Tañi huesa rupan mu, feimu eluhun ñi quimafiel ta Chau Dios. Fei, ¿chem rupai feichi dumiñcülechi pun meu? Nütramcaleluhuayiñ. Huelu hune quimeleluhuayiñ ñi rupan pichicalu iñche, femngechi quimtucuafuimün chumngelu eluhun ñi quintuafiel ta Ngünechen.

Choyüngen 1937 tripantu meu, Francia mapu meu, Guesnain pingechi huaria meu. Tañi chau minerongefui, fei quimeltueneu ñi cüme cüdaufe ngeal. Tañi Chau nor chengefui, fei eluhun tañi inayentuafiel. Pu minero müna huesa rupaquefuingün, feimu tañi chau eluhui ñi incañpeafiel. Feimu adniefui tati sindicato ca coni huelga mu ñi protestayal. Cafei tañi chau müna lladcülcaquefeyu pu sacerdote. Fentren engün pütrün chemcün nierquefuingün, huelu ca pediquefuingün plata ca iyael tati pu che doi pofrengelu. Tañi Chau fente ñi lladcütuquefiel pu sacerdote, quimeltulaeneu chem religion no rume, nütramcaquelafuyu rume Chau Dios mu.

 Tremcülerpulu iñche ca ayüfun ñi norümal quiñeque huesaque dungu. Ayülafun ñi huesa troquingeal pu catripanche. Iñche pelotatuquefun pu catripanche meu, fei cüme rupaquefuiñ. Cafei ñi ñuque ca tuhun-ngefui, feimu iñche ayülefun com pu che ñi quiñeucüleal.

1957 tripantu meu conün tati ejercito mu, fei huercüngen Argelia mapu meu. Chumngechi nütramcaleluhuiyiñ feichi dumiñ pun, deu huirarlu iñche: “¡Ahuem Chau Dios!”, peufaluurumei quiñe aucan burro. Pefilu tañi hueichafe ngenon, ayüunagün. Huelu tañi rupan hueichan meu eluhun tañi ramtuhual: “¿Chumal mongelen? ¿Duamniepeneu mai Chau Dios? ¿Cüme feletuafun chi?”.

Pichi rupalu elungen permiso ñi pemeafiel tañi Chau ca ñuque, üyeu quimfiñ quiñe che testigongelu, fei eleleneu quiñe Biblia. Huiñotulu Argelia mu, eluhun ñi papeltuafiel ti Biblia. Quiñe troquiñ ñi papeltufiel afmatuleneu, tüfa ta Apocalipsis capitulo 21, versiculo 3 ca 4 feipilu: ‘Fei Ngünechen mületuai tati pu che meu. Ancümüñmangetuai engün tañi cülleñu, fei ngehuelayai ta lan, ngüman no rume, eyütun no rume, cutrantun no rume’. Fei ramtuhun: “¿Felepeai mai tüfa?”. Feichi mu müte quimquelafun Biblia meu ca Chau Dios mu.

1959 tripantu meu, tripan tati ejercito meu, fei quimfiñ quiñe testigo François pingelu, pütrünque dungu quimeltueneu Biblia mu. Quimeltueneu Chau Dios ñi nien quiñe üi, Jehová pingei (Sal. 83:18). Ca feipieneu Jehová ñi cüme elcünutuafiel ti mapu, ca ñi femtripayal ñi feipin Apocalipsis capitulo 21, versiculo 3 ca 4.

Com tañi quimürpun puhui tañi piuque mu. Huelu ca rume illcunagün pu sacerdote mu, re coila dungu quimeltuquelu engün. Ayüfun com che ñi quimal ñi coilatumequen pu sacerdote. Petu raquiduamcülefun tañi chau reque, pürümquechi ayülefun ñi norümtuafiel huesaque dungu.

François ca cangelu hueni quellueneu tañi tüngduamcüleal. Feipieneu iñchiñ pu rüf cristiano juzgachequelaiñ, doi mai quimelelquefiyiñ ta che tati rüf dungu Ngünechen meu. Femngechi femi Jesús, fei ca femngechi femquei tañi pu inaniequeteu (Mat. 24:14; Luc. 4:43). Cafei quimeltungen chumngechi ñom piuque mu nütramcayafiel pu che chem feyentun niefule rume. Chumngechi feipi ta Biblia, pu inaniequefilu ta Jesús ngelai ñi quehuayahual, huelu mai mülei ñi piuqueyeafiel com che (2 Tim. 2:24).

Eluhun ñi cüme elcünutuafiel tañi mongen, fei 1959 tripantu meu fautizahun quiñe fütra trahun meu. Fei mu quimfiñ quiñe üllcha domo, fei ayüfiñ. Müchaique peyahulmequefiñ tañi trahunche mu, fei 1960 tripantu mu, niehuiyu. Angèle pingei, quiñe cüme domo tati. Quiñe regalo cüpalu Jehová mu troquiniefiñ (Prov. 19:14).

Rupayechi tripantu meu, falinque dungu quimeltueneu caquelu pu peñi. Quimürpun: chem cüdau elungeliyiñ rume, femafiyiñ ñom piuque mu ca inayafiyiñ ñi feipin Proverbios capitulo 15, versiculo 22. Feipi: “Quiñe che ramtuquenolu, huesa tripaquei ñi pepicacünuel, huelu cüme tripaquei mülen mu fentren ngülamtufe”.

1964 tripantu meu elfalcünungen ñi huitranmeafiel fillque trahunche, fei quimtucun ñi fente falin-ngen inanieal ñi chem pin Proverbios. Feichi mu, iñche 27 tripantu niefun. Fentren quimün nielafun ca huelulcauquefun, huelu eluucülefun tañi ngülamtungeal.

Acordapen quiñe dungu ñi rupan. Deu huitranmefilu quiñe trahunche París huaria mu, quiñe peñi feipieneu: “¿Pichi nütramcayafuyu?”. “Mai” pifiñ.

Ti peñi ramtueneu: “Louis. Pu doctor, ¿inei mülei ñi quelluafiel? ¿Pu cutran cam pu tremolelu?”.

“Tati pu cutran llemai” pifiñ.

“Cümei tami feipin” pieneu, “iñche inaduameyu tami doi alünque antü tami rupaquen pu loncolelu trahunche meu müten. Huelu taiñ trahunche meu mülei hueque peñi ca lamngen. Quiñeque ngañhuadcülei ca caquelu duamniei tañi quellungeal, fei müna cümeafui tami rulpaantücünual fei engün meu. Pemefilmi tañi ruca meu, quiñentrür yafütuafuimün, femngechi yafültucuafuimi” pieneu.

Tüfachi poyen peñi ñi ngülam, rume falintufali. Tüfachi peñi rume piuqueyefi pu peñi ca pu lamngen, feimu fente cüme puhui tañi feipin iñche tañi piuque mu. Fei ñom piuque mu eluhun ñi inanieal tañi ngülamtueteu. Mañumniefiñ ta Jehová feichi pu peñi mu, cümeque ngülam hulquelu.

1969 ca 1973 tripantu meu, femngei epu fütraque trahun ca mangelngei fentren peñi ca lamngen ca mapu meu cüpalu. Fei iñche elfalcünungen ñi eluafiel iyael com pu che aculu trahun mu. 1973 tripantu meu, tati fütra trahun quechu antü mu femngei, fei elufiyiñ iyael ta 60.000 che caque antü meu. Elungen mu tüfachi cüdau, rume pellquelefun. Huelu ca huiño quellueneu ñi feipin Proverbios capitulo 15, versiculo 22, feimu eluhun ñi quellungeal.  Quintufiñ pu peñi adümuucülelu tüfachi cüdau meu: carnicero, anümcaquelu, deumaiyalquelu ca ngillacaquelu. Fei quiñentrür enturpuiñ tüfachi fütra cüdau.

1973 tripantu mu, mangelngeyu tañi domo iñchiu tayu cüdaupual Francia mülechi Betel mu. Ñi hunen cüdau tañi elungeel iñche, rume cüdaungelu troquifiñ. 1970 puulu 1993 tripantu meu, taiñ cüdau catrütungei Camerún mu. Fei iñche elfalcünungen ñi yelelafiel fillque papel taiñ pu peñi ca pu lamngen üyeu mülelu. Fütra cüdau ürque, pepilnoafilu troquihun. Feiti peñi adniequelu ti cüdau Betel mu, ngüneduameneu tañi chum duamcülen, fei feipieneu: “Taiñ pu peñi ca pu lamngen Camerún mu, duamniei ñi elungeal tüfachi fillque papel. Mülei taiñ cuñiutucuafiel engün”.

Fentren rupa trahuluuquefuiñ pu loncolelu cüpalu Camerún mu. Trahuluuquefuiñ quiñeque pais inafülcülelu Camerún mu. Feichi pu peñi fütra piuquecünuhuingün ca müna quimchengefuingün. Quellueneu tañi yelelafiel fillque papel pu peñi ca pu lamngen Camerún meu. Jehová fütra cümelcaeiñmu taiñ cüdau meu. Doi 20 tripantu meu taiñ cüdau catrütungequefui Camerún mapu meu, huelu taiñ pu peñi ca pu lamngen rumel llouqueingün ti revista Ti Huerquen ca Taiñ Amuldunguqueel pingechi papel.

Hue eluulu ñi quimafiel ta Angèle, ngüneduamfiñ tañi cüme chumngen ca ñi fente cüme hueniyefiel ta Jehová. Nieulu iñchiu, doi cüme quimüñmafiñ tañi cüme piuquengen tañi domo. Feichi pun müten tayu niehun, feipieneu: “¿Ngillatuafuimi ta Jehová tayu quelluaeteu quiñentrür cüdahuelafiel com piuque mu?”. Fei Jehová cümelcaeyumu, quimfali tayu allcütueteu.

 Tañi domo ca quelluqueneu tañi doi maneluucüleal Jehová mu. 1973 tripantu mu, mangelngeyu ta Betel. Huelu iñche rume ayüfiñ ñi huitranmeafiel fillque trahunche. Fei, “¿cümepeafui chi tañi amual Betel mu?” ramtuhun. Fei tañi domo feipieneu: “Iñchiu eluhuiyu tayu cüdahuelafiel ta Jehová. Fei, ¿cümenoafulu inanieal chem tayu feipieteu quisu tañi troquiñche?”. Chem pihuelan rume, amucayu müten ta Betel. Tañi domo quim raquiduam niei, quimchengei ca eluucülei ñi femal Chau Dios tañi pin. Com tüfa quellueyumu tayu cüme dullial tayu mongen meu (Heb. 13:17).

Alün tripantu niefuyu rume, tañi domo petu quellunieneu. Fillque escuela ñi adcünuel Jehová tañi troquiñche, gringodungun mu ta nütramcangequei, feimu eluhuiyu tayu quimürpual gringodungun. Feimu doi 70 tripantu niefulu rume, eluhuiyu tayu trahuluhual quiñe trahunche gringodungun meu. Iñche coneltulen tati Troquiñche Adcünuquelu Betel Ruca, feimu rume cüdaungefui adcünual tañi tiempo ñi quimürpuafiel quiñe hue quehun dungun. Huelu tañi domo iñchiu, hueluquentu quelluhuiyu. Fei feula doi 80 tripantu nierpuyu, huelu amulecai tayu pepicahun trahun meu epurume quehun dungun meu. Cafei eluucüleyu tayu quelluconcüleal trahunche mu. Jehová müna cümelcaeyumu tayu quimürpufiel quiñe hue quehun.

2017 tripantu meu mangelngeyu tayu amual tati Escuela ñi Pepicangeam pu Adcünuquelu Betel ca tañi Domo engün. Tüfachi escuela femngei tati ruca ñi adcünuqueel ta Watchtower cheu ñi quimeltuchequen, mülelu Patterson huaria, Nueva York meu.

Jehová rume cüme quimeltuchequei (Is. 30:20). Feimu com tati pu che coneltulelu tañi troquiñche meu, huechequeche cam füchangefule rume, müna cüme quimeltungequeingün (Deut. 4:5-8). Fei ngüneduamquen: pu huechequeche allcütuquefilu ta Jehová ca pu peñi ca pu lamngen quimchengelu doi fülmaucüleingün Jehová mu, ca doi cüme yenieingün tañi mongen. Quimfali ñi rüfngen Proverbios capitulo 9, versiculo 9, feipilu: “Quimeltufinge quiñe quimchengelu, femngechi tañi doi quimchengerpual. Quimeltufinge quiñe nor piuquengelu, femngechi tañi doi quimün nierpual”.

Quiñeque mu, acordaquen ñi rupan feichi dumiñcülechi pun Argelia mapu meu. Feichi mu turpu raquiduamlafun chumngechi tañi cümelcayaeteu Jehová cüpalechi antü meu. ¡Caquelu che falinque dungu quimeltueneu! Felei llemai, Jehová rume cümelcaeyumu tayu mongen meu. Feimu eluucüleyu tayu doi quimafiel ta Jehová ca pu peñi ca pu lamngen quimchengelu.