1. ¿Chem llican dungu chaftuafuiñ?

 NGÜNEDUAMAIÑ chem dungu ñi rupan tañi mongen mu tüfachi pu peñi ca pu lamngen. Néstor ca tañi domo María ayüniefuingu ñi cañpüle huiñamtuhual cheu ñi doi duamniengeel quellu. * Huelu tañi femürpual engu, mülefui tañi doi pichin plata mu tañi mongeluhual, feimu rume llicalefui ñi ayüucülenoal engu. Peaiñ chem ñi rupan taiñ peñi Pedro. Tañi pais cheu tañi mülen mu caiñetungequei pu testigo. Testigongerpulu, ngüneduami quisu tañi ca caiñetungeal, fei rume llicaniefi. Huelu doi llicalefui tañi caiñetuaeteu tañi familia. Inaduamaiñ chem ñi rupan Valeria nielu quiñe huesa cutran, cancer pingelu. Quisu ayülefui ñi inayafiel ñi feipin Biblia mollfüñ dungu mu, huelu rume cüdautui ñi peal quiñe doctor tañi quelluaeteu. Llicalefui tañi layal.

2. ¿Chumngelu mülei taiñ ngüneafiel ti llican dungu?

² Chumngechi ñi rupan tüfachi pu peñi ca lamngen, iñchiñ ca femngechi llican dungu chaftuquefiyiñ chi. Ngünenienofiliyiñ ti llican dungu, huesa dungu dulliafuiñ fei püntütripayafuiñ Jehová mu. Fei ayüniei ta Huecüfü. Taiñ llican mu Huecüfü allmalltufemafui taiñ huelulcayaeteu, femngechi taiñ femnoal Jehová taiñ feipieteu, quiñe tüfa amuldungunoal (Apoc. 12:17). Felei Huecüfü ñi rume huesañmangen ca pepiluhun-ngen, huelu chaftuafuiñ. ¿Chumngechi? Peafiyiñ.

3. ¿Chem quelluafeiñmu taiñ llicalenoal?

³ Chaftuafuiñ tati Huecüfü maneluucüleliyiñ Jehová mu taiñ piuqueyeteu ca taiñ quelluqueteu (Sal.  118:6). Ti huirintuculu Salmo 118 rupai rume huesaque dungu mu. Niequefui fentren caiñe, quiñeque tüfa ülmenque che (versiculo 9, 10). Quiñeque mu fütraque dicümtucu dungu mu rupai (versiculo  13). Ca quiñeque mu Jehová norümtueyu (versiculo  18). Rupan mu rume tüfachi huesaque dungu, feipi: “Llicalayan”. ¿Chumngelu fente maneluucülefui? Fei quimniefui tañi piuqueyeteu tañi Chau Jehová tañi norümeteu rume. Chem dungu mu rupafule rume, ti salmista maneluucülefui tañi piuqueyen Chau Jehová eluucülei tañi quelluaeteu (Sal. 118:29).

4. Maneluucüleliyiñ Jehová taiñ piuqueyeteu, ¿chem cüla dungu llicanielayafiyiñ?

⁴ Quisuque iñchiñ mülei taiñ maneluucüleal Jehová taiñ piuqueyenieteu. Tüfa quelluafeiñmu taiñ huehuafiel ti cüla dungu. 1) Chumngechi eluafiel com tañi duamnieel taiñ pu che. 2) Chumngechi llicanoafiel tati pu che. 3) Chumngechi llicanoafiel tati lan dungu. Taiñ nütramcaelchi pu peñi ca lamngen hunen parrafo meu maneluhuingün Jehová tañi piuqueyeteu, feimu llicanielafingün tüfachi cüla dungu.

5. ¿Chem huesa dungu raquiduamelafeyu pu peñi loncolelu ñi pu che mu? (Inaduamnge ti adentun hunen pagina mu).

⁵ Pu peñi loncolelu tañi familia meu rume yafüluuquei ñi dapiafiel tañi pu che (1 Tim. 5:8). Eimi am loncolelu tami pu che mu, rume huesa duameleimu tüfachi COVID-19 tami nienoal cüdau. Raquiduamimi chi chumngechi ñi dapiafiel tami pu familia cam chumngechi ñi cullial ti arriendo. Ca raquiduamimi chi huemünentungelmi tami cüdau mu, ca huiño petulayaimi chi cheu tami cüdahual. Néstor ca María reque, taiñ peel hunen parrafo mu, raquiduamimi chi tami mongeluunoal doi pichin plata mu. Femngechi llican dungu mu Huecüfü allmalltuquei ñi püntünentuafiel fentren che Jehová mu.

6. ¿Chem raquiduamelqueiñmeu mai Huecüfü?

⁶ Satanás ayülei taiñ feyentual taiñ duamtunienoeteu Chau Jehová. Ca raquiduamelqueiñmu pepi dapinofiliyiñ taiñ pu che, Jehová duamcülelayai. Feyentuñmafiliyiñ tañi pin, fei doyümafuiñ taiñ cüdaucüleal müten, femngechi taiñ püntünentuaeteu Jehová mu.

7. ¿Chem feipinieiñmu Jesús?

⁷ Jesús müten rüf cüme quimniefi tañi Chau Jehová. Feimu feipinieiñmu: ‘Tamün Huenu Chau deu quimniei chem tamün duamtunien, petu tamün ngillatunofiel rume’ (Mat. 6:8). Jesús ca quimniei taiñ Chau Jehová taiñ eluaeteu com taiñ duamnieel. Jehová feipiniefi pu ngen familia ñi eluafiel tañi pu che com tañi duamnieel (1 Tim. 5:8). Quisu am loncolelu iñchiñ mu fei eluaiñmu com taiñ duamnieel.

8. 1) Taiñ llicanoal, ¿chem quelluaiñmeu taiñ eluafiel com ñi duamnieel taiñ familia? (Mateo 6:31-33). 2) ¿Chumngechi inayentuafuiñ ti curehuen mülelu ti adentun mu?

⁸ Maneluucüleliyiñ Jehová taiñ piuqueyeteu, rüf quimtucunieaiñ taiñ eluaeteu com taiñ duamnieel (papeltunge Mateo 6:31-33). Jehová ayüniei taiñ eluaeteu, ayühunquechi eluqueiñmu com taiñ duamnieel, doi eluqueiñmu cütu. Jehová deumafilu ti mapu elulaeiñmu taiñ duamnieel müten, fei afmatufali ñi apolfiel ti mapu epe fillem taiñ ayüucüleal  (Gén. 2:9). Pichin iyael müten nieliyiñ rume taiñ rulpaantüal, mañumafiyiñ ta Jehová, fei am taiñ elueteu (Mat. 6:11). Chem rume elcünuliyiñ taiñ poyeafiel ta Jehová, mülei taiñ quimtucunieal taiñ doi eluaeteu feula, ca cüpalechi antü mu ti rumel mongen. Néstor ca María quimürpuingu tüfa (Is. 65:21, 22).

9. ¿Chem quimeltueimu ñi rupan Néstor ca María?

⁹ Néstor ca María mülequefuingu Colombia mapu mu. Cüme rupalequefuingu, nieingu quiñe cüme cüdau ca quiñe cüme ruca. Huelu ayüleingu tañi doi cüdahuelafiel ta Jehová. Huelu llicalefuingu ñi cümelcalenoal doi pichin plata mu. ¿Chem femingu ñi llicahuenoal? Raquiduamtucuingu tunte rupachi Jehová tañi quellunieteu. Rume maneluhuingu Jehová tañi quisucünunoaeteu. Feimu elcünuingu tañi cüme cüdau, fendefingu tañi ruca, fei ca müten pepicahuingu ñi amual cañpüle cheu ñi doi duamniengeel quellu tañi amuldungual. ¿Chum duamingu tañi cüme dullin mu? Néstor feipi: “Rüf feingei ñi feipilen Mateo 6:33. Chumcaunorume fillañmalayu, feula queta ayüucüleyu”.

10. ¿Chumngelu pu che llicaniefi tañi pu chafche?

¹⁰ Ellaca mu ca fantepu mu pu che hueluquentu huesalcauquei (Ecl. 8:9). Quiñeque che allmalltuquei tañi autoridadngen mu ñi huesalcayafiel pu che. Ca pu hueñefe allfülcachequeingün, langümchequeingün cütu. Pu compañ colegio mu lucatuuquei, yamuuquelai. Ca quiñeque che ahucaquefi quisu tañi pu familia. Feimu lle, pu che llicaniefi tañi pu chafche. ¿Chumngechi allmalltuquei Huecüfü ti llican dungu mu? Peafiyiñ.

11, 12. ¿Chumngechi allmalltuquei Satanás taiñ llicaniefiel caquelu pu che?

¹¹ Huecüfü adcünuquei taiñ fütra llicayafiel pu che, femngechi taiñ amuldunguhuenoal ca taiñ femnoal taiñ feipieteu Jehová. Quisu adcünuquefi pu gobierno taiñ inacayaeteu, ca catrütuqueiñmu taiñ amuldunguhuenoal (Luc. 21:12; Apoc. 2:10). Huecüfü ngüneniefilu am pu che, tüfa engün huesa dunguyequefingün pu Dunguquelu Ineingen Jehová, re coilatuqueingün. Tüfachi pu che feyentuquelu tüfachi coila  dungu duamtuhuelayafeiñmu, huesa dunguyeafeiñmu ca hulelcayafeiñmu (Mat. 10:36). Afmatulquelaeiñmu Huecüfü tañi ngünencan, tüfachi dungu ca rupai hunen siglo mu (Hech. 5:27, 28, 40).

¹² Huelu ca quiñe dungu pünequei Huecüfü taiñ llicalcayaeteu. Quiñeque che ñi testigongerpual llicaniefingün tañi pu familia, fei ta doi llicalcaeyeu tañi cutrancangen. Fente tañi piuqueyefiel tañi pu familia ayüqueingün ñi poyeafiel ta Chau Jehová. Rume cutrantupiuquequei ñi huesa dunguyefiel ta Jehová ca tañi pu che. Quiñeque mu, tati pu familia llouquelafui tati rüf dungu, huelu rupachi antü mu poyerpufingün ta Jehová. Huelu quiñeque taiñ pu familia duamtuhuenoeliyiñmu taiñ testigongen, ¿chumafuiñ?

13. Caiñetueteu mu taiñ pu che, ¿chumngechi quelluafeiñmu raquiduamal Jehová taiñ piuqueyenieteu? (Salmo 27:10).

¹³ Ñi feipin Salmo 27:10 rume falin-ngei ca yafüluhun-ngei (papeltunge). Raquiduamtucunieliyiñ fente taiñ piuqueyenieteu ta Jehová, llicanielayafiyiñ taiñ pu che caiñetueliyiñmu rume. Fei maneluucüleaiñ Jehová taiñ eluaeteu ti cullitu taiñ yafüluhun mu. Jehová eluaiñmu com taiñ duamnieel taiñ mongeleal, taiñ ayüucüleal ca taiñ tüngduamcüleal. Ca quelluaiñmu taiñ fülmanieafiel. Jehová müten femafui llemai. Tüfachi dungu mu rupai Pedro, taiñ nütramcapeel hunen parrafo mu.

14. ¿Chem quimeltueimeu Pedro ñi rupan?

¹⁴ Pedro eluhui ñi testigongerpual quimniefulu rume pu autoridad ñi inacayaeteu. Pedro feipi: “Quimniefun ñi inacangeal, huelu pu autoridad doicünuingün ñi huesalcaeteu. Huelu doyelchi mai llicaniefun tañi pu familia. Tañi testigongerpun mu rume cutrantupiuquelefun ñi huesa duamelafiel tañi chau ca tañi yamnienoaeteu tañi pu che”. ¿Chem quellueyu Pedro tañi llicahuenoal? Raquiduamtucuniefi Jehová tañi piuqueyenieteu ca ñi cuñiutucuquefiel tuchi tañi piuqueyeteu. Pedro ca feipi: “Raquiduamtucuniefiñ tañi pu peñi ca lamngen yafüluulu rupan mu fillan dungu mu, illamcan dungu ca ahucan dungu mu. Huelu Jehová quisucunulaeyu engün. Iñche quimniefun recüluuli  tañi Chau Jehová mu, quisu cümelcayaeneu. Mufü rupachi presuntucungen ca cüpafcangen. Femngechi cutrancahun mu rupan mu, pen quisu tañi nge mu chumngechi Jehová quelluquefi tuchi tañi nor piuqueyeteu” pi. Jehová quiñe rüf Chau ngerpui Pedro mu, ca ti trahunche tañi familiangerpui.

15. ¿Chumngelu llicaquefiyiñ ti lan dungu?

¹⁵ Biblia feipi tati lan dungu quiñe caiñengei (1 Cor. 15:25, 26). Raquiduamün mu ti lan dungu mu, rume huesa duamelafeiñmu. Doyelchi mai iñchiñ ca taiñ pu familia cutrancülele. ¿Chumngelu llicaqueiñ raquiduamün mu ti lan dungu? Jehová am deumaeiñmeu taiñ rumel mongeleal (Ecl. 3:11). Huelu llicafiel mu ti lan dungu quelluafeiñmu taiñ cuñiutucual taiñ mongen. ¿Chumngechi? Taiñ cüme dullial cümeque iyael, taiñ deportetual, taiñ quintual quiñe cüme doctor, taiñ lahuentual cutrancülen mu ca taiñ connoal cuñihun-ngechi dungu mu.

16. Huecüfü, ¿chumngechi allmalltuquei taiñ llicaniefiel ti lan dungu?

¹⁶ Satanás quimniei taiñ falintuniefiel taiñ mongen. Feimu, feipiquei iñchiñ quiñepülecünuafiyiñ müten ta Jehová taiñ mongeleal (Job 2:4, 5). Huelu Huecüfü huelulcahui llemai. Mai, Huecüfü niei pepiluhun tañi langümcheal, fei allmalltuquei taiñ llicaniefiel ti lan dungu femngechi taiñ püntünentuaeteu ta Jehová mu (Heb. 2:14, 15). Quiñeque mu, Huecüfü pünequefi quiñeque che taiñ feipiaeteu elcünunofilmi ta Jehová, langümngeaimi. Ca quiñeque mu, lef cutranrumeliyiñ cam allfürumeliyiñ, Huecüfü ca allmalltuquei taiñ huelulcayaeteu. Femngechi pu doctor ca taiñ pu familia dicümtucuafeiñmu taiñ tuculelngeal ta mollfüñ, femngechi taiñ pecancünuafiel Chau Dios ñi ley dungu. Ca quiñeque ngülamtuafeiñmu taiñ llohual quiñe lahuen Chau Dios tañi ayüquenoel.

17. ¿Chumngelu rume llicalayafiyiñ ti lan dungu? (Romanos 8:37-39).

¹⁷ Iñchiñ ayüquelaiñ taiñ layal, huelu quimnieiñ lafuliyiñ rume, Jehová piuqueyenieaiñmu (papeltunge Romanos 8:37-39). Lan mu Jehová tañi pu hueni, petu mongeleingün reque tañi raquiduam mu (Luc. 20:37, 38). Jehová raquiantülei tañi huiñomongeltuafiel engün (Job 14:15). Jehová fütra culli taiñ “nieal ta rumel mongen” (Juan 3:16). Cüme quimnieiñ fente taiñ piuqueyenieteu ta Jehová ca taiñ cuidaqueteu, feimu cutran mu iñchiñ ca aneltungen mu elcünuquelafiyiñ ta Jehová. Doi mai, doi fülconpuqueiñ Jehová mu, fei taiñ eluaeteu quimün, nehuen ca yafüluhun. Femngechi femingu Valeria tañi füta engu (Sal. 41:3).

18. ¿Chem quimeltueimu ñi rupan Valeria?

¹⁸ Valeria nielu 35 tripantu feipingei ñi nien quiñe cancer huesa cutran. Peaiñ chumngechi ti piuqueyen quellueyu ñi llicanoafiel ti lan dungu. Valeria feipi: “Tañi feipingen mu chem cutran ñi nien, cacünuñmaeiñmeu taiñ mongen. Mülefui ñi femal quiñe fütra operacion femngechi ñi mongetripayal. Quintufiñ fillque cirujano, huelu com ayüfuingün tañi tuculelaeteu mollfüñ. Rume llicalefun. Rume yamniefilu am Jehová iñche, turpu eluulayafun tañi tuculelngeal mollfüñ. Com tañi mongen mu, Jehová pengelelfeneu tañi piuqueyenieteu. Feula iñche mülefui tañi pengelelafiel tañi  piuqueyeniefiel. Huesaque dungu ñi feipingen mu, doi nehuenconquefun, femngechi Huecüfü ñi hueutripanoal. Iñche ayülefun tañi ayühuelafiel ta Jehová. Rupachi antü mu operangen, tuculelngelan mollfüñ, com cüme tripai. Amulei ñi chaftuniefiel ti cutran, huelu Jehová quisucunuquelaeyumu. Petu ñi feipingenon ñi nien cancer cutran, afchi semana chillcatufiyiñ ti troquiñ “Afrontemos con valentía los golpes de la vida”. * Tüfachi troquiñ rume yafültucueiñmeu, chillcatufiyu mufüque rupachi. Chillcatuyu tüfachi troquiñ ca caquelu, fentecünulayu tayu trahuluhual, amuldungual, femngechi tüngduamcüleyu ca cüme dulliyu tayu chumal”.

19. ¿Chem rupayai pichiñma mu?

¹⁹ Com huall mapu püle cutrancauquei pu peñi pu lamngen, huelu Jehová quellueyu engün, femngechi nehuencüleingün ca chaftuquefingün Huecüfü ñi huesa femquen (1 Ped. 5:8, 9). Eimi ca pepi femafuimi llemai. Pichiñma mu Jehová feipiafi ta Jesús ca tañi pu quellunieteu ñi apümcayafiel ñi femün ta Huecüfü (1 Juan 3:8). Deu rupale tüfa, Jehová tañi pu che mapu mu chem no rume llicalcahuelayaeyeu engün (Is. 54:14; Miq. 4:4). Petu ñi acunon feichi antü, yafüluucüleaiñ taiñ huehuafiel ti llican dungu.

20. ¿Chem quelluaiñmu taiñ huehuafiel ti llican dungu?

²⁰ Doi maneluucüleaiñ Jehová ñi piuqueyefiel ca cuidaquefiel tañi pu poyequeteu. ¿Chem quelluaiñmu taiñ doi maneluhual Jehová mu? Raquiduamaiñ chumngechi ñi cuidafiel Jehová tañi pu che cuifi mu, cafei nütramcalelafiyiñ ta caquelu. Ca quimtucunieaiñ chumngechi taiñ quellueteu ta Jehová rupayechi antü meu. Jehová tañi quellun mu, huehuafuiñ llemai ti llican dungu (Sal. 34:4).