1, 2. 1) ¿Chem rupaquei deu fautizahun mu quiñe che? 2) ¿Chem peaiñ tüfachi troquiñ mu?

 ¿PEQUEFIMI quiñe troquiñche eluucülelu ñi fautizahual? Ti hueupife ñi ramtueteu epu ramtun, com nehuen mu huiñoldunguqueingün. Ñi pu hueni ca tañi pu familia rume ayüuqueingün tripatun mu engün co meu, alofquei ñi ange fente ñi ayüucülen ca com ti pu adquintulelu cutraftucuhuqueingün. Fillque semana huarancaque che hultucuquei ñi mongen Jehová mu ca fautizauquei, femngechi Dunguquelu Ineingen Jehová ngerpui engün.

² Ayülmi tami fautizahual, quimfalcülei tami quintufiel ta Jehová, feimu huilüfaimi tüfachi dumiñcülechi mapu mu (Sal. 14:1, 2). Tüfachi chillca quelluaimu eimi, huechengelmi rume cam füchalmi rume. Tüfa mu peaimi cüla falin dungu tami nengümaeteu tami serfiafiel Jehová. ¿Iñchiñ cai deu fautizaucülelu? Tüfachi chillca yafültucuaiñmu taiñ cüdahuelnieafiel Jehová rumel mu.

3. Jehová ñi pu che, ¿chumngelu piuqueyefiyiñ ti rüf dungu ca nor dungu? (Salmo 119:128, 163).

³ Jehová huercüfi tañi pu inanieteu ñi piuqueyeafiel ti rüf dungu (Zac. 8:19). Jesús ca quimeltufi tañi pu inanieteu ñi quintuafiel tati nor dungu (Mat. 5:6). ¿Chem quimeltueiñmu tüfa? Com taiñ nehuen mu eluhuaiñ taiñ femal lifngechi dungu ca cümeque dungu chumngechi ñi ayüqueel Jehová. ¿Piuqueyefimi ti rüf dungu ca nor dungu? Femqueimi tati. Feimu üdequefimi tati coila dungu ca com norngenochi dungu (papeltunge Salmo 119:128, 163). Ti pu coilatuquelu inayentuquefingün ta Huecüfü, ti ngünenielu tüfachi mapu (Juan 8:44; 12:31). Huecüfü re ayüniei ñi podcañmayafiel Jehová tañi üi. Edén  jardin mu, Huecüfü feipi Jehová ñi huesa ngüneniefiel tati pu che ayünolu cai ñi cüme feleal engün. Famülque mu, tati Huecüfü amulei ñi coilatumequen (Gén. 3:1, 4, 5). Fente ñi ngünencan mu, fentren che cüme chau troquilafingün ta Jehová. Pu che ñi ayünofiel mu ti rüf dungu, Huecüfü allmalltuquei ñi doi huesa femal engün (Rom. 1:25-31).

4. ¿Chumngechi pengeli Jehová ñi ngen-ngen ti rüf dungu mu? (Ca inaduamnge ti adentun).

⁴ Jehová ngen-ngei tati rüf dungu meu. Pu che tañi piqueyequeteu quimeltuquefi ti rüf dungu (Sal. 31:5). Femngechi nülañmafi ñi nge, lifreentuquefi Huecüfü ñi coila dungu mu. Jehová ca quimeltuquefi ñi nor chengeal ca ñi feipinoal coilaque dungu, tüfa quelluquefi tañi pu che ñi che troquihual ca ñi tüngduamcüleal (Prov. 13:5, 6). ¿Femngechi fempelai Jehová eimi mu? Eimi quimtucuimi doi cümeafui com pu che ñi inayafiel Jehová ñi feipin (Sal. 77:13). Feimu eimi ayüleimi tañi inayafiel Jehová ñi nor dungu (Mat. 6:33). Eimi ca ayüleimi tami pengelal Huecüfü ñi coilatumequen Jehová mu, femngechi tami incayafiel ti rüf dungu, ¿chumngechi femafuimi?

5. ¿Chem femafuimi tami incayafiel ti rüf dungu ca nor dungu?

⁵ Tami chem femün mu tami mongen mu, pengelafuimi tami chaftuquefiel Huecüfü ñi coila dungu ca tami incaquefiel ti rüf dungu. Ca pengelafuimi Jehová tami ngünenieateu ca tami feyentuñmayafiel tañi huercün dungu. ¿Chumngechi pengelafuimi com tüfa? Chalintuculelafimi tami mongen Jehová quiñe ngillatun mu ca fei hula fautizahuaimi. Eimi piuqueyefilmi ti rüf dungu ca nor dungu, nengümaimu tami fautizahual.

6. Ñi feipin Salmo 45:4, ¿chumngelu piuqueyefiyiñ ta Jesús?

⁶ Eimi, ¿chumngelu piuqueyefimi ta Jesucristo? Peafuimi falinque dungu Salmo 45:4 (papeltunge). Jesús quimeltuquefi ti rüf dungu, nor dungu ca chumngechi ñom piuquengeal ta caquelu che. Feimu eimi piuqueyefilmi ti rüf dungu ca nor dungu, ca piuqueyeafimi ta Jesús. Raquiduamnge Jesús ñi incafiel com nehuen mu ti rüf dungu ca nor dungu (Juan 18:37). Jesús, ¿chumngechi quimelqueiñmu taiñ ñom piuquengeal?

7. ¿Chem doi ayüfimi ñi ñom piuquengen ta Jesús?

 ⁷ Jesús quimelqueiñmu chumngechi taiñ ñom piuquengeal tañi feipin mu ca tañi femquen mu. Jesús quisutu püramyeuquelai, doi mai com tañi femün mu püramyequefi tañi Chau müten (Mar. 10:17, 18; Juan 5:19). ¿Chum duamqueimi fente ñi ñom piuquengen ta Jesús? ¿Nengümpelaeimu tami inayentuafiel? ¿Chumngelu fente ñom piuquengei ta Jesús? Tañi piuqueyefiel mu ca inayentuquefiel mu ñi Chau ñi ñom piuquengen (Sal. 18:35; Heb. 1:3). Quimün mu tüfa, ¿doi fülcontupelafimi ta Jesús?

8. ¿Chumngelu ayühuelqueiñmu Jesús taiñ ngünenieteu?

⁸ Rume ayühuelqueiñmu Jesús taiñ ngünenieteu, fei tati doi cüme ngünenielu Jehová tañi pepicaeteu mu (Is. 50:4, 5). Jesús ca pengeleiñmu taiñ rüf piuqueyeteu (Juan 13:1). Jesús iñchiñ taiñ ngünenieteu, feimu mülei taiñ piuqueyeafiel. Jesús feipi tañi pu rüf piuqueyeteu femqueingün quisu tañi feipicünuel. Feimu hueni piquefi engün (Juan 14:15; 15:14, 15). Rume falin dungu taiñ hueniyeafiel Jehová ñi fotüm.

9. Jesús ca tañi pu discipulo ñi fautizahun, ¿chem mu trüri?

⁹ Jesús huercüfi tañi pu discipulo ñi fautizahual (Mat. 28:19, 20). Quisu femngechi femi. Chumngechi ñi fautizahun ta Jesús ca tañi pu discipulo caquerumei (inaduamnge ti huichulechi dungu “ Jesús ca tañi pu inanieteu ñi fautizahun, ¿chem mu trürlai?”). Huelu quiñeque dungu meu trüri, ¿chumngelu? Fautizaulu Jesús, peufaluhui ñi femal tañi Chau ñi ayüqueel (Heb. 10:7). Ca femngechi femquei Jesús tañi pu inanieteu. Fautizahun mu engün quimfalcünufingün com pu che ñi hultucun ñi mongen Jehová mu ca ñi eluucülen ñi femal Jehová tañi ayüqueel müten com ñi mongen mu. Tañi femün mu engün, inaniefingün tañi quimeltufe, fei ta Jesús.

10. ¿Chumngelu piuqueyefimi ta Jesús? Ca, ¿chem nengümafeimu tami femal?

¹⁰ Eimi feyentuleimi Jesús Jehová ñi quiñen fotümngen ca ayüucüleimi Jehová ñi dullifiel mu tañi ngünenieal. Quimnieimi Jesús ñi ñom piuquengen ca ñi inayentuquefiel tañi Chau. Quimimi ñi ilelfiel pu ngüñülelu, yafültucufi pu ngañhuadcülelu ca tremolfi pu cutrancülelu (Mat. 14:14-21). Eimi pequefimi chumngechi Jesús ñi adniefiel tañi pu che famülque mu (Mat. 23:10). Ca quimnieimi Jesús ngünenietufile ti mapu, eluaiñmu re cümeque dungu, ¿chumngechi pengelafuimi tami piuqueyefiel? Inayentuñmafilmi ñi femün (Juan 14:21). Feimu mülei tami hultucual tami mongen Jehová mu ca fautizahual.

11. ¿Chumngelu fautizauqueiñ?

¹¹ ¿Chumngelu fautizauqueiñ? Taiñ quimafiel, acordayaiñ tati doi falin huercün dungu. Jesús feipi: “Piuqueyefinge tami Chau Ngünechen Jehová com tami piuque mu, com tami mongen, com tami raquiduam ca com tami nehuen meu” (Mar. 12:30). ¿Femngechi piuqueyefimi Jehová chumngechi ñi feipin Jesús?

12. Eimi, ¿chumngelu piuqueyefimi Jehová? (Ca inaduamnge ti adentun).

¹² Fentren dungu mu piuqueyefiyiñ Jehová. Eimi quimimi fei mu cüpai ta mongen. Eimi ca quimimi “com tati cümeque dungu ca com tati tutengelu Chau Ngünechen mu cüpai” (Sal. 36:9; Sant. 1:17).  Jehová hulquei fentren cümeque dungu ca rume piuqueyequeiñmu. Fei mu cüpai com ti cümeque dungu tami nieel.

13. Jehová ñi hulün tañi fotüm ñi mongen rume falin-ngei, ¿chumngelu?

¹³ Ti doi falin dungu taiñ elueteu mu Chau Jehová tañi chalintucun mu tañi fotüm. ¿Chumngelu femngechi raquiduamafuiñ? Raquiduamnge fente ñi piuqueyehun Jehová tañi fotüm engu. Jesús feipi tañi piuqueyenieteu tañi Chau ca quisu ñi piuqueyeniefiel (Juan 10:17; 14:31). Jesús petu ñi cüpanon mapu meu, rume fentren tripantu mülequefui tañi Chau engu. Feimu cüme quimuucülequefuingu ca rume piuqueyeucülequefuingu (Prov. 8:22, 23, 30). ¿Jehová rume cutrancaupelai pefiel ñi cutrancahun ca ñi lan tañi fotüm? Huelu Jehová rume piuqueyefi com che, eimi ca piuqueyeimu. Feimu huli tañi saquin fotüm, femngechi ñi rumel mongeleafel eimi ca com pu che (Juan 3:16; Gál. 2:20). Iñchiñ quimün mu tüfa, ¿piuqueyenoafulu am ta Jehová?

14. ¿Chem am tati doi cüme dungu tami femafel?

¹⁴ Doi quimfilmi Jehová, doi piuqueyeafimi. ¿Ayülepelaimi tami doi cüme hueniyeafiel? Femafuimi tati. Tami femqueel mu ca dungun mu ayühuelmafuimi tañi piuque. Jehová yafültucunieimu tami femal ta tüfa (Prov. 23:15, 16).  Chumngechi tami yenien tami mongen, pengelaimi tami rüf piuqueyeniefiel (1 Juan 5:3). Yenielmi tami mongen chumngechi ñi ayüqueel Jehová, fei tami doi cüme femafel.

15. ¿Chumngechi pengelafuimi tami piuqueyefiel ta Jehová?

¹⁵ ¿Chumngechi pengelafuimi tami piuqueyefiel ta Jehová? Hune ngillatuafimi ta Jehová, tati rüfngechi Ngünechen. Feipiafimi tami chalintucual tami mongen (Sal. 40:8). Fei hula, fautizahuaimi caquelu pu che ñi adquiñ mu. Rume ayühun-ngei ca falin-ngei ti antü tami fautizahual. Fautizahulmi, mongelelayaimi quisu tami duam mu, doi mai mongeleaimi Jehová mu (Rom. 14:8; 1 Ped. 4:1, 2). Tami fautizahual fütra dungu tati, huelu quelluaimu tami ayühun mongen yenieal. ¿Chumngelu feipiqueiñ? Peaiñ.

16. Chumngechi ñi feipin Salmo 41:12, ¿chem cümeque dungu Jehová eluafi tañi pu serfinieteu?

¹⁶ Jehová ñi hulquen cümeque dungu trürümfal-lai. Tunten rume elufilmi ta Jehová, quisu doi alün huiñolelaimu (Mar. 10:29, 30). Doyelcülerpun mu rume huesaque dungu mapu meu, Jehová elunieaimu tami ayüucüleal. Fautizahun mu ellaconi tami cüdau. Tüfa aflayai, rumel serfiafuimi ta Chau Jehová. Tami piuqueyehun Jehová eimu doi tremcülerpuai, eimi ca rumel mongeleaimi quisu reque (papeltunge Salmo 41:12).

17. ¿Chem eluafuimi ta Jehová?

¹⁷ Com tami cümeque rupan ca tati cümeque dungu tami nieel Jehová ta elueimu. ¿Eimi cai? ¿Elupeafuimi mai quiñe dungu ta Jehová, tati ngen-ngelu com dungu meu? Femafuimi llemai. Eluafuimi tami püramyeafiel. Hultuculmi tami mongen Jehová mu ca fautizahulmi, püramyeafimi. Quisu dicümtucuquelaeimu tami püramyeafiel, eimi müten eluhuafuimi tami femal (Job 1:8; 41:11; Prov. 27:11). Tüfa tati doi cüme mongen tami nieafel. Tami fente piuqueyefiel mu ta Jehová, quelluaimu tami fautizahual.

18. ¿Chem ramtuhuafuimi?

 ¹⁸ Deu taiñ peel, ¿fautizahuaimi? Eimi müten huiñoldunguafuimi tüfachi ramtun. Cümeafui tami ngüneduamuhual. Ramtuunge: “¿Chumngelu petu fautizaulan?” (Hech. 8:36). Loncontucunge tati cüla dungu tami nengümafeteu tami fautizahual. Hunelu, eimi piuqueyefimi ti rüfngelu ca norngelu. Epu, eimi piuqueyefimi ta Jesús. Ca cüla, eimi piuqueyefimi ta Jehová tüfa tati doi falin dungu. Feimu ramtuunge: “¿Com piuque mu ayüniefun com pu che ñi feipial rüf dungu ca ñi femal norngechi dungu? ¿Com piuque mu ayüniefun tañi inayafiel Jesús ca inayentuafiel tañi femün? ¿Com piuque mu ayüniefun tañi cüdahuelafiel Jehová fei ñi ayühuelmafiel ñi piuque?”. Ayülmi tami femal com tüfa, ¿chumngelu petu fautizaulaimi? ¿Chem catrütueimu tami femal? (Hech. 16:33).

19. ¿Chumngelu ngüneulayaimi tami fautizahual? Feipinge quiñe pengelün dungun (Juan 4:34).

¹⁹ Petu ngüneucülelmi tami fautizahual, raquiduamnge quiñe pengelün dungu ñi feipin ta Jesús (papeltunge Juan 4:34). Jesús feipi ñi femal tañi Chau ñi ayüqueel, fei tañi iyael reque felefui, ¿chumngelu? Ti iyael cümelcaqueiñmu. Jesús cüme quimniefui chem rume pedieliyiñmu Jehová taiñ femal cümelcaqueiñmu. Jehová feipiquelaeiñmu taiñ femal taiñ huesalcayaeteu. ¿Chem ayüniei Jehová tami femal? Tami fautizahual (Hech. 2:38). Feimu fautizahulmi, maneluhuaimi tüfa tami cümelcayaeteu. Elungelmi quiñe cüme iyael, eluhuafuimi müten tami iyafiel. Ca femngechi, eluhuaimi müten tami fautizahual.

20. ¿Chem peaiñ cüpalechi troquiñ mu?

²⁰ Quiñeque che raquiduamquei tañi pepicaucülenon, feimu petu fautizaulaingün. Rüfcünu mai, hultucuel tami mongen Jehová mu ca fautizahual fei tati doi falin dungu tami femal. Feimu petu tami fautizaunon, mülei tami cüme raquiduamal ca elantücünual tami pepicahual. Huelu ayülmi tami fautizahual, ¿chem quelluaimu tami femal? Cüpalechi troquiñ mu peafiyiñ.