QUIÑE lamngen, Lisa * pingelu, feipi: “Hue quimfilu iñche ti rüf dungu, afmatulehuen ñi piuqueyechefengen Jehová tañi pu che”. Cangelu lamngen, Ana pingelu, ca feipi: “Hue quimfilu iñche tati pu testigo, müte afmatulehuelan tañi enseñaqueel engün. Huelu mai, doi afmatulehuen tañi piuqueyechefengen engün”. Fachantü tüfachi epu lamngen ayühuelqueyu tañi papeltual Biblia, huelu tañi piuqueyechefengen pu peñi ca pu lamngen doi famtucupaeyu Jehová mu.

¿Chumngechi pengelafuiñ taiñ piuqueyechefengen femngechi taiñ puhual pu che ñi piuque mu? Peaiñ epu dungu: taiñ feipin mu ca taiñ femün meu pengelafuiñ taiñ piuqueyechefengen. Ca peaiñ inei pengelelafiyiñ taiñ piuqueyefiel.

Ti cüdaufengechi domo ñi nütramcael Proverbios capitulo 31 “piuqueyen meu entuquei ñi feipin” (Prov. 31:26). Feimu, tüfachi domo tañi piuqueyechefengen mu cüme raquiduamquei tañi chem pial ca cüme entuquei ñi feipin. Pu chau ca femngechi mülei ñi piuqueyenquechi dunguafiel tañi pu yall. Epe com pu chau quimniei huesa dungufile tañi pu yall, huesa duamelafingün ca allcütulayafeyu engün. Huelu piuqueyenquechi nütramcangele tati pu yall, cüdautulayai tañi allcütuafiel tañi pu chau.

Chaungefuliyiñ, chaungenofuliyiñ rume, ¿chem quelluafeiñmu taiñ piuqueyenquechi dungual? Proverbios 31:26 feipi: “Quimün meu dunguquei”. Quimchengeliyiñ, cüme dulliafuiñ taiñ feipial ca chumngechi taiñ feipial. Feimu, ramtuhuafuiñ: “Tañi feipial, ¿yafültucucheai cam huesa duamelcheai?” (Prov. 15:1). Feimu, cüme raquiduamliyiñ taiñ chem pial, pengelaiñ taiñ quimchengen.

Proverbios 12:18 feipi: “Tati feipingequeelchi dungun raquiduamngenon mu, tüfa quiñe allfeñ reque femquelu quiñe fütra cuchillo”. Ramtuhuafuiñ: “¿Huesa duamelpeafiñ mai ti che iñche tañi feipin mu?”. Femngechi raquiduamliyiñ, doi cuñiutucuhuaiñ taiñ chem pial. Piuqueyechefengeliyiñ, huesa duamel-layafiyiñ ta caquelu iñchiñ taiñ feipin mu (Efes. 4:31, 32). Cafei huesa raquiduam tucuquelaiñ taiñ lonco mu ca huesa piquelafiyiñ ta caquelu. Huelu mai, cümeque dungu raquiduamqueiñ ca piuqueyenquechi dunguqueiñ. Com feitachi dungu mu inayentuafuiñ ta Jehová. Quiñe rupa, Elías rume llicalefui. Fei, ¿chumi Jehová? Huercüfi quiñe cüme püllü ñi yafültucuafiel ta Elías. Feitachi cüme püllü ñochiquechi ca piuqueyenquechi dungufi ta Elías (1 Rey. 19:12). Huelu taiñ piuqueyechefengeal re pengelcünulayaiñ müten taiñ feipin mu, huelu mai taiñ femün mu cafei. ¿Chumngechi? Peafiyiñ.

Iñchiñ inayentuquefiyiñ ta Jehová, feimu taiñ feipin mu ca taiñ femün meu pengelqueiñ taiñ piuqueyechefengen (Efes. 4:32; 5:1, 2). Lisa, taiñ nütramcapeel hunen parrafo mu, pei chumngechi tati pu  testigo ñi piuqueyechefengen. Lisa feipi: “Quiñe rupa, tañi familia iñchiñ huiñamtuhuiyiñ cañpüle. Fei epu curehuen testigongelu pedingün permiso tañi cüdau mu taiñ quelluaeteu. Feichi mu, iñche papeltuquelafun rume ta Biblia tati pu testigo engün” pi taiñ lamngen. Tañi femün mu feitachi epu curehuen, Lisa ayüumafi tañi papeltuafiel ta Biblia.

Ana, taiñ nütramcapeel hunen parrafo mu, ca ngüneduami ñi piuqueyechefengen pu testigo. Quisu feipi: “Quiñeque che rume huesa duameleneu, feimu cüdautuquefun tañi maneluhual pu che mu. Feimu, quimfilu tati pu testigo ta iñche, maneluuquelafun quisu engün mu. Ramtuuquefun chumngelu am ta fente duamtuqueneu engün piquen. Huelu ti domo tañi enseñaleteu Biblia inaduamfiñ tañi rüf piuqueyeteu, re hun meu müten no, feimu maneluhun quisu mu. Fei eluhun tañi piuquentucual com tañi quimeltungeel”.

Felei llemai, feitachi epu lamngen pefiel mu ñi piuqueyechefengen pu testigo afmatulehuingu, fei ayüfuingu ñi quimafiel  ti rüf dungu. Tañi piuqueyeteu mu ti trahunche, feimu maneluhurpuingu Jehová mu ca tañi troquiñche mu.

Chumngechi tañi tremümngen mu ca tuhun-ngen mu, quiñeque che cüdautuquelai ñi ayelafiel ta caquelu che ca ñi piuqueyenquechi dunguafiel. Feita rume cümefui. Huelu taiñ tremümngen mu ca tuhun mu müten pengel-liyiñ taiñ piuqueyechefengen, pengel-layafuiñ chi chumngechi ñi piuqueyechefengen ta Chau Dios (ngüneduamafuimi Hechos 28:2).

Tati pu che llouquelu Chau Dios ñi nehuen pengelquei tañi rüf piuqueyechefengen (Gál. 5:22, 23). Feimu, ayüliyiñ taiñ pengelal tüfachi rüf piuqueyehun ca inayentuafiel ta Jehová ca Jesús, duamniefuiñ Jehová tañi nehuen. Iñchiñ am piuqueyefilu ta Jehová ca taiñ chafche, feimu rüf duamtuniefiyiñ ta caquelu che. Taiñ piuqueyechen am tripaquelu piuque mu, feimu ayühuelquefiyiñ ta Jehová.

Iñchiñ cüdautuquelaiñ taiñ pengelelafiel taiñ piuqueyefiel taiñ quimelchi che (2 Sam. 2:6). Iñchiñ pengelelquefiyiñ taiñ mañumtufiel (Col. 3:15). Huelu raquiduamliyiñ quiñe che piuqueyefal-lai tañi huesa chengen mu, ¿chumafuiñ?

Raquiduamaiñ tüfa: Jehová pengelelfi tañi piuqueyefiel com che, falintunoelieyu rume quiñeque che. Inei no rume Jehová reque femquelai. Tati Griego Huirintucun mu fentren rupa huirintucungei Jehová ñi cutranpiuqueyechequen. Chau Jehová, ¿chumngechi pengeli tüfa?

Chau Jehová eluquefi com che tañi duamnieel engün (Mat. 5:45). Doi mai, petu quimnofilu rume iñchiñ ta Jehová, pengeleiñmu taiñ cutranpiuqueyequeteu (Efes. 2:4, 5, 8). ¿Chumngechi? Huercüi tañi quiñen saquin Fotüm ñi montulafiel com pu che. Ti apostol Pablo feipi Jehová fente taiñ cutranpiuqueyequeteu com iñchiñ cümelcayafeiñmu Jesús tañi lan (Efes. 1:7). Cafei, huelulcaufuliyiñ rume cam hueñancülfuliyiñ rume ta Jehová, quisu enseñaniequeiñmu müten. Jehová tañi feipin “fürfür mahun” reque felei (Deut. 32:2). Fente taiñ piuqueyenieteu mu ta Jehová, turpu chem meu no rume cullilayafuiñ. Cafei, cüme quimnieiñ Chau Jehová cutranpiuqueyenoeliyiñmu, chem maneluhun no rume nielayafuiñ (ngüneduamafuimi 1 Pedro 1:13).

Jehová fente taiñ piuqueyenieteu mu fültucupaqueiñmu quisu mu, feimu ayüqueiñ taiñ inayentuafiel. ¿Chumngechi femafuiñ? Pengelel-layafiyiñ taiñ piuqueyeniefiel quiñeque che müten. Doi mai, fill antü piuqueyenieafiyiñ com che (1 Tes. 5:15). Piuqueyechefengeliyiñ, quiñe cütral reque feleaiñ eñumalquefilu ta che hutrelen mu. Femngechi cüme duamelafiyiñ taiñ pu familia, pu peñi ca lamngen trahunche mu, pu compañ cüdau mu ca colegio mu, ca taiñ pu vecino.

Ramtuunge: tami familia mu ca tami trahunche mu, ¿mülepei mai quiñe che tami pengelelafiel tami cutranpiuqueyefiel? Mülei chi quiñe peñi cam quiñe lamngen duamnielu ñi cuidalelngeal ñi ruca cam ñi ngillalelmengeal quiñeque chemcün supermercado mu. Fei, ¿chumafuiñ? Eluhuaiñ taiñ quelluafiel. Cafei, amuldunguyauliyiñ ca quimfiliyiñ quiñe che duamnielu ñi quellungeal, eluhuaiñ taiñ quelluafiel.

Amuleaiñ taiñ inayentunieafiel ta Jehová. Rumel pengelaiñ taiñ piuqueyechefengen taiñ feipin mu ca taiñ femün mu.