FEICHI 670 tripantu petu ñi mülepanon Jesús, Asiria rume fütra imperiofel. Quiñe pagina internet ti Museo Británico, feipi: “Chipre mu tuuquefui, puhui Irán mu, ca quiñeque tripantu, Egipto”. Nínive, ti capital tüfachi imperio, doi alüquefui com huaria mu. Tüfachi fütra huaria, adelcalequefui fentren anümca flor, ca niequefui fütraque ülmenque ruca ca fentren biblioteca. Quiñeque fütraque cura malal, pengelquefui ti rey Asurbanipal ngünenielu com mapu troquiuquefui. Huelu tüfachi rey müten no, ca caquelu rey ca femngechi feipiquefui. Petu ngünenielu Asurbanipal, inei no rume hueulayafeyu, fütra huaria cai.

Felefule rume, Jehová ñi duam mu, ti profeta Sofonías feipicünui: ‘Jehová apümcayafi Asiria. Apümcayafi Nínive, ancümafi desierto reque’. Cafei Jehová ñi duam mu, ti profeta Nahúm feipicünui: ‘¡Müntuñmafimün ti plata! ¡Müntuñmafimün ti oro! ¡Tüfachi huaria huelliletui, chem no rume mülehuelai, falihuetulai! Inei rume peelmu, lefmahuai, ca feipiai: “¡Nínive apümcangei!”’ (Sof. 2:13; Nah. 2:9, 10; 3:7). Allcülu tüfachi niniveche, feipipelaingün: “Turpu rupalayai tüfachi dungu. ¿Feingepei mai?”.

Huelu rupai tüfachi dungu ñi feipicünuel Jehová. Petu ñi acunon ti 600 tripantu petu ñi mülepanon Jesús, pu babilonio ca pu medo maloncontupafingün ta Asiria. Rupachi tripantu, ngehuelai che Nínive mu, ca acordangehuetulai chi huaria. Ti Museo de Arte Metropolitano pingelu, mülelu Nueva York mu feipi ta “tüfachi huaria rüngalconi, turpu tuculpangehuequelai, Biblia meu müten”. Quiñe troquiñche feipiquefui 1800 tripantu püle, inei no rume quimquelafui ñi mülequefel ta Nínive. Huelu ti 1845 tripantu mu, ti arqueologo Austen Henry Layard rüngafi chi mapu cheu ñi mülequefel ta Nínive. Fei tañi peel tüfachi arqueologo pengeli ñi rume fütra huariafel ta Nínive.

Tüfachi profecia ñi feipiel com femtripai. Tüfa quelluqueiñmu taiñ doi maneluhual fillque profecia mu nütramcalu tati pu gobierno mu (Dan. 2:44; Apoc. 19:15, 19-21).