Müchai hula amulean tamün nütramcayafiel chem ñi rupan. Huelu hune, feipihuayiñ chumngechi eluhun ñi cüdahuelafiel ta Jehová fill antü.

Choyüngen 1942 tripantu mu, quiñe huapi mu Curazao pingelu, tüfa ti Caribe mu mülei. Tañi chau choyüngei Surinam mapu meu, huelu mülepui Curazao huapi mu tañi cüdahual. Quiñeque tripantu petu tañi choyüngenon iñche, tañi chau fautizahui. a Feichi mu, rume pichin testigo mülefui Curazao mu. Fill semana, fei chillcatulelquefeiñmu Biblia iñche, tañi peñi ca tañi cüla lamngen, quiñeque mu ayülenofulu rume iñchiñ. 14 tripantu nielu iñche, tañi chau feipieiñmu taiñ müleputual Surinam mu, femngechi quisu cuidayafui tañi cushe ñuque.

Surinam mapu mu, hueniyerpufiñ quiñeque huechequeche, fei engün ayühunquechi serfiniequefuingün ta Jehová. Doi tripantu niefuingün iñche mu ca precursorngefuingün. Nütramcaquefeneu ñi cüme tripan tañi amuldungun, fei ayüucülequefuingün. Fentepuhun mu ti trahun, nütramcaquefuiñ Biblia mu. Ca quiñeque mu, tripaquefuiñ taiñ nütramcayal petu taiñ peniefiel pu huangülen. Tañi pu hueni ñi quellun mu, quimürpun chumal tañi mongen mu: ayüniefun cüdahuelnieafiel ta Jehová. Feimu 16 tripantu nielu iñche, fautizahun. Ca eluhun ñi precursorngeal 18 tripantu nielu.

Petu tañi precursorngen, quimürpun falinque dungu. Tüfa quelluqueneu ñi cüme serfinieafiel Jehová. Quiñe dungu: rume falin-ngei ñi adümelngeal pu peñi, pu lamngen. Hue precursorngelu iñche, quiñe misionero rume duamtueneu ca quellueneu,  Willem van Seijl pingefui. b Quisu quimeltueneu tañi cüme enturpual tañi fillque cüdau trahunche mu. Feichi mu, duamniefun tañi doi quimeltungeal. Quiñe tripantu rupalu, precursor especialngerpun. Fei feipingen ñi quelluntucunieafiel pichique troquiñche mülelu ti mahuida Surinam mapu mu. ¡Rume mañumniefiñ peñi Willem ca caquelu peñi tañi quimeltueteu mu! Feimu rupalechi tripantu mu, iñche ca eluhun ñi adümelafiel pu peñi ca pu lamngen.

Cangelu falin dungu quimürpun. Taiñ cüme serfiafiel ta Jehová, duamfalngelai taiñ nieal fentren chemcün, doi mai cüme adcünunieafiel taiñ nieel ca cüme raquiduamal taiñ chumal. Conün mu chi cüyen, iñche ca ti precursor tañi compañqueteu cüme raquiduamquefuyu chem tayu ngillacayal. Fei hueluque amuquefuyu huaria mu tayu ngillacayal tayu duamnieel. Ti plata tayu llouqueel fill cüyen cüme adcünuquefuyu, ca femngechi fillque chemcün taiñ ngillacafiel, fei ñi puhulcayal afchi cüyen. Mahuida mu, afle chi iyael cam caquelu fillem, rume cüdaungeafui tayu quellungeal. Huechengelu müten iñche, quimürpun tañi cüme adcünuafiel tañi nieel ca cüme raquiduamal ñi chumal. Tüfa quellueneu ñi doi cüme cüdahuelnieafiel Jehová.

Cangelu falin dungu tañi quimürpun. Pu che amuldungulelngele quisu tañi quehun mu, doi cüme llohuafui ti cümeque dungu. Iñche quim holandes dunguquen, gringodungun, papiamento quehun ca surinames quehun (tüfachi quehun ca feipingequei sranan). Tüfachi quehun doi dungungequei Surinam mu. Huelu mahuida mu, caque quehun dunguquei che. Feichi pu che doi cüme llouquefui ti cümeque dungu quisu tañi quehun mu. Iñche cüdautuquefun tañi dungual saramacano quehun ca caquelu quehun ñi dungungequeel mahuida mu. Cüdaungefulu rume, cüme tripai tañi femün. Rupayechi tripantu mu, fentren che quimeltulelfiñ Biblia quisu tañi quehun mu, fei quimürpufingün ti rüf dungu.

Petu tañi quimün tüfachi quehun, quiñeque mu yehuen-ngechi dungu mu rupan. Quiñe rupa, cutranpütrai quiñe domo estudiaquelu Biblia, fei ta saramacano quehun dunguquefui. Pefilu iñche, ayülefun ñi ramtuafiel ñi chumlen, huelu feipifiñ “¿niepüñeñcüleimi?”. Ti domo ayülafi tañi ramtufiel. Fentren rupa huelulcaulu rume tañi dungual, eluhun tañi quimürpual pu che tañi quehun dungun.

1970 tripantu mu, feipingen ñi huitranmayafiel pu trahunche. Feichi tripantu, pemefiñ quiñeque troquiñche mahuida mu ca hulün quiñe hueupin, ca pengelün quiñeque foto. Ti hueupin feipilei: “¿Chumquei pu Dunguquelu Ineingen Jehová ti Fütra Betel ruca mu?”. Iñche ca quiñeque peñi miyauquefuiñ huampo mu ti leufü mu taiñ puhual mahuida püle. Huampo mu, yequefuiñ  quiñe generador, bencina, lampara de queroseno ca quiñe maquina taiñ pengelafiel chi foto. Puulu iñchiñ, trecaquefuiñ taiñ puhual cheu ñi hulngeal chi hueupin ca yequefuiñ com taiñ duamnieel. Loncontucunien ñi rume mañumcülen com pu che allcütulu chi hueupin. Rume ayühueleneu ñi quimeltucheal Jehová mu ca tañi troquiñche mu. Chem cüdaungechi dungu rume tañi rupan trürlai fente tañi füreneeteu Jehová.

Tañi cauchulen mu, quelluqueneu tañi elfal cüdau mu. Femlu rume, iñche ayüniefun ñi nieal quiñe compañ. Feimu feipifiñ ta Jehová tañi quelluaeteu ñi peal quiñe domo. Huelu mahuida mu, cüdaungei ta mongen. Feimu duamfali ti domo ñi nehuen piuquengeal, femngechi ayühunquechi cüdahuelafiel ta Jehová mahuida mu. Quiñe tripantu rupalu, quimfiñ ta Ethel. Quiñe precursora especialngefui ca eluucülefui ñi cüdahuelafiel ta Jehová cüdaungefule rume. Pichi domongelu Ethel, afmatuleyu ta Pablo. Fei com nehuen mu amuldunguquefui ti cümeque dungu, feimu Ethel cüpa inayentufi. Niehuiyu septiembre 1971 tripantu mu, fei trür huitranmaquefuyu trahunche.

Ethel nehue pofre tremlafui, feimu cüdautulai ñi huimtual mahuida mu. Pemefiel mu pu trahunche camapulelu, pepi yelayu fentren fillem ca tacun. Cafei leufü mu, cüchatuqueyu tayu tacun ca müñetuqueyu. Iqueyu chem rume tayu elungeel: iguana, piraña, ca fillque culliñ ca challhua tañi nüfiel engün pu peñi ca pu lamngen. Ngenon mu rali, platano ñi tapül mu iqueiñ. Ca ngenon mu cuchara, tenedor, re cuhu mu müten iqueiñ. Quiñeque mu, cüdaungefui tayu femngechi serfiafiel ta Jehová. Huelu tayu femün quellueiñmu tayu doi quiñeucüleal, quiñe cüla rumechi  füu reque (Ecl. 4:12). Rume ayüucüleyu chumngechi yeniefiel tayu mongen, ¡chumcaunorume elcünulayafuyu!

Tañi nütramcapeel ellaca mu rupai huiñotulu iñchiu huitranmafiel ti trahunche camapulelu. Amulelu huampo mu, fei coniyiñ matu huitrulechi leufü mu. Fei llumconi tati huampo, huelu pürüm hueftripai. Huelu cümei tayu yenieel chaleco salvavidas, fei tranaconlayu co mu. Huelu ti huampo apoi co mu. Tayu iyael yenielu challa mu ütrüfentufiyu leufü mu, femngechi ñi püneafiel ti challa ñi huelliñmayafiel ti co mülelu ti huampo mu.

Ütrüfentufilu cai iñchiñ taiñ iyael, niehuelaiñ taiñ iyal. Feimu amulelu huampo mu iñchiñ, quintuiñ chumngechi taiñ challhuayal. Huelu quiñe challhua no rume pelaiñ. Feimu llellipufiyiñ ta Jehová. “Elumuiñ taiñ iyal fachantü” pifiyiñ. Rupan ngillatulu müten iñchiñ, quiñe peñi enturumei quiñe fütra challhua. Ifiyiñ, fei quechungefulu rume iñchiñ, huedalehueiñ.

Yenielu iñchiu 5 tripantu tayu huitranmaquefiel trahunche, acurumei quiñe cüme dungu: niepüñeñi ta Ethel. Iñche rume ayühun, huelu quimlayu chem rupayal tayu mongen mu. Ethel iñchiu ayülefuyu tayu cüdahuelnieafiel ta Jehová fill antü. 1976 tripantu mu, nieyu tayu hunen yall, Ethniël pingelu. Fei rupalu epu tripantu ca rangiñ, acui ta Giovanni.

Mülelu cai fentren cüdau Surinam mapu mu, amulen ñi huitranmaquefiel trahunche. Petu pichicalu tayu pu yall, pichin trahunche müten huitranmaquefun. Femngechi quiñe cüyen mu, epu semana huitranmaquen trahunche ca epu semana mülequen tañi trahunche mu. Huitranmafilu pu trahunche püllelelu tañi ruca mu, tañi pu yall ca Ethel compañqueneu. Huelu pemefilu pu trahunche camapulelu mahuida mu, quisu amuquefun.

Alün cüdau niefun, feimu mülefui tañi cüme adcünual tañi tiempo. Fill semana, tañi pu che iñchiñ quiñentrür chillcatuquefuiñ ta Biblia. Mülelu iñche mahuida mu, Ethel chillcatuquefui Biblia tayu pichiqueche engu. Elcünuquefuiñ tiempo taiñ quiñentrür cüme rupaleal. Adngelluuqueiñ, aucantuqueiñ ca pasiayauqueiñ. Quiñeque mu, punmaquefun tañi pepicamequefiel tañi  hueupin ca fillque cüdau tañi nieel trahunche mu. Tañi poyen domo Ethel inayentuquefi ti domo ñi feipin Proverbios 31:15. Epehun huitraquefui taiñ trür papeltuafiel ti texto diario ca yafütual petu ñi amunon pu pichiqueche escuela mu. Rume mañumniefiñ tañi domo tañi quelluqueteu mu ñi enturpual tañi fillque cüdau. Müna saquifali tañi cüme cüdaufengen ca ñi quisu duamuuquenon.

Ethel iñchiu quimeltufiyu tayu pu yall ñi piuqueyeafiel ta Jehová ca ti amuldungun cüdau. Ayüniefuyu tañi cüdahuelafiel engu ta Jehová fill antü. Huelu dicümtucuquelafiyu, quisu engu mülefui tañi dullial. Feimu nütramcaquefiyu ñi ayühun-ngen cüdahuelafiel ta Jehová. Feipiquefiyu ñi cüdahun-ngen quiñeque mu, huelu doi nütramcaquefiyu chumngechi taiñ quelluqueteu ca fürenequeteu Jehová. Cafei quelluquefiyu tayu pu yall ñi quintual cümeque hueni com piuque mu cüdahuelquefilu ta Jehová.

Jehová ñi duam mu, niequeiñ taiñ duamnieel. Tañi chaungen mu, quintucauquen ñi eluafiel ñi duamnieel tañi pu che. Chem tañi rupan precursorngelu iñche mahuida mu cüme pepicaeneu. Quimürpun ñi cüme adcünuafiel tañi nieel ca tañi plata. Quiñeque mu taiñ müna cüdauquefel rume, fillalequefuiñ. Femngechi rupan mu, Jehová eluucülequei taiñ quelluaeteu. Femngechi rupaiñ 1986 puulu 1992 tripantu püle, mülerumelu cai quiñe hueichan Surinam mapu mu. Feichi mu, cüdaungefui ñi pengeal iyael ca caquelu duamfalchi fillem. Huelu Jehová rumel cuidaniequeiñmu (Mat. 6:32).

Jehová turpu elcünuquelaeiñmu ca elueiñmu ayühun-ngechi mongen. Tayu pu yall rume ayühueleiñmu. Quimeltufiyu tañi piuqueyeafiel ta Jehová. Tremlu engu, eluhuingu tañi cüdahuelafiel fill antü. Tüfa müna ayühueleiñmu. Ethniël ca Giovanni amuingu quiñeque escuela femngelu Jehová tañi troquiñche mu. Ca feula trür tañi domo engu cüdauqueingün ti Betel mülelu Surinam mapu mu.

Ethel iñchiu deu füchayu, huelu cüdahuelniefiyu ta Jehová, precursor especialngeyu. Felei llemai, fentren cüdau nien, feimu feula petu quim huellelan. Huelu huiño trecaulayafun. Huiñoquintun mu chumquefel tañi mongen mu, ayüucülen. Huechengelu müten, eluhun tañi fill antü cüdahuelafiel ta Jehová, ¡müna cüme dullin llemai!