1. ¿Chumi Jesús miyaupalu Mapu mu? ¿Chumingün cai tañi pu inanieteu? (Inaduamnge ti adentun huenulelu).

MIYAUPALU Mapu mu, Jesús amuldunguchequefui ca maneluucülequefui ñi allcütungeal. Fei Jesús ayüniei taiñ femngechi femal iñchiñ (Juan 4:35, 36). Cuifi mu, Jesús tañi pu inanieteu ayühunquechi amuldunguquefuingün (Luc. 10:1, 5-11, 17). Huelu presuntucungelu ca langümngelu ta Jesús, ayühunquechi amuldunguhuelaingün (Juan 16:32). Huiñomongetulu Jesús, feipifi ñi pu inanieteu ñi doi falintuafiel ti amuldungun cüdau. Fei hula amutulu Jesús huenu mu, tañi pu discipulo com nehuen mu amuldunguingün. Fente amuldunguingün, tañi pu caiñe feipingün “com Jerusalén meu quimeltufimün tüfachi ngülam” (Hech. 5:28).

2. ¿Chemu quimfalcülei Jehová taiñ quelluqueteu amuldungun mu?

² Hunen siglo mu, Jesús adcünui ñi amuldungungeal ta che, ca fentren che allcütuingün. Conlu ti Pentecostés 33 tripantu mu, 3.000 che ta fautizahuingün (Hech. 2:41). Ca rupalechi tripantu mu, doi alün-ngerpuingün (Hech. 6:7). ¿Famülque mu cai? Jesús feipicünui fentren che ñi cüme llohual Chau Dios ñi dungu (Juan 14:12; Hech. 1:8).

3. ¿Chumngelu cüdaungeafui ñi amuldungual quiñeque lof mu?

³ Com iñchiñ ayünieiñ taiñ amuldunguleal ca ayünieiñ taiñ allcütuaeteu pu che. Quiñeque mapu mu cüdaungelai taiñ amuldungual. ¿Chumngelu? Fentrenque che ayüniei tañi quimeltungeal Biblia. Fentren mülelu cai faltai tiempo tañi quimeltuafiel com tati pu che ayünielu ñi quimeltungeal. Caquelu mapu mu cüdaungei taiñ amuldungual,  tati pu che piquelai ñi allcütual cam ngequelai tañi ruca mu engün.

4. ¿Chem inaduamaiñ tüfachi troquiñ mu?

⁴ Rume cüdaungele ñi amuldungual tami lof mu, tüfachi troquiñ rüf quelluaimu tami ayühunquechi amuldunguleal. Ca inaduamaiñ chumquen quiñeque peñi ca quiñeque lamngen ñi amuldunguafiel doi fentren che.

5. ¿Chumngelu cüdaungei ñi amuldungual quiñeque lof mu?

⁵ Quiñeque huaria mu doi cüdaungetui ñi amuldungual. Fentren edificio ca condominio mülequei, feimu elungequelai ñi conpual quimnoelchi che. Fei rume cüdaungei ñi amuldungungeal feiti che mülelu fei mu. Caquelu lof mu taiñ pu peñi, pu lamngen fill ruca püle amuldunguqueingün, huelu cüdaungei ñi pengeal ta che ruca mu. Caquelu mapu mu pu peñi, pu lamngen mülei ñi miyahual fentren kilometro ñi puhual quiñeque lof mu cheu ñi mülen pichin che müten. Quiñeque mu, alünque mapu trecaqueiñ taiñ quintuafiel tati pu che. Huelu puhun mu ruca mu, mütrümiyiñ, inei rume tripaquelai. Femngechi dungu rupaliyiñ, ¿chumafuiñ taiñ elcünunoal taiñ amuldungun?

6. Ñi femquen pu amuldunguquelu, ¿chumngelu trürcülei ñi femquen pu challhuafe?

⁶ Jesús trürümfi ñi chumquen pu amuldunguquelu tañi chumquen pu challhuaquelu (Mar. 1:17). Quiñeque mu, pu challhuafe rumeñma quintuyahulquei challhua, huelu quiñe no rume pelai. Femlu rume, fentecünuquelaingün ñi challhuayal. Doi mai cambiatuqueingün chumngechi ñi challhuaquen, cangelu hora mu ca cañpüle amuquei ñi challhuayal. Pu challhuaquelu reque, iñchiñ cambiatuafuiñ chumngechi taiñ amuldungumequen. Inaduamaiñ quiñeque dungu taiñ femafel.

7. Fillque hora amuldunguliyiñ, ¿chem rupayafui?

⁷ Caque hora mu quintuafiyiñ tati pu che. Com antü cüdahuafui rume tati pu che, huelu acuquetui tañi ruca mu. Feimu feichi hora mu ta pemeafiyiñ. Quiñeque taiñ pu peñi ca pu lamngen, tarde mu cam epe dumiñcülelu amuldunguqueingün chem hora ñi acuquetun tati pu che tañi ruca mu. Feichi hora mu tati pu che doi tüngcülepelai, fei doi eluhuafui chi ñi nütramcayal. Eimi ca inayentuafuimi ñi cüme femün quiñe loncolelu, David pingei. Feichi peñi rupan amuldungulu tañi compañ engu, huiñoquetuingu feichi ruca mu ñi mülenon ta che. Taiñ peñi feipi: “Ca huiño rupatun mu, afmatulehuequen. Doi alünque che pequetufiyiñ ruca mu taiñ nütramcayafiel”.⁠ *

8. Ñi feipin Eclesiastés 11:6, ¿chumngechi inayafuiñ ñi cüme amuleal taiñ cüdau?

⁸ Penofiliyiñ rume tati pu che tañi ruca mu, amuleaiñ müten taiñ amuldunguleal. Biblia feipi: “Pulihuentu nganaimi tami quetran, ca nagantü mu amulepe tami cüdaumequen, quimnolu am eimi chuchi am cüme tripayai, tüfa cam feiti, cam mür ñi cüme tripayal” (Eclesiastés 11:6). David, taiñ deu ngüneduampeel, fentecünulai tañi cüdau. Fentren rupa amui quiñe ruca mu, huelu inei no rume tripalai. Fei quiñe antü tripai quiñe huentru ayülu ñi nütramcayal  Biblia mu. Feichi huentru feipi: “Pura tripantu mülefun tüfa mu, huelu quiñe rupa no rume nütramcaquelafuiñ pu testigo engün”. Taiñ peñi David feipi: “Fentecünunoliyiñ taiñ cüdau, peafiyiñ doi alünque che eluucülelu ñi nütramcayal”.

9. Taiñ pu peñi ca pu lamngen, ¿chumquei ñi amuldungual feichi pu che ñi penofiel tañi ruca mu?

⁹ Fill püle amuldunguaiñ taiñ lof mu. Quiñeque taiñ pu peñi, pu lamngen, fill püle amuldunguquei, femngechi ñi nütramcayafiel feichi pu che ñi pequenofiel ruca mu. Por ejemplo, cheu ñi mülemum fütraque edificio taiñ pu peñi, pu lamngen pepi conpuquelaingün ñi amuldunguafiel pu che. Feimu pu peñi, pu lamngen calle mu ca carrito mu amuldungulelquefi pu che mülelu feichi edificio mu. Cafei taiñ pu peñi, pu lamngen, inaduamqueingün pu che doi eluucülei ñi nütramcayal ca llohual publicacion parque mu, mercado mu ca cheu ñi mülen negocio. Quiñe huitran-ngepaquechi loncolelu Bolivia mapu meu mülelu, Floiran pingei, feipi: “La 1 de la tarde puulu las 3 de la tarde, amuldunguqueiñ mercado mu ca negocio mu. Feichi hora mu tati pu fendecaquelu müte niequelaingün cüdau, feimu doi cüme allcütuqueiñmu. Cafei quiñeque mu, quiñeque che eluuquei ñi estudiayal ta Biblia” pi taiñ peñi.

10. ¿Ca chumafuiñ taiñ amuldungulelafiel pu che?

¹⁰ Chumaiñ rume taiñ amuldungucheal. Fentren rupa ca fillque hora mu amuafuiñ quiñe che ñi ruca mu taiñ nütramcayafiel, huelu pelayafuiñ chi. Fei, ¿ca chumafuiñ taiñ amuldungulelafiel? Inaduamnge  ñi femün taiñ lamngen Katarína, fei feipi: “Iñche huirintuculelfiñ carta tañi pequenoelchi che, femngechi amuldungulelquefiñ” pi taiñ lamngen. ¿Chem quimeltueiñmu ñi femquen taiñ lamngen? Chumafuiñ rume taiñ amuldungulelafiel pu che.

11. Fentren che allcütuquelaeiñmu, ¿chumngelu?

¹¹ Fentren che pilai taiñ allcütuaeteu. ¿Chumngelu? Fentren engün pefiel ñi cutrancaumequen pu che, feyentuquelai Chau Dios mu. Cafei fentren loncolechi religioso feipiquei ñi papeltuquen Biblia, huelu inaquelai Biblia ñi ngülam. Feimu fentren che feyentuquelai Biblia mu. Caquelu che rume raquiduamcülequei ñi nieal ta cüdau, huesaque dungu rupaquei tañi familia mu, ca caquelu femngechi dungu. Feimu raquiduamquelaingün Biblia ñi rüf quelluafeteu. Allcütunoeliyiñmu femngechi che, ¿chumafuiñ taiñ fentecünunoal taiñ amuldungun cüdau? Peafiyiñ.

12. Amuldungun mu, ¿chumngechi inayafuiñ ñi feipin Filipenses 2:4?

¹² Duamtucheaiñ. Cuifi mu, quiñeque che allcütuquelafeiñmu, huelu cambiatui tañi raquiduam engün. ¿Chumngelu? Ngüneduamlu engün taiñ duamtufiel (papeltunge Filipenses 2:4). Taiñ peñi David, taiñ deu inaduampeel, feipi: “Feipin mu pu che: ‘Duamlafiñ tamün dungu’, iñche guardacünuquefiñ tañi Biblia ca tañi lifru. Fei ramtuquefiñ ti che ‘¿chemu femngechi raquiduamqueimi? ¿Feipiafuimi?’” pi taiñ peñi. Feimu, tati pu che acordahuelayafui chi taiñ enseñalfiel Biblia, pero piuquentucunieai chumngechi taiñ duamtufiel. Feimu, pinole rume ti che taiñ allcütuaeteu, piuqueyenquechi dunguafiyiñ, fei pengelelafiyiñ taiñ duamtufiel.

13. ¿Ca chumngechi duamtucheafuiñ?

¹³ Ngüneduamafuiñ chem doi duamnieel ti che, fei nütramcalelafiyiñ. Femngechi pengelelafiyiñ engün taiñ duamniefiel. Raquiduamnge tüfa: inaduamliyiñ ti ngen ruca ñi nien ta pichiqueche, fei ayüquepelafui ñi enseñalngeal chumngechi tremümafiel pu pichiqueche cam chumngechi ayüucüleal tañi familia engün. Caquelu che com püle llafecaniequei tañi ruca, fei llicaquepelafui ñi contuaeteu ta hueñefe. Fei, inaduamliyiñ tüfa, nütramcayafuiñ ti che chumngelu fente huesalcalei tati pu che. Ca feipiafuiñ ñi mülehuenoal ta hueñefe. Peliyiñ quiñe che taiñ  allcütuaeteu, pengelelafiyiñ chumngechi Biblia quelluafeyu. Taiñ lamngen Katarína, taiñ nütramcapeel, rumel raquiduamquei chumngechi ñi quellueteu Biblia, fei tüfa rume ayühulqueyu. Feimu amuldungun mu, pu che ngüneduamquei ñi rume ayüucülen ta Katarína.

14. Ñi feipin Proverbios 27:17, ¿chumngechi quelluhuafui epu compañhuen amuldungun mu?

¹⁴ Eluhuaiñ taiñ quellungeal. Cuifi mu, Pablo enseñalfi ta Timoteo chumngechi ñi quimeltucheal ca ñi amuldungucheal, fei ayüniefui ta Timoteo ñi ca femngechi enseñayafiel tati pu peñi ca pu lamngen trahunche mu (1 Cor. 4:17). Timoteo reque, iñchiñ ca femngechi inayentuafuiñ pu peñi ca pu lamngen cüme quimeltuchequelu. Biblia feipi: “Epu pañillhue yungümuuquei, ca femngechi quiñe huentru yungümquefi reque tañi hueni” (Proverbios 27:17). Inaduamaiñ ñi rupan taiñ peñi Shawn. Ti lof cheu ñi hunelequefel amuldungun mu, fentren che ayüucülequefui tañi religion mu. ¿Chem quellueyu taiñ peñi Shawn ñi fentecünunoal tañi amuldungun? Ti peñi ramtuquefi caquelu peñi ñi compañaeteu. Feipi: “Amulen mu rüpü mu, nütramcauqueyu chumngechi doi cüme amuldungual. Rupan amuldungun mu quiñe ruca mu, tañi compañ iñchiu ramtuuqueyu ñi chum tripan tayu amuldungun, femngechi quelluuqueyu. Tüfa quellueyumu tayu doi cüme amuldungual” pi taiñ peñi.

15. ¿Chumngelu fente falin-ngei taiñ llellipual?

¹⁵ Llellipunieafiyiñ Jehová taiñ quelluaeteu. Amuldungun mu mülei taiñ ngillatuafiel ta Jehová, ¿chumngelu? Nienoliyiñ Jehová tañi nehuen, chumlayafuiñ rume (Sal. 127:1; Luc. 11:13). Ngillatufiliyiñ ta Jehová, cüme feipiafiyiñ chem taiñ duamtunieel. Por ejemplo, llellipunieafiyiñ ta Jehová taiñ peal doi cüpa quimlu ta Jehová mu. Rupan ngillatuliyiñ, femaiñ chem taiñ pedifiel ta Jehová, fei itrocom che amuldungulelafiyiñ.

16. ¿Chemu falin-ngei taiñ quisu papeltual Biblia?

¹⁶ Elüucüleaiñ taiñ quisu papeltuafiel Biblia. Tati Biblia feipieiñmu iñchiñ mülefui taiñ doi cüme quimafiel ta Chau Jehová (Rom. 12:2). ¿Chumngechi femafuiñ? Doi cüme estudiayaiñ Biblia. Femliyiñ, doi maneluucüleaiñ Jehová mu. Femngechi, nütramcafiliyiñ pu che Jehová mu, quimfalcünuaiñ taiñ maneluucülen quisu mu. Katarína, taiñ nütramcapeel, feipi: “Cuifi mu, ngüneduamün iñche doi duamniefun ñi maneluhual Biblia ñi quimeltuel mu” pi taiñ lamngen. Feimu Katarína doi cüme estudiai cüla dungu: 1) ñi mülepen mai ta Chau Dios, 2) Biblia ñi rüf cüpapen mai ta Chau Dios mu ca 3) ñi mülepen mai quiñe troquiñche Jehová ñi adnieteu. Femngechi femün mu taiñ lamngen, doi maneluhui Chau Jehová mu ca doi ayühunquechi amuldungui.

17. ¿Chemu Jesús fentecünulai tañi amuldungun?

¹⁷ Jesús fentecünulai tañi amuldungun allcütunoeteu rume tati pu che. ¿Chemu fentecünulai? Jesús quimniefui tati pu che duamniei ñi quimal ti rüf dungu, feimu ayüniequefui com che tañi amuldungulelafiel. Cafei Jesús quimniefui ellaca mu quiñeque che allcütulayafeyu, huelu rupachi antü mu ñi feyenturpual engün. Raquiduamnge tüfa: mülepalu Jesús Mapu mu, quiñe tañi pu peñi no rume inaquelafeyu (Juan 7:5). Huelu huiñomongetulu Jesús, cristianogerpuingün (Hech. 1:14).

18. ¿Chemu fentecünuquelaiñ taiñ amuldungun?

 ¹⁸ Iñchiñ quimlaiñ inei ñi poyerpuafiel ta Jehová. Quiñeque che doi cüdautuquei ñi adümafiel Biblia ñi rüf dungu, ca quiñeque che pilai taiñ allcütuaeteu. Huelu iñchiñ ayühunquechi amuldunguliyiñ, fei peeliyiñmu taiñ cüme femün ti che, eluhuafuingün chi ñi serfiafiel ta Jehová (1 Ped. 2:12).

19. Ñi feipin 1 Corintios 3:6, 7, ¿chem mülefui taiñ loncontucual?

¹⁹ Iñchiñ amuldunguqueiñ ca quimeltuqueiñ, huelu loncontucuaiñ: Jehová ñi quellun mu müten cüme tripaquei taiñ cüdau (papeltunge 1 Corintios 3:6, 7). Quiñe peñi, Etiopía mapu mu mülei, feipi: “Doi 20 tripantu mu iñche müten testigongequefun tañi lof mu. Fachantü mülei 14 amuldunguquelu, huelu 13 fautizahui. Fei engün mu ca fautizahui tañi domo, tañi ñahue ca tañi epu fotüm. Fill semana 32 che peno trahuquefui” pi taiñ peñi. Taiñ peñi fentecünulai ñi amuldungun, maneluucülefui Jehová ñi cüpalafiel ti cüme piuquengechi che (Juan 6:44).

20. ¿Chumngelu falin-ngei taiñ quiñentrür cüdahual?

²⁰ Jehová falintuquefi com che. Jehová elueiñmu quiñe falin cüdau, taiñ quiñentrür cüdahual Jesús iñchiñ taiñ cüpalafiel itrocom tati pu che Jehová tañi troquiñche mu (Ageo 2:7). Amuldungun mu montulchequeiñ. Quiñe peñi cam quiñe lamngen rume quellufile caquelu che ñi fautizahual, com ti trahunche mülei ñi quelluntucual. Quimlaiñ chumten che taiñ montulafiel, huelu Jehová caque quiñeque iñchiñ adnieafeiñmu taiñ quelluafiel ta quiñeque che. Taiñ peñi Andrés, Bolivia mapu mu mülelu, feipi: “Quimürpulu quiñe che ti rüf dungu ca fautizaulu, com ti trahunche quelluntucuquei” pi taiñ peñi. Feimu llemai, fentecünunoliyiñ taiñ amuldungual, Jehová cümelcayaiñmu ca rume ayüucüleaiñ iñchiñ.