1, 2. 1) Pu curehuen hue nieulu, ¿chumngelu mülei ñi maneluhual Chau Jehová mu? (Salmo 37:3, 4). 2) ¿Chem peaiñ tüfachi chillcatun mu?

EIMI, ¿hue curengeimi cam fütangeimi? Cam, ¿raquiduamcülepelaimi chi tami curengeal cam fütangeal? Fei, ayüniepelafuimu tamu ayüucüleal. Pu curehuen rupayafui cüdaungechi dungu, ca pu hue nieulu mülei ñi cüme dullial chem tañi femal engu. Chem dungu rume dullilmu, tüfa quelluafeimu cam huesalcayafeimu com tamu mongen mu. Maneluhulmu Chau Jehová mu doi cüme dulliaimu tamu chumal, tamu curehuen-ngen doi nehuen-ngeai ca doi ayüucüleaimu. Inanofilmu Chau Dios tañi ngülam, rupayafuimu cutrancahun-ngechi dungu ca ayüucülelayafuimu (papeltunge Salmo 37:3, 4).

² Tüfachi chillcatun quelluafi tati pu curehuen hue nieulu, huelu ca quelluafi tati doi alün tripantu yenielu ñi curehuen mu. Peaiñ ñi rupan quiñeque huentru ca domo nütramcangelu Biblia mu ca chem dungu inayenturpuafui tati pu curehuen. Ca peaiñ chem quimeltuqueiñmu ñi femün quiñeque curehuen famülque mu.

3, 4. ¿Chem cüdaungechi dungu rupayafui tati pu hue curehuen?

³ Quiñeque mu pu curehuen hue nieulu feipingeafui chumngechi tañi yenieal tañi mongen. Por ejemplo,  tañi pu chau ca tañi pu pariente feipiafeyu tañi nieal ta pichiqueche. Ca femngechi tañi pu hueni feipiafeyu tañi nieal ta quiñe cüme ruca ca fillque fillem.

⁴ Ti pu curehuen cuñiutucuunole, huesa dulliafuingün fei nieafuingün ta fütraque deuda. Tañi culliafiel tüfa duamnieafuingün chi ñi mür cüdahual com antü. Cafei llicayafuingün chi ñi quechanentungeal tañi cüdau mu, feimu doi cüdauqueingün. Tañi femün mu tüfa, nielayafuingün tiempo ñi estudiayal ta Biblia, ñi amuldungual ca ñi amual ta trahun mu. Feimu tañi cüdau engün catrütuafeyu ñi doi cüme cüdahuelafiel ta Jehová.

5. ¿Chem quimeltuqueiñmu Klaus ca Marisa ñi rupan?

⁵ Iñchiñ rume cüdauliyiñ taiñ nieal falinque fillem, tüfa ayühul-layafeiñmu. Tüfachi dungu mu rupai Klaus ca Marisa. * Hue nieulu feitachi curehuen, fill antü cüdauqueingu femngechi ñi nieal fentren fillem ca plata. Huelu tüfa ayühulquelaeyu. Klaus feipi: “Doi niequefuyu tayu duamnieel, huelu raquiduamquelayu rume tayu doi cüme cüdahuelafiel ta Jehová. Rume cüdaungechi mongen niequefuyu, fill raquiduamcülequefuyu”. Eimi peñi, lamngen ngüneduamquefuimi chi tami rume cüdahun mu rüf ayühulquelaeimu. Rupalmi tüfachi dungu mu, huesa duamquilnge. Caquelu che ñi rupan quelluafeimu. Feula peafiyiñ chem quimürpuafuingün pu füta ti rey Jehosafat mu.

6. Jehosafat contupaeteu mu quiñe fütra troquiñ hueichafe, ¿chumi? (Proverbios 3:5, 6).

⁶ Eimün pu füta alün cüdau nieimün, feimu quiñeque mu huesa duamcüleafuimün chi. Femngechi raquiduam nielmi, tati rey Jehosafat ñi rupan quelluafeimu. Quisu am reyngelu, mülefui ñi cuñiutucuafiel ti troquiñche tañi ngüneniefiel. Tüfa quiñe cüdaungechi dungufel. Tañi femal tüfachi cüdau, Jehosafat deumai fütraque huaria malalngelu ca trahulfi doi quiñe millon nehuen-ngechi hueichafe (2 Crón. 17:12-19). Rupan mu ta antü, Jehosafat quimürpui ñi contupayaeteu alün hueichafe (2 Crón. 20:1, 2). Fei, ¿chumi Jehosafat? Maneluhui Jehová mu ca llellipufi tañi quelluaeteu. Quisu inafi tati ngülam mülelu Proverbios 3: 5, 6 (papeltunge). Jehosafat tañi llellipun mülei 2 Crónicas 20:5-12. Ñi llellipun mu pengelngei fente ñi maneluucülen Jehosafat Chau Jehová mu. ¿Chumngechi lloudungueyu Jehová? Peafiyiñ.

7. Jehová, ¿chumngechi lloudungufi ñi llellipun ta Jehosafat?

 ⁷ Jehová huercüfi quiñe levita ñi feipiafiel ta Jehosafat chem tañi femal. Feipifi: ‘Ngelai tamün quehuayal. Re adquintulemün müten chumngechi Jehová tamün montulaeteu’ (2 Crón. 20:13-17). Ñi feipingeel ta Jehosafat cangei, pu hueichafe mülei ñi pepicaucüleal tañi hueichayal. Huelu ñi feipingeel ta Jehosafat cüpalai quiñe huentru mu, Jehová mu cüpai llemai. Fei, ¿chumi Jehosafat? Maneluhui Jehová mu ca femi tañi feipieteu Jehová. Tripalu engün tañi chaftuafiel tañi pu caiñe, Jehosafat hunelu mu huercülafi tañi doi cümeque hueichafe. Doi mai huercüfi quiñeque huentru nienolu hueichahue, tüfa engün ülcantulen amuingün. Fei chumngechi Jehová ñi feipifiel ta Jehosafat femtripai. Quisu hueufi tañi pu caiñe (2 Crón. 20:18-23).

8. Tati pu füta cai, ¿chem quimeltun entuafuingün Jehosafat tañi rupan mu?

⁸ Eimi füta, ¿chem quimeltun entuafuimi Jehosafat tañi rupan mu? Eimi com nehuen mu cüdauqueimi tami cuidayafiel tami pu familia. Fei acule huesaque dungu, raquiduamafuimi chi tami quisutu chaftuafiel, fei quisu maneluhuafuimi. Huelu tüfa cümelayafui. ¿Chem cümeafui tami femal? Quisulen mu llellipuafimi Jehová tami quelluaeteu. Ca femngechi llellipuaimi tami domo engu. Ca papeltuafimi Biblia ca taiñ fillque publicacion, fei inayafimi ti ngülam ñi feipingeel. Quiñeque pu che ayülayai chi tami quintual ngülam Biblia mu, huedhued dungu troquiquefilu am engün. Ca feipiafeimu chi: “Ti plata ca falinque fillem quelluaimu tami cuñiutucuafiel tami pu familia”. Huelu raquiduamnge chem ñi rupan ta Jehosafat. Quisu maneluhui Jehová mu ca pengelcünui tañi maneluucülen. Jehová quisucünulafi ta Jehosafat, eimi ca femlayaimu (Sal. 37:28; Heb. 13:5). ¿Pu curehuen cai? ¿Chumafuingün tañi doi ayüucüleal? Peafiyiñ.

9. Isaías ca tañi domo, ¿chumqueingu?

⁹ Isaías tañi domo engu doyümfingu ñi cüdahuelafiel Jehová. Isaías quiñe profetangefui. Tañi domo ca profetisa pingequei Biblia meu (Is. 8:1-4). Com pu curehuen müna cümeafui ñi inayentuafiel Isaías ca tañi domo.

10. Pu curehuen, ¿chemu mülefui ñi papeltual chumngechi huechutriparpumequen Biblia ñi feipin?

¹⁰ Pu curehuen, ¿chumngechi inayentuafui ñi femquen Isaías ca tañi domo? Mülei ñi doyümafiel ñi serfiafiel ta Jehová engün. Pu curehuen doi papeltufile engün chumngechi ñi huechurpumequen Jehová ñi feipin mülelu Biblia meu, doi maneluhuaingün Jehová mu * (Tito 1:2). Por ejemplo, famülque mu femtripamequei Jesús ñi feipin, huall Mapu mu pu che enseñalngequei Jehová ñi dungu (Mat. 24:14). Fei pu curehuen ramtuhuafuingün chumngechi ñi quelluntucual engün. Doi ngüneduamfile engün ñi femtripamequen  Jehová ñi feipin, doi eluhuaingün tañi serfiafiel.

11. ¿Chem eluhui ñi femal Áquila engu Priscila? ¿Chumngelu femingu?

¹¹ Pu curehuen müna quelluafeyu ñi femün Priscila Áquila engu. Quisu engu judio tuhun-ngefuingu ca Roma huaria mu mülequefuingu. Allcülu engu Jesús ñi cümeque dungu, cristianongerpuingu. Ayüucülepelafuingu ti mongen ñi yeniequefel engu. Huelu tañi chumlequefel engu felehuetulaingu. ¿Chemu? Tati emperador Claudio feipi com pu judio ñi amutual Roma huaria mu. Fei, ¿chumingu Áquila engu Priscila? Elcünuingu cheu tañi cüme felequefel engu, fei quintuingu cheu tañi müleal ca tañi cüdahual engu. ¿Famentupefingu mai Jehová tañi cüdau? Femlai. Áquila engu Priscila amuingu Corinto huaria mu. Fei eluhuingu ñi quelluntucuafiel ti trahunche ca ñi yafültucuafiel. Rupachi antü mu, ca huaria mu amuingu ñi amuldungual (Hech. 18:18-21; Rom. 16:3-5). Áquila engu Priscila rumel eluucülequefuingu ñi cüdahuelafiel ta Jehová, feimu ayüucülequefuingu.

12. Pu curehuen, ¿chemu mülefui ñi raquiduamal chumngechi ñi cüdahuelafiel Jehová?

¹² Pu curehuen ca inayentuafuingün ñi femün Áquila Priscila engu. ¿Chumngechi? Ngelai ñi famentuafiel ñi cüdahuelafiel ta Jehová. ¿Chem quelluafeyu? Epu che ayüle ñi curehuen-ngerpual, hunelu meu mülei ñi nütramcayal chumngechi tañi serfiafiel ta Jehová. Femngechi femle engu ca eluule ñi cüdahuelafiel Jehová, cüme ngüneduamaingu chumngechi ñi quelluaeteu Jehová (Ecl. 4:9, 12). Peafiyiñ ñi chumün quiñe curehuen, Russell ca Elizabeth pingequeingu. Russell feipi: “Petu tayu nieunon, nütramcaqueyu chumngechi tayu serfiafiel Jehová”. Elizabeth ca feipi: “Femngechi femün mu iñchiu, quellueyumu cüme dullial tayu  chumal, femngechi chem no rume catrütulaeyumu tayu cüdahuelafiel Jehová”. Rupachi tiempo mu, tüfachi curehuen eluhui ñi amuldungual Micronesia mapu mu.

13. Ñi feipin Salmo 28:7 maneluuliyiñ Jehová mu, ¿chumngechi quelluaiñmu?

¹³ Russell ca Elizabeth reque, fentren curehuen cüdauquei tañi mongeluhuam müten, femngechi tañi doi cüdahuelafiel ta Jehová. Pu curehuen raquiduamle chumngechi tañi serfiafiel ta Jehová ca eluule ñi femal, rume quelluayu. Femngechi quimaingün tañi cuidanieteu Jehová, doi maneluhuaingün quisu mu ca rume ayüucüleaingün (papeltunge Salmo 28:7).

14. Pedro ca tañi domo, ¿chumngechi pengelingu ñi maneluucülen Jehová mu? (Mateo 6:25, 31-34).

¹⁴ Ti apostol Pedro ca tañi domo, ca rume inayentufalfuingu. Pedro challhuaquefui femngechi ñi nieal ta plata ca ñi eluafiel tañi domo tañi duamnieel. Quiñe rupa, Jesús feipifi ta Pedro ñi elcünual tañi challhuaquen fei tañi inayafiel. Fei Pedro nütramcapelafi tañi domo (Luc. 5:1-11). Fei, ¿chumi Pedro? Eluhui tañi inayafiel ta Jesús. Fei tañi domo compañnieyu. ¿Chumngechi quimiyiñ tüfa? Biblia pengeli Pedro tañi domo tañi compañnieteu (1 Cor. 9:5). Pedro tañi domo cüme cristianangequefui, poyequefui Jehová. Feimu peno Pedro ngülamtufi tati pu curehuen (1 Ped. 3:1-7). Pedro ca tañi domo maneluucülequefuingu Jehová tañi cuidayaeteu, feimu doyümfingu ñi poyeafiel ta Jehová (papeltunge Mateo 6:25, 31-34).

15. ¿Chem quimeltueiñmu ñi femün Tiago ca Ester?

¹⁵ Eimün pu curehuen fentren tripantu rume yenielmün tamün curehuen-ngen, doi cüdahuelafuimün ta Jehová. ¿Chumngechi? Inayentuafuimün ñi femquen caquelu curehuen. Quiñeque dungu ñi femquen mülei JW Broadcasting^® mu ca taiñ fillque chillca. Peaiñ ñi femün Tiago ca Ester. Fei engu papeltufingu ñi femquen quiñeque curehuen. Tiago feipi: “Ngüneduamiyu caque quiñeque curehuen chumngechi ñi quellueteu Jehová. Fei ca ayüfuyu tayu femngechi femaeteu Jehová”. Rupachi antü mu, Tiago ca tañi domo amuingu Paraguay mapu. Üyeu amuldunguqueingu portugués quehun mu. Ester feipi: “Tayu amuldunguquen mu pequefiyu reque chumngechi ñi huechutriparpuquen Efesios 3:20. Rume ayüquefiyu feitachi texto” pi taiñ lamngen. Feitachi carta Efesios mu, Pablo huirintucui Jehová chem rume pedifiliyiñ doi apoeluafeiñmu. Feitachi dungu rüfngei llemai.

16. Tati ayünielu ñi doi cüdahuelafiel Jehová, ¿inei mu doi fülconafuingün ñi ngülamtungeal?

¹⁶ Eimün pu hue curehuen, fentren dungu quimürpuafuimün caquelu peñi ca pu lamngen maneluuquelu Jehová mu. Quiñeque curehuen alün tripantu yeniequei tañi precursorngen engün. Feimu eimün pu hue curehuen raquiduamülmün tamün doi cüdahuelafiel Jehová, feipiafuimün tamün ngülamtuaeteu. Femngechi pengelaimün tamün maneluucülen Jehová  mu (Prov. 22:17, 19). Pu loncolelu ca quelluafeimünmu.

17. Klaus ca Marisa, ¿chem rupaingu? Fei, ¿chem quimeltueiñmu ñi rupan?

¹⁷ Iñchiñ ayüafuiñ taiñ cüdahuelafiel ta Jehová cheu taiñ ayüqueel ñi cüdahual, huelu quiñeque mu femngechi tripaquelai ti dungu. Ca huiño nütramcayaiñ ñi rupan Klaus ca Marisa. Cüla tripantu cureyeucülelu engu, elcünui ñi ruca engu ñi amual Finlandia mapu mu. Fei quelluntucuingu ñi deumayal Trahunhue Ruca. Fei feipingeingu tañi cayu cüyen tañi müleal engu müten. Ellaca mu huesa duamfuingu, huelu rupachi tiempo mu, mangelngeingu quiñe curso mu ñi árabe dungual engu. Famülque mu, ayühunquechi amuldunguqueingu árabe quehun mu. Marisa raquiduamün mu tañi rupan ta cuifi mu, feipi: “Llicaquefun tañi tripayal cheu tañi cüme felen, feimu mülefui tañi maneluucüleal Jehová mu. Iñche cüme quimnien Jehová tayu rumel quelluqueteu. Feitachi dungu tayu rupan, doi maneluuquen Jehová mu”. ¿Chem quimeltueiñmu Klaus ca Marisa ñi rupan engu? Maneluuliyiñ Jehová mu com taiñ piuque mu, fei rumel quelluaiñmu.

18. ¿Chumafui ti pu curehuen ñi maneluhual Jehová mu?

¹⁸ Chau Jehová eli ñi niehual ta che femngechi ñi curehuen-ngeal, ca ayüquei ñi ayüucüleal engün (Prov. 5:18; Mat. 19:5, 6). Eimün pu hue curehuen, ¿chummequeimün am tamün mongen mu? Jehová elueimünmu fentren cümeque dungu. ¿Pengelquepeimün mai tamün mañumcülen? Ngillatuafimün ta Jehová, quintufimün falinque ngülam mülelu Biblia mu ca inayafimün. Loncontucuaimün: doyümfilmün tamün cüdahuelafiel ta Jehová, ayüucüleaimün tamün curehuen-ngen.