1. David ¿chumngechi trürümfi taiñ Chau Jehová? (Salmo 18:46).

 MAPU mu calerumetuquei ti dungu, feimu quiñeque mu calerumetuafui taiñ mongen. Femngechi dungu rupaliyiñ, llellipuafuiñ ta Chau Jehová taiñ quelluaeteu. ¡Tüfa rume yafültucuqueiñmu! Rupachi chillcatun mu peiñ Chau Jehová ti mongelechi Dios ngei ca rumel quelluqueiñmu. Ngüneduamlu iñchiñ chumngechi taiñ quelluqueteu Chau Jehová, quimtucuqueiñ ñi feipin David. Fei feipi: “¡Chau Jehová mongelei!” (papeltunge Salmo 18:46). Fei hula David feipi Chau Ngünechen fei ta iñche ñi “Fütra Cura” pi. Huelu ti cura nielai mongen, ¿chemu David trürümfi taiñ mongelechi Chau Jehová quiñe fütra cura reque?

2. ¿Chem ngüneduamaiñ tüfachi troquiñ mu?

² Tüfachi troquiñ mu peaiñ chumngelu Biblia feipi Chau Jehová quiñe fütra cura reque felei, ca chem quimeltueiñmu tüfachi pengelün dungu Chau Jehová mu. Cafei ngüneduamaiñ chumngechi peafiel ta Chau Jehová taiñ Fütra Cura reque. Af meu peaiñ chumngechi inayentuafiel ñi chumngen ta Chau Dios.

JEHOVÁ QUIÑE FÜTRA CURA REQUE, ¿CHUMNGELU AM?

3. Biblia feipilu cura, ¿chem cüpa feipi? (Inaduamnge ti adentun).

³ Biblia trürümfi ta Chau Jehová quiñe fütra cura reque, tüfa quelluqueiñmu taiñ adümal ñi chumngen. Fentren versiculo mu, tripai che püramyefilu ta Chau Jehová tañi cüme chumngen mu, fütra cura reque felei piqueingün. Ti hunen texto nütramcalu Chau Jehová “tati Fütra Cura” fei ta Deuteronomio 32:4. Llellipulu Ana, feipi “taiñ Chau Ngünechen fütra cura reque felei, ngelai cangelu” (1 Sam. 2:2).  Habacuc feipifi ta Chau Jehová “iñche tañi Fütra Cura” (Hab. 1:12). David feipi “cura reque felei tañi Dios” (Sal. 18:2). Ca Chau Jehová quisu feipihui “Cura” (Is. 44:8). Peaiñ cüla dungu pengelquelu chumngechi Chau Jehová quiñe fütra cura reque felei, ca peaiñ chem chumal taiñ troquiafiel ta Chau Jehová “taiñ Fütra Cura” reque (Deut. 32:31).

4. ¿Chumngelu feipiafuiñ Chau Jehová quiñe ellcaupeyüm reque felei? (Salmo 94:22).

⁴ Chau Jehová quiñe ellcaupeyüm reque felei. Mülele fütra cürüftucu mahun, quiñe che conpuafui lolo mu cam miñche quiñe fütra cura mu tañi ellcahual. Ca femngechi rupaliyiñ cüdaungechi dungu, ellcahuafuiñ reque Chau Jehová mu (papeltunge Salmo 94:22). Chau Dios cuñiutucuqueiñmu ca feipieiñmu com taiñ cutrancaqueteu fachantü pichiñmayai müten. Huelu feica müten no, cafei feipicünui cüpalechi antü mu apümcayafi com taiñ cutrancahun ca com taiñ huesa duameleteu (Ezeq. 34:25, 26).

5. ¿Chumafuiñ taiñ peal ta Chau Jehová quiñe ellcaupeyüm reque?

⁵ Mülei taiñ llellipuafiel ta Chau Jehová, femngechi taiñ ellcaupeyüm reque feleai. Llellipufiliyiñ, llouqueiñ Chau Ngünechen ñi “cüme tüngün”, tüfa cuñiutucuqueiñmu taiñ piuque ca taiñ raquiduam (Filip. 4:6, 7). Peaiñ ñi rupan quiñe peñi Artiom pingelu, presulefui tañi feyentun mu. Quiñe huentru fentren rupa ramtucafi taiñ peñi, ngüchaltucuquefi ca illamcaquefi. Artiom feipi: “Ramtucangelu iñche, rume raquiduamcülefun. […] Rume llellipuniefiñ ta Chau Jehová tañi elueteu tüngün ca quimün. Ti huentru femngechi femlu rume, iñche cüme duamcülequefun […]. Pefiñ Chau Jehová quiñe fütra cura malal reque, cuñiutucuqueneu”.

6. ¿Chemu maneluuqueiñ Chau Jehová mu? (Isaías 26:3, 4).

⁶ Chau Jehová manelfali. Quiñe fütra cura ca quiñe huincul turpu nengümlai, ca femngechi Chau Jehová rumel müleai iñchiñ mu taiñ quelluaeteu. Feimu maneluuqueiñ Chau Dios mu, “tati Fütra Cura rumel mülealu” (papeltunge Isaías 26:3, 4). Rumel mülequei, femtripaquei ñi feipicünun, allcütuquei taiñ llellipun ca duamnieliyiñ taiñ quellungeal, quelluntucuqueiñmu. Cafei Chau Dios piuqueyefi tañi pu piuqueyeteu, feimu maneluuqueiñ quisu mu (2 Sam. 22:26). Loncontucunieai taiñ femquen ca rumel füreneaiñmu (Heb. 6:10; 11:6).

7. ¿Chumngechi cümelcaqueiñmu maneluhual Chau Jehová? (Ca inaduamnge ti adentun).

⁷ Com piuque mu maneluhuaiñ Chau Jehová mu, femngechi taiñ Fütra Cura reque feleai. Cüdaungechi dungu rupaliyiñ rume, allcütunieafiyiñ ta Chau Dios, tüfa cümelcaqueiñmu (Is. 48:17, 18). Ngüneduamlu chumngechi taiñ quelluqueteu, doi maneluuqueiñ Chau Dios mu. Femngechi Chau Jehová ñi quellun mu,  doi pepicaucüleaiñ taiñ chaftuafiel fill dungu cüdaungefule rume. Quiñeque mu inei no rume quellulayafeiñmu, huelu quimtucuqueiñ Chau Jehová rumel mülequei iñchiñ mu, quisucünuquelaeiñmu. Quiñe peñi Vladímir pingelu, feipi: “Presulelu iñche, doi fülconün Chau Dios mu. Quisulefun ca pepi caletulafun tañi rupan, huelu quimürpun doi maneluhual Chau Jehová mu”.

8. 1) ¿Chumngelu feipiqueiñ Chau Jehová caletuquelai? 2) Chau Jehová taiñ fütra cura reque felei, ¿chumngechi cümelcaqueiñmu tüfa? (Salmo 62:6, 7).

⁸ Chau Jehová caletuquelai. Quiñe fütra cura ca quiñe huincul reque, Chau Jehová nehuencülei, fei caletuquelai. Chau Jehová ñi chumngen ca tañi ayüqueel turpu caletuquelai (Mal. 3:6). Adán engu Eva caiñetulu, Jehová caletuquelai chem ñi ayünieel tati pu che mu. Ti apostol Pablo feipi Chau Jehová “quisu catrütuuquelai” (2 Tim. 2:13). Feimu chem rupale rume ca chem femle rume pu che, Chau Jehová turpu cacünutulayai ñi chumngen, tañi ayüqueel ca tañi huercün dungu. Tüfachi dungu quelluqueiñmu maneluhual Chau Jehová mu huesaque dungu rupaliyiñ, ca quelluqueiñmu maneluhual ñi femtripayal com ñi feipicünuel cüpalechi antü mu (papeltunge Salmo 62:6, 7).

9. Ñi rupan Tatiana, ¿chem quimeleimu?

⁹ Raquiduamtucunieaiñ Chau Jehová ñi chumngen ca ñi chumal mapu mu ca tati pu che mu, tüfa quelluaiñmu taiñ maneluhual Chau Jehová mu ca taiñ peafiel fütra cura reque. Tüfachi dungu quelluaiñmu taiñ tüngcüleal ca cüme duamcüleal cüdaungechi dungu rupaliyiñ rume (Sal. 16:8). Femngechi rupai Tatiana, taiñ lamngen presulefui tañi ruca mu tañi feyentun meu. Feipi: “Rume quisulehuen”. Ca feipi: “Ellaca mu rume cüdaungefui, ca fentren rupa huesa duamcülefun”. Huelu raquiduamtucui Chau Jehová ñi chumngen ca ñi cümelcayafiel pu che, tüfa quellueyu chaftuafiel ti huesa dungu ca cüme duamcületual. Tatiana feipi: “Loncontucun, femngechi dungu rupan fente tañi piuqueyefiel ta Chau Jehová ca cüpa femün chem tañi ayünieel. Tüfa quellueneu tañi quisutu duamuunoal”.

10. ¿Chumafuimi tami peafiel Chau Jehová tami fütra cura reque?

¹⁰ Pichiñma mu rupayaiñ cüdaungechi dungu mu, feimu duamnieiñ doi maneluhual Chau Jehová mu. Feula mai amulepe taiñ doi maneluhual Chau Jehová mu, fei quellunieaiñmu taiñ afeluunoal ca püntütripanoal quisu mu. ¿Chem chumafuimi tami doi maneluhual? Papeltuaimi fillque nütram Biblia mu ca chem ñi rupan pu peñi ca pu lamngen famülque mu. Raquiduamtucuaimi ñi rupan engün ca ngüneduamaimi chumngechi Chau Jehová quiñe fütra cura reque felei tañi pu che mu. Tüfa quelluaimu tami peafiel Chau Jehová tami fütra cura reque.

 INAYENTUAFIYIÑ ÑI CHUMNGEN CHAU JEHOVÁ

11. ¿Chumngelu cümeafui taiñ inayentuafiel Chau Jehová ñi chumngen? (Ca inaduamnge ti huichulechi dungu feipilelu “ Chumafui pu huecheque huentru”).

¹¹ Deu ngüneduampeiñ chem dungu mu Chau Jehová quiñe fütra cura reque felei. Feula ngüneduamaiñ chumngechi inayentuafiyiñ ñi chumngen. Doi inayentufiliyiñ Chau Jehová, doi cüme quelluafiyiñ pu peñi ca pu lamngen trahunche mu. Quiñe ejemplo, Jesús Cefas (Pedro) pintuculelfi ta Simón, tüfa cüpa feipi cura (Juan 1:42). Femngechi Jesús pengeli Pedro ñi yafültucucheal ca ñi nehuentucuafiel ti trahunche. Tati Biblia ca feipi pu loncolelu “quiñe fütra cura ñi llaufeñ reque” feleingün, cuñiutucuquefingün pu peñi ca pu lamngen trahunche mu (Is. 32:2). Rüfcünu, com iñchiñ inayentuafuiñ ta Jehová fei nehuentucuafuiñ ti trahunche, quiñe cura reque feleafuiñ fei engün mu (Efes. 5:1).

12. ¿Chumngechi quelluafuiñ pu peñi ca pu lamngen rupamequele huesaque dungu mu?

¹² Quiñe ellcaupeyüm reque feleaimi. Pu peñi ca pu lamngen cutrancaule hueichan mu, pofolcan dungu ca itrofill huesaque dungu mu, llohuafuiñ taiñ ruca mu taiñ cuñiutucuafiel. “Epe puucülele ñi afal mapu müleyechi dungu” doi huesalcalerpuai ti dungu. Feimu fill dungu mu duamfalngeai hueluquentu quelluhual (2 Tim. 3:1). Cafei yafültucuafuiñ ca pengelelafuiñ taiñ piuqueyefiel pu peñi ca pu lamngen. Tüfa femafuiñ: cüme llohuafiyiñ pu peñi ca pu lamngen Trahunhue Ruca mu, femngechi quelluntucuafiyiñ ñi ayüucüleal engün ca doi piuqueyehuai ti trahunche. Fachantü fentren che hueluquentu huesalcauquei ca huesa duamuuquei, feimu taiñ pu peñi ca pu lamngen fill raquiduamcülequei ca  piuqueyengenolu troquiuquei. Feimu pu peñi ca pu lamngen acule trahun mu, cüme duamelafiyiñ ca piuqueyeafiyiñ engün, femngechi mülen mu ellcaupeyüm reque troquihuaingün.

13. Pu loncolelu, ¿chumngechi quiñe ellcaupeyüm reque feleafui? (Ca inaduamnge ti adentun).

¹³ Pu loncolelu quiñe ellcaupeyüm reque feleafuingün pu huesaque dungu rupamequelu. Tüfa tañi femquen engün: rupale quiñe huesa dungu cam rume cutrancülele quiñe peñi cam quiñe lamngen, pürüm adcünuquei ñi quelluafiel engün. Cafei Biblia mu ngülamtuchequeingün ca yafültucuchequeingün. Quiñe loncolelu piuqueyechele, duamtuchele ca quim allcütule, pu peñi ca pu lamngen cüdautulayai ñi fülconal quisu meu ca piuqueyengelu troquihuaingün. Cafei cüme duam mu inafemaingün chem tañi ngülamtueteu pu loncolelu Biblia mu (1 Tes. 2:7, 8, 11).

14. ¿Chumngechi pengelafuiñ taiñ manelfal chengen?

¹⁴ Manelfal chengeaiñ. Com pu peñi ca pu lamngen quimpe taiñ manelfal chengen ca taiñ quelluchequen, doyelchi mai mülele cüdaungechi dungu mu (Prov. 17:17). ¿Chumngechi quimngeaiñ taiñ manelfal chengen? Fill antü yafüluhuaiñ inayentuñmayafiel Chau Jehová ñi chumngen. ¿Chem femafuiñ? Enturpual taiñ feipicünuel ca tardeñmanoal (Mat. 5:37). Cafei quelluafiyiñ pu duamnielu ñi quellungeal. Ca elfalcünungeliyiñ quiñe cüdau, huechunenturpuaiñ ca inayaiñ taiñ feipingeel.

15. Pu loncolelu manelfalngele, ¿chumngechi cümelcangei ti trahunche?

¹⁵ Manelfalngechi loncolelu rume cümelcaquefi ti trahunche. Pu peñi ca pu lamngen duamle ñi quellungeal, eluule ñi mütrümafiel pu loncolelu ca maneluule ñi quelluaeteu engün, tüfa quelluayu ñi cüme duamcüleal engün ca piuqueyengelu troquihuaingün. Pu loncolelu ngülamtuchequelaingün chem tañi raquiduamquen, doi mai entuqueingün tañi ngülam Biblia ca fillque publicacion mu. Cafei nütramcayauquelaingün ñi feipingeel ca enturpuqueingün  tañi feipicünuel, tüfa quelluqueyu pu peñi ca pu lamngen ñi doi maneluhual pu loncolelu mu.

16. ¿Chumngechi quelluqueiñmu femal cümeque dungu? ¿Tüfa chumngechi cümelcaquefi caquelu che?

¹⁶ Amulepe tami femün cümeque dungu. Inaniefiliyiñ com ñi feipin Chau Jehová ca cüme dulliliyiñ chem taiñ femal, inayentufalngeaiñ, fei calerumetulayaiñ. Estudianieafiyiñ Biblia ca nehuentucuafiyiñ taiñ feyentun, femliyiñ doi maneluhuaiñ Chau Jehová mu ca tañi huercün dungu. Cafei epu rume raquiduam nielayaiñ, calerumetulayaiñ ca cuñiutucuhuaiñ taiñ hueluraquiduamelnoaeteu chem ñi raquiduamquen pu poyequenofilu Chau Jehová (Efes. 4:14; Sant. 1:6-8). Taiñ feyentun Chau Jehová mu ca tañi feipicünuel quelluqueiñmu taiñ tüngcüleal feipingeliyiñ ñi rupan huesaque dungu (Sal. 112:7, 8). Cafei quelluafiyiñ pu huesa rupamequelu (1 Tes. 3:2, 3).

17. ¿Chumafui pu loncolelu ñi nehuentucuafiel ti trahunche?

¹⁷ Pu loncolelu mülei ñi quim ngüneniehual, cüme raquiduam nieal, ñom piuquengeal ca cüme adnieal tañi mongen. Cafei “mülei ñi cüme inanieal tati rüfngechi dungu”, femngechi nehuentucuafi ca yafültucuafi tati trahunche (Tito 1:9; 1 Tim. 3:1-3). Pu loncolelu inayentufalngele ca cuidaniefile pu peñi ca pu lamngen, quelluquefingün ñi faltanoal trahun mu, ñi amuldunguleal ca ñi estudiayal Biblia. Pu peñi ca pu lamngen chaftuafui huesaque dungu tañi huesa duamelnieteu, fei fill raquiduamcüleafuingün, huelu pu loncolelu quelluayu engün ñi loncontucual Chau Jehová ca tañi ayüqueel.

18. ¿Chemu püramyequefiyiñ Chau Jehová? ¿Chumngelu doi fülmaucüleaiñ quisu mu? (Ca inaduamnge ti huichulechi dungu feipilelu “ Chumafuiñ taiñ doi fülmaucüleal Jehová mu”).

¹⁸ Deu ngüneduamlu iñchiñ Chau Jehová ñi cüme chumngen, David reque duamcülequeiñ. Fei feipi: “Püramyengepe Chau Jehová, tañi Fütra Cura” (Sal. 144:1). Rumel maneluhuafuiñ Jehová mu. Com taiñ mongen mu, füchaleliyiñ rume, Chau Jehová quelluaiñmu taiñ fülmaucüleal quisu mu. Feimu fente taiñ maneluuquen, feipiqueiñ: “Chau Dios iñche tañi Cura llemai” (Sal. 92:14, 15).