1. Pu che, ¿chem dungu afmatuleyu hue amulu trahun mu? (Ca inaduamnge ti adentun).

 RAQUIDUAMNGE quiñe curehuen hue amulu trahun mu. Afmatulehueingu tañi cüme lloungen mu engu ca tañi huelucontu piuqueyehun pu testigo. Huiñotulu tañi ruca mu engu, tati domo feipifi tañi füta: “Ayüfiñ tañi chumngen engün, caquelu che reque femngelaingün”.

2. ¿Chumngelu quiñeque che püntütripaqueingün Jehová mu?

² Afmatufali fente tañi piuqueyeuquen Jehová tañi pu che. Tunte piuqueyeuliyiñ rume, huelu ca culpafe chengeiñ (1 Juan 1:8). Feimu doi quimfiliyiñ taiñ pu peñi ca pu lamngen, doi peñmayafiyiñ ñi huelulcaquen engün (Rom. 3:23). Femngechi dungu ñi rupan mu, quiñeque pu peñi ca pu lamngen püntütripaqueingün Jehová mu.

3. ¿Chumngechi am quimngeafui pu rüfngechi cristiano? (Juan 13:34, 35).

³ Peafiyiñ ñi feipin Juan 13:34, 35 (papeltunge).  ¿Chumngechi am quimngeafui ti rüfngechi pu cristiano? Biblia feipilai tañi huelulcaunoal engün, doi mai tañi hueluquentu piuqueyehual. Feimu ñi huelucontu piuqueyehun mu, com pu che quimafui tañi inaniequefiel engün ta Jesús. Jesús feipilai tañi pu discipulo müten ñi quimal tüfa, huelu mai com pu che.

4. ¿Chem ramtuhuafui quiñeque che testigongenolu?

⁴ Quiñeque che testigongenolu ramtuhuafuingün chi: “Pu cristiano, ¿chumngelu am quimngequei tañi piuqueyehun engün? Jesús, ¿chumngechi pengelelfi tañi piuqueyefiel tañi pu discipulo? ¿Chumngechi inayentungeafui ta Jesús fachantü?”. Iñchiñ ca cümeafui taiñ femngechi ramtuhual. Femngechi hueluconque piuqueyehuaiñ huelulcaule rume quiñe peñi cam quiñe lamngen (Efes. 5:2).

5. Ñi feipin Juan 15:12, 13, ¿chumngechi mülei taiñ piuqueyehual?

⁵ Jesús feipi chumngechi ñi piuqueyehual tañi pu discipulo (papeltunge Juan 15:12, 13). Jesús feipifi tañi pu discipulo: “Hueluconque piuqueyehuaimün chumngechi piuqueyehuiyiñ ta iñche”. Feimu Jesús reque, iñchiñ doi piuqueyequefiyiñ taiñ pu peñi ca lamngen ta iñchiñ mu. Eluucüleiñ taiñ layal cütu fei engün tañi duam mu. b

6. Biblia, ¿chumngechi enseñaleiñmu ñi falin-ngen taiñ piuqueyehual?

⁶ Biblia feipieiñmu fente falin-ngen taiñ hueluconque piuqueyehual. Por ejemplo, 1 Juan 4:8 feipi: “Chau Ngünechen fei ta piuqueyen”. Mateo 22:39  feipi: “Piuqueyefinge tami chafche chumngechi piuqueyehuimi ta eimi”. 1 Pedro 4:8 feipi: “Tati piuqueyechequelu rumel eluucülequei ñi perdonacheal”. Ca 1 Corintios 13:8 feipi: “Piuqueyehun afquelai”. Eimi, ¿ayüpelafimi feitachi texto? Tüfa ca caquelu troquiñ Biblia pengeleleiñmu ñi rume falin-ngen taiñ piuqueyehual.

7. ¿Chumngelu am Huecüfü trapümlayafui pu che ñi piuqueyehual?

⁷ Fentrenque che ramtuuquei: “¿Chuchi am ti rüfngechi religion? Ca, ¿chumngechi quimafun? Com tati che feipiquei ñi nien tati rüf religion, huelu quiñeucülelaingün tañi quimeltun engün”. Satanás deumafilu fentren coilaque religion, feimu fentrenque che cüdautuquei chem religion tañi rüfngen. Huelu Satanás turpu trampümlayafui fillque tuhun-ngechi che tañi piuqueyehual engün, Jehová müten femafui llemai. Iñchiñ quimnieiñ tati piuqueyehun cüpai Jehová mu, feimu tati nielu müten Jehová tañi nehuen rüf piuqueyehuafui (1 Juan 4:7). Feimu Jesús feipi tañi pu inaniequeteu müten nieafui ti rüfngechi piuqueyehun.

8, 9. Quiñeque che ñi pefiel ñi piuqueyehun pu testigo, ¿chumngechi quellueyu?

⁸ Chumngechi feipicünui Jesús, fentrenque che quimtucuingün ineingen ti pu rüfngechi cristiano tañi piuqueyehun mu engün. Quiñe peñi Yan pingelu acordaquei hue amulu quiñe fütra trahun mu. Quiñe rupa amufui ñi peal quiñe partido estadio mu, huelu ca amulu ñi pemeafiel ti fütra trahun afmatulehuei, feipi: “Com pu che amulu ti fütra trahun mu cüme tucutuuqueingün, duamchefengeingün ca pu pichiqueche cüme portaqueingün, femngechi femquelaingün tati amulu partido mu. Fütra trahun mu com ayüucüleingün ca tüngcüleingün, femngechi dungu ayüquefun iñche. Acordalan com ti hueupin ñi hulngeel, huelu acordaquen mai ñi cüme chengen engün pu testigo”. c ¿Chumngelu am femngechi chengeiñ? Taiñ rüf piuqueyehun mu. Feimu cüme yeuqueiñ ca hueluconque yamuuqueiñ.

⁹ Taiñ peñi John ca femngechi dungu mu rupai hue amulu trahun mu. Quisu feipi: “Iñche afmatulehuen ñi pefiel pu testigo ñi cüme llouquefiel pu che. Afmatulehuen tañi fente cüme chengen engün. Tañi rüf piuqueyehun mu engün, feita queta tati rüfngechi religion pin”. d Ñi rupan taiñ peñi John, Yan ca caquelu pu che pengeli ñi rüf cristianongen Jehová tañi pu che.

10. ¿Chem dungu mu pengelafuiñ taiñ rüf piuqueyeniefiel taiñ pu peñi ca pu lamngen? (Inaduamnge ti adentun).

¹⁰ Taiñ pu peñi ca pu lamngen ñi culpan chengen mu, quiñeque mu huesa duamelafeiñmu (Sant. 3:2). e Femngechi dungu mu rupaliyiñ, taiñ femün mu ca taiñ feipin mu pengelaiñ taiñ rüf piuqueyeniefiel engün. Femngechi femi  Jesús, ¿chumngechi inayentuafuiñ? Peafiyiñ (Juan 13:15).

11. ¿Chem huesa raquiduam niefuingu Santiago ca Juan? (Ca inaduamnge ti adentun).

¹¹ Jesús feipilai tañi pu discipulo ñi huelulcaunoal. Doi mai huelulcahun mu engün, quellufi ñi nor raquiduamtual, femngechi ñi ayühuelafiel ta Jehová. Peafiyiñ ñi femün Santiago ca Juan. Fei engu ayüfuingu ñi anüleal inafül Jesús ngünenietule, feimu feipifingu ñi ñuque ñi feipiafiel ta Jesús (Mat. 20:20, 21). Femngechi ñi femün mu, pengelingu ñi mallma piuquengen ca ñi doi falintungeal caquelu mu (Prov. 16:18).

12. ¿Santiago ca Juan müten huelulcahuingu? ¿Chemu feipiafuiñ?

¹² Santiago ca Juan müten huelulcauquelafuingu. Caquelu mari apostol quimlu ñi femün Santiago ca Juan, “rume lladcütufi ti epu peñihuen” (Mat. 20:24). Feipipelaingün chi: “¿Doi cümelu iñchiñ mu troquihuimu am? ¿Eimu müten am cüdahuelquefimu ta Jesús? Iñchiñ ca cüdahuelquefiyiñ, feimu ca ayünieiñ taiñ müleal ta fei mu”. Quimlaiñ tañi chem pihun engün, huelu ngoimanentuingün tañi rüf piuqueyehual engün.

13. Huelulcaulu pu apostol, ¿chumquei Jesús? (Mateo 20:25-28).

 ¹³ Huelulcaulu pu apostol, ¿chumi Jesús? Illcutulafi engün. Ca doi cümeque apostol quintuan pilafi, doi ñom piuquengeaingün ca rüf piuqueyehuaingün pilafi. Huelu mai ñochi duam mu quellufi engün ñi norümtual ñi raquiduam (papeltunge Mateo 20:25- 28). Pu apostol fentrenque rupa notucauquefuingün inei tañi hunencülen. Huelu ¿chumi Jesús? Turpu elcünulai ñi piuqueyefiel engün (Mar. 9:34; Luc. 22:24).

14. ¿Chem quimeltungequefui pu apostol cheu ñi tremümngen engün?

¹⁴ Jesús ñi antü mu, pu loncolechi religioso quimeltuquefui pu che ñi falin chengerpual (Mat. 23:6; ca ngüneduamafuimi ti video Asientos del frente en la sinagoga mülelu ti nota Mateo 23:6). Ca femngechi, doi falilu caquelu che mu troquiuquefuingün (Luc. 18:9-12). f Jesús quimniefui femngechi ñi tremümngen tañi pu apostol, ¿feimu raquiduampelai ñi cüdautun ñi ñom chengeal engün? (Prov. 19:11; Juan 2:24, 25). Jesús esperaquelafui ñi huelulcaunoal tañi pu apostol. Doi mai ñi huelulcahun mu engün, Jesús niefui paciencia fei engün mu. Jesús quimniefui ñi nien cüme piuque engün, feimu quimeltuquefui ñi nieal ñom piuque engün, ñi poyeafiel engün caquelu ca ñi doicülen caquelu mu engün ñi troquiunoal.

15. ¿Chem quimeltuafeiñmu femngechi dungu mu ñi rupan pu apostol?

¹⁵ Santiago ca Juan huesa femingu ñi pedifiel mu Jesús doi falin cüdau. Caquelu pu apostol ca huesa femingün, quiñeucülelafuingün. Huelu Jesús pengelelfi tañi piuqueyeniefiel tañi 12 apostol. ¿Chem quimeltueiñmu tüfa? Huelulcaule caquelu che, fente falin-ngelai tañi femün engün, doi falin-ngei iñchiñ taiñ cüme femal. ¿Chem quelluafeiñmu? Quiñe peñi cam quiñe lamngen illculcaeliyiñmu, ramtuhuaiñ: “¿Chumngelu fente huesa raquiduameleneu ñi femün tati peñi? ¿Iñche ñi raquiduam mai huelulcalepei? ¿Mülei ñi cümelcacünuafiel? Tüfachi peñi, ¿rupamequei chi huesaque dungu mu? Iñche ñi huesa femnon mu rume, ¿pengelelafun piuqueyehun ca ngoimayafun tañi femeteu?”. Hueluconque taiñ piuqueyehun mu, pengelaiñ taiñ rüf inaniefiel ta Jesús.

16. ¿Chem quimeltuafeiñmu ñi cüme femün ta Jesús?

¹⁶ Jesús ñi femün mu quellueiñmu taiñ cüme quimafiel taiñ pu peñi ca pu lamngen (Prov. 20:5). Jesús quimnieñmafi ñi piuque ta pu che, iñchiñ femlayafuiñ. Huelu mülei taiñ nieal paciencia huelulcaule engün iñchiñ mu (Efes. 4:1, 2; 1 Ped. 3:8). Quimliyiñ cheu ñi tuhun taiñ pu peñi ca pu lamngen, doi cüdautulayaiñ taiñ nieal ta paciencia. Peaiñ quiñe rupan dungu.

17. ¿Chem quimürpuafuiñ ñi rupan quiñe huitran-ngepaquechi loncolelu?

 ¹⁷ Peaiñ ñi rupan quiñe huitran-ngepaquechi loncolelu África mapu mu. Taiñ peñi quimfi cangelu peñi, nehue piuqueyechequenolu troquifi. Fei feipi: “Tañi nütramcanoafiel tañi peñi, huelu mai eluhun ñi cüme quimafiel”. Doi cüme quimuulu engu, quimi chumngechi ñi tremümngen ti peñi ca cheu ñi tuhun, fei quimürpufi ñi chumngechi chengen. Taiñ peñi huitran-ngepaquechi loncolelu feipi: “Ti peñi rume cüdautui ñi cüme yeucüleal caquelu che engün. Ñi cüdautun mu rume, doi cüme chengerpui, feimu rume afmatufali tañi femün. Fei cüme huenihuen-ngerpuyu”. Taiñ cüme quimfiel taiñ pu peñi ca pu lamngen, doi cüdaungelai taiñ piuqueyeafiel.

18. Quiñe che huesa femeliyiñmu, ¿chem raquiduamafuiñ? (Proverbios 26:20).

¹⁸ Quiñeque mu ayüafuiñ chi ñi nütramcayal quiñe peñi cam quiñe lamngen taiñ huesa femeteu. Huelu hune mülei taiñ ramtuhual: “¿Com quimnien chem ñi rupan?” (Prov. 18:13). “Tati peñi, ¿rüf ayüniefui tañi huesa duamelaeteu?” (Ecl. 7:20). “Iñche ca femngechi huelulcauquefun chi cuifi” piafuiñ (Ecl. 7:21, 22). “Nütramcafili tüfachi che, ¿doi huesalcalerpupeai mai tüfachi dungu?” (papeltunge Proverbios 26:20). Raquiduamliyiñ tüfachi dungu mu, taiñ piuqueyefiel mu taiñ peñi cam lamngen, ngoimayafuiñ chi taiñ huesa femeteu.

19. ¿Chem eluucüleiñ taiñ femal?

¹⁹ Pu Dunguquelu Ineingen Jehová tañi rüf piuqueyehun engün, pengelqueingün ñi rüf inaniefiel ta Jesús. Quisuque iñchiñ ca pengelafuiñ taiñ rüf inaniefiel ta Jesús piuqueyefiliyiñ taiñ pu peñi ca pu lamngen tañi culpafe chengen mu rume engün. Piuqueyecheliyiñ, caquelu che inaduamafui chem religion ñi rüfngen, fei quiñehuafui iñchiñ mu engün taiñ poyeafiel ta Jehová. Feimu amuleai taiñ piuqueyechequen, femngechi pengelaiñ taiñ rüf cristianongen.