“Ti pariente ñi doi familiayefiel ta Elimélec”, ¿chumngelu feipi ñi pofrengerpual nieule Rut engu? (Rut 4:1, 6).

Fütra cuifi mu, lan mu quiñe huentru curengelu huelu nienolu quiñe fotüm cam ñahue, ¿chem rupayafui tañi mapu mu? ¿Ñamafui tañi familia ñi üi? Moisés ñi ley huiñoldunguquefui com tüfachi ramtun.

Quiñe huentru fendefule tañi mapu fente tañi pofrengerpun mu, quiñe peñi cam quiñe pariente huiño ngillañmatuafui tañi mapu, femngechi tati mapu amuleafui tañi familia mu. Ca femngechi femngequefui ti mapu ñi niequefel ti huentru lalu (Lev. 25:23-28; Núm. 27:8-11).

¿Chumquefuingün ñi ñamümnoafiel tati laluchi che ñi familia ñi üi? Tati lalu ñi peñi quiñeuquefui tañi fillca engu, femngechi tañi nieal quiñe yall tañi ñamnoal ñi üi tati lalu, ca femngechi ñi ngen-ngerpual ti lalu ñi mapu. Femngechi incañpengequefui tati lantu domo (Deut. 25:5-7; Mat. 22:23-28). Rut tañi rupan mu inangei feichi huimtun.

Raquiduamiyiñ ñi rupan mu ta Noemí. Quisu fütayequefui ta Elimélec. Lalu Elimélec ca tañi epu fotüm, ngehuelafui quiñe huentru no rume tañi cuidayaeteu (Rut 1:1-5). Huiñotulu Noemí Judá mapu mu, feipifi tañi nanüng Rut pingelu: “Feipifinge ta Boaz ñi huiño ngillatual Elimélec ñi mapu”. Boaz, Elimélec ñi parientengefui (Rut 2:1, 19, 20; 3:1-4). Huelu Boaz quimniefui ñi nien quiñe doi fülmaucülechi pariente, fei ta doi ngen-ngerquefui ñi huiño ngillatuafiel (Rut 3:9, 12, 13).

Ellaca mu, “ti pariente ñi doi familiayefiel ta Elimélec” eluucülefui ñi huiño ngillatuafiel chi mapu (Rut 4:1-4). Quimniefui ñi gastayal fentren plata. Huelu ca quimniefui fente tañi cuselen mu Noemí, niehuelayafui püñeñ ñi ngen-ngeal Elimélec ñi mapu. Feimu ellaca mu, cüme dungu troquifui huiño ngillatuafiel feichi mapu.

Huelu tüfachi huentru quimlu ñi nieafiel ta Rut, pihuetulai ñi ngillayafiel feitachi mapu. Quisu feipi: “Ngillalayafiñ. Femli, pofrengerpuafun” (Rut 4:5, 6). ¿Chumngelu femngechi feipi?

Tüfachi huentru cam caquelu pariente niefile ta Rut, fei Rut niele quiñe püñeñ, feichi püñeñ ngen-ngerpuafui Elimélec ñi mapu. ¿Chumngechi ‘pofrengerpuafui’ feichi huentru? Biblia feipilai tüfa, huelu ti huentru, ¿chumngelu chi cai feipi tüfa? Peaiñ quiñeque dungu.

• Quiñe dungu, ¿raquiduampelai ñi ngünamcayal tañi plata? Quisu am ngen-ngehuetunoafulu Elimélec ñi mapu, doi mai Rut ñi püñeñ ta ngen-ngetuafui.

• Epu dungu, mülefui ñi eluafiel iyael ca cuidayafiel ta Rut engu Noemí.

• Cüla dungu, Rut niefule püñeñ ti huentru engu, feichi püñeñ ca llohuafui ti huentru ñi mapu tañi pu yallngealu.

• Meli dungu, feichi huentru nienole yall huelu nierpule quiñe fotüm Rut engu, Rut ñi püñeñ ngen-ngerpuafui feichi huentru ñi mapu ca Elimélec ñi mapu. Feichi huentru lale, tañi mapu ngen-ngerpuafui tañi fotüm, huelu yenielayafui ti huentru ñi üi, doi mai Elimélec ñi üi. Feimu feichi huentru eluucülelai ñi ñamümal chem tañi nieel ñi quelluafiel ta Noemí. Feimu rulpalelfi ta Boaz ñi huiño ngillatuafiel Elimélec ñi mapu. Boaz femi, duamlu cai feichi huentru lalu ñi ñamümnoal tañi üi (Rut 4:10).

Feimu ti pariente ñi doi familiayefiel ta Elimélec doi ayüquefui ñi ñamümnoal tañi üi ca com tañi nieel. Feichi huentru quisutu duamuuquefui. Tunte feichi huentru yafüluufui ñi amuleal tañi üi, feula quimüñmangelai. Ca femngechi ñamümi quiñe falin-ngechi dungu, Boaz mai ta elungei, ti Mesías ñi cüpan chengerpual. Feichi huentru elungefui quiñe cüme dungu ñi femal, huelu pilai ñi quelluafiel tiyechi epu lantu domo. ¡Müna huesa tripai! (Mat. 1:5; Luc. 3:23, 32).