1. ¿Chem cümeque dungu llouqueiñ Jehová tañi troquiñche mu?

 MÜNA ayühun-ngei coneltuleal Jehová tañi troquiñche mu. Taiñ mülen mu fentepun antü meu, doi huesalcalerpui taiñ mongen. Huelu Jehová elueiñmu taiñ pu peñi, pu lamngen taiñ quellunieaeteu (Sal. 133:1). Jehová quelluqueiñmu ayüucüleal taiñ familia iñchiñ (Efes. 5:33–6:1). Jehová eluqueiñmu quimün ca quelluqueiñmu taiñ cüme raquiduamcüleal ca ayüucüleal.

2. ¿Chem mülei taiñ femal ca chumngelu?

² Mülei taiñ nehuencünuhual taiñ serfinieafiel ta Jehová. ¿Chumngelu? Hueluraquiduamelafeiñmu ñi chem piquen ca ñi femquen pu peñi pu lamngen. Ca huesa duamcüleafuiñ taiñ huelulcan mu, doi mai huelulcaumequeliyiñ quiñe dungu meu. Tüfachi troquiñ quelluaiñmu taiñ serfinieafiel ta Jehová rupaliyiñ cüla dungu mu: 1) huesa duameleliyiñmu quiñe peñi cam lamngen, 2) huesa duameleliyiñmu taiñ afcadi, ca 3) huesa duamcüleliyiñ taiñ culpan mu. Ca peafiyiñ ñi femün cüla che tripalu Biblia meu.

HUESA DUAMELELIYIÑMU QUIÑE PEÑI CAM LAMNGEN

3. ¿Chem dungu rupaquei pu serfiquefilu ta Jehová?

³ ¿Chem rupayafuiñ? Quiñeque mu taiñ pu peñi, pu lamngen nüngayelafeiñmu. Caquelu lladcütuafeiñmu ca huesa duamelafeiñmu. Cafei pu loncolelu ca huelulcaqueingün, feimu quiñeque che ramtuhuafui: “Tüfa, ¿Jehová tañi troquiñche pemai?”. Rupan mu tüfa, dunguhuelafingün tañi pu peñi, lamngen tañi huesa duameleteu ca trahuluuhuelaingün, femngechi quiñeucülehuelaingün  ñi serfiafiel Jehová trahunche mu (Sof. 3:9). ¿Cümelcalepei mai tañi dulliel engün? Ngüneduamaiñ ñi rupan quiñe che poyequefulu Jehová cuifi.

4. ¿Chem dungu mu rupai Pablo?

⁴ ¿Inei inayentuafuiñ? Ti apostol Pablo quimniefui ñi culpan chengen tañi pu peñi. Hue cristianongerpulu Pablo, quiñeque cristiano Jerusalén trahunche mu llicaniequefeyu (Hech. 9:26). Caquelu huesa dunguyeyu (2 Cor. 10:10). Pablo ca ngüneduamfi ñi huesa femün quiñe loncolelu, fei huelulcahuafui caquelu peñi ca lamngen (Gál. 2:11, 12). Ca lladcülcaeyu ñi femün Marcos, fei tüfa quiñe cüme hueni fel (Hech. 15:37, 38). Duamhuelayafiñ tüfachi peñi piafui Pablo, huelu femlai. Falintuniefi tañi pu peñi ca fentecünulai tañi serfinieafiel ta Chau Jehová. ¿Chem quellueyu? Ngüneduamaiñ.

5. ¿Chem quellueyu Pablo ñi püntüluunoal tañi pu peñi mu? (Colosenses 3:13, 14; ca inaduamnge ti adentun).

⁵ Pablo fente ñi piuqueyeniefiel tañi pu peñi ca pu lamngen, ngüneduamquefui ñi cüme chengen engün. Quiñepülecünuquefui ñi huelulcahun engün. Tañi piuqueyehun quellueyu ñi huiñoduamtucheal, femngechi ngülamtueiñmu taiñ femal Colosenses 3:13, 14 (papeltunge). Ti hunen rupa ñi amuldunguyahun Pablo, Marcos quisucünueyu. Huelu Pablo afquentu illcutunielafi ta Marcos. Rupachi tripantu, huirintuculelfilu pu Colosas trahunche, feipi ñi rume falintuniefiel ta Marcos ca ñi fente yafültucueteu (Col. 4:10, 11). Ca presulelu Roma mu, feipi ñi huercülelngeal ta Marcos tañi quelluaeteu (2 Tim. 4:11). Quimfali Pablo ñi perdonafiel tañi pu peñi ca ñi fülmaniefiel engün. ¿Chem quimeltueiñmeu Pablo ñi femün?

6, 7. Culpan chengelu rume taiñ pu peñi pu lamngen, ¿chem quelluaiñmu taiñ piuqueyenieafiel? (1 Juan 4:7).

⁶ ¿Chem quimeltuqueiñmeu? Jehová ayüniei taiñ piuqueyenieafiel taiñ pu peñi pu lamngen (papeltunge 1 Juan 4:7). Huesa duameleliyiñmu quiñe peñi cam lamngen, cüpa huesalcaeneu pilayaiñ. Doi mai raquiduamaiñ feichi che nehuentumequei ñi inayafiel Jehová ñi ngülam (Prov. 12:18). Culpan chengeiñ, huelu Jehová rume piuqueyenieiñmeu.  Huelulcauquelu rume iñchiñ, Chau Jehová hueniyenieiñmu ca lladcütuniequelaeiñmu (Sal. 103:9). Mañumfali Jehová tañi perdonachequen mu, feimu iñchiñ ca femngechi perdonachequeaiñ (Efes. 4:32–5:1).

⁷ Fülcülepale Jehová ñi antü, doi huesalcalerpuai ta mongen, feimu duamnieiñ taiñ fülmaucüleal taiñ pu peñi ca lamngen iñchiñ. Doi caiñetungeaiñ peno, cafei presungeafuiñ. Feichi mu doi duamnieaiñ taiñ pu peñi pu lamngen tañi quellu (Prov. 17:17). Femngechi rupai quiñe loncolelu Josep pingelu, a España mapu mu. Pinolu ñi conal ejercito mu, presungei caquelu peñi engün. Quisu feipi: “Carcel mu huircolequei che, feimu nüngayeluuquefuiñ. Feimu mülefui taiñ hueluconque perdonahual. Tüfa quellueiñmeu taiñ quiñeucüleal ca taiñ cuñiutucuhual caquelu presu mu testigongenolu. Quiñe rupa allfüi tañi lipang, trariniefiñ, fei pepi nengümhuelafiñ. Duamniefun fentren quellu, feimu quiñe peñi cüchañmaeneu tañi tacun ca rume füreneeneu. Feichi doi duamnielu quellu, ngüneduamün fente tañi piuqueyengen ta iñche” pi. Rume falin-ngei feula taiñ cümelcaucüleal taiñ pu peñi, pu lamngen iñchiñ.

HUESA DUAMELELIYIÑMU TAIÑ AFCADI

8. ¿Chem huesaque dungu rupaquei pu curehuen?

⁸ ¿Chem rupayafuiñ? Biblia feipi com pu curehuen rupaquei huesaque dungu (1 Cor. 7:28). ¿Chumngelu chi cai? Ti domo ca ti huentru culpan chengeingu. Caquerumequei tañi chumngechi chengen, tañi ayüqueel cam tañi ayüquenoel. Caquerumeafui tañi tuhun ca tañi tremün engu. Ca deu nieulu engu, doi cüme quimuhuingu, fei ngüneduamafuingu quiñeque dungu tañi ayüquenofiel tañi afcadi mu. Feichi dungu mu yafcahuafuingu. Ti curehuen mür huelulcauqueingu, feimu mülefui ñi trür yafüluhual ñi cüme yeucüleal. Huelu quiñeque mu pu curehuen epuñpüle culpatuuquei ñi huesa rupan mu, feimu doi cümei tayu hudahual piafuingu. ¿Cümepeafui mai ta tüfa? b Ngüneduamaiñ ñi rupan quiñe domo tripalu Biblia mu. Quisu huesa rupalu rume tañi füta ñi duam mu, fentecünulai ñi poyeafiel ta Jehová.

9. ¿Chem huesa rupai Abigaíl?

⁹ ¿Inei inayentuafuiñ? Abigaíl tañi füta Nabal pingefui, fei rume huesañmangefui ca femquefui huesaque dungu (1 Sam. 25:3). Feimu, ¿Abigaíl huesa rupaquefui peno? Quiñe antü, Nabal huesa pifi David ca tañi pu hueichafe, feimu David ayüfui tañi langümafiel (1 Sam. 25:9-13). Tüfa mu, langümngepe müten piafui ta Abigaíl, lifreletuan. Huelu femlai. Llellipufi ta David ñi perdonayafiel tañi füta (1 Sam. 25:23-27).

10. ¿Chem quellueyu Abigaíl ñi hueluraquiduamnoal huesañmangelu rume tañi füta?

¹⁰ Abigaíl poyequefui ta Jehová, feimu rume falintuquefui chem pin Jehová tati curehuen mu. Rüfcünu, quimniepelafui  ñi feipin Jehová feichi trahulfilu Adán engu Eva ñi niehual (Gén. 2:24). Abigaíl cüme quimniefui Jehová mu ñi yamfalngen ti curehuen. Abigaíl ayüniefui ñi ayühuelafiel ta Jehová, feimu yafüluhui ñi montulafiel ta Nabal ca caquelu pu huentru. Tañi langümüñmangenoal tañi füta, quisu pürümquechi pepicahui, fei perdonaen pifi ta David tañi huesa femnon mu rume. Abigaíl nehuen piuquengefui ca quisu duamuuquelafui, feimu Jehová rume poyequefeyu. ¿Chem quimürpuafui pu curehuen Abigaíl tañi rupan mu? Peafiyiñ.

11. 1) ¿Chem duamquei Jehová pu curehuen mu? (Efesios 5:33). 2) ¿Chem quimeltuafeiñmu Carmen ñi femün? (Ca inaduamnge ti adentun).

¹¹ ¿Chem quimeltuqueiñmeu? Jehová ayüquei pu curehuen ñi quiñeucüleal tutefalnole rume ti huentru cam ti domo. Jehová rume ayüuquei pu curehuen yamniehual ca poyeniehual. Ca lladcütuule engu, mülei ñi yafüluhual tañi cümelcautual (papeltunge Efesios 5:33). Inaquintuafiyiñ Carmen ñi rupan. Yenierquei cayu tripantu ñi fütangen, fei eluhui ñi papeltual Biblia ca Dunguquelu Ineingen Jehová ngerpui. Quisu feipi: “Tañi huentru rume illcui, nüngayeleyu iñche ñi poyefiel ta Jehová. Üyautuquefeneu, elcünuayu pieneu”. Tunte femlu rume, Carmen püntütripalai tañi füta mu. Quechu mari tripantu rupai ñi yafüluhun. Com femi ñi yamnieafiel ca poyenieafiel tañi füta. Quisu ca feipi: “Rupachi tripantu mu, doi cüme quimürpun ñi chum duamcülen tañi füta ca chumngechi ñi poyenquechi dunguafiel. Quimnien Jehová ñi rume falintuquefiel ti curehuen, feimu yafüluhun tayu quiñeucüleal. Iñche am poyeniefilu Jehová, nehuencünuhun tañi püntüunoal tañi füta mu” pi. c Huesa rupamequele tami curehuen-ngen, rüf maneluhuafuimi Jehová mu tami quelluaeteu.

HUESA DUAMCÜLELIYIÑ TAIÑ CULPAN MU

12. Fütra culpaliyiñ, ¿chem raquiduamafuiñ?

¹² ¿Chem rupayafuiñ? Biblia feipi fütra culpaliyiñ, cutrantupiuqueafuiñ ca hueñancülafeiñmu (Sal. 51:17). Femngechi rupai ta Robert. Fentren tripantu yafüluhui tañi siervo ministerialngerpual. Rupachi antü mu coni quiñe fütra culpan mu, fei ngüneduami tañi huesa duamelfiel ta Jehová. Quisu  feipi: “Ngüneduamuulu iñche ñi culpan, trañmaduamcülehuen. Illnguduami tañi piuque, ngüman ca llellipufiñ ta Jehová. Raquiduamün Jehová turpu allcütuhuenoaeteu troquihun. Rüfcünu, huesa duamelfiñ ta Jehová”. Ca femngechi iñchiñ culpaliyiñ Jehová mu, taiñ piuque ngünencayafeiñmu, fei raquiduamafuiñ taiñ quisucünuaeteu Jehová. Falintulaeneu ñi serfiafiel piafuiñ (Sal. 38:4). ¿Femngechi dungu mu rupaqueimi? Femngechi rupalmi, rume quelluafeimu ñi rupan quiñe huentru tripalu Biblia mu. Fütra culpalu rume, fentecünulai ñi poyeafiel ta Jehová.

13. ¿Chem mu huelulcahui Pedro?

¹³ ¿Inei inayentuafuiñ? Feichi pun petu lanon Jesús, apostol Pedro fentren rupa huelulcahui, feimu fütra culpai. Hunelu mu quisutu maneluhui, feipi: “Caquelu apostol püntütripale Jesús mu, iñche femlayan” pi (Mar. 14:27-29). Fei hula, Getsemaní lelfün mu mufü rupa umaunagi (Mar. 14:32, 37-41). Malocontueteu Jesús tañi pu caiñe, Pedro püntütripai, quisucünufi ta Jesús (Mar. 14:50). Fei hula, cüla rupa quimlafiñ Jesús pi (Mar. 14:66-71). Pedro ngüneduamuulu tañi fütra culpan, rume cutrantupiuquei fei ngümacahui (Mar. 14:72). Ca pichin mu müten, pefi Jesús ñi pültrülen ti orcon mamüll meu, fei ¿doi huesa duamnagpelai?

14. ¿Chem quellueyu Pedro tañi serfinierpuafiel ta Jehová? (Inaduamnge ti adentun).

¹⁴ Huelulcaulu rume, Pedro amulei ñi serfinieafiel ta Jehová. ¿Chem quellueyu? Pedro huichutripalai tañi pu peñi mu, femngechi yafültucueyu engün (Luc. 24:33). Ca huiñomongetulu Jesús, peufaluufi Pedro tañi yafültucuafiel peno (Luc. 24:34; 1 Cor. 15:5). Jesús huesa pilafi ta Pedro tañi huelulcan mu, doi mai elufi falinque cüdau (Juan 21:15-17). Pedro quimfui tañi huesa culpan, huelu famentuulai Jehová mu. ¿Chumngelu am? Quimnielu cai Jesús tañi petu piuqueyenieteu ca yafültucunieyu tañi pu peñi. ¿Chem quimeltueiñmu Pedro tañi rupan mu? Peafiyiñ.

15. ¿Chem ayüquei Jehová taiñ quimtucunieal? (Salmo 86:5; Romanos 8:38, 39; ca inaduamnge ti adentun).

¹⁵ ¿Chem quimeltuqueiñmeu? Jehová duamquei taiñ quimtucunieal taiñ piuqueyenieteu ca cüpa perdonaqueteu  (papeltunge Salmo 86:5; Romanos 8:38, 39). Culpan mu iñchiñ, huesa dungu no taiñ hueñancüleal. Huelu Jehová piuqueyehuelaeneu ca perdonalayaeneu pilayaiñ. Doi mai, pürümquechi quintuaiñ quellu. Robert taiñ nütramcapeel ti parrafo 12 mu, feipi: “Iñche am quisutu maneluuquefulu, feimu conün culpan dungu mu”. Huelu Robert ngüneduami ñi dunguafiel pu loncolelu. Robert ca feipi: “Dungufilu iñche pu loncolelu, quimeleneu ñi petu piuqueyenieteu Jehová. Ca ngüneduamün ti pu loncolelu tañi piuqueyenieteu. Pengeleneu Jehová tañi quisucünunoeteu”. Ca femngechi iñchiñ Robert reque, feipiafuiñ Jehová taiñ rume piuqueyenieteu. Nor raquiduamtuliyiñ taiñ culpan mu, nütramcafiliyiñ pu loncolelu ca huiño contuhuenoliyiñ femngechi culpan mu, Jehová perdonayaiñmu llemai (1 Juan 1:8, 9). Rüfcünu maneluucüleliyiñ Jehová mu taiñ perdonaqueteu, fentecünulayaiñ taiñ serfiafiel huelulcauliyiñ rume.

16. ¿Chumngelu eluucüleiñ serfinieafiel ta Jehová?

¹⁶ Tüfachi afaelchi antü mu, Jehová rume falintuñmaqueiñmu com taiñ cüdau. Jehová quelluaiñmu taiñ serfinieafiel tunte rupamequeliyiñ rume cüdaungechi dungu mu. Yafüluhuaiñ taiñ doi poyenieafiel taiñ pu peñi ca lamngen, ca perdonayafiyiñ. Cafei yafüluhuaiñ com taiñ piuque mu ñi tutehual pu curehuen mu, femngechi pengelelafiyiñ ta Jehová taiñ poyeniefiel ca taiñ yamniefiel ti curehuen. Fütra culpaliyiñ, quintuaiñ Jehová tañi quellu. Quimtucunieaiñ Jehová taiñ poyenieteu ca taiñ perdonayaeteu, ca amuleaiñ taiñ serfinieafiel. Quimnieiñ taiñ rume cümelcayaeteu Jehová, feimu “fentecünulayaiñ taiñ cüme femün” (Gál. 6:9).