TROQUIÑ ÑI CHILLCATUNGEAL 23
ÜLCANTUN 28 ¿Chumngechi hueniyerpuafuiñ Jehová?
Jehová mangelqueiñmu taiñ müleal ñi tolto ruca mu
“Tañi tolto ruca müleai quisu engün mu, iñche quisu engün tañi Dios ngean” (EZEQ. 37:27).
¿CHEM QUIMAIÑ?
Doi falintuafiyiñ Jehová taiñ mangeleteu tañi tolto ruca meu ca chumngechi cuidaqueiñmu.
1, 2. Jehová, ¿chumal am mangelqueiñmu tañi ruca mu?
RAMTUNGELIYIÑ chem am ta Jehová ta iñchiñ mu, ¿chem piafuiñ? Feipiafuiñ Jehová taiñ Ngünechen, taiñ cüme Chau ca taiñ hueni. ¿Ca chem feipiafuiñ Jehová mu? Quisu mangelqueiñmu tañi ruca mu.
2 Ti lonco ülmen David feipi Jehová ñi mangelquefiel tañi pu serfiqueteu tañi ruca mu. Feipi: “Ahuem Jehová, ¿inei am ta huitran-ngeafui tami tolto ruca mu? ¿Inei am mülenagafui tami fütra huincul mu?” (Sal. 15:1). ¿Chem pengeli tüfa? Jehová mangelqueiñmu taiñ hueniyeafiel. Müna cüme dungu tati.
JEHOVÁ AYÜLEI TAIÑ MANGELAETEU TAÑI RUCA MU
3. ¿Inei am hune mangelfi Jehová tañi ruca mu? ¿Chum duamcülequefui Jehová ca tañi mangel?
3 Petu tañi deumanofiel chem rume, Jehová quisulequefui. Hunelu mu deumafi tañi Fotüm, fei mangelfi ñi müleal tañi ruca mu, fei rume ayühueleyu. Ca ti Fotüm ‘rume ayüucülequefui mülen mu quisu engu’ (Prov. 8:30).
4. ¿Ca inei engün am mangelfi Jehová tañi ruca mu?
4 Rupachi antü mu, Jehová ca deumarpufi cümeque püllü, fei engün ca mangelfi tañi müleal reque quisu ñi ruca mu. Biblia mu pu cümeque püllü ‘Ngünechen ñi pu fotüm’ pingeingün, ca rume ayüucüleingün ñi müleal Jehová engün (Job 38:7; Dan. 7:10). Fentren tripantu Jehová hueniyeniequefui pu mülelu huenu mu müten. Rupachi tiempo mu, Jehová deumafi pu che ñi müleal mapu mu. Fei engün Jehová ca mangelfi tañi müleal quisu ñi ruca mu. Quiñeque feitachi huentru ñi mangelel ta Jehová fei ta Enoc, Noé, Abrahán ca Job. Biblia feipi quisu engün hueniyequefi ta Jehová tañi feyentufiel mu (Gén. 5:24; 6:9; Job 29:4; Is. 41:8).
5. ¿Chem quimeltueiñmu ti profecia mülelu Ezequiel 37:26, 27?
5 Jehová amulei tañi mangelniefiel tañi pu hueni ñi müleal tañi ruca mu (papeltunge Ezequiel 37:26, 27). Ñi feipicünuel ta Ezequiel pengeli Chau Jehová ayüquei com tañi pu serfiqueteu tañi hueniyeaeteu engün. Jehová feipicünui: “Eldungucünuafiñ engün tañi pengelal ñi fürenefiel”. ¿Chumül femtripayai tüfachi dungu? Famülque mu llemai huechurpumequei tüfa. Pu dullingelu ñi amual huenu mu ca pu mülealu mapu mu quiñeucületuingün Jehová ñi ruca mu, quiñe troquiñche reque feletuingün (Juan 10:16).
CHEU RUME MÜLELIYIÑ, JEHOVÁ CUIDAQUEIÑMU
6. 1) ¿Chumngechi conafuiñ Jehová tañi tolto ruca mu? 2) ¿Quiñeque che müten conafui Jehová tañi tolto ruca mu?
6 Cuifi pu che conpuquefui tolto ruca mu tañi cansatuam. Tüfa ca cuñiutucuquefeyu tañi arecaunoal ca tañi mahunmanoal. Quiñe mangel conpufule feitachi tolto ruca meu, cüme atendengequefui. ¿Iñchiñ cai? ¿Chumngechi am conqueiñ reque Jehová ñi tolto ruca mu? Hultuculu iñchiñ taiñ mongen Jehová mu (Sal. 61:4). Jehová tañi tolto ruca mu ca femngechi cüme atendengequeiñ reque. Nieiñ com chumngechi taiñ hueniyeafiel ta Jehová ca nieiñ fentren hueni poyequefilu Jehová, fei engün ca mangelngeingün tañi conpual Jehová tañi tolto ruca mu. Quiñe mu müten mülelai Jehová tañi tolto ruca, com püle ta mülei, feimu com pu che caque tuhun nielu conpuafui Jehová tañi tolto ruca mu. Eimi amulmi caque mapu mu fütraque trahun mu, fei peafuimi fentren peñi ca lamngen ñi concülen Jehová tañi tolto ruca mu (Apoc. 21:3).
7. ¿Chumngelu feipiafuiñ pu layechi che petu müleingün Jehová tañi ruca mu? (Ca inaduamnge ti adentun).
7 Jehová tañi pu che lalu, ¿mülecapei mai Jehová tañi ruca mu? Felei llemai. ¿Chumngelu feipiafuiñ? Jesús feipi fei engün müleingün Jehová tañi raquiduam mu. Feipi: “Moisés cütu pengeli ñi huiñomongetual pu layelu, feichi nütramcalu ti üicülechi zarza mu. Moisés üitufi ta Jehová ‘Abrahán, Isaac ca Jacob tañi Ngünechen’. Fei pu layelu ñi Ngünechen no, huelu mai pu mongelelu ñi Ngünechen llemai. Com engün mongelelu troquiquefi” (Luc. 20:37, 38).
Jehová tañi pu che lalu ca mülenagafui Jehová tañi tolto ruca mu. (Inaduamnge parrafo 7).
¿CHEM CÜMELCAN LLOUQUEIÑ? CA ¿CHEM MÜLEI TAIÑ FEMAL?
8. ¿Chem cümelcan llouqueiñ müleliyiñ Jehová ñi tolto ruca mu?
8 Quiñe tolto ruca mu cansatuafuiñ ca cuñiutucuafeiñmu mahunle cam rume arengele. Ca femngechi com pu mülelu Jehová ñi tolto ruca mu cuñiutucuqueyu tañi püntütripanoal Jehová mu, femngechi ñi hueniyenieafiel ca eluqueyu maneluhun. Fülmaniefiliyiñ Jehová, Huecüfü rumel huesalcalayaiñmu. Chumfeliyiñmu rume ta Huecüfü, huelu fülconcüleliyiñ Jehová mu, rumel huesalcalayaiñmu (Sal. 31:23; 1 Juan 3:8). Ti hue mapu mu Jehová amuleai taiñ cuñiutucunieaeteu, huelu ca cuñiutucuaiñmu lan dungu mu (Apoc. 21:4).
9. ¿Chem mülei ñi femal Jehová ñi mangelelchi che?
9 Rume mañumniefiyiñ ta Jehová taiñ mangeleteu quisu tañi tolto ruca mu. Taiñ mangeleteu mu, feimu cüme hueniyeafuiñ Jehová rumel mu. Raquiduamnge tüfa: mangelngeliyiñ quiñe ruca mu, feipingeliyiñ taiñ liftual taiñ zapato, femaiñ llemai. Femngechi pengelaiñ taiñ respetafiel ti ngen ruca ca cüme duamelafiyiñ. Ca femngechi iñchiñ, pu concülelu Jehová tañi tolto ruca mu, eluuqueiñ taiñ femal chem dungu rume taiñ feipieteu Jehová, femngechi taiñ ayühuelafiel. ¿Chumngelu femqueiñ? Fente taiñ piuqueyeniefiel (Col. 1:10). Jehová taiñ hueni, taiñ cüme Dios, ca taiñ fütra Chau, feimu mülei taiñ yamnieafiel (Sal. 25:14). Turpu ngoimalayaiñ ineingen ta Jehová. Yamniefiliyiñ ta Jehová, chem no rume femlayaiñ taiñ huesa duamelnoafiel. Ayüqueiñ taiñ ‘miyahual Jehová iñchiñ ñom piuque mu’ (Miq. 6:8).
JEHOVÁ DULLINTULAFI TATI PU ISRAEL CHE
10, 11. Jehová, ¿chumngechi pengeli ñi dullintuchequenon?
10 Jehová dullintuchequelai, cüme llouquefi com tañi mangelelchi che (Rom. 12:11). Peaiñ chumngechi Jehová ñi troquifiel pu Israel che toltoucülefulu engün Sinaí huellin mapu mu.
11 Deu lifrecünufilu pu Israel che Egipto mapu mu, Jehová dullifi quiñeque huentru ñi sacerdotengeal, femngechi ñi cüdahual ngillatuhue tolto ruca mu. Jehová ca dullifi quiñeque Leví che ñi femal quiñeque cüdau fei mu. Ca mülefui quiñeque Israel che inafülcülelu ngillatuhue tolto ruca mu. ¿Com fei engün müten Jehová doi cuidaquepefeyu mai caquelu Israel che mu? Femlai llemai, Jehová com falintuniefui tañi pu che cheu rume mülefule engün.
12. ¿Chumi Jehová ñi pengelal tañi dullintuchequenon? (Éxodo 40:38; ca inaduamnge ti adentun).
12 Com pu Israel che hueniyeafuingün ta Chau Jehová, fei Jehová com cuidaniequefeyu engün. Toltoucülefule rume inafül cam doi alü camapu, Jehová com quelluquefeyu engün. Peaiñ quiñeque dungu. Jehová elcünui tañi tromü ca tañi cütral huente ti ngillatuhue tolto ruca mu, femngechi com pu Israel che tañi peafiel (papeltunge Éxodo 40:38). Feimu cañpüle amun mu ti tromü, pu Israel che alü camapulefule rume, com pequefingün, ngümituquefuingün com tañi nieel, entuquefuingün cheu tañi toltoucülen, fei inaquefingün (Núm. 9:15-23). Aculu tañi amutual engün, nehuentu dungulngequefui epu trompeta, femngechi com pu Israel che tañi allcütual (Núm. 10:2). Feimu cheu rume mülefule pu Israel che, hueniyeafuingün Jehová. Fei adniequefeyu ca cuidaquefeyu engün. Fachantü ca femquei ta Jehová, cheu rume müleliyiñ Jehová piuqueyequeiñmu, cuidaqueiñmu ca quelluqueiñmu.
Ti ngillatuhue tolto ruca rangiñ pu Israel che mu mülefui, feimu pengeli Jehová ñi dullintuchequenon. (Inaduamnge parrafo 12).
FAMÜLQUE MU JEHOVÁ CA DULLINTUCHEQUELAI
13. Famülque mu, ¿chumngechi Jehová pengeli ñi dullintuchequenon?
13 Quiñeque cristiano fülcülei ti fütra Betel ruca cam caquelu Betel mu. Ca quiñeque cüdauquei fei mu. Feitachi peñi ca lamngen coneltuquei quiñeque cüdau Betel mu, ca trür mülequeingün pu peñi adniequelu taiñ cüdau. Ca mülei quiñeque peñi huitrancontuquefilu pu trahunche, ca quiñeque peñi, lamngen, fill antü cüdahuelquefilu ta Jehová. Eimi femngechi cüdau coneltulenolmi, loncontucunieaimi Jehová tami piuqueyenieteu ca tami mülen Jehová tañi ruca mu. Quisu cüme quimnieimu ca eluqueimu com tami duamnieel (1 Ped. 5:7). Jehová com tañi pu che eluquefi ñi duamnieel engün, femngechi tañi hueniyeafiel, cuñiutucuquefi ca adniefi.
14. Jehová, ¿ca chumngechi pengeli ñi dullintuchequenon?
14 Jehová ca eluquefi pu che huall mapu mu ñi nieal quiñe Biblia tañi papeltuafiel, femngechi ca pengelquei ñi dullintuchequenon. Chau Dios ñi Dungu cüla quehun mu huirintucungequefui: hebreo, arameo ca griego. Quiñe che papeltufile Biblia feitachi quehun mu, ¿fei müten hueniyepeafui mai Jehová? Femlai llemai (Mat. 11:25).
15. ¿Ca chumquei Jehová tañi dullintuchequenon mu? (Ca inaduamnge ti adentun).
15 Jehová hueniyequelafi pu quimche müten, cam pu quimlu caque quehun. Jehová tati nielu müten ta estudio eluquelafi tañi quimün, doi mai com tati pu che eluquefi. Tati Biblia fentren quehun dungu rulpadungungei, feimu com püle mülechi che cümelcayafeyu ñi chem pin ta Biblia ca hueniyeafui ta Chau Jehová (2 Tim. 3:16, 17).
Tati Biblia fentren quehun dungu mu rulpadungungei, ¿chumngechi pengeli Jehová ñi dullintuchequenon? (Inaduamnge parrafo 15).
AMULEAI TAIÑ AYÜHUELNIEAFIEL TA JEHOVÁ
16. ¿Chem mülei taiñ femal taiñ llohuaeteu Jehová? (Hechos 10:34, 35).
16 Mañumcüleiñ Jehová taiñ nieeteu ñi ruca mu. Jehová müna piuqueyechefengei ca cüme llouquefi com che. Jehová dullintuchequelai. Cheu tuhun niefuliyiñ rume, chem quehun niefuliyiñ, chumte educacion nieliyiñ rume, domo, huentru, füchaleliyiñ rume, huechengeliyiñ rume, com llouqueiñmu Jehová feyentufiliyiñ (papeltunge Hechos 10:34, 35).
17. ¿Chem peaiñ cüpalechi troquiñ mu?
17 Tati Salmo 15:1 mu David ramtui: “¿Inei am ta huitran-ngeafui tami tolto ruca mu? ¿Inei am mülenagafui tami fütra huincul mu?”. Fei Jehová adnieyu ñi huiñoldungual tüfachi ramtun. Cüpalechi troquiñ mu peaiñ chumaiñ taiñ ayühuelafiel ta Jehová ca taiñ hueniyenieafiel.
ÜLCANTUN 32 ¡Coneltupange Chau Jehová ñi pu che mu!
