1, 2. ¿Chem huesaque dungu rupaquei taiñ pu peñi ca pu lamngen?

TI APOSTOL Pablo yafültucufi ta Timoteo ñi cüme yenieal tañi amuldungun cüdau (2 Tim. 4:5). Iñchiñ inaquefiyiñ Pablo tañi ngülam, fei eluucüleiñ taiñ cüme cüdahuelafiel ta Jehová. Huelu quiñeque mu cüdaungeafui chi. Alünque taiñ pu peñi, pu lamngen mülefui ñi nehuencüleal tañi amuldungual (2 Tim. 4:2). Quiñeque pais mu taiñ pu peñi, pu lamngen müte elungequelai ñi amuldungual ca caquelu pais mu catrütungequei ñi amuldungual. Femfule rume, amuldunguqueingün müten carceltucungefule rume.

² Jehová tañi pu che huesaque dungu mu rupaquei, feita huesa duamelafeyu. Quiñeque taiñ pu peñi, pu lamngen com antü cüdauqueingün tañi ngillalelafiel tañi pu che tañi duamtunieel müten. Fei engün doi ayüafuingün chi ñi doi cüdahuelafiel ta Jehová, huelu fente tañi cansalen engün pepi femlaingün. Caquelu pu peñi ca lamngen müte amuldunguquelaingün tañi cutrancülen mu, tañi füchan mu, quiñeque pepi tripaquelaingün rume tañi ruca mu. Ca quiñeque falintunoeteu Jehová troquiuqueingün. Quiñe lamngen, María pingelu,⁠ * feipi: “Fill antü rume cüdauquen ñi famentuafiel ti huesaque raquiduam, fei cansalqueneu. Feimu culpauquen ñi nienon mu tiempo ca nehuen ñi amuldungual” pi taiñ lamngen.

3. ¿Chem inaduamaiñ tüfachi troquiñ mu?

³ Chem huesa dungu mu rume rupaliyiñ, Chau Jehová eluafeiñmu ñi nehuen femngechi taiñ serfinieafiel. ¿Chumngechi femquei tüfa? Tüfachi troquiñ mu, inaduamafiyiñ. Huelu hune inaduamaiñ chumngechi Jehová quellufi ta Pablo ca Timoteo ñi poyenierpuaeteu, huesaque dungu rupalu rume engu.

4. ¿Chem huesaque dungu mu rupaquefui Pablo?

⁴ Pablo fentren huesaque dungu mu rupaquefui. Hulelcangei, curatungei ca presucünungei. Feimu Pablo duamniefui Jehová ñi eluaeteu nehuen (2 Cor. 11:23-25). Cafei quiñeque mu cüdauquefui ñi famentual huesaque raquiduam (Rom. 7:18, 19, 24). Huelu fei ca müten no. Pablo ca contueyu quiñe huesa cutran ñi rumel cutrancanieteu. Fei ayüfui Chau Dios ñi müntuñmayaeteu feichi huesa cutran (2 Cor. 12:7, 8, TNM).

5. Huesaque dungu rupalu rume ta Pablo, ¿chumi?

⁵ Huesaque dungu mu rupalu rume ta Pablo, Jehová quellueyu ñi fentecünunoal tañi amuldungun cüdau. Inaduamaiñ ñi femün ta Pablo. Presulelu quiñe ruca mu, Pablo amuldungufi quiñeque loncolechi judio ca amuldungufi pu cüdauquelu gobierno mu peno (Hech. 28:17; Filip. 4:21, 22). Pablo ca amuldungulelfi tañi pu llihuatunieteu ca com pu che ñi pepaqueteu (Hech. 28:30, 31; Filip. 1:13). Huelu fei ca müten no. Petu presulelu ta Pablo, Jehová adnieyu ñi huirintuculelafiel carta tati pu trahunche. Feitachi carta petu yafültucuqueiñmu fachantü. Cafei Pablo tañi cüme femün yafültucufi tati trahunche Roma meu, fei doi yafüluhui engün tañi amuldungual (Filip. 1:14). Pablo ayüpelafui chi ñi doi cüdahuelafiel ta Jehová, huelu pepi femlai. Tunte felefulu rume, Pablo fentecünulai tañi cüdau ca quelluntucui ñi quimelelngeal ti cümeque dungu (Filip. 1:12).

6. Ñi feipin 2 Corintios 12:9, 10. ¿chumngelu fentecünulai ñi cüdau Pablo?

⁶ Pablo, ¿inei ñi nehuen mu cüdahuelquefui ta Jehová? ¿Quisu tañi nehuen mu pemai? Femlai. Jehová quellueyu llemai. Pablo feipi: ‘Huelu Chau Dios feipieneu: “Iñche tañi cutranpiuqueyechequen fentepuucai eimi mu, ngañhuadcülelu eimi iñche tañi nehuen doi yafültucueimu”. Feimu rume ayüucülen mallmahuan reque tañi ngañhuadcülen meu, femngechi Cristo tañi nehuen yafülduameleneu quiñe ellcaupeyüm reque. Feimu ayühulqueneu ñi ngañhuadcülen, huesa pingen mu, filla dungu mu, caiñetungen ca huesa rupan, Cristo ñi duam mu. Ngañhuadcülequelu am iñche, fei nehuen-ngequetun’ (2 Corintios 12:9, 10, TNM).  Fentren huesaque dungu mu rupalu rume ta Pablo, Jehová elueyu ñi nehuen ñi fentecünunoal tañi cüdau.

7. ¿Chumngelu müna cüdautufui Timoteo ñi femal ti cüdau?

⁷ Ngüneduamaiñ chumün Timoteo. Compañquefi Pablo ñi quimeltucheal, yafültucuafiel fillque trahunche. Pablo ca huercüfi Timoteo ñi amual yafültucumeafiel pu trahunche (1 Cor. 4:17). Timoteo rume cüdautufui, ¿chumngelu? “Pepi femlan” pipelafui tañi raquiduam mu. Feimu peno Pablo feypieyu: ‘Eluuquilnge tami illamcangeal tami hueche huentrungen meu’ (1 Tim. 4:12). Pablo reque, Timoteo ca cutranchengefui (1 Tim. 5:23, TNM). Femngechi rupafule rume Timoteo, quimtucuniefui Jehová tañi quelluaeteu ta quimeltucheal ca yafültucuafiel pu peñi ca pu lamngen (2 Tim. 1:7).

8. Jehová, ¿chumngechi nehuentucuqueiñmu?

⁸ Jehová famülque mu quelluqueiñmu ca eluqueiñmu nehuen (2 Cor. 4:7, TNM). Peaiñ meli falinque dungu Jehová yafültucuqueiñmu: Ti llellipun, tati Biblia, taiñ pu peñi ca pu lamngen ca ti amuldungun cüdau.

9. Llellipufiliyiñ ta Jehová, ¿chumngechi quelluaiñmu?

⁹ Tati llellipun. Pablo ngülamtueiñmu taiñ rumel llellipuleal (Efes. 6:18). Femngechi femliyiñ, Jehová quelluaiñmu. Peafiyiñ chem rupan epu peñi. Hune peaiñ chem rupan peñi Jonnie, Bolivia mapu mu. Jonnie tañi domo, tañi chau ca tañi ñuque com cutranrumeingün. Jonnie rume cüdautufui ñi dapiafiel engün. Rupachi antü mu, Jonnie tañi ñuque lai. Huelu tañi domo ca tañi chau rume cüdautufui tañi cümelcaleal ca nehuencüleal. ¿Chem quellueyu ta Jonnie? Feipi: “Huesa duamcülen mu iñche, feipiquefiñ Jehová, llellipun mu, tañi chum duamcülen. Fei rume quelluqueneu” pi taiñ peñi. Feimu Jehová elueyu nehuen ta Jonnie tañi aguantaleal. Ca peaiñ chem ñi rupan Ronald. Quiñe antü, Ronald quimi ñi nieel quiñe cutran tañi ñuque, cancer pingelu. Rupai quiñe cüyen, tañi ñuque lai. ¿Chumi Ronald tañi doi cüme duamcüleal? Taiñ peñi feipi: “Llellipufiñ Jehová, nülalquefiñ tañi piuque reque. Feipiquefiñ com chum duamcülen. Fei Jehová doi cüme quimnieneu tañi chum duamcülen. Inei no rume quimlayafeneu Jehová reque, iñche quiñeque mu quimuuquelafun reque” pi ti peñi. Quiñeque mu, müna huesa duamcülequeiñ. Quimquelaiñ chem piafiel Jehová llellipun mu. Jehová feipiqueiñmu llellipuafiel müten, quimnofuliyiñ rume tañi pial (Rom. 8:26, 27, TNM).

10. Ñi feipin Hebreos 4:12, ¿chumngelu falin-ngei papeltuafiel Biblia huesa duamcüleliyiñ?

¹⁰ Tati Biblia. Pablo papeltui Jehová ñi huirintucun, feimu yafültucueyu. Iñchiñ ca duamnieiñ femngechi femal (Rom. 15:4). Ngüneduamfiliyiñ Biblia, Chau Dios eluafeiñmu tañi nehuen taiñ quelluaeteu (papeltunge Hebreos 4:12). Peñi Ronald, taiñ nütramcapeel rupachi parrafo mu, feipi: “Fill antü iñche papeltuquen Biblia. Iñche rumel raquiduamquen ñi chumngen ta Jehová ca chumngechi ñi duamtuquefiel tañi pu che. Raquiduamlu iñche, rume yafültucuqueneu” pi ti peñi.

11. Quiñe lantu lamngen, ¿chumngechi quellueyu Biblia?

¹¹ Raquiduamfiel mu iñchiñ taiñ papeltufiel Biblia mu, quelluaiñmu taiñ cüme raquiduam nieal. Femngechi cüme chaftuafiyiñ chem huesa dungu rume rupafuliyiñ.  Peaiñ chumngechi tati Biblia quellufi quiñe lantu lamngen. Quiñe loncolelu ngülamtueyu ñi papeltuafiel Job tañi rupan, fei entuafui cümeque ngülam. Femlu feiti lamngen, juzgafemfi ta Job. “Huesa raquiduamcüleimi Job. Fente cutrancauquilnge” pifi reque. Fei hula inaduamürpui ñi huesa raquiduamcülen Job reque. Raquiduamlu hula, quellueyu ñi cüme raquiduamtual, femngechi ñi cüme chaftuafiel huesaque dungu tañi rupan.

12. Jehová, ¿chumngechi yafültucuqueiñmu taiñ pu peñi ca pu lamngen mu?

¹² Taiñ pu peñi ca taiñ pu lamngen. Chau Jehová adniequefi taiñ pu peñi, taiñ pu lamngen taiñ yafültucuaeteu. Pablo epechi amulefui ñi pemeafiel tañi pu peñi, pu lamngen femngechi ñi hueluconque yafültucuhual (Rom. 1:11, 12). Taiñ lamngen María, taiñ nütramcapeel, müna ayüuquei ñi trahuluhual tañi pu lamngen engün. Taiñ lamngen feipi: “Chau Jehová adniefi quiñeque lamngen tañi yafültucuaeteu, quimlafuingün rume chem tañi rupamequen. Quiñeque mandaleneu carta, quiñeque tarjeta ca tañi feipin mu yafültucueneu. Ca femngechi nütramcafiel mu caquelu lamngen femngechi dungu rupalu, rume quellueneu. Ca tati pu loncolelu quimeltuqueneu chumngechi tañi pu lamngen falintuqueneu” pi taiñ lamngen.

13. Trahun mu, ¿chumngechi huelucontu yafüluuqueiñ?

¹³ Trahun mu huelucontu yafültucuuqueiñ. Trahun mu iñchiñ, feipiafuiñ taiñ pu peñi, pu lamngen fente taiñ piuqueyeniefiel ca fente taiñ mañumcülen tañi femün mu engün. Inaduamnge ñi femün quiñe loncolelu, Pedro pingelu. Tañi trahunche mu, mülei quiñe lamngen, tañi füta testigongelai. Taiñ lamngen quisu yequefi tañi pu püñeñ trahun mu. Feimu petu ñi connon chi trahun, taiñ peñi Pedro feipifi: “Ayühulqueneu tami pefiel. Tami cayu püñeñ rumel cüme tucutuucülequeingün ca rume cüme pepicaquefimi ñi huiñoldungual engün” pifi. Fei taiñ lamngen fente ñi mañumcülen feipieyu: “Müna ayühun tami feipifiel. Duamniefun ñi yafültucungeal fachantü”.

14. ¿Chumngechi quelluqueiñmu taiñ amuldungun cüdau?

¹⁴ Taiñ amuldungun cüdau. Amuldunguyahun mu iñchiñ rume cüme duamelqueiñmu, allcütungenoliyiñ rume (Prov. 11:25). Inaduamnge ñi rupan taiñ lamngen Stacy. Quiñe tañi pu che huemünentungei trahunche mu, feimu rume hueñancülefui. Fente tañi hueñancülen, raquiduamquefui: “Doi quellufili, femlayafui chi”. Müna cüdaungefui ñi raquiduamhuenoal feichi dungu meu. ¿Chem cüme duameleyu feitachi lamngen? Tati amuldungun cüdau. Amuldungun mu, raquiduamquei pu che ñi duamnieel ñi quellungeal engün. Taiñ lamngen feipi: “Feichi meu, Jehová quellueneu ñi peal quiñe domo ayülu ñi papeltual Biblia. Feichi domo inafemfi tañi quimürpuel. Feitachi dungu müna yafültucueneu. Feimu feipiafun ti amuldungun müna quellueneu” pi taiñ lamngen.

15. ¿Chem quimeltueiñmu ñi feipin taiñ lamngen María?

¹⁵ Raquiduamafuiñ chi taiñ müte amuldunguquenon. Huelu loncontucuaiñ: cüdahuelfiliyiñ Jehová com taiñ nehuen mu, fei ayüucüleai. Inaduamaiñ ñi rupan taiñ lamngen María, taiñ nütramcapeel. Amulu ca trahunche mu ca quehun nielu, müte falinolu troquiuquefui. Fei feipi: “Müte quimnofulu am ti quehun, pichique dungu müten huiñoldunguquefun trahun mu ca quiñe pichi troquiñ Biblia mu papeltuquefun müten. Cafei amuldungun mu re tratado  müten hulquefun” pi taiñ lamngen. Trürümuhun mu ti quim dungulu mu, taiñ lamngen María falintuulafui. Huelu cüme raquiduamtui. Fei feipi: “Biblia ñi enseñaqueel cüdaungelai ca quelluafui pu che ñi cüme elcünutual ñi mongen” pi taiñ lamngen. Feimu cüme dungunolu rume ti quehun, inaduamürpui Jehová tañi adnieafeteu ñi amuldungucheal.

16. Pepi tripanoliyiñ ruca mu, ¿chem quelluafeiñmu?

¹⁶ Jehová quimniei taiñ cüpa amuldunguquen, pepi tripanoliyiñ rume taiñ ruca mu. Jehová quelluafeiñmu taiñ amuldunguafiel taiñ pu cuidanieteu, pu doctor ca enfermera. Raquiduamliyiñ taiñ femquefel cuifi ca taiñ femhuequenon feula, hueñancüafuiñ. Doi mai, mülei taiñ raquiduamal chumngechi taiñ quellunieteu Jehová feula. Femliyiñ, ayühunquechi chaftuafiyiñ chem huesa dungu rume rupafuliyiñ.

17. Ñi feipin Eclesiastés 11:6, ¿chemu mülefui taiñ amuldunguleal allcütungenoliyiñ rume?

¹⁷ Pütrünque che amuldungulelquefiyiñ, huelu quimlaiñ inei ñi puhual ñi piuque mu feitachi falinque dungu, femngechi tañi poyerpuafiel ta Jehová. Biblia feipi: “Pulihuentu nganaimi tami quetran, ca nagantü mu amulepe tami cüdaumequen, quimnolu am eimi chuchi am cüme tripayai, tüfa cam feiti, cam mür ñi cüme tripayal” (Eclesiastés 11:6). Quiñe lamngen, doi 80 tripantu nielu, Bárbara pingei, amuldunguquei carta ca telefono mu. Quiñe sobre mu mandalfi tati revista La Atalaya 1 conchi marzo cüyen 2014 tripantu. Feichi revista niei quiñe troquiñ feipilu: “¿Qué ha hecho Dios por usted?”. Taiñ lamngen quimlafui rume tañi carta ñi llohueteu quiñe curehuen cuifi mu huemünentungelu trahunche mu. Fei engu müfüquechi papeltufi tati revista. Tati huentru tañi dungueteu Jehová troquihui. 27 tripantu rupafulu rume, tüfachi curehuen huiño trahuluhuingu Jehová tañi troquiñche mu, fei testigongerputuingu. Bárbara müna ayühui ñi yafültucufiel ti curehuen tañi carta tañi mandalelfiel.

18. ¿Chumaiñ taiñ yafültucuaeteu Jehová?

¹⁸ Jehová eluqueiñmu fillque dungu taiñ yafültucuaeteu. Eluqueiñmu taiñ llellipuafiel ca tati Biblia. Ca eluqueiñmu taiñ pu peñi, pu lamngen ca taiñ amuldungual. Eluuliyiñ taiñ femngechi yafültucungeal, pengelaiñ taiñ maneluucülen Jehová taiñ yafültucuqueteu. Jehová ayühunquechi yafültucuquefi “feichi che poyequeteu com tañi piuque mu”. Feimu fill antü maneluhuaiñ Jehová mu (2 Crón. 16:9).