Quimtuculiyiñ chumngechi taiñ perdonaeteu Jehová feula, cüme duamcüleaiñ ca tüngcületuai taiñ raquiduam (Hech. 3:19). Perdonaeliyiñmu Jehová, quisu eluuquei iñchiñ taiñ huiño hueniyetuafiel. Fei ngoimanentuquei taiñ culpan.

¹³ Culpaliyiñ huelu perdonaeliyiñmu Jehová, eimi femngechi culpaimi cuifi pilayaiñmu ca castigalayaiñmu taiñ culpan mu (Is. 43:25; Jer. 31:34). Biblia feipi Jehová mu: “Tunte alü camapulelu ti tripahue antü ca ti conhue antü mu, ca femngechi alü camapucünui taiñ culpan” (Sal. 103:12). * Raquiduamlu iñchiñ chumngechi taiñ perdonaeteu Jehová, mañumcüleiñ ca afmatulehueiñ (Sal. 130:4). Feula peaiñ inei am perdonaquefi Jehová.

14. ¿Chem quimürpuiñ Jehová ñi perdonachequen mu?

¹⁴ Chumngechi taiñ pefiel, pichi culpaliyiñ cam fütra culpaliyiñ, Jehová perdonayafeiñmu. Ca peiñ Jehová iñchiñ taiñ deumaeteu, tati hulquelu ley ca iñchiñ taiñ Juez, feimu feipiafui taiñ perdonayaeteu cam tañi femnoal. ¿Chem mu raquiduamquei Jehová petu ñi huiñoduamtunofiel quiñe che? Peaiñ.

15. ¿Chem mu raquiduamquei Jehová petu ñi huiñoduamtunofiel quiñe che? (Lucas 12:47, 48).

¹⁵ Quiñe dungu ñi raquiduamqueel Jehová: ti che culpalu ¿rüf quimtucupei mai ñi huesa femün? Jesús pengeli tüfa Lucas 12:47, 48 (papeltunge). Quiñe che huelulcamequele  quimnien mu ñi huesalcamequen, Jehová huiñoduamtulayafeyu (Mar. 3:29; Juan 9:41). Huelu, quiñeque mu huesaque dungu femquefuiñ quimnien mu taiñ huesalcamequen, fei ¿perdonapeafeiñmu mai ta Jehová? Femafui llemai. ¿Chumngelu feipiafuiñ? Feula peafiyiñ ca chem ñi raquiduamqueel Jehová ñi perdonayafiel quiñe che.

16. ¿Chumquei quiñe che rüf repentiutulu? Ca ¿chumngelu falin-ngei tüfa?

¹⁶ Ca dungu ñi raquiduamqueel Jehová: ti che culpalu, ¿rüf repentiutui? Quiñe che rüf repentiulu cacünutuquei ñi raquiduam ñi niequefel ta cuifi. Ca femngechi hueñancülequei ti huesaque dungu ñi femel mu, ca huesa duamquei ñi femnon mu tañi femafel. Huelu fei müten no. Ti che rüf repentiulu ca huesa duamquei tañi cüme hueniyenofiel ta Jehová cuifi mu ñi culpan. Acordayaiñ ñi rupan ti rey Manasés ca David. Fei engu fütra culpaingu huelu rüf repentiutuingu, feimu Jehová huiñoduamtueyu engu (1 Rey 14:8). Feimu llemai, rüf repentiutuliyiñ, Jehová perdonayaiñmu. Huelu culpaliyiñ, ¿re duamfali taiñ huesa duamcüleal müten? Femlai. Ca dungu mülei taiñ femal. * Peafiyiñ.

17. ¿Ca chem duamfali taiñ femal? Ca ¿chumngelu falin-ngei? (Isaías 55:7).

¹⁷ Ca dungu ñi ngüneduamqueel Jehová: ti che mülei ñi femhuenoal ti huesa dungu ca mülei ñi yenieal quiñe cüme mongen chumngechi ñi ayüqueel ta Jehová (papeltunge Isaías 55:7). Ti che mülei ñi huecünutual ñi raquiduam ca eluucüleai ñi adnieaeteu ta Jehová (Rom. 12:2; Efes. 4:23). Mülei ñi elcünual ñi huesa raquiduam ca ti huesaque dungu ñi femel ta cuifi (Col. 3:7-10). Huelu loncontucuaiñ: Jesús ñi lan mu perdonangequeiñ taiñ culpan mu. Feimu, pengelcünuliyiñ taiñ feyentulen Jesús tañi lan mu ca rüf repentiuliyiñ ca  eluuliyiñ taiñ cacünutual taiñ mongen, Jehová perdonayaiñmu (1 Juan 1:7).

18. ¿Chem ngüneduamiyiñ chumngechi ñi perdonachequen Jehová?

¹⁸ ¿Chem falin dungu inaduampeiñ tüfachi troquiñ mu? Jehová trürümfalngelai chumngechi ñi perdonachequen. ¿Chumngelu feipiafuiñ tüfa? Hunelu mu, Jehová rumel eluucülei ñi perdonacheal. Epu, Jehová cüme quimnieiñmu, quimniei taiñ chumngen ca taiñ rüf repentiucülen cam taiñ repentiucülenon. Ca cüla, huiñoduamtueliyiñmu Jehová, ngoimanentuquei reque taiñ culpan. Femngechi, cüme raquiduam nietuafuiñ ca huiño hueniyetuafuiñ ta Jehová.

19. Culpan chengeliyiñ rume, ¿chumngelu ayüucüleafuiñ?

¹⁹ Culpan chengelu am iñchiñ huelulcahuaiñ. Ñi feipin ti Perspicacia para comprender las Escrituras, volumen 1, pagina 209 rume yafültucuafeiñmu. Feipi: “Jehová cutranpiuqueyequefi tañi pu poyequeteu ca quimniei ñi culpan chengen engün. Feimu ngelai ñi fill antü hueñanquiyahual tañi culpan chengen mu ca tañi huesa femel mu engün (Sal. 103:8-14; 130:3). Com ñi nehuen mu eluule engün ñi inayal Jehová ñi rüpü tañi mongen mu, ayüucüleafuingün (Filip. 4:4-6; 1 Juan 3:19-22)”. Rume tüngduameleiñmu tüfa, ¿felelai am?

20. ¿Chem peaiñ cüpalechi troquiñ mu?

²⁰ Felei llemai, Jehová eluucülei taiñ perdonayaeteu rüf repentiuliyiñ. Müna mañumcüleiñ. Huelu iñchiñ, ¿chumngechi inayentuafuiñ Jehová ñi perdonachequen? Iñchiñ taiñ perdonachequen ca Jehová ñi perdonachequen, ¿chem mu trürümfalngei ca chem mu trürümfalngelai? ¿Chumngelu falin-ngei taiñ quimal tüfa? Ca troquiñ mu peaiñ tüfa.