Tati Segunda Guerra Mundial mu tañi chau ca ñuque elcünufingu Estonia, amuingün Alemania mapu mu. Fei choyüngen Alemania mu. Pichin tiempo rupalu, amuiñ ta Canadá, püllepuiñ Ottawa, Canadá mapu mu. Taiñ ruca pichifui ca rume mülefui achahuall fei mu. Müna pofrelefuiñ, huelu niefuiñ curam taiñ iyal.

Quiñe rupa pu Dunguquelu Ineingen Jehová papeltulelfingün tañi ñuque Apocalipsis 21:3, 4. Tañi ñuque fente ñi puhun tañi piuque mu tachi texto, ngümai. Tañi chau ca ñuque papelturpuingu ta Biblia, fei pichin mu rupalu müten tañi chau ca ñuque pepicaufuingu tañi fautizahual.

Tañi pu chau nehue adümquelafui tati ingles, huelu rume falintufingu tati rüf dungu. Tañi chau cüdauquefui com pun quiñe fabrica mu. Huelu epe fill sabado yequefeiñmu tañi chau tañi lamngen iñchiu taiñ amuldungual. Ca fill semana papeltuquefuiñ Ti Huerquen pingechi revista. Tañi chau ca tañi ñuque quellueneu tañi piuqueyeafiel ta Jehová. Feimu 1956 tripantu mu, feipifiñ ta Jehová tañi serfiafiel com tañi mongen mu, mari tripantu niefun. Tañi chau ca ñuque rume piuqueyefingu ta Jehová. Tañi femün mu engu, femngechi iñche piuqueyerpufiñ ta Jehová com ñi mongen mu.

Tripalu colegio mu iñche, pichi huelulcaufun. Precursorngeli, nielayafun ta plata pin. Müna ayüquefun tañi amual caque pais mu avion mu. Feimu eluhun ñi cüdahual quiñe estacion de radio mu, iñche tucuquefun tati musica tañi allcütungeal. Müna ayüquefun tañi cüdau, huelu fill pun cüdauquefun. Feimu müte amuquelafun trahun mu, ca trahuquefun tati poyequenofilu ta Jehová. Cüme raquiduamün tañi enseñaleteu ta Biblia, feimu cüme elcünutun ñi mongen.

Huiñamtuhun cañpüle, Oshawa, Ontario mapu mu. Fei mu quimfiñ ta Ray Norman ca tañi lamngen Lesli. Precursorngefuingu, fei cüme duameleneu engu. Pefilu iñche tañi rume ayüucülen engu, ramtuhun ¿chuman tañi mongen mu? Fei feipieneu engu ñi precursorngeal, fei precursorngerpun septiembre  1966 tripantu mu. Rume ayüucülefun. Tañi mongen calerumetui, rupai quiñe cüme dungu tañi raquiduamquenofel.

Petu colegiotulelu iñche, mandaquefun quiñe solicitud Betel mu Canadá mu. Fei precursorngelu iñche, mangelngen ñi amual ta Betel mu meli tripantu mu. Huelu ayüquefiñ ta Lesli. Amuli Betel mu, pehuenoafilu troquiufun. Feimu pichi llicalefun tañi amual, fei ngillatufiñ ta Jehová. Fei eluhun ñi amual ta Betel mu. Hueñancüleafulu rume tañi pehuenoafiel ta Lesli, amun müten.

Cüdahun lavanderia mu Betel mu, rupachi antü secretariongerpun. Fei Lesli precursor especialngerpui Gatineau, Quebec mapu mu. Mufüquechi ramtuuquefun ¿chumlei chi ta Lesli? piquefun. Ca quiñeque mu ramtuuquefun ¿cümepei mai tañi amun Betel mu? Huelu quiñe antü rupai quiñe rume cüme dungu. Lesli tañi lamngen mangelngei Betel mu, quiñe pieza mu umañquefuyu. Ca femngechi ca hueniyeutuyu Lesli iñchiu. Fei aflu tañi meli tripantu tañi serfiniefiel Betel mu, niehuiyu, 27 conchi febrero 1971 tripantu mu.

Lesli iñchiu huercüngeyu quiñe trahunche frances quehun dunguquelu Quebec mu. 28 tripantu nielu iñche, mangelngen ñi huitrancontuafiel pu trahunche, huelu iñche cüme pepicaucülenolu troquiufun. Müna huechelefun, huelu tañi feipiel Jeremías 1:7, 8 yafültucueneu. Feichi mu, Lesli niequefui quiñeque accidente auto mu, feimu cüme umautuquelafui. Feimu feipihuiyu ¿chumngechi am amuayu tayu huitrancontumeafiel tati pu trahunche? Fei Lesli feipi: “Jehová mangeleteu iñchiu tayu amual, cümeafui tayu femal müten”. Fei amuyu müten, 17 tripantu ayühunquechi femiyu tachi cüdau.

Huitrancontufilu tati trahunche rume cüdau niequefun, feimu müte niequelafun tiempo ñi müleal Lesli iñchiu. Huelu quimürpun quiñe falin dungu. Lunes pulihuen mu, allcün ñi tocangen ti timbre, nülafin ti puerta, ngelai inei no rume ta huecun. Mülei quiñe canasta müten nielu ta quiñe mantel, fruta, queso ca cofque, ca mülei quiñe botella pulcu ca epu copa. Ca quiñe pichi papel feipi: “Mangelfinge tami domo tamu pasiayal”. Quiñe cüme antüngefui ca pañingefui. Huelu feipifiñ ta Lesli tañi pepi tripanoal, nien quiñeque hueupin tañi pepicayal pifiñ. Quisu entendeneu, huelu pichi hueñancülefui. Anücünuhun tañi escritorio mu, fei raquiduamün ñi feipin Efesios 5:25, 28. Feitachi texto mu Jehová cüme raquiduameleneu, femngechi ñi duamtuafiel tañi domo. Rupan ngillatulu iñche, feipifiñ ta Lesli tayu tripayal, quisu müna ayühui. Amuyu inafül quiñe leufü, fei tucufiyu tati mantel ca tati iyael. Rume cüme rupayu feichi antü, ngoimaquelafiyu. Ca pepicahun tañi deumayal tañi hueupin.

Huitrancontuquefiyu fentrenque trahunche, müna ayüqueyu tayu femal. Fill püle amuquefuyu  Columbia Británica mapu ca Terranova mapu. Huechutripamequerpui tañi ayüquefel ta cuifi. Ayüquefun tañi amual ta Galaad, huelu ayüquelafun tañi misioneroleal caque pais mu. Pepicaucülenolu ñi misionerongeal troquiuquefun ca llicalequefun tañi huercüngeal África mu. África mapu mu mülequefui fentrenque hueichan ca cutran, feimu ayüquelafun. Ayüucülequefun Canadá mapu mu.

1992 tripantu mu, ngehuequelafui ti Unión Soviética, feimu tati pu Dunguquelu Ineingen Jehová elungetuingün tañi amuldunguleal engün. Fentren cüdau am mülelu, feimu ramtungeyu tayu amuleal Estonia mu tayu misioneroleal. Lelilehuiyu, fei ngillatufiyu ta Jehová. Fei ca raquiduamiyu: “Jehová mangeleyumu ta iñchiu, fei cümeafui tayu amual müten”. Fei amuyu ta Estonia. “Mandangelayu África mu” pihuiyu.

Pürüm adümcamtufiyu Estonia tañi quehun dungu. Rupayechi cüyen mu, mangelngeyu ñi huitrancontumeafiel ti trahunche. Huitrancontumefiyu 46 trahunche ca quiñeque pichique troquiñche mülelu Estonia, Letonia ca Lituania mapu mu cafei Kaliningrado, Rusia mapu mu. Mülefui tayu quimürpuafiel fillque quehun. Tüfa cüdaungefui, huelu tayu pu hueni quellueiñmu. 1999 tripantu mu elcünungei quiñe sucursal Estonia mapu mu, fei iñche mangelngen ñi cüdahual Betel mu. Coneltuquefun ti troquiñche adcünuquelu Betel ruca. Cüdauquefuiñ caquelu peñi iñchiñ, Toomas Edur, Lembit Reile ca Tommi Kauko.

Quimfiyu fentren pu testigo yengefulu ta Siberia. Huesa troquingelu rume ta carcel mu engün ca püntütripalu rume tañi familia mu engün, lladcüluulaingün. Huelu mai ayühunquechi amuldunguyahuingün. Tañi femün mu engün, quellueyumu tayu ayüucüleal rupan mu rume huesaque dungu mu.

Fentren tripantu mu niefuyu fentren cüdau, feimu Lesli rume cansalefui. Quimlafuyu ta Lesli tañi cutrancülen, huelu rupachi antü mu quimiyu tañi nien fibromialgia cutran, feimu ta nehuen-ngehuequelafui. Raquiduamfuyu tayu huiñotual ta Canadá, huelu mangelngeyu ñi amual quiñe Escuela ñi Pepicangeam pu Adcünuquelu Betel. Mülefui tayu amual Patterson, Estados Unidos mu. Iñche raquiduamün tayu amunoafiel. Huelu ngillatufiyu ta Jehová, fei amuyu. Jehová cümelcaeiñmu, mülelu feichi escuela mu Lesli elungei tati lahuen tañi duamnieel. Feimu ca cüdautuyu chumngechi tayu cüdauquefel ta cuifi.

Huiñotuyu Estonia mu, fei 2008 tripantu mu pu peñi central mundial mu mütrümeneu. Feipingeyu tayu amual ta Congo mu. Afmatulehuen, feipingen ca antü mu tañi huiñoldungual. Cüpa feipilafiñ ta Lesli, femli umautulayafui feichi pun. Feichi pun umautulan, raquiduamfun tañi feipingen, fei ngillatufiñ ta Jehová.

 Ca antü mu feipifiñ ta Lesli, fei raquiduamiyu: “Jehová mangeleteu iñchiu tayu amual África mu, feimu amuliyu müten, quimafuyu tayu ayüucülen”. 16 tripantu yeniefuyu Estonia mu, fei amuyu Kinsasa, Congo mapu meu. Com tüngcülequefui fei mu ca apolefui anümca mu. Lesli niequefui quiñe tarjeta tripalu Canadá mu iñchiu, ti tarjeta feipi: “Ayüucüleaimi cheu rume amulmi”, fei Lesli pültrücünufi tayu pieza mu. Quimfiyu taiñ pu peñi, pu lamngen, enseñalelfiyu Biblia tati pu che ca ayüucülefuyu tayu misionerongen, feimu ayüucülefuyu tayu poyefiel mu Jehová. Rupayechi antü mu, huitrancontumefiyu 13 pais África mu müleyechi Betel, quimfiyu fentrenque pu che. Feimu llicalehuelafun tañi huercüngen África mu, doi mai mañumfiyu ta Jehová tayu huercüeteu mu.

Congo mu elungeyu fillque iyael ca elungeyu pichique insecto tayu iyal. Inoafilu troquiufun huelu pefiñ pu peñi pu lamngen fente ñi cümentufiel, fei ifiñ ca cümentufiñ.

Quiñeque troquiñ mapu mu mülequefui quiñeque troquiñche ayüquefuingün ñi quehuayal engün, huesalcaquefi tati pu pichiqueche ca tati pu domo, malocontuquefi tati pu che mülelu fei mu. Iñchiu huitrancontumefiyu tati pu peñi pu lamngen mülelu fei mu, tayu yafültucuafiel ca eluquefiyu tañi duamnieel engün. Taiñ pu peñi maneluucülefuingün tati huiñomongetun mu, piuqueyequefingün ta Jehová ca püntütripaquelafuingün Jehová ñi troquiñche mu. Pefilu com feitachi dungu iñchiu yafültucuqueyumu. Raquiduameleyumu chemu taiñ serfiquefiel ta Jehová ca quellueyumu tayu doi feyentuleal quisu mu. Quiñeque taiñ pu peñi ñamümfui tañi ruca ca tañi anümca. Tüfa raquiduameleneu tati plata rumeñma nielayafuiñ, afafui. Huelu aflayafui taiñ hueniyefiel Jehová. Rupafulu rume fentren huesaque dungu mu pu peñi, pu lamngen, quisu engün huesa raquiduamquelafuingün. Tañi cüme femün engün quelluqueyumu tayu chaftuafiel huesaque dungu ca cutran rupafuliyu rume.

Rupayechi antü mu ca afmatulehueyu, feipingeyu ñi amual Hong Kong müleyechi Betel mu.  Raquiduamquelafuyu rume tayu amual ta Asia, huelu inaduamiyu chumngechi taiñ cuidanieteu ta Jehová cheu rume huercüngefulu. Feimu amuyu müten. Pichi hueñancülefuiñ, huelu 2013 tripantu mu chalifiyiñ taiñ pu hueni, fei amuyu ta Asia. Quimlafuyu chem tayu rupayal.

Hong Kong quiñe fütra huaria fel, mülefui fentren che caque tuhun nielu, feimu rume caletui tayu mongen. Ca cüdautufuyu tayu dungual chino dungun, huelu taiñ pu peñi, pu lamngen cüme llohueiñmu. Com tati iyael mülelu cümentufiyu. Betel mu fentren cüdau mülefui, duamniengefui quiñe doi fütra Betel ruca. Huelu rume falilu am tati edificio üye mu, feimu tati Cuerpo Gobernante epe com fendefi tati edificio. Fei 2015 tripantu mu, huiñamtuhuiyu Corea del Sur mu, petu müleyu fachantü fei mu. Tüfa mu coreano quehun dungu quimürpuyu, nehue petu adümlafiyu, huelu taiñ pu peñi pu lamngen yafültucuqueiñmu, cüme amulimu feipieimu.

Taiñ peal ta cümeque hueni cüdaungeafui. Huelu quimürpuyu mangelfiel taiñ pu peñi, pu lamngen, doi quimürpufiyu. Caquerumeiñ taiñ pu peñi, pu lamngenhuen-ngen, huelu quiñeucüleiñ fentren dungu mu. Quimtucuyu Jehová deumaeiñmu taiñ nieal fentrenque hueni (2 Cor. 6:11).

Quimürpuyu tayu cüme llohuafiel pu peñi, pu lamngen chumngechi ñi femquen ta Jehová. Mülei taiñ raquiduamal chumngechi Jehová pengelqueiñmu taiñ piuqueyenieteu ca adnieteu. Hueñancülen mu ca piuqueyenoeteu taiñ pu peñi, pu lamngen troquihuiyu, ca huiño papeltufiyu ti carta taiñ elueteu pu hueni, fei yafültucuqueyumu. Inaduamiyu chumngechi taiñ huiñoldunguqueteu Jehová taiñ llellipun, yafültucuqueiñmu ca pengeleleiñmu taiñ piuqueyenieteu.

Rupachi tripantu mu inaduamiyu Lesli iñchiu tayu nieal ta tiempo ta iñchiu tayu cüme rupaleal, fentren cüdau rume niefuliyu. Ca quimürpuyu tañi falin-ngen ñi ayeleal, doi mai quimürpun mu quiñe hue quehun. Fill pun raquiduamiyu chem mu tayu mañumafiel ta Jehová.

Iñche tañi duam mu, amulayafun caque pais mu ca misionerongelayafun. Huelu Jehová tañi duam mu müten, femürpun tañi ayüquefel cüdaungefulu rume. Jeremías feipifi ta Jehová: “Eimi Jehová afmatulen” (Jer. 20:7). Iñche ca afmatulqueneu ta Jehová ca rume cümelcaeneu. Elueneu llemai tañi müpühual avion mu, raquiduamquelafun rume tañi fente miyahual ta avion mu, fentrenque pais miyauquefun ca huitrancontumefiñ fentren Betel huall mapu mu. Ca rume mañumniefiñ ta Lesli fente tañi quelluqueteu tañi cüdau mu.

Lesli iñchiu acordaniefiyu com tayu femel, femqueyu tayu piuqueyeniefiel mu ta Jehová. Com cümeque dungu taiñ nieel fachantü pengelqueiñmu doi cüme mongen taiñ nieal cüpalechi antü mu. Feichi mu, Jehová ‘nülanentuafi tañi cuhu ca eluafi com ñi duamtunieel’ com pu mülealu mapu mu (Sal. 145:16).