1. Jehová, ¿chem piqueiñmu taiñ femal?

JEHOVÁ rume cüpa pengelqueiñmu taiñ nor piuqueyenieteu (Os. 6:6). Ca feipiqueiñmu taiñ pengelal tüfachi rüf piuqueyen (Miq. 6:8). Huelu hunelu, peaiñ chumquei tati pu che pengelquelu tüfachi rüf piuqueyehun.

2. ¿Chumquei ti rüf piuqueyechequelu?

² Tati che nielu tüfachi rüf piuqueyehun, elcünuquelai tañi piuqueyefiel quiñe che, chem rupale rume turpu quisucünulayafi. Chau Jehová doi inayentufali tañi rüf piuqueyechequen mu. Tüfachi troquiñ mu peaiñ Jehová chumngechi pengelqueiñmu taiñ nor piuqueyenieteu. Cangelu troquiñ meu, peaiñ chumngechi iñchiñ pengelafuiñ hueluconquechi taiñ nor piuqueyehun.

3. Jehová, ¿chem dungu feipifi ta Moisés ñi chumngen mu ta quisu?

³ Pu israelita tripatulu Egipto mapu mu, Jehová feipifi ta Moisés ñi chumngen ta quisu. Feipifi: “Jehová, Jehová, quiñe Ngünechen cutranduamyechequelu, cutranpiuqueyechequelu, ca lladcüfemquenolu, rume piuqueyechequelu ca rüfngelu, nor piuqueyequefilu ta huarancaquechi pu che, huiñoduamtuquefilu huelulcan, huesa femün ca ti culpan” (Éx. 34:6, 7). Femngechi  Jehová pengelelfi ta Moisés quiñe rume falin dungu. ¿Chem dungu? Peafiyiñ.

4, 5. 1) ¿Chem piquei Jehová quisu mu? 2) ¿Chem ramtun inaduamaiñ?

⁴ Jehová feipi ñi rume piuqueyechequen. Tati Biblia alünquechi feipiquei Jehová ñi rüf piuqueyechefengen (Núm. 14:18; Neh. 9:17; Sal. 86:15; 103:8; Joel 2:13; Jon. 4:2). Afmatufali ta Chau Jehová mufüchi rupa feipiquelu tañi rüf piuqueyechefengen. Feimu lle David feipi: “Ahuem Jehová, tami nor piuqueyechen huenu mu cütu puuquei [...]. Ahuem Chau Dios, rume falin-ngei tami nor piuqueyechen. Pu huentru tañi pu cüpanche ellcauquei ca llaufeñtuquei miñche tami müpü mu” (Sal. 36:5, 7). David reque, ¿falintuquepefiyiñ mai Chau Jehová ñi rüf piuqueyechen?

⁵ Taiñ doi cüme quimafiel feitachi rüf piuqueyehun ñi nieel ta Jehová, peaiñ epu dungu. Jehová, ¿inei engün am rüf piuqueyequefi? Jehová tañi rüf piuqueyechen, ¿chumngechi quelluqueiñmu?

6. Jehová, ¿inei engün am rüf piuqueyefi?

⁶ Chau Jehová rüf piuqueyeniequefi tañi pu serfiqueteu müten. ¿Chumngechi pengeli tüfa? Chau Jehová turpu elcünulayafi tañi pu hueni, eluquefi tañi maneluhual engün ca elcünulayafi tañi piuqueyeafiel.

7. Jehová, ¿chumngechi pengeli ñi piuqueyequefiel com pu che?

⁷ Chau Jehová piuqueyeniefi com pu che. ¿Chumngechi quimiyiñ tüfa? Quiñe rupa Jesús feipifi ta Nicodemo tüfachi dungu: ‘Ngünechen rume piuqueyefi ta com Mapu meu mülechi pu che, feimeu huli ñi quiñen Fotüm femngechi com tati feyentulu quisu meu chumcaunorume ñi lanoal, huelu mai ñi nieal ta rumel mongen’ (Juan 3:1, 16; Mat. 5:44, 45).

8, 9. 1) ¿Chumngelu Jehová rüf piuqueyeniefi tañi pu serfiqueteu? 2) ¿Chem ngüneduamaiñ cüpalechi parrafo mu?

 ⁸ Chumngechi ngüneduampeiñ, Chau Jehová rüf piuqueyeniefi tañi pu serfiqueteu. David ca Daniel feipingu tüfa. David feipi Jehová rüf piuqueyefi tañi pu rüf quimeteu ca tañi yamnieteu. Daniel ca feipi Chau Jehová rüf piuqueyefi tañi piuqueyenieteu ca inaniefilu tañi feipin (Sal. 36:10; 103:17; Dan. 9:4). Tati pu che ñi rüf serfinieteu Jehová ta rüf piuqueyequefi.

⁹ Cuifi mu, petu taiñ poyerpunofiel Jehová, Jehová deu pengelelquefeiñmu taiñ piuqueyenieteu (Sal. 104:14). Huelu cristianongerpulu iñchiñ, doi piuqueyerpueiñmu. Ca Jehová feipieiñmu turpu elcünulayai taiñ piuqueyenieaeteu (Is. 54:10). Tañi piuqueyenieteuchi pu che, Jehová fültucuquefi quisu meu ca quisucünuquelafi (Sal. 4:3). Fei, ¿chem mülei taiñ femal? Ti salmista feipi iñchiñ mülei taiñ cüme raquiduamal Jehová chumngechi pengelelqueiñmu taiñ rüf piuqueyenieteu (Sal. 107:43). Feimu feula ngüneduamaiñ cüla dungu ñi femquen ta Jehová ca chumngechi quelluqueiñmu tüfa.

10. ¿Chumngechi quelluqueiñmu Jehová taiñ rumel piuqueyenieteu? (Sal. 31:7).

¹⁰ Turpu aflayai taiñ rüf piuqueyeaeteu Jehová. Com tati Salmo 136 mu huiriconcülei tüfa. Versiculo 1 feipi: “Jehová cüme piuquengei, feimu mañumafimün; aflayai taiñ nor piuqueyeaeteu” (Sal. 136:1). Cafei versiculo 2 puulu 26, caque quiñeque ti versiculo mu cüme pengeli Chau Jehová tañi rüf piuqueyen turpu afquelai. Papeltufiel mu feitachi versiculo, quimiyiñ Jehová chumngechi pengelelquefi tañi pu che ñi rüf piuqueyeniefiel. ¿Chem quimeltueiñmu tüfachi salmo? Chem huesaque dungu mu rume  rupafuliyiñ, Jehová turpu elcünulayaiñmu. Feimu serfifiel mu ta Jehová iñchiñ, quisu famentuuquelai iñchiñ mu. ¿Chumngechi quelluqueiñmu Jehová taiñ rumel piuqueyenieteu? Femngechi müten ayüucüleaiñ ca nehuencüleaiñ, fei cüme chaftuafiyiñ chem huesaque dungu mu rume rupaliyiñ ca rumel serfinieafuiñ ta Jehová (papeltunge Salmo 31:7).

11. ¿Chumngelu perdonachequei Jehová? (Salmo 86:5).

¹¹ Fente taiñ rüf piuqueyenieteu mu Jehová, perdonaqueiñmu. Quiñe che huesa culpan mu huelu rüf repentiulu, Jehová perdonaqueyu. Ti salmista David feipi Jehová huiñoleltuquelaeiñmu taiñ huesa femün mu (Sal. 103:8-11). Culpalu ta David, quisu cutrantupiuquelequefui feimu quisu culpahui ca müna hueñancülequefui. Huelu David quimürpui Jehová eluucülei tañi perdonayaeteu. ¿Chemu perdonachequei ta Jehová? Tañi rüf piuqueyechen mu. Quisu “perdonaen” pingen mu, eluucülequei ñi perdonacheal (papeltunge Salmo 86:5).

12, 13. Petu culpalelu troquiuliyiñ, ¿chem quelluafeiñmu taiñ femngechi troquiunoal?

¹² Culpan mu iñchiñ, cümei taiñ huesa duamal. ¿Chumngelu? Femngechi müten eluucüleafuiñ taiñ pedial ta perdon ca norümtuafuiñ taiñ huesa femün. Femfulu rume ta quiñeque che, petu culpalelu troquiuqueingün. “Müna huesa femün. ¿Perdonapeafeneu Jehová?” piqueingün. Femngechi troquiulimi, acordanienge Chau Jehová eluucülei tami perdonayaeteu, quisu rüf piuqueyeimu.

¹³ ¿Chumngechi quelluqueiñmu Jehová ñi eluucülequen ñi perdonacheal? Culpanchengeliyiñ rume, poyenieafuiñ ta Jehová cüme raquiduam mu. ¿Chumngelu? ‘Jesucristo, Ngünechen ñi Fotüm, tañi mollfüñ liftutueiñmeu com culpan meu’ (1 Juan 1:7). Huesa duamcülelmi quiñe huesa dungu tami femün meu, acordanienge Chau Jehová  eluucüleai tami perdonayaeteu. Ti rey David feipi: ‘Tati huenu doi alüpüralelu am ti nag Mapu mu, ca femngechi doicülei Chau Dios ñi nor piuqueyefiel tañi pu yamnieteu. Tunte alü camapulelu ti tripahue antü ca ti conhue antü mu, ca femngechi Chau Dios alü camapucünui taiñ culpan’ (Sal. 103:11, 12). Cafei perdonaeteu mu Jehová, acordahuequelafi taiñ huesa femün (Is. 55:7).

14. ¿Chumngechi cuñiutucuqueiñmu Jehová?

¹⁴ Fente taiñ rüf piuqueyeteu Jehová, cuñiutucuqueiñmu taiñ poyenieafiel. David llellipufi ta Jehová, feipifi: “Eimi quiñe ellcaupeyüm reque feleimi iñche mu. Eimi cuñiutucuaen tañi hueñancülenoal. Eluen tami hualloñmanieaeteu ta che ayühunquechi huirarhuirarngequelu tami montulchequen mu [...]. Jehová nor piuqueyen mu cuñiutucuquefi tañi pu maneleteu” (Sal. 32:7, 10). Cuifi mu, deumangequefui fütraque malal ñi cuñiutucungeam ta che tañi pu caiñe mu. Feitachi fütraque malal reque, Jehová fente taiñ piuqueyeteu mu cuñiutucuqueiñmu. Femngechi chem rume catrütulayafeiñmu taiñ cüme hueniyeafiel Jehová. Cafei Jehová fente taiñ piuqueyeteu mu, fültucupaqueiñmu quisu mu (Jer. 31:3).

15. Jehová, ¿chemu am quiñe ellcaupeyüm reque felei?

¹⁵ David ca quimfalcünui chumngechi taiñ cuñiutucuqueteu Jehová. David feipi: “Chau Dios tañi ellcaupeyüm, fei pengelqueneu tañi nor piuqueyenieteu [...]. Chau Dios tañi nor piuqueyenieteu ca tañi incañpeteu. Tañi ellcaupeyüm ca tañi montulqueteu. Chau Dios tañi escudo ca tañi chelcomtuhue reque felei” (Sal. 59:17; 144:2). ¿Chumngelu feipi David? Cheu rume müleliyiñ, Jehová cuñiutucuaiñmu taiñ cüme hueniyeafiel Jehová. Cafei ti huentru huirintuculu ti Salmo 91 feipi: “Feipiafiñ ta Jehová: ‘Eimi iñche tañi ellcaupeyüm ca tañi nehuentuqueteu’” (Sal. 91:1-3, 9, 14). Moisés ca huirintucui Jehová quiñe ellcaupeyüm (Sal. 90:1). Cafei epe puulu ñi layal ta Moisés, quisu feipi: “Chau Dios quiñe ellcaupeyüm tati, cuifi mu ca famülque mu. Tañi lipang recülqueimu” (Deut. 33:27). ¿Chem pi chi am Jehová tañi lipang recülqueiñmu?

16. ¿Chumngechi quelluqueiñmu taiñ cuñiutucuqueteu Jehová? (Salmo 136:23).

¹⁶ Maneluuliyiñ Jehová taiñ cuñiutucuaeteu, cüme duamaiñ. Huelu quiñeque mu, rume huesa duamafuiñ ca pepi huitrapüraquelaiñ reque. Fei, ¿chumngechi quelluaiñmu Jehová? (Papeltunge Salmo 136:23). Miñche mu tuculelaiñmu reque tañi lipang, fei ñochiquechi huitrañpüramaiñmu (Sal. 28:9; 94:18). ¿Chumngechi quelluqueiñmu taiñ cuñiutucuqueteu Jehová? Epu dungu mu. Quiñe, maneluucülequeiñ cheu rume müleliyiñ iñchiñ, Chau Jehová cuñiutucuaiñmu. Ca epu, quimnieiñ Chau Jehová taiñ rüf duamtunieteu.

17. Taiñ piuqueyenieteu mu, ¿chumai Jehová? (Salmo 33:18-22).

¹⁷ Huesaque dungu mu rupaliyiñ rume, quimnieiñ Jehová taiñ cuidayaeteu fei taiñ cüme hueniyeafiel (2 Cor. 4:7-9). Ti profeta Jeremías feipi: “Chau Jehová taiñ nor piuqueyenieteu mu petu nieiñ  mongen. Fentecünuquelai taiñ cutranpiuqueyeateu” (Lam. 3:22). Iñchiñ cüme quimnieiñ Jehová taiñ rüf piuqueyenieaeteu. ¿Chumngelu? Biblia feipi: “Jehová ngüneduammequefi tañi pu yamnieteu, tati pu maneluuquelu tañi nor piuqueyeaeteu” (papeltunge Salmo 33:18-22).

18, 19. 1) ¿Chem mülei taiñ loncontucual? 2) ¿Chem peaiñ cüpalechi chillcatun mu?

¹⁸ Loncontucuaiñ: petu taiñ serfinofiel ta Jehová, quisu piuqueyenieuyequeiñmu. Huelu poyerpufilu iñchiñ, doi piuqueyerpuqueiñmu ca quisucünuquelaeiñmu. Fente taiñ piuqueyeteu mu, cuñiutucuqueiñmu ca com huechurpuai taiñ feipicünueteu. Quisu rumel ayüfui taiñ hueniyeafiel (Sal. 46:1, 2, 7). Feimu llemai, chem huesaque dungu mu rume rupafuliyiñ, Jehová nehuentunieaiñmu taiñ poyenieafiel.

¹⁹ Chumngechi taiñ ngüneduampeel, Jehová rüf piuqueyequefi tañi pu poyequeteu ca püntütripaquelai quisu engün meu. Jehová ayüquei taiñ ca femngechi femal taiñ pu peñi ca pu lamngen mu. ¿Chumngechi femafuiñ tüfa? Cüpalechi chillcatun mu peafiyiñ.