Choyüngen 22 conchi diciembre cüyen 1929, Noville pingechi lof, Bélgica mapu. Tremün quiñe granja niefulu tañi chau. Tañi inan peñi Raymond iñchiu entulichihuacaquefuyu fill antü. Cafei quelluquefuyu cosecha mu. Tañi lof mu hueluconque quelluquefuiñ cheu ñi doi mülen cüdau.

Tañi chau ca tañi ñuque catolicongeingu, amuquefuingu misa mu fill domingo. Huelu 1939 tripantu calerumetui taiñ mongen. Aculu quiñeque precursor Inglaterra mapu tuulu, tañi chau elungei ¡Tami quimafel! pingechi revista. Tañi chau feipi: “Tüfa tati rüf dungu”, ca eluhui papeltual Biblia. Tañi pu carucatu pefilu ñi amuhuenon misa mu, rume illcuingün. Amuhuenolu cai tañi chau feichi iglesia mu, com taiñ pu carucatu rume caiñetueiñmu.

Rume cutrantupiuquefun caiñetungen mu tañi chau. Feimu llellipufiñ ta Dios com tañi piuque mu. Ñochiquechi tüngnagi tañi pu carucatu. Quimürpun Chau Dios ñi huiñoldunguleteu tañi llellipun.

Coni ti fütra hueichan, ti Alemania nazi malocontufi Bélgica mapu 10 conchi mayo 1940, feimu fentren che lefmahui feichi mapu mu. Iñchiñ lefmahuiyiñ Francia mapu mu. Rüpü mu peiñ fentren tralcatuhun pu Alemania che ca Francia che.

Huiñotulu iñchiñ taiñ granja, taiñ trehua Bobbie pingelu, fei müten mülehuei taiñ llohuaeteu. Hueñeñmangeiñ epe com taiñ fillque chemcün. Tañi pefiel mu com tüfachi  dungu, ramtuhun: “¿Chemu mülei fentren hueichan ca cutrancahun?”.

Feichi antü rume quellueiñmu huitrantupaqueteu Emile Schrantz, a quiñe precursor ca loncolelu trahunche mu. Biblia mu huiñoldungueneu chumngelu sufriquei che ca caquelu ramtun. Rume yafültucuñmaeneu tañi mongen mu. Fei doi pülleconal Jehová mu ca quimfiñ quiñe poyen Chau Dios ngen ca cutrancachequelai.

Petu ñi afnon chi hueichan, doi nütramcauquefuiñ pu testigo. Agosto cüyen 1943, ti peñi José-Nicolas Minet huitrantupaeiñmu taiñ granja mu, ca huli quiñe hueupin. Fentepun mu tañi hueupin, ramtui: “¿Inei ayülei tañi fautizahual?”. Tañi chau, tañi malle ca iñche huitrapüramiyiñ taiñ cuhu. Fautizahuiyiñ quiñe pichi leufü mülelu taiñ inafül granja.

Diciembre 1944 tripantu mu, rupai Alemania tañi inan hueichan “batalla de las Ardenas” pingelu. Iñchiñ quiñe fütra lolo meu ellcahuiyiñ quiñe cüyen. Quiñe antü tripan ilelmeafiel tañi culliñ, acui fütraque tralcatun taiñ granja mu. Feichi mu huirari quiñe soltau: “¡Tranacünuunge!”. Tranacünuulu iñche, ti soltau tacucünuñmaeneu tañi lonco quiñe casco. Femngechi montuluhun.

Deu rupachi hueichan, nütramcaquefuiñ quiñe trahunche mülelu Lieja pingechi huaria, 90 kilometro camapulei iñchiñ mu. Pichin antü mu trahuluuqueiñ taiñ estudiayal Biblia, Bastoña pingechi mapu. Cüdauquefun administracion de impuesto ca estudiaquefun ñi abogadongeal. Rupachi antü conün ñi cüdahual quiñe oficina publica mu. 1951 tripantu femiyiñ taiñ hunen fütra trahun Bastoña huaria mu, fei mu puhui pataca che. Feichi fütra trahun quimfiñ ta Elly, quiñe precursora. Amui 50 kilometro cicleta mu ñi puhual tati fütra trahun mu. Ayühuiyu ca feipihuiyu tayu niehual. Elly mangelngefui tañi amual Galaad pingechi Escuela, Estados  Unidos mu. Elly huercülelfi quiñe carta tati fütra Betel ruca, feipi tañi amunoal chi escuela. Taiñ peñi Knorr feichi mu loncolei pu testigo tañi cüdau, ayühunquechi lloudungui ca antü cüpayafuimi tami huentru engu. Niehuiyu febrero 1953 tripantu mu.

Feichi tripantu Elly iñchiu amuyu ti fütra trahun “Sociedad del Nuevo Mundo” pingelu, femngelu Nueva York huaria. Fei mu quimfiñ quiñe peñi mangeleneu ñi cüdahual Estados Unidos mapu mu. Llellipufiyu ta Jehová, femlayayu pifiyu ca huiñotuyu Bélgica mapu tayu quellual quiñe pichi troquiñche nielu mari publicador Bastoña mapu. 1954 tripantu choyüngei tayu pichi huentru. Ayühunquechi lloufiyu. Huelu rupalu regle cüyen, cutrani ca lai. Llellipun mu feipifiyu ta Jehová fente tayu cutrantupiuquelen, fei yafültucueiñmu ñi maneluhun ti huiñomongetun.

Octubre cüyen 1961 tripantu, elungen quiñe pichi cüdau elueneu tiempo tañi precursorngeal. Huelu feichi antü müten mütrümngen tañi huitran-ngepaquechi loncolelungeal. ¿Cümelayafui am hunelu mu tayu precursorngeal? pin. Mai huiñoldungungen. Rupalu pura cüyen tayu precursorngen, llohuiyu ti elfal cüdau ñi huitrancontuafiel pu trahunche septiembre cüyen 1962 tripantu.

Octubre cüyen 1964 tripantu, mütrümngeyu tayu cüdahual Betel ruca Bruselas mapu. Fentren cümelcan llohuiyu. 1965 tripantu taiñ peñi Knorr acui ñi huitrantupayafiel ti Betel ruca mülelu Bélgica mapu. Afmatulehuen üitungen ñi loncoleal Betel ruca mu. Pichiñma mu, Elly iñchiu mangelngeyu amual ti clase 41 Galaad pingechi Escuela. Mari cüla tripantu cuifi ñi feipicünun peñi Knorr huechutripai. Aflu chi escuela, huiñotuyu Betel ruca Bélgica mapu mu.

Tañi abogadongen mu, fentren tripantu cüdahuelquefiñ ñi incayafiel pu testigo Europa ca caquelu troquiñ mapu (Filip. 1:7). Tüfachi cüdau ñi duam mu coneltun ñi nütramcayal 55 autoridadcülelu fillque troquiñ mapu cheu ñi catrütungequen taiñ amuldungun cüdau. Nütramcafiel mu pu autoridad, iñche abogadongen piquelafun, doi mai “iñche quiñe huentru cüdahuelquefilu ta Dios” piquefun. Rumel llellipuquefiñ ta Jehová ñi quellun ca acordaquen Proverbios ñi feipin: “Ti lonco ülmen ñi piuque quiñe huitrunco reque felei Jehová tañi cuhu meu. Fei adniequefi chumngechi ñi ayüqueel” (Prov. 21:1).

Quiñe rupa nütramcaulu iñchiu quiñe huentru cüdauquelu ti gobierno Europa mapu, fentren rupa ayüfun ñi nütramcayafiel,  huelu piquelafui feichi huentru. Quiñe rupa eluulu ñi nütramcayafiel, “quechu minuto müten nieimi” pieneu. Müchai müten nagquintun ca llellipufiñ ta Jehová. ¿Chumpeimi am? pieneu ti huentru. “Mañumtupefiñ ta Dios tami nütramcayafiel eimi, cüdahuelquefilu ta Chau Dios”, femngechi feipifiñ. “¿Chem pimi?” ramtueneu ti huentru. Femngechi pengelelfiñ ñi feipin Romanos 13:4. Tüfachi huentru evangelicongerquelu, feimu afmatulehui. Femngechi eluhui tayu nütramcayal 30 minuto. Com cüme tripai, fei feipi tunte ñi afmatuquefiel pu testigo ñi cüdau.

Europa mapu mu fentren tripantu Jehová tañi troquiñche juiciantucungei tañi conquenon politica dungu mu, müntuñmangeal tañi pu yall ca cullial fentrenque impuesto. Tañi abogadongen mu fentren rupa quelluquefiñ ñi incayafiel pu testigo juiciantucungelu, ca ngüneduamün Jehová ñi quellun mu müten hueutripaqueiñ. Doi 140 rupa pu testigo hueutripaiñ ñi juiciantucungen ti Tribunal Europeo de Derechos Humanos.

Feichi 1990 tripantu püle, iñche ca tañi epu peñi Philip Brumley cüpalu ti fütra Betel ruca ca Valter Farneti cüpalu Italia mapu mu, quiñehun cüdahuiyiñ ñi amuldungungeal Cuba mapu, cheu catrütungequei ti amuldungun. Bélgica mapu mülelu iñche, huercülelfiñ quiñe carta ti embajada Cuba mülelu. Pichin antü mu trahuluhuiyu quiñe huentru adcünungelu taiñ quelluaeteu. Ellaca mu tuteulayu tayu nütram meu.

Llellipufiñ Jehová, fei doi cüme triparpui ti dungu. Elungeiñ quiñe permiso ñi huercüal 5.000 Biblia Cuba mapu, com cüme puhui. Elungei caque quiñeque taiñ pu peñi ca lamngen. Quimfali taiñ quellueteu Chau Jehová. Ca pichiñma mu elungeiñ caquelu permiso taiñ huercülelafiel 27.500 Biblia. ¡Rume ayühueleneu quelluafiel fentrenque pu peñi ca lamngen ñi nieal caque quiñeque engün tañi Biblia!

Fentren rupa huitrantumequen Cuba ñi quelluafiel catrütungehuenoal ti amuldungun cüdau. Llellipufiel mu Jehová,  cüme entuquen ñi nütram ca doi cüme yeucülequen pu autoridad engün.

Feichi 1994 tripantu, pu che tutsi tuhun-ngelu caiñetungeingün Ruanda mapu mu, doi quiñe millon che lai. Cafei langümngei quiñeque taiñ pu peñi ca lamngen. Pürümquechi pu testigo pepicai quellu ñi yelelafiel taiñ pu peñi ca pu lamngen.

Puulu iñchiñ Kigali pingechi huaria, ngüneduamiyiñ cheu ñi mülen taiñ publicacion ca ti oficina ñi rulpadungungeal, pefiyiñ cheu ñi puhun ti tralcatun. Fei mu nütramcangeiñ pu peñi ca lamngen re machete mu langümngei. Huelu ca allcütuiñ fentren poyehun taiñ pu peñi ca lamngen. Quiñe familia hutus tuhun-ngelu cuidafi quiñe peñi tutsi tuhun-ngelu. Ellcafi quiñe lolo mu 28 antü, femngechi ñi montulafiel. Cafei trahuluuqueiñ Kigali pingechi huaria, femngechi yafültucufiyiñ doi 900 peñi ca lamngen.

Puhuiyiñ República Democrática del Congo troquiñ mapu, femngechi quintuafiel pu testigo lefmaulu Ruanda mapu mu. Amuiñ cheu ñi ellcaupeyüm fülcülelu Goma pingechi huaria. Penofilu cai iñchiñ pu peñi ca pu lamngen, llellipufiyiñ ta Jehová. Fei perumefiyiñ quiñe che fülconpalu iñchiñ mu ca ramtufiyiñ ¿quimfimi quiñe Dunguquelu Ineingen Jehová? “Iñche tati” pi, “ayühun mu yehuaiñ cheu ñi mülen pu peñi”. Entuiñ quiñe cüme nütram taiñ pu peñi engün. Fei trahuluhuiyiñ 1.600 lefmaulu Ruanda mapu mu taiñ nehuentucuafiel ca yafültucuafiel. Ca papeltulelfiyiñ quiñe carta cüpalu ti Troquiñ Adniechequelu. Feipi: “Iñchiñ llellipulequeiñ eimün meu. Jehová chumcaunorume quisucünulayaimünmeu”. Tüfachi carta puhui taiñ pu peñi ca lamngen ñi piuque mu. Ñi feipin chi carta femtriparpui taiñ antü meu. Feula Ruanda mapu mu mülei doi 30.000 testigo ayühunquechi cüdahuelquefilu ta Jehová.

2011 tripantu, lai tañi poyen domo Elly. Llellipun mu nülalquefiñ reque tañi piuque Jehová mu tañi yafültucuaeteu. Ca quelluqueneu ñi yelelafiel tañi pu carucatu cümeque dungu cüpalu Chau Dios ñi Gobierno.

Deu nien doi 90 tripantu, huelu petu amuldungulen fill semana mu. Ca cüdauconcülen Departamento de Asuntos Legales, Bélgica Betel ruca. Ca yafültucuquefiñ doi huechelechi betelita.

Deu rupai 84 tripantu tañi hune llellipufiel ta Chau Dios. Femngechi llitun tañi rume hueniyerpufiel ta Jehová. Fill antü doi pülleconcülen fei mu. ¡Rume mañumniefiñ ta Jehová tañi allcütuñmaqueteu com tañi llellipun! (Sal. 66:19). b