TROQUIÑ ÑI CHILLCATUNGEAL 19
Chem no rume famentulayafeiñmu taiñ serfiafiel ta Jehová
“Fentren tüngün nieingün tati pu piuqueyequefilu tami ley; ca chem no rume huelulcalayafeyu” (SAL. 119:165).
ÜLCANTUN 122 ¡Amulepe taiñ nehuentuleal!
¿CHEM QUIMAIÑ? *
1, 2. 1) ¿Chem feipi quiñe quim huentru? 2) ¿Chem inaduamaiñ tüfachi troquiñ mu?
FENTRENQUE che feipiquei ñi feyentun Jesús mu, huelu inaquelafi tañi feipin (2 Tim. 4:3, 4). Quiñe quim huentru feipi: “Fachantü mülerumefule quiñe huentru Jesús reque cüme dungufule, ca femngechi famentuafuiñ chumngechi ñi femngequefel cuifi” pi tati huentru.
2 Jesús mülepalu Mapu mu, fentren che peeyu chumngechi ñi cüme enseñachequen ca ñi femquen afmatun dungu, huelu feyentulaingün. ¿Chumngelu? Tüfachi troquiñ mu peaiñ tüfa. Ca peaiñ chumngelu famentungequei pu rüfngechi cristiano. Cafei peaiñ chem quelluaiñmu taiñ famentunoafiel Jehová. Chumngechi feipipeiñ rupachi troquiñ mu, com tüfa quelluafui ñi testigongerpual pu epurume raquiduamcülelu.
1) JESÚS DULLINTUCHEQUELAFUI
¿Chumngelu fentren che famentufingün Jesús? Ayülafuingün Jesús ñi dullintuchequenon. ¿Famülque mu cai? ¿Chumngelu quiñeque che famentuafui ta Jesús? (Inaduamnge parrafo 3). *
3. Fentren che famentufi ta Jesús, ¿chumngelu am?
3 Mülepalu mapu mu, Jesús dullintuchequelafui. Com che engün trahuluuquefui, ricu cam pofre ngepe rume. Cafei feiti culpafe che pingequelu Jesús cutrantupiuqueyequefi. Ñi femün mu ta Jesús fentren che famentueyu. Doi mai ramtufingün ta Jesús ñi pu discipulo: ‘¿Chumngelu am ipeimün ca putupeimün fei ti cofraquelu impuesto ca ti pu culpafe eimün?’. ¿Chem pieyu ta Jesús? ‘Com tüfeichi cülfüncülelu duamtuquelai tati lahuentuchequelu, huelu ti cutrancülelu mai duamtuquei lahuentuchequelu. Iñche cüpan tati pu culpafe meu, fei ñi huiñoraquiduamtual engün ta Ngünechen meu’ (Luc. 5:29-32).
4. Pu judio, ¿chemu ngelafui ñi afmatulehueal?
4 ¿Chem quimeltuquei Biblia? Petu ñi cüpanon Mapu mu tati Mesías, Biblia feipicünui ñi cüme lloungenoal. Feipi: “Quisu illamcangei ca famentueyu ti pu che, [...] quisu ellcalequefui reque tañi ange iñchiñ mu. Illamcangei ca falinolu troquifiyiñ” (Is. 53:3). Tüfachi profecia pengeli ti Mesías ñi famentungeal. Pu Judio quimniefuingün tüfa, feimu ngelafui ñi afmatulehueal engün.
5. Fachantü, ¿chumngechi troquiqueiñmu pu che?
5 ¿Ca femngechi dungu rupaquei fachantü? Femllei mai. Pu loncolechi religioso doi cüme troquiquefi tati pu ülmenque che. Cafei cüme llouquefi engün tañi iglesia mu femfule rume Chau Dios ñi üdequeel. Ca feitachi loncolechi religioso illamcaqueiñmu iñchiñ pu testigo ngen. Iñchiñ com nehuen mu sefiquefiyiñ ta Jehová ca cüme yeniequeiñ taiñ mongen. Tunte felefule rume, pu che illamcaqueiñmu. Feimu Pablo feipi ta Chau Dios dullifi tati pu illamcangequelu (1 Cor. 1:26-29). Huelu Jehová mu, com tañi pu che falin-ngefui.
6. Ñi feipin Mateo 11:25, 26, ¿chem mülei tami loncontucual?
6 ¿Chem quelluaimu tami maneluucüleal Jesús mu? (Papeltunge Mateo 11:25, 26). Loncontucunge: Chau Dios dulliquefi pu ñom piuquengelu müten ñi femal Chau Dios ñi ayüqueel (Sal. 138:6). Tati pu che “nielai educacion” pieliyiñmu rume, huelu Jehová adniequeiñmu taiñ femal falinque dungu. Feimu llemai, com famentuafimi ñi huesa feipingequeel pu testigo.
2) JESÚS FEIPI ÑI COILANGEN QUIÑEQUE QUIMELTUN
7. 1) Jesús, ¿chumngelu feipifi pu fariseo ñi huesa femmequen engün? 2) ¿Chumingün tati pu fariseo?
7 Jesús ñi antü mu pu loncolechi religioso cüme ngülamtuquelafui pu che ñi femal Jehová ñi ayüqueel. Feimu Jesús feipifi engün ñi huesa femmequen. Pu fariseo doi falintuquefui ñi cüchayal tañi cuhu engün, huelu duamtuquelafui tati pu fütaque che (Mat. 15:1-11). Feimu Jesús feipieyu engün ñi huesa femmequen. Tati pu fariseo rume illcuingün ñi feipieteu Jesús. Feimu Jesús ñi pu discipulo feipifingün ta Jesús: “¿Quimimi am tañi huesa duamün tati pu fariseo allcülu engün tami femngechi feipin meu ta eimi?”. Fei Jesús feipieyu engün: ‘Chem anümca rume tañi huenu mapu Chau ñi anümnoel, ngeduentungeai folilcülen. Trauma reque felei engün, tati adniefilu ta caquelu trauma. Quiñe trauma adniefile ta cangelu trauma, mür ütrüfconaingu ta quiñe rüngan meu’ (Mat. 15:12-14). Pu fariseo lladcütufulu rume ta Jesús, huelu Jesús feipieyu müten ñi huesa femmequen engün.
8. Jehová llouquelai itrofill religion, ¿chem feipi Jesús ñi quimfalcünual tüfa?
8 Jesús quimfalcünui quiñeque che ñi quimeltuquen coilaque dungu. Jesús feipi ta Jehová llouquelafi itrofill religion. Doi mai Jesús feipi fentren che ñi conpual ti alürupachi rüpü yequefilu ta che ñi apümcangeal. Huelu pichin che müten conpuai feiti pichi rupachi rüpü yequefilu ta che ñi rumel mongeleal (Mat. 7:13, 14). Fentren che “iñche dios poyequefiñ” pingün, huelu rüf femquelaingün. Feimu Jesús feipi taiñ cuñiutucuucüleal feichi pu che ñom ufisa reque femfaluuquelu, huelu auca trehua reque feleingün. Tañi femün meu engün iñchiñ quimafuiñ inei ngen engün (Mat. 7:15-20).
¿Chumngelu fentren che famentufingün Jesús? Jesús feipi ñi coilangen quiñeque quimeltun. ¿Famülque mu cai? ¿Chumngelu quiñeque che famentuafui ta Jesús? (Inaduamnge parrafo 9). *
9. ¿Chem quimeltun quimfalcünui Jesús ñi coilangen?
9 ¿Chem quimeltuquei Biblia? Cuifi mu, feipicünungei ti Mesías ñi rume yamnieafiel Chau Jehová ñi ruca (Sal. 69:9; Juan 2:14-16; 2:17, TNM). Feimu Jesús quimfalcünui ñi huesa femmequen ca ñi coilatumequen pu loncolechi religioso. Fei, ¿chumi Jesús? Pu fariseo quimeltuquefui, lan mu quiñe che amulei ñi mongen cañpüle. Huelu Jesús enseñai tati pu layelu umaucülei müten (Juan 11:11). Pu saduceo feyentuquelafui ñi huiñomongequetun pu layelu, huelu Jesús huiñomongeltufi tañi hueni Lázaro (Juan 11:43, 44; Hech. 23:8). Pu fariseo feipiquefui huiriconcülei reque chem taiñ rupayal ca chem taiñ femal, huelu Jesús quimeltui tati pu che dulliafui ñi serfiafiel cam ñi serfinoafiel ta Jehová (Mat. 11:28).
10. ¿Chemu famentuqueiñmu pu che?
10 ¿Ca femngechi dungu rupaquei fachantü? Femllei mai. Tati pu che famentuqueiñmu. ¿Chumngelu? Iñchiñ, Biblia mu, quimfalcünuqueiñ coilaque quimeltun. Tati pu loncolechi religioso quimeltuquefi tañi inanieteu ñi mülequen quiñe infierno, “üye mu Chau Dios castigaquefi pu huesaque che” piqueingün. ¿Chumngelu femngechi quimeltuqueingün? Ñi llicalcapenoafiel pu che, fei ñi inanieaeteu engün. Huelu iñchiñ pu testigongen quelluquefiyiñ ta che ñi quimal engün ñi coilangen feitachi quimeltun. Pu loncolechi religioso ca quimeltuquei ñi laquenon tati alma. Huelu laquenole tati alma, duamlayafuiñ ñi huiñomongetual ta che. Fei iñchiñ quimeltuchequeiñ feitachi quimeltun mülelai Biblia mu. Cafei fentren religion quimeltuquei Chau Dios deu feipicünueiñmu chem taiñ chumal. Huelu iñchiñ quimeltuchequeiñ ñi rüfngenon tüfa. Caque quiñeque iñchiñ Chau Dios elueiñmu taiñ dullial chem chumal, cafei taiñ serfiafiel cam taiñ serfinoafiel. Fei, ¿chumqueingün pu religioso? Allcün mu tüfa, illcuqueingün.
11. Ñi feipin Juan 8:45-47, ¿chem feipieiñmu Jehová taiñ femal?
11 ¿Chem quelluaimu tami maneluucüleal Jesús mu? Rüf falintufilmi ti rüf dungu, inayaimi chem tami feipieteu Jehová (papeltunge Juan 8:45-47). Huecüfü famentufi ti rüf dungu, huelu iñchiñ turpu famentuulayaiñ ti rüf dungu mu (Juan 8:44). Chau Jehová feipieiñmu taiñ üdeafiel ti huesaque dungu ca inayaiñ ti cümeque dungu chumngechi ñi femün Jesús (Rom. 12:9; Heb. 1:9).
3) JESÚS INACANGEQUEFUI
¿Chumngelu fentren che famentufingün Jesús? Jesús ñi langümngeel quiñe orcon mamüll mu. ¿Famülque mu cai? ¿Chumngelu quiñeque che famentuafui ta Jesús? (Inaduamnge parrafo 12). *
12. Quiñeque judio, ¿Chemu famentufingün ta Jesús?
12 ¿Pu Judio ca chem dungu mu famentufi ta Jesús? Pablo feipi ta Cristo langümngei quiñe orcon mamüll meu (1 Cor. 1:23, TNM). Fei pu Judio huelulcaqueingün tüfachi dungu meu. ¿Chemu huelulcaingün tati pu judio? Cuifi mu, culpachi che clafantungequefui quiñe orcon mamüll mu. Fei langümngelu Jesús quiñe orcon mamüll mu, culpafe troquieyu quiñeque judio. Feimu Jesús famentungei (Deut. 21:22, 23).
13. Pu che famentufilu ta Jesús, ¿chem inaduamlai?
13 Tati pu judio famentufilu Jesús cüme inaduamlaingün ñi culpafe chengenon, ñi coila dalluntucungen ca ñi huesa juzgangen ta Jesús. Tati pu jueces aporiauquechi trahufemingün ñi juzgayafiel ta Jesús ca inalafingün ñi feipin tati ley (Luc. 22:54; Juan 18:24). Cafei pu sacerdote quintucaingün chumngechi ñi coila dalluntucungeal ta Jesús, fei ñi langümngeal. Huelu chem huesa dungu no rume peñmangelai ta Jesús. Fei, ¿chumi tati loncolechi sacerdote? Fei ayüfui Jesús ñi feipial chem huesa dungu rume ñi culpantucuafiel, feimu ramtucadungufingün. Tañi femün mu engün respetalafui tati ley (Mat. 26:59; Mar. 14:55-64). Fei, ¿ca chem chumingün feitachi huesaque jueces? Huiñomongetulu ta Jesús, “fentren plata elufi engün tati pu soltau” cuidaniefilu cheu ñi elcünungen ta Jesús. Femngechi feitachi soltau com püle feipingün ñi hueñentungetun ñi cuerpo ta Jesús (Mat. 28:11-15).
14. ¿Chumngechi feipicünungei ñi layal ti Mesías?
14 ¿Chem quimeltuquei Biblia? Jesús tañi antü mu, fentren Judio raquiduamquelafui ta Jesús tañi layal. Huelu feipicünungefui Jesús ñi langümngeal quiñe culpanche reque, fei taiñ perdonangeal iñchiñ taiñ culpan (Is. 53:12). Femngechi langümngefulu rume ta Jesús, pu Judio feipilayafui chem dungu no rume ñi famentuafiel.
15. ¿Chem coilaque dungu mu dalluntucungei pu testigo?
15 ¿Ca femngechi dungu rupaquei fachantü? Femllei mai. Jesús reque iñchiñ pu testigo coilaque dungu dalluntucungequeiñ. Feimu fentren che allcütulu tüfa famentuqueiñmu. Inaduamaiñ quiñeque dungu taiñ rupan cuifi mu. Estados Unidos mapu mu, conlu 1930 puhualu 1950 tripantu fentren rupa catrütungequefuiñ taiñ poyenoafiel ta Chau Dios. Huelu amuquefuiñ tribunales taiñ incañpehual. Quimfali quiñeque juez taiñ huesa raquiduamaeteu. Cafei Canadá mapu mu, Quebec huaria mu, tati iglesia catolica ca ti gobierno quiñehuingu taiñ catrütuaeteu taiñ poyenoafiel ta Chau Jehová. Feimu fentren taiñ pu peñi ca pu lamngen carceltucungei ñi amuldungulelfiel caquelu pu che. Ca femngechi Alemania mapu mu, pu nazi langümfi taiñ pu peñi ca pu lamngen. Famülque mu, Rusia mapu meu, taiñ pu peñi ca pu lamngen coila dalluntucungeingün, “extremista” pingequeingün tañi amuldunguchequen Biblia, feimu carceltucungeingün. Ca femngechi ti Traducción del Nuevo Mundo de las Santas Escrituras ruso quehun dungun mu catrütungequei ñi nieal ca hulngeal, feipingequei ñi chaftuquefiel tati gobierno ñi ley dungu. ¿Chumngelu? Yenien mu Jehová tañi üi.
16. Ñi feipin 1 Juan 4:1, ¿chumngelu falin-ngei taiñ famentuafiel coilaque dungu?
16 ¿Chem quelluaimu tami maneluucüleal Jesús mu? Cüme ngüneduamaimi ñi rüfngepen mai ñi feipingequen pu testigo mu. Jesús feipicünui ñi üyautungeal “fill coila dungu meu” tañi pu inanieteu (Mat. 5:11). Biblia feipi: “Saquin pu peñi ca pu lamngen, feipingelmün quiñe dungu ñi cüpan Chau Dios mu, feyentufemlayaimün. Mapu meu triparpui fentren coilaque profeta, feimu cüme ngüneduamaimün tañi feipiqueel engün tamün quimal ñi rüfngepen mai ñi cüpan Chau Dios mu” (1 Juan 4:1, TNM). Fei, ¿chumngelu falin-ngei taiñ famentuafiel com feichi coilaque dungu? Com tüfachi coila dungu Huecüfü mu cüpai. Ti Huecüfü adniequefi taiñ pu caiñe ñi coilaque dungu feipial iñchiñ mu (Apoc. 12:9, 10). Feimu famentufiliyiñ, llicalcalayaiñmu taiñ poyeafiel ta Chau Jehová.
4) JESÚS NGÜNENCANGEI CA QUISUCÜNUNGEI
¿Chumngelu fentren che famentufingün Jesús? Ñi ngünencaeteu Judas. ¿Famülque mu cai? ¿Chumngelu quiñeque che famentuafui ta Jesús? (Inaduamnge parrafo 17 ca 18). *
17. Quiñeque che pefilu chem ñi rupan ta Jesús, ¿chumi chi?
17 Epe puulu ñi layal ta Jesús, furi ngünencaeyu quiñe tañi pu apostol. Cangelu cüla rupa feipi ñi quimnofiel ta Jesús ca com tañi pu apostol quisucünueyu (Mat. 26:14-16, 47, 56, 75). Jesús feipicünui ñi femngechi femal engün (Juan 6:64; 13:21, 26, 38; 16:32). Feimu afmatulai rume ñi femngechi femeteu tañi pu apostol. Quiñeque pefilu ñi femün pu apostol catrütuafeyu ñi inayafiel ta Jesús. Feipifuingün chi: “femngechi chengele engün, ayülafun ñi conal feichi troquiñche mu”.
18. ¿Chem profecia femtriparpui Jesús mu?
18 ¿Chem quimeltuquei Biblia? Fentren tripantu petu ñi cüpanon Jesús mapu mu, huiriconcülefui Jesús ñi traicionangeal 30 moneda plata mu (Zac. 11:12, 13). ¿Inei am tañi traicionayaeteu? Quiñe tañi pu hueni (Sal. 41:9). Cafei ti profeta Zacarías feipicünui: langümafiñ tati camañ fei tati pu ufisa com püd tripayaingün (Zac. 13:7). Tati che pefilu ñi rupan com tüfa mülefui doi maneluhual Jesús mu, huelu femlaingün famentufingün.
19. Huesa dungungelu rume pu testigo, ¿chem quimnieingün pu cüme piuquengelu?
19 ¿Ca femngechi dungu rupaquei fachantü? Femllei mai. Famülque mu, quiñeque testigo doi quimniengelu cütu famtripaquei Jehová mu. Fei engün coilaque dungu feipiquei pu testigo mu ca ayüquei caquelu che ñi famtripayal Jehová mu. Radio mu, television mu, diario ca internet mu feipiqueingün coilaque dungu pu testigo mu. Huelu pu cüme piuquengelu quimniei femngechi dungu ñi rupayal, feimu huelulcauquelai coilaque dungu mu (Mat. 24:24; 2 Ped. 2:18-22).
20. ¿Chumafuiñ taiñ huelulcaunoal? (2 Timoteo 4:4, 5).
20 ¿Chem quelluaimu tami maneluucüleal Jesús mu? Mülei tami cüme estudiayal Biblia, llellipunieafiel ta Jehová ca amuldunguleal. Femngechi maneluucüleaimi Jesús mu (papeltunge 2 Timoteo 4:4, 5). Feimu coilaque dungu feipingele rume pu testigo mu, llicalayaimi fente tami maneluucülen Jesús mu (Is. 28:16). Piuqueyefilmi ta Jehová, tami pu peñi, pu lamngen ca tati Biblia, chem no rume huelulcalayaimu.
21. Jesús, ¿com che famentupeyu mai? ¿Chumngelu am?
21 Mülepalu Jesús mapu mu, fentren che famentueyu. Ca mülequefui quiñeque che cüme lloufilu ta Jesús. Quiñeque tüfa, quiñe huentru coneltulelu tati Sanedrin mu ca fentren sacerdote (Hech. 6:7; Mat. 27:57-60; Mar. 15:43). Ca femngechi fachantü fentren che eluhui ñi inanieafiel ta Jesús. ¿Chumngelu? Fentren che quimürpui tati lloudungun mülelu Biblia mu Feimu Biblia ta feipi: “Fentren tüngün nieingün tati pu piuqueyequefilu tami ley; ca chem no rume huelulcalayafeyu” (Sal. 119:165).
ÜLCANTUN 124 Nor piuquengeaiñ fill dungu mu
^ parr. 5 Rupachi troquiñ mu, peiñ chemu famentungei Jesús ca chemu famentungequeiñ iñchiñ famülque mu. Tüfachi troquiñ mu ngüneduamaiñ ca chem dungu mu famentungei ta Jesús ca chemu famentungequeiñ iñchiñ. Ca inaduamaiñ chemu pu poyequefilu ta Jehová eluulai ñi famentuafiel.
^ parr. 60 ¿CHEM PENGELI TI ADENTUN? Jesús, Mateo ca quiñeque cofraquelu impuesto quiñentrür iqueingün.
^ parr. 62 ¿CHEM PENGELI TI ADENTUN? Jesús quechanentufi tati pu fendecaquelu ngillatuhue ruca meu.
^ parr. 64 ¿CHEM PENGELI TI ADENTUN? Jesús meñcuyeniefi ti orcon mamüll tañi langümngeal.
^ parr. 66 ¿CHEM PENGELI TI ADENTUN? Judas ngünencafi ta Jesús.
