1. ¿Chem piquei ta Biblia tati rüf piuqueyehun mu?

 “ÜI CÜTRAL reque felei ti poyehun, Jehová tañi üi cütral tati. Nehuen-ngechi reu lafquen no rume chongümlayafui ti piuqueyehun, huitrun leufü no rume yelayafeyu” (Cant. 8:6, 7). b Müna cüme feipilei tati piuqueyehun mu. ¿Chem quimeltui tüfachi texto? Com pu curehuen rumel rüf piuqueyehuafui.

2. ¿Chem mülei ñi femal ti curehuen ñi afnoal ñi piuqueyehun?

² Ti huentru ca ti domo mülei ñi cüdaucüleal engu, fei ñi chongnoal ñi piuqueyehun. Ti cütral ñi chongnoal, mülei ñi tucunielngeal mamüll, femngechi üicüleai. Ca femngechi ti curehuen fentecünunole ñi cüdahun, tremcüleai ñi piuqueyehun engu. Quiñeque mu rupayafuingu huesaque dungu mu, nielayafui plata, cutrancüleafuingu ca cüdautuafuingu ñi tremümafiel tañi pu yall. Feimu chongnagafui reque tañi piuqueyehun. Eimu, ¿chumafuimu tañi afnoal tamu piuqueyehun? Tüfachi troquiñ mu, peafiyiñ chumafuimu tamu quiñeucüleal ca ayüucüleal tamu curehuen-ngen. c

3. Quiñe curehuen ñi afnoal tañi piuqueyehun, ¿chumngechi quelluafeyu ñi hueniyefiel mu Jehová? (Eclesiastés 4:12; ca inaduamnge ti adentun).

³ Fei ñi chongnoal “Jehová tañi üi cütral”, ti huentru ca ti domo mülei ñi cüme hueniyeafiel ta Jehová, ¿chumngelu am? Falintufile engu ñi hueniyefiel Jehová, eluhuaingu ñi inayafiel tañi ngülam, fei quelluaeyu ñi hudaunoal engu (papeltunge Eclesiastés 4:12). Cafei inayentuafingu ta Jehová, feimu ñom piuquengeaingu, piuqueyechefengeaingu ca perdonachefengeaingu (Efes. 4:32–5:1). Femngechi chengele engu, doi piuqueyehuaingu. Quiñe lamngen, Lena pingelu, yeniei doi 25 tripantu tañi fütangen. Quisu feipi: “Quiñe che cüme hueniyefile Jehová, caquelu che piuqueyeaeyu ca yamnieaeyu”.

4. Jehová, ¿chumngelu am dullifi José engu María ñi choyüafiel tati Mesías?

⁴ Peafiyiñ ñi femün José ca María. Jehová dullieyu engu ñi choyüafiel ti Mesías. Ca mülefui caquelu tuhun-ngelu David mu, feimu ¿chumngelu am dullifi José engu María? Fei engu cüme hueniyequefui ta Jehová, quiñehun tañi mongen mu hunentucuniefingu Jehová. ¿Chem quimürpuafuiñ ñi femün José ca María? Peafiyiñ.

5. Pu füta, ¿chem quimafuingün José ñi femün?

⁵ José eluhui ñi adnieaeteu Jehová, feimu cüme fütangefui. Cüla rupa Jehová yefaltuculeyu chumngechi ñi adcünual tañi familia. Cüdaungefulu rume, José eluhui ñi fementufemal (Mat. 1:20, 24; 2:13-15, 19-21). Allcütuquefiel mu ta Dios, José cüme cuidafi ta María. Ñi femün mu ta José, ¿María doi poyepelaeyu ca yamnieyu? Pu füta, ¿chumngechi inayentuafuimün ta José? Quintumün Biblia mu chumngechi cuidayafiel tamün familia. d Inafilmün ñi feipilen Biblia tunte cüdaungefule rume, pengelaimün tamün piuqueyeniefiel tamün domo, femngechi doi quiñeucüleaimün. Quiñe lamngen Vanuatu mapu mu doi 20 tripantu yeniei ñi fütangen, fei feipi: “Iñche tañi füta inafiel mu Jehová ñi ngülam, doi yamquefiñ, doi cüme cuidaqueneu ca doi maneluuquen quisu meu”. 

6. Pu fütangechi domo, ¿chem inahuentuafuimün María mu?

⁶ María ca hueniyequefui Jehová. Quisu ñi duam mu eluucülefui ñi maneluhual Jehová mu ca cüme quimniequefi Chau Dios ñi Huirin Chillca  (Luc. 1:46). Ca raquiduamquefui tañi quimürpuel (Luc. 2:19, 51). María cüme hueniyefiel mu Jehová, cüme domongefui. Famülque mu, fentren lamngen inayentuquefingün María. Quiñe lamngen, Émiko pingelu, feipi: “Petu tañi fütangenon, eluucülefun ñi femal fillque dungu tañi fülmaniefiel Jehová. Huelu fütangelu iñche, tañi füta llellipuquefui iñche mu ca quisu amulniequefui tayu chillcatun Biblia, feimu iñche inaduamün tañi füta mu müten ñi inaconcülen. Huelu iñche mülefui tañi hueniconcüleal Jehová mu. Feimu elün antü quisu tañi llellipuafiel Jehová, tañi papeltuafiel Biblia ca tañi raquiduamal Jehová ñi feipin mu” (Gál. 6:5). Pu fütangechi domo doi hueniyefilmün Jehová, tamün füta doi piuqueyeaimünmeu ca saquiaimünmeu (Prov. 31:30).

7. ¿Chem inaduamafui pu curehuen José ca María ñi femün mu?

⁷ José engu María quiñehun cüdahuingu ñi fülconcüleal Jehová meu. Quimniefuingu ñi rume falin-ngen quiñentrür poyeafiel Jehová (Luc. 2:22-24, 41; 4:16). Quiñeque mu cüdaungefui chi ñi femal, doi mai nien mu fentren yall. Huelu tunte cüdaungefule rume, eluhuingu ñi serfiafiel Jehová tañi familia engün. Tüfa inayentufali ñi femün engu. Eimün nielmu pu püñeñ, doi cüdautuqueimün chi amual trahun mu cam tamün quiñentrür estudiayal Biblia. Ca doi cüdautuqueimu chi quiñentrür tamu llellipual ca papeltuafiel Biblia. Huelu rume falin-ngei tamu quiñentrür poyeafiel Jehová. Femngechi doi fülconcüleaimu ta Jehová mu, ca eimu doi quiñeucüleaimu. Feimu doyelchi poyeniefimu ta Jehová.

8. ¿Chumafui quiñe curehuen niele yafcahun dungu?

⁸ Nielmu yafcahun dungu, feimu ayülayafuimu chi tamu quiñentrür estudiayal Biblia. Fei, ¿chumafuimu? Quiñentrür pichi inaduamafuimu chem tamu ayühuelqueteu Biblia mu. Tüfa quelluafeimu tamu doi cümelcautual ca tamu doi piuqueyehual. Ca femngechi doi ayünieafuimu tamu poyenieafiel Jehová.

9. Ti huentru engu ñi domo, ¿chumngelu am mülei ñi quiñentrür müleal?

⁹ Pu curehuen mülei ñi elcünual antü tañi quiñeucüleal, femngechi amuleai ñi doi piuqueyehun engu. Fei quelluaeyu chem ñi raquiduamcülen cangelu ca ñi chum duamcülen (Gén. 2:24). Peafiyiñ ñi rupan Lilia ca Ruslán. Doi 15 tripantu yeniei ñi nieucülen engu. Taiñ lamngen feipi: “Tañi füta iñchiu nieulu, rumel quiñe mu mülealu troquihuiyu, huelu femtripalai. Rume duamngemequefuyu cüdau mu, ruca mu ca tayu dapiafiel tayu pu püñeñ. Inaduamiyu tayu püntülal tiempo tayu quiñehun müleal, femnoliyu ñochica püntühuafuyu reque”.

10. Ti curehuen, ¿chumngechi inayafui ñi feipin Efesios 5:15, 16?

¹⁰ Ti curehuen mülei ñi elantücünual femngechi ñi quiñehun müleal engu (papeltunge Efesios 5:15, 16). Quiñe peñi Uzondu pingei, mülelu Nigeria mapu mu, feipi: “Adcünulu iñche tañi tiempo, ca püntülquen tiempo ñi müleal ñi domo iñchiu. Fei rume falin-ngei  iñche mu” (Filip. 1:10). Ca peafiyiñ ñi feipin Anastasia, taiñ lamngen ñi füta huitran-ngemequei pu trahunche Moldavia mapu mu. Taiñ lamngen feipi: “Tañi füta cüdaucülequelu ñi elfalnieelchi cüdau meu, iñche mequequen ñi fill duamngen. Feimu dehuelcale tayu cüdau, quiñe mu mülequetuyu” pi taiñ lamngen. Eimu rume fentren cüdau nielmu, ¿chumafuimu? Peafiyiñ.

11. ¿Chem dungu quiñehun femquefuingu Áquila engu Priscila?

¹¹ Pu curehuen inaduamafui ñi cümeque femün Áquila engu Priscila (Rom. 16:3, 4). Biblia müte pengel-lai ñi chumngefel engu, huelu pengelquei ñi quiñehun cüdauquefel engu ca quiñehun amuldunguquefuingu ca quelluquefingu caquelu che (Hech. 18:2, 3, 24-26). Cafei Biblia üitufiyüm Áquila ca Priscila, rumel quiñehun mülequeingu.

12. ¿Chumafui pu curehuen doi alün tiempo mu ñi müleal? (Ca inaduamnge ti adentun).

¹² Pu curehuen, ¿chumngechi inayentuafuingün ñi femün Áquila ca Priscila? Raquiduamnge quisuque eimu chem cüdau tamu fementual. Tamu püntülenoal, quiñeque cüdau epuñma femafuimu. Chumngechi ñi femün Áquila ca Priscila, quiñehun amuldunguquefuingu, ¿eimu ca femqueimu? Cafei Áquila engu Priscila quiñehun cüdaucülequefuingu. Eimu ca femngechi cüdau nielafuimu chi, huelu eimu quiñehun femafuimu fillque duam tamu ruca mu (Ecl. 4:9). Quiñehun cüdaucülelmu, doi fülmaucüleaimu ca doi nütramcahuaimu. Peaiñ ñi rupan Robert ca Linda. Doi 50 tripantu yenieingu tañi quiñeucülen. Robert feipi: “Müte nielayu fentren tiempo tayu cüme rupaleal. Huelu iñche cücharalimequelu, fei tañi domo secangequetui rali. Quiñeque mu petu cüdahun jardin meu, fei quelluqueneu tañi domo. Feimu rume ayüucülequen. Doi quiñeucüleyu tayu quiñentrür cüdahun ca doi piuqueyehuiyu”.

13. ¿Chem mülei ñi femal ti curehuen ñi doi quiñeucüleal?

¹³ Ti curehuen quiñe mu mülele engu rume, huelu cuñiutucuucülenole engu, quiñeucülelayafui tañi raquiduam. Peafiyiñ ñi feipin quiñe lamngen fütangelu Brasil mapu mu: “Famülque mu rume nieiñ cüdau. Iñchiu quiñe mu mülelu am ruca mu feipiafuyu tayu quiñeucülen, huelu müte felelai. Iñche mülei ñi pengelelafiel tañi duamtuniefiel ñi huentru”. Peafiyiñ ñi femün Bruno ca tañi domo ñi pengeleluhual tañi duamtuniehun. Bruno feipi: “Mülelu quiñe mu ellcacünuqueyu tayu  telefono, feimu doi cüme rulpaqueyu tayu fülmaucülen”.

14. ¿Chumafui pu curehuen müte ayünole quiñe mu ñi müleal engu?

¹⁴ Quiñeque curehuen ayüquelai tañi quiñe mu müleal engu, ¿chumngelu am? Ayüquelai engu ñi femal quiñe rume femün, ca quiñeque mu yafcauqueingu pichin dungu meu. Eimu femngechi rupalmu, ¿chumafuimu? Raquiduamaimu chi cütral mu ñi pichi üicülen. Ñi üicüleal chi cütral, pichique amultuculelngeai mamüll, ca pichi pichi mülei ñi tuculelngeal doi fütraque mamüll. Ñi doi amuleal tamu piuqueyehun, pichi pichi quiñehun müleaimu. Quintumu chem tamu quiñehun ayüqueel, femngechi tamu yafcaumequenoal (Sant. 3:18). Amulele pichiquen dungu mu, tremcüleafui tamu piuqueyehun.

15. ¿Chumngelu fente falin-ngei yamniehual ti curehuen?

¹⁵ Tati cürüf pimuniefile chi cütral, amuleai ñi üicülen. Ngenole cürüf, chongnagafui chi cütral. Ca femngechi ti curehuen yamuunole engu, chongnagafui reque tañi piuqueyehun. Huelu yamnieule engu, doi tremai tañi piuqueyehun. Huelu eimi feipiafuimi tami yamniefiel tami afcadi, huelu ¿chem pilei quisu? ¿Yamniengelu troquiucülei? Peafiyiñ ñi rupan Penny ca Aret. Fei engu doi 25 tripantu yeniei tañi nieucülen. Taiñ lamngen feipi: “Tañi füta iñchiu yamniehun mu, tayu ruca mu mülei ayühunquechi rupan. Iñchiu feipiafuyu com tayu raquiduamqueel ca tayu chum duamcülen. Rüf quimnieyu tayu yamniehun” pi taiñ lamngen. Eimi, ¿chumafuimi tami afcadi ñi yamniengelu troquihual? Peafiyiñ ñi femün Abrahán ca Sara.

16. Pu füta, ¿chem inaduamafui Abrahán ñi femün? (1 Pedro 3:7; ca inaduamnge ti adentun).

¹⁶ Abrahán pengelquefui ñi yamniefiel ta Sara. Allcütuquefi ñi feipin ca falintuñmaquefi tañi raquiduam. Quiñe rupa Sara rume lladcüluucülefui, feipifi ta Abrahán ñi illculen ca culpatufi tañi huesa rupalen. Huelu Abrahán illcutulaeyu ca chem pilafi rume tañi huesa duamal. Abrahán quimniefui ñi chumngen ta Sara, tañi yamniequeteu ca tañi quelluqueteu, feimu allcütui tañi domo ca eluhui ñi cüme elafiel chi huesa dungu (Gén. 16:5, 6). ¿Chem quimeltueiñmu tüfa? Tati huentru loncolei tañi familia mu (1 Cor. 11:3). Huelu piuqueyenielu am ñi domo, feimu eluuquei ñi allcütuñmayafiel ñi feipin, doi mai raquiduamle ñi femal quisu mu ca tañi  domo meu (1 Cor. 13:4, 5). Ca quiñeque mu tami domo lladcüluucülei chi, feimu duamniei ñi entual tañi huesa duam. Fei eimi, ¿falintuafimi tami allcütuafiel tami yamniefiel meu? (papeltunge 1 Pedro 3:7). Angela engu Dimitri yeniei epe 30 tripantu tañi nieucülen engu. Angela feipiquei chumngechi tañi yamnieteu tañi füta, feipi: “Tañi füta eluucülei tañi allcütuaeteu ñi rupan huesa antü mu ca allcütuqueneu cüpa dunguyüm. Quisu rume niei paciencia iñche mu, iñche cüme duamcülenoli rume”.

17. Pu domo fütangelu, ¿chumngechi inayentuafui Sara ñi femün? (1 Pedro 3:5, 6).

¹⁷ Sara quelluquefui tañi feipin Abrahán, femngechi pengeli tañi respetaquefiel (Gén. 12:5). Quiñe rupa acurumei huitran, fei Abrahán ayüfui ñi atendeafiel. Feipifi ta Sara ñi elcünual caquelu cüdau, fei ñi deumayal cofque (Gén. 18:6). Sara feyentufemi. Eimün pu domo, ¿chumngechi inayentuafuimün Sara? Quelluntucuafimün ñi feipin tamün füta, femülmün doi quiñeucüleaimün (papeltunge 1 Pedro 3:5, 6). Dimitri feipi ñi chumquen ñi domo: “Quiñeque mu quiñeucülelayu rume tayu raquiduam, huelu tañi domo quelluqueneu chem tañi feipin. Cüme tripanon mu rume tañi dungu, huesa piquelaeneu. Rume falintuquefiñ tañi femquen Angela”. Eimi domo yamniefilmi tami füta, quisu doi piuqueyeaimu.

18. Ti curehuen eluucülele ñi cüme piuqueyehual, ¿chum tripayai?

¹⁸ Huecüfü ayüniei pu curehuen ñi piuqueyehueunoal, femngechi ñi püntünentuhual engün Jehová mu. Huelu rüf piuqueyeule pu curehuen, chem no rume huelulcaulayafeyu. Feimu llemai eimün pu curehuen, piuqueyeucülemün chumngechi ñi feipin El Cantar de los Cantares pingechi lifru. Hunentucunieafimün ta Jehová tamün curehuen-ngen, elcünuaimün antü tamün quiñehun müleal ca epuñpüle yamuucüleaimün. Femülmün, püramyenieafimün ta Jehová ca tamün piuqueyehun rumel nehuencüleai.