Pu papeltuquelu ñi ramtuqueel
¿Chem pifui Salmo 12:7?
Feitachi versiculo feipi Jehová ñi cuñiutucuquefiel pu che. Taiñ quimal, ngüneduamafiyiñ nüucülechi versiculo mu.
Salmo 12:1-4 mu, David feipi “pu che meu ngehuelai pu manelfalngelu”. Feula peafiyiñ ñi feipin Salmo 12:5-7.
“‘Ñi huesalcangen pu cutrancauquelu ñi duam mu,
ñi eyütumequen pu pofrelelu ñi duam mu,
iñche huitrapürayan, fei quelluafiñ engün’ pi ta Jehová.
‘Montulafiñ tañi pu huesalcaqueteu mu’.
Jehová tañi dungu lifngei,
plata reque felei liftungelu quiñe fotrangechi horno mu, regle rupa liftungei.
Eimi cuñiutucuafimi engün, ahuem Jehová,
eimi incayafimi caque quiñeque engün fantepu mülechi pu che meu ca rumel mu”.
Versiculo 5 feipi Jehová ñi montulafiel pu che cutrancauquelu.
Versiculo 6 feipi: “Jehová tañi dungu lifngei, plata reque felei liftungelu”. Com pu cristiano femngechi raquiduamqueiñ Chau Dios ñi Dungu mu (Sal. 18:30; 119:140).
Salmo 12:7 ca feipi: “Eimi cuñiutucuafimi engün, ahuem Jehová, eimi incayafimi caque quiñeque engün fantepu mülechi pu che meu ca rumel mu”. ¿Inei cuñiutucuafi Jehová?
Ti versiculo 6 nütramcalu Jehová ñi dungu mu, quiñeque che raquiduamafui Jehová ñi cuñiutucuafiel quisu tañi dungu. Quimnieiñ quiñeque tañi pu caiñe ayüfui ñi apümcayafiel ta Biblia, fei Jehová cuñiutucuquefi (Is. 40:8; 1 Ped. 1:25).
Huelu chumngechi feipi versiculo 5, Jehová ca cuñiutucuquefi pu che “cutrancauquelu” tañi huesalcangen mu, fentecünulayai llemai tañi femal (Job 36:15; Sal. 6:4; 31:1, 2; 54:7; 145:20).
Feimu ñi feipin ti Salmo 12:7, ¿inei cuñiutucuquefi Jehová? ¿Pu che cam tañi dungu?
Papeltufiel mu caquelu texto, inaduamquefiyiñ tañi cuñiutucufiel ta che.
Salmo 12:1 feipi tati manelfalngechi che encañangepelafui. Ti versiculo 3 feipi Jehová apümafi feichi pu che huesa entuquelu tañi dungu. Ti salmo ca feipi Jehová ñi dungu lifngei, feimu maneluhuaiñ Jehová ñi incayafiel tañi pu che.
Feimu ñi feipin versiculo 7, Jehová cuñiutucuafi pu che huesalcangelu.
Feimu, ¿chumngelu cüme feipilai inei tañi cuñiutucuniefiel Jehová? Femngechi huirintucungei manelfalchi copia Hebreo Huirintucun mu. Huelu griego quehun mu, ti Septuaginta pengeli Jehová taiñ cuñiutucuqueteu iñchiñ. Feimu feipiafuiñ tati norngechi che tañi cuñiutucungequen. Feitachi pu che incangeai “fantepu mülechi pu che meu”. Tüfa tati huesaque che ‘fampüramyequefilu huesaque dungu’ (Sal. 12:7, 8). Quiñe Biblia arameo quehun mu tüfachi texto feipi: “Eimi, ahuem ÑIDOL, cuñiutucuafimi tati norngechi che, eimi incayafimi fantepu mülechi huesaque pu che ca rumel mu. Tati huesaque che hualloñmayahuleiñmu quiñe sanguijuela foshidmafi reque ñi mollfüñ pu huentru ñi pu fotüm”. Cafei ta pengeli Salmo 12:7 feipilai Chau Dios ñi cuñiutucuafiel tañi dungu, doi mai tati pu che.
Feimu feitachi versiculo quimeleleiñmu Jehová ñi incayafiel pu “manelfalngechi che”.
