1. ¿Chem falin cüdau femquei ti pu loncolelu? (1 Pedro 5:2).

 JEHOVÁ elcünufi tati pu loncolelu ñi cuidayafiel tañi pu che. Tati pu loncolelu falintuniefingün ti cüdau ñi elueteu ta Jehová ñi cuidayafiel tañi pu peñi, pu lamngen. Ca nehuencünuuqueingün tañi cüme cuidayafiel Jehová tañi pu ufisa (Jer. 23:4; papeltunge 1 Pedro 5:2). Mañumniefiyiñ taiñ pu peñi fente tañi cüme cüdauquen trahunche mu.

2. ¿Chem cüdaungechi dungu chaftuquei quiñeque loncolelu?

² Tati pu loncolelu tañi cüdau mu chaftuquefingün cüdaungechi dungu. Ñi cuidayafiel tati trahunche, müna cüdauquefuingün. Peafiyiñ ñi rupan quiñe loncolelu Tony pingelu, Estados Unidos mapu mu. Quisu inaduami tañi doi ñom piuquengeal, femngechi ta chem cüdau tañi llohual ca tañi llounoal. Quisu feipi: “Rupalu tati COVID-19 fentren cüdau mülefui. Mülefui tañi adniengeal trahun ca amuldungun. Iñche chem cüdau rume elungelu femquefiñ. Huelu chumten cüdau rume femfuli, doi cüdau mülequei. Rupachi antü mu niehuequelafun ta tiempo tañi estudiayal ta Biblia ca tañi llellipual”. Ca peafiyiñ ñi rupan quiñe loncolelu Kosovo mapu mu, Ilir pingelu. Quisu ca rupai cüdaungechi dungu mu. Quisu tañi mapu mu mülequefui ta hueichan, cüdautuquefui tañi inayafiel ñi chem pieteu Jehová ñi troquiñche. Quisu feipi: “Betel huercüeneu ñi quelluafiel pu peñi, pu lamngen, fei mu müna cuñihun-ngefui, fei llicalefun. Ca tañi feipieteu ta Betel cümenolu troquiquefiñ”. Cangelu loncolelu Tim pingelu, Asia mapu mu, cüdautuquei tañi femal com tañi cüdau tañi niefel. Feipi: “Quiñeque mu yafüngehuequelafun fente tañi cansalen”. ¿Chem quelluafeyu tati pu loncolelu? Peafiyiñ.

3. ¿Chumngelu cümei taiñ inaduamafiel ñi femün ta Gedeón?

³ Pu loncolelu inayentuafui ñi femün ta Gedeón (Heb. 6:12; 11:32). Gedeón cuñiutucuquefui ca cuidaquefui Jehová  ñi troquiñche cuifi mu (Juec. 2:16; 1 Crón. 17:6). Famülque mu ruparupangen mu huesaque dungu, pu loncolelu elfalcünungei ñi cuidayafiel Jehová ñi pu che (Hech. 20:28; 2 Tim. 3:1). Feimu tüfachi troquiñ peafiyiñ ñi femün ta Gedeón. Fei ñom piuquengefui ca inaquefui com tañi feipieteu ta Jehová. Cafei aguantai ñi rupan mu rume huesaque dungu mu. Loncoleliyiñ cam loncolenoliyiñ rume, com iñchiñ mülei taiñ falintuafiel ti cüdau ñi femquen pu loncolelu (Heb. 13:17).

4. Gedeón, ¿chumngechi pengeli ñi ñom piuquengen?

⁴ Gedeón ñom piuquengefui. b Cuifi mu pu Israel che ngüneniequefeyu pu Madián che, feimu Jehová feipifi ta Gedeón ñi lifrecünuafiel pu Israel che. Huelu Gedeón ñom piuque mu feipi: “Tañi troquiñche fei tati doi pichingelu Manasés ñi troquiñche mu, ca iñche tati doi falin-ngenolu tañi chau ñi ruca meu” (Juec. 6:15). Gedeón müte falintuuquelafui, feimu raquiduamquefui ñi femnoafiel ti cüdau Jehová ñi feipieteu. Huelu Jehová quellueyu, femngechi montulfi pu Israel che.

5. Pu loncolelu, ¿chem dungu mu cüdautuafuingün ñi ñom piuquengeal?

⁵ Pu loncolelu eluucülequei ñi ñom piuquengeal engün (Miq. 6:8; Hech. 20:18, 19). Pu loncolelu mallmauquelaingün doi cümeque cüdau ñi femquen ti trahunche mu. Cafei ñi huelulcahun mu engün, falinolu troquiufemquelaingün. Huelu quiñeque mu pu loncolelu cüdautuafuingün tañi ñom piuquengeal engün. Quiñe ejemplo: quiñe loncolelu llohui rume fentren cüdau trahunche mu, huelu quimürpui com ñi cüme entunoafel. Cafei rume saquingeafui ñi femün quiñe cüdau. Ca feipingeafui cüme cüdau ñi femnon. Fei pu loncolelu, ¿chumngechi ñom piuquengeafuingün Gedeón reque?

6. Pu loncolelu, ¿chumngechi ñom piuquengeafuingün Gedeón reque? (Ca inaduamnge ti adentun).

⁶ Quelluen piaimün. Ñom piuquengechi che quimniei com cüdau ñi femnoafiel. Gedeón ñi ñom piuquengen mu feipifi caquelu ñi quelluaeteu ñi cüdau mu (Juec. 6:27, 35; 7:24). Quimün-ngechi loncolelu ca femngechi femquei. Ti peñi Tony, taiñ nütramcapeel parrafo epu mu, feipi:  “Chumngechi ñi tremümeteu tañi pu chau, llouquefun doi fentren cüdau tañi pepi femnoafel. Fei tañi familia iñchiñ nütramcaiñ chumngechi taiñ ñom piuquengeal. Ca ramtufiñ tañi domo chem dungu mu tañi doi ñom piuquengeal iñche. Ca pefiñ quiñe video mülelu jw.org mu feipilelu Pepikafinge, maneluwnge fey engün mu tami wülal fillke küdaw, chumngechi femi Jesu”. Ti peñi Tony pedifi caquelu peñi ñi quelluaeteu ti cüdau trahunche mu. Fei feipi: “Cüme amulniengei ti cüdau trahunche mu, feula doi nien tiempo tañi doi hueniyeafiel ta Jehová”.

7. Pu loncolelu, ¿ca chumngechi inayentuafuingün ta Gedeón? (Santiago 3:13).

⁷ Huesa pingelmün, ñom piuquengeaimün. Gedeón quimniefui quiñeque mu ñi huelulcahual. Feimu pu Efraín che ñi huesa pieteu, Gedeón tüngcülei (Juec. 8:1-3). Illcufemlai, huelu mai cüme allcütufi engün. Ñi femün mu Gedeón, com engün ñomcületuingün. Pu loncolelu, ¿chumngechi inayentuafuingün ta Gedeón? Pu loncolelu ñi huesa pieteu mu caquelu pu che, mülei ñi tüngcüleal ca cüme allcütuafiel (papeltunge Santiago 3:13). Femngechi femle pu loncolelu, ti trahunche tüngcüleai.

8. Ñi saquingen mu pu loncolelu, ¿chem mülei ñi femal? Feipinge quiñe rupan dungu.

⁸ Saquingelmün, Jehová müten püramyeafimün. Gedeón hueufilu pu Madián che, pu che saquieyu. Huelu Gedeón püramyefi Jehová müten (Juec. 8:22, 23). Pu loncolelu, ¿chumngechi inayentuafuingün ta Gedeón? Jehová müten mülei ñi püramyeafiel engün femle cümeque cüdau (1 Cor. 4:6, 7). Quiñe loncolelu saquingele tañi cüme quimeltun mu, quisutu saquiulayai. Huelu mai, ti cüme quimeltun Chau Dios mu müten cüpai ca tañi troquiñche mu piafui. Pu loncolelu mülei tañi ramtuhual: “Tañi quimeltun mu, ¿püramyepefiñ mai ta Jehová cam quisutu püramyeuquen?”. Peafiyiñ ñi rupan mu quiñe peñi Timothy pingelu. Üitungen mu ñi loncoleal, rume ayüquefui tañi hueupial. Fei feipi: “Ellaconlu tañi hueupin, fentrenque nütram entuquefun ca feipiquefun fentrenque ejemplo, feimu tañi pu peñi rume saquiquefeneu. Huelu tati trahunche püramyequelafingün Jehová, Biblia no rume”. Rupalechi antü mu Timothy cacünutui tañi quimeltun, femngechi ñi quisutu püramyeunoal (Prov. 27:21). Taiñ peñi feipi: “Feula taiñ pu peñi feipiqueneu tañi hueupin quellueyeu chumngechi ñi chaftuafiel quiñeque dungu. Ca quellueyu engün ñi nehuencüleal ca ñi fülconcüleal Jehová mu, fei doi ayühuelqueneu”.

9. Gedeón, ¿chumngelu duamniefui ñi nehuen piuquengeal ca ñi feyentual? (Inaduamnge ti adentun hunen pagina mu).

⁹ Jehová üitufilu ta Gedeón ñi juezngeal, elfalcünufi ñi teifücayafiel quiñe altar cheu ñi püramyengequefel ta Baal (Juec. 6:25, 26). Cafei Gedeón trahulfilu ñi pu hueichafe ñi hueichayafiel pu Madián che, Jehová epu rupa feipieyu ñi nieal pichin hueichafe (Juec. 7:2-7). Fei Jehová ca feipifi ta Gedeón ñi hueichayafiel pu Madián che rangi pun meu (Juec. 7:9-11). Feimu Gedeón duamniefui ñi nehuen piuquengeal ca ñi feyentual.

10. Pu loncolelu, ¿chumngelu cüdautuafuingün tañi feyentual?

¹⁰ Pu loncolelu mülei ñi ‘eluucüleal ñi femal tañi feipingeel’ (Sant. 3:17). Pu loncolelu mülei ñi inanieafiel chem ñi quimeltun ta Biblia ca ñi feipieteu Jehová ñi troquiñche, femngechi inayentuaeyu caquelu  pu che. Huelu quiñeque mu cüdaungeafui pu loncolelu ñi feyentual, ¿chumngelu? Jehová tañi troquiñche hulquei fentren huercün dungu ca quiñeque mu calerumetuquei, feimu pu loncolelu cüdautuafui ñi inayafiel. Cafei Jehová ñi troquiñche huercüle ñi femal quiñe dungu, pu loncolelu ramtuhuafuingün: “¿Rüf cüme tripapeai mai ta tüfa?”. Pu loncolelu ca feipingeafui ñi femal quiñe dungu, huelu femle presuntucungeafui. Feimu cüdautuafuingün tañi feyentual. ¿Chumngechi inayentuafuingün ta Gedeón? Peafiyiñ.

11. ¿Chem mülei ñi femal pu loncolelu?

¹¹ Allcütuafimün tamün feipingeel ca inanieafimün. Jehová feipifi ta Gedeón chumngechi ñi teifücayafiel ti altar tañi chau ñi deumael. Ca feipifi cheu ñi deumayafiel quiñe altar cheu ñi poyengeam ta Jehová ca chem culliñ ñi chalintuculelafiel. Gedeón huesa raquiduamlai tañi feipieteu ta Jehová, doi mai inafemfi tañi feipingeel. ¿Chem quimürpuafui pu loncolelu? Fachantü pu loncolelu llouquei fentren huercün dungu, com tüfa taiñ quelluaeteu ca taiñ doi fülmaniefiel ta Jehová. Pu loncolelu inaquefingün com chumngechi ñi feipieteu Jehová ñi troquiñche, femngechi ti trahunche cümelcalequei. Feimu rume piuqueyeniefiyiñ (Sal. 119:112).

12. Cacünutun mu quiñeque dungu Jehová ñi troquiñche, ¿chumngechi inayafuingün pu loncolelu Hebreos 13:17?

¹² Calerumetule quiñe dungu, cüme llohuafimün. Jehová feipifi ta Gedeón ñi huercüafiel tañi ruca mu epe com tañi pu hueichafe (Juec. 7:8). Huelu Gedeón ramtuupelai: “¿Felepei mai tüfa ñi femal? ¿Cüme tripapeai mai?”. Ñi femün mu rume, feyentui. Pu loncolelu, ¿chumngechi inayentuafingün ta Gedeón? Mülei ñi inanieafiel engün com dungu rume, calerumetule Jehová ñi troquiñche mu (papeltunge Hebreos 13:17). Por ejemplo, 2014 tripantu mu ti Troquiñ Adniechequelu cacünutui chumngechi trapümngequei plata ñi deumangeal Trahunhue Ruca ca fütraque Trahunhue Ruca (2 Cor. 8:12-14). Cuifi mu, Jehová ñi troquiñche arelquefeyu plata caquelu trahunche ñi deumayafiel Trahunhue Ruca. Fei ti trahunche mülei ñi huiñoleltuafiel ti plata. Huelu feula trahulngequei ti plata com pu che ñi hulqueel huall mapu mu ñi deumangeam Trahunhue Ruca. Femngechi deumangequei Trahunhue Ruca ti trahunche nienon mu alün plata rume. Ñi cambian mu ti dungu, quiñe loncolelu José pingelu müte ayülafi. Feipi: “Femngechi dungu femngeafui caque mapu mu, huelu fau cüme tripalayafui. Quiñe Trahunhue Ruca no rume deumangelayai” pi. Huelu tüfachi loncolelu quelluntucui ñi feipin Jehová ñi troquiñche. ¿Chumngelu? Fei feipi: “Raquiduameleneu ñi feipin Proverbios 3:5, 6 tañi maneluhual Jehová mu, fei com cüme tripai. Fei doi deumangei  Trahunhue Ruca ca quimürpuiñ taiñ hueluconque quelluhual”.

13. 1) ¿Chem mu maneluucülefui Gedeón? 2) ¿Chumngechi inayentuafui pu loncolelu Gedeón? (Ca ngüneduamnge ti adentun).

¹³ Nehuen piuque mu femaimün Jehová ñi ayüqueel. Cuñihun-ngefui rume ca llican-ngefui rume, huelu Gedeón femi Jehová tañi elfalcünueteu (Juec. 9:17). Jehová pengelelfi ta Gedeón ñi quelluafiel, feimu maneluuquefui Jehová ñi quellun mu ñi cuidayafiel tañi pu che. Quiñeque loncolelu müleingün cheu ñi catrütungequen taiñ cüdau, huelu Gedeón reque nehuen piuquengeingün. Adcünuquefingün ti trahun ca amuldungun ñi quimnien mu rume tañi presungeal, ñi quechanentungeal ñi cüdau mu ca ñi huimacangeal. c Acule ti fütra cutrancahun, pu loncolelu mülei ñi nehuen piuquengeal ñi inayal ñi feipieteu Jehová tañi troquiñche cuñihun-ngele rume. Por ejemplo, pu loncolelu feipingeafui chumngechi ñi amuldungungeal ti huercün dungu condenachequelu. Pu loncolelu ca feipingeafui chumngechi com iñchiñ montutripayafuiñ contueliyiñmu Gog tuulu Magog mu (Ezeq. 38:18; Apoc. 16:21).

14. ¿Chumngelu cüdautui ñi aguantan Gedeón?

¹⁴ Ñi juezngeal Israel mu, Gedeón mülefui ñi rume cüdahual. Pu Madián che lefmaulu rangi pun, Gedeón inantucueyu engün Jezreel ñi lür mapu mu ñi puhual Jordán leufü mu, feichi inafül leufü mu mülefui chi fentren chacai (Juec. 7:22). Fei, ¿chumi Gedeón? ¿Fentecünui ñi inantucuniefiel pu Madián che? Femlai. Gedeón ca tañi 300 hueichafe cansalefulu rume engün, rumeingün ti leufü mu ca inantucuniefingün müten pu Madián che, fei dirpufingün ca hueufingün (Juec. 8:4-12).

15. Quiñe loncolelu, ¿chumngelu cüdautuafui ñi aguantayal?

¹⁵ Pu loncolelu mülei ñi cuidayafiel ñi  trahunche ca tañi familia. Tüfa mu cansayafui ca fill raquiduamelafeyu. ¿Chumngechi inayentuafingün Gedeón pu loncolelu? Peafiyiñ.

16, 17. 1) ¿Chem quellueyu Gedeón ñi aguantayal? 2) ¿Chem dungu mu maneluucüleafui pu loncolelu? (Isaías 40:28-31; ca inaduamnge ti adentun).

¹⁶ Maneluhuaimün Jehová tamün eluaeteu nehuen. Gedeón maneluhui Jehová tañi elueteu nehuen, ca Jehová femngechi femi (Juec. 6:14, 34). Quiñe rupa Gedeón ca tañi pu hueichafe namuntu inantucufi epu rey Madián mapu mu tuulu, ¿camello mu lefmaupelafuingu tüfachi epu rey? (Juec. 8:12, 21). Huelu Jehová ñi quellun mu pu Israel che dirpufingün tati epu rey ca hueufingün. Fachantü pu loncolelu ca maneluhuafuingün Jehová mu. Jehová “afeluuquelai ca ngañhuadquelai”, feimu quelluaeyu engün ñi nehuencüleal (papeltunge Isaías 40:28-31).

¹⁷ Peafiyiñ ñi rupan taiñ peñi Matthew pingelu. Taiñ peñi coneltulei Troquiñ Huentru ñi Quellual pu Cutrancülelu Pital mu. Feipi: “Ñi feipilen Filipenses 4:13 Jehová eluqueneu ta nehuen. Fentren rupa cansalequefun ca yafüngehuequelafun. Huelu llellipuquefiñ ta Jehová, femngechi ñi nehuencüleal ñi quelluafiel pu peñi ca pu lamngen. Ñi ngañhuadcülen mu, Jehová eluqueneu nehuen”. Gedeón reque, pu loncolelu rume cüdauquei ñi cuidayafiel Jehová ñi troquiñche, quiñeque mu cüdaungele rume. Huelu mülei ñi ñom piuquengeal cam quimtucunieal com cüdau ñi femnoafiel, ayüfule rume ñi femal engün. Huelu pu loncolelu maneluule Jehová mu ca ngillatufile, fei elunieaeyu nehuen ñi amulnieal ñi cüdau engün (Sal. 116:1; Filip. 2:13).

18. Pu loncolelu, ¿chumngechi inayentuafuingün Gedeón?

¹⁸ Chumngechi taiñ pefiel, pu loncolelu rume quimeltuafeyu Gedeón tañi femün. Mülei ñi quimtucunieal engün tunten cüdau tañi pepi femal. Ca mülei ñi ñom piuquengeal saquingele ca huesa pingele. Ca pu loncolelu mülei ñi nehuen piuquengeal ca mülei ñi inanieafiel tañi feipingeel, doi mai epe puule ñi afal huesaque dungu. Ca mülei ñi maneluucüleal engün chem dungu rupale rume, Jehová eluaeyu nehuen ñi aguantayal engün. Rüfcünu llemai, rume falintuquefiyiñ pu loncolelu ñi rume cüdauquen engün Jehová ñi troquiñche mu (Filip. 2:29).