1. 1) ¿Chem dungu quimnieiñ pu cristiano? 2) ¿Chem dungu maneluucülequeiñ?

 FAMÜLQUE mu quiñeque che caiñetuquefi taiñ amuldunguchequen, huelu afmatulquelaeiñmu. Quimnieiñ ñi doi caiñetuaeteu engün cüpalechi antü mu (Dan. 11:44; 2 Tim. 3:12; Apoc. 16:21). Huelu maneluucülequeiñ taiñ quelluaeteu Chau Jehová. ¿Chumngelu cai? Chau Jehová rumel quelluquefi tañi pu che ñi enturpual tañi elfal cüdau cüdaungefule rume. Taiñ ngüneduamal tüfa peaiñ chem ñi rupan ta Ezequiel, Chau Dios tañi huerquen. Quisu amuldungulelfi pu judio yengelu ta Babilonia huaria mu.

2. 1) ¿Chem feipi Jehová ñi chumngechi chengen pu judio? (Ezequiel 2:3-6). 2) ¿Chem peaiñ tüfachi troquiñ mu?

² Ezequiel mülefui ñi amuldungulelafiel tati pu che. Huelu, ¿chumngechi chengeingün? Chau Jehová feipi feichi pu judio ‘ngünefalngelai’ ca ‘cura piuque nieingün’. Rume huesa chengefuingün chacai reque. Ca rume cuñihun-ngeingün escorpion reque. Feimu Chau Jehová fentren rupa feipifi ta Ezequiel: “Llicalayaimi” (papeltunge Ezequiel 2:3-6). Ezequiel, ¿chumngechi huechunenturpui tañi cüdau? 1) Jehová huercüeyu, 2) Chau Dios tañi nehuen yafültucueyu, ca 3) Chau Jehová tañi feipin nehuentucufi ta Ezequiel. Tüfachi cüla dungu, ¿chumngechi quellueyu? Ca, ¿chumngechi quelluqueiñmu ta iñchiñ?

3. 1) ¿Chem dungu yafültucufi ta Ezequiel? 2) Jehová cai, ¿chumngechi pengeli tañi quellufiel?

³ Jehová feipifi ta Ezequiel: “Huercüayu” (Ezeq. 2:3, 4). Tüfachi dungu, ¿müna yafültucupelaeyu? Ezequiel, ¿acordapelai Jehová ñi feipifiel ta Moisés ca Isaías tañi  huerquen-ngeal? (Éx. 3:10; Is. 6:8). Ezequiel ca quimtucui chumngechi Jehová quellufi tañi pu huerquen femngechi ñi femürpual fütraque cüdau. Feimu epu rupa Chau Dios feipilu: “Iñche huercüayu”, Ezequiel quimniefui Chau Dios tañi quelluaeteu. Cafei Ezequiel ñi lifru mu, fentren rupa feipilei: “Llohun Chau Jehová ñi dungun” (Ezeq. 14:2). Cafei fentren rupa feipilei: “Ca quiñe rupa llohun Chau Jehová ñi dungun” (Ezeq. 6:1). Feimu Ezequiel cüme quimniefui Jehová tañi huercüeteu. Ezequiel tañi chau sacerdotengefui. ¿Tüfa quimeltupelaeyu Chau Jehová ñi quellufiel tañi pu huerquen? Chau Jehová feipicünufi ta Isaac, Jacob ca Jeremías: “Iñche am mülelu eimi mu” (Gén. 26:24; 28:15; Jer. 1:8).

4. ¿Chem dungu yafültucufi ta Ezequiel?

⁴ Pu Israel che, ¿allcütupeafuingün mai Chau Dios tañi huercün dungu? Jehová feipifi ta Ezequiel: “Pu Israel che pilaingün tañi allcütuaeteu, feimu ca eluulayaingün tami allcütuaeteu” (Ezeq. 3:7). Pu llounofilu Chau Dios tañi huerquen, ca lloulafingün ta Chau Jehová. Tüfachi dungu, ¿rume yafültucupelaeyu ta Ezequiel? Tañi llounoeteu pu che, pengel-lai ñi huesa huerquen-ngen. Cafei Chau Jehová pengelelfi ta Ezequiel femtripale tañi huercün dungu condenachequelu, pu judio “rüf quimaingün ñi mülefel Chau Ngünechen ñi huerquen quisu engün meu” (Ezeq. 2:5; 33:33). Tüfachi dungu rume yafültucufi ta Ezequiel, femngechi ñi amuleal tañi amuldunguchequen.

5. Ñi feipin Isaías 44:8, ¿chumngelu yafültucuqueiñmu?

⁵ Jehová huercüqueiñmu ta iñchiñ, tüfa rume yafültucuqueiñmu. Iñchiñ dunguqueiñ ineingen ta Chau Jehová,  tüfa rume ayühuelqueiñmu (Is. 43:10). Chumngechi ta Jehová feipifi ta Ezequiel: “Llicalayaimi”, Jehová ca femngechi feipiqueiñmu: “Ngelai tamün pellqueleal”. ¿Chumngelu llicalayafiyiñ taiñ pu caiñe? Chau Jehová huercüqueiñmu ca quelluqueiñmu chumngechi ñi femfiel ta Ezequiel (papeltunge Isaías 44:8).

6. 1) ¿Chumngechi Jehová pengeli taiñ quelluqueteu? 2) ¿Chem dungu yafültucuqueiñmu?

⁶ Chau Jehová pengeli taiñ quelluqueteu. Peaiñ quiñe dungu. Chau Dios feipi: “Ngilarumelmi co meu, iñche mülean eimi mu, ca ngilarumelmi leufü mu, tüfa mangiñmalayaimu. Huente cütral meu rumelmi lüflayaimi, tati hueihuiñ cütral no rume cuninlayaimu” (Is. 43:2). Fei hula Chau Dios feipi: “Eimün tati pu dunguquelu iñche tañi ineingen”. Quiñeque mu, amuldungun mu chaftuqueiñ cüdaungechi dungu leufü reque felelu. Ca rupaiñ fütraque dungu cütral reque felelu. Huelu Jehová ñi quellun mu, amuleiñ taiñ amuldungumequen (Is. 41:13). Iñchiñ rupaiñ Ezequiel reque. Fentren che llouquelai Chau Dios ñi huercün dungu. Huelu quimtucunieiñ, tüfa pengelquelai taiñ cüme serfinofiel ta Jehová. Fentecünunoliyiñ taiñ amuldunguchequen, Jehová ayüucüleai. Tüfa rume yafültucuqueiñmu. Ti apostol Pablo feipi: “Caque quiñeque che tañi cüdau mu llohuai tañi cullitu” (1 Cor. 3:8; 4:1, 2). Quiñe lamngen yenielu fentren tripantu tañi precursorngen, feipi: “Chau Jehová fürenequeiñmu taiñ femqueel, tüfa rume ayühueleneu”.

7. Ezequiel raquiduamlu tüfachi afmatun dungu mu, ¿chum duamcülefui? (Inaduamnge ti adentun hunen pagina mu).

⁷ Ezequiel pei fente ñi pepiluhun-ngen Chau Ngünechen tañi nehuen. Quiñe afmatun dungu mu, pei chumngechi Chau Jehová ñi nehuen quelluquefi pu cümeque püllü ca nengümquefi ti carro chingcül huenu mu mülelu (Ezeq. 1:20, 21). Ezequiel pefilu, trananagi mapu meu. Fente tañi afmatulen, pochongnagi mapu meu (Ezeq. 1:28). Felei llemai, Ezequiel raquiduamfilu tüfachi afmatun dungu mu, rüf quimniefui ñi enturpual tañi amuldungun Jehová tañi nehuen mu.

8, 9. 1) Jehová, ¿chem feipifi ta Ezequiel ñi femal? 2) ¿Ca chem femi Jehová ñi yafültucuafiel ta Ezequiel?

⁸ Chau Jehová feipifi ta Ezequiel: “Huentru ñi fotüm, huitrapürange, fei dunguayu”. Tüfachi dungu nehuentucuquefi ta Ezequiel ñi huitrapüramal, fei huirintucui: “Coni Chau Ngünechen ñi nehuen iñche mu, fei huitrañpürameneu” (Ezeq. 2:1, 2). Chau Jehová tañi cuhu, tüfa ta Chau Ngünechen tañi nehuen, adniefi ta Ezequiel ñi amuldungucheal com feichi tripantu (Ezeq. 3:22; 8:1; 33:22; 37:1; 40:1). Chau Ngünechen ñi nehuen yafültucuquefi ta Ezequiel ñi amuldungulelafiel tati pu judio mülelu tañi mapu mu, fei engün “yafü lonco niei ca cura piuque niei” (Ezeq. 3:7). Jehová feipifi: “Yafü ange niei engün, ca femngechi yafücünuñmaeyu tami ange. Yafü tol niei engün, ca femngechi yafücünuñmaeyu tami tol. Quiñe diamante reque femcünuñmaeyu tami tol, doi yafülei cura mu. [...] Llicalayafimi engün, tañi ange engün ngelai tami pellquelaeteu” (Ezeq. 3:8, 9). Jehová feipicafi reque: “Yafü lonco niele rume engün, ngañhuadcülelayaimi. Iñche nehuentucuayu”.

⁹ Fei meu müten Chau Jehová ñi nehuen adniefi ta Ezequiel ñi amuldungual com feichi mapu mu. Fei feipi fente tañi  nehuentucueteu Chau Jehová tañi cuhu. Quiñe semanañmai, Ezequiel raquiduamtucufi Jehová tañi huercün dungu, fei tañi amuldungucheal (Ezeq. 3:14, 15). Fei hula Chau Jehová feipifi ñi amual laf mapu mu, tüfa mu llohui Chau Ngünechen ñi nehuen (Ezeq. 3:23, 24). Feulaque ta Ezequiel pepicaucülefui tañi amuldungucheal.

10. ¿Chem quellu duamnieiñ taiñ amuldungucheal? Ca, ¿chumngelu?

¹⁰ ¿Chem quellu duamnieiñ taiñ amuldungucheal? Taiñ quimal, raquiduamaiñ ñi rupan ta Ezequiel. Petu ñi amuldungunon, Chau Ngünechen ñi nehuen yafültucueyu. Ca femngechi iñchiñ, Chau Ngünechen ñi nehuen quellueiñmu taiñ amuldungual. ¿Chumngelu feipiqueiñ tüfa? Huecüfü hueichaqueiñmu reque taiñ amuldunguhuenoal (Apoc. 12:17). Iñchiñ taiñ raquiduam mu Huecüfü rume nehuen-ngei iñchiñ mu piafuiñ. Huelu taiñ amuldungun mu, hueuniefiyiñ reque (Apoc. 12:9-11). Taiñ coneltulen amuldungun mu, pengelqueiñ taiñ llicanofiel ta Huecüfü chem chumle rume. Femngechi femün mu iñchiñ, hueuniefiyiñ reque ta Huecüfü. Feimu llemai, caiñetungelu rume iñchiñ, amuldungulelquefiyiñ ta pu che. Tüfa pengelquei taiñ quellueteu Chau Ngünechen ñi nehuen ca taiñ ayühuelquefiel ta Chau Jehová (Mat. 5:10-12; 1 Ped. 4:14).

11. 1) ¿Chumngechi quelluafeiñmu Chau Ngünechen ñi nehuen? 2) ¿Chem mülei taiñ femal taiñ eluniengeal Jehová ñi nehuen?

¹¹ Chau Jehová yafücünuñmafi tañi ange ca tañi tol ta Ezequiel, fei ¿chem pengelquei ta tüfa? Chau Ngünechen ñi nehuen quelluqueiñmu taiñ chaftuafiel chem dungu rume, femngechi taiñ amuldungucheal (2 Cor. 4:7-9). ¿Chem mülei taiñ femal taiñ eluniengeal Chau Ngünechen ñi nehuen? Llellipunieafiyiñ Chau Dios taiñ eluaeteu ñi nehuen, quimnieiñ taiñ allcütuaeteu. Jesús feipifi tañi pu inanieteu “llellipuleaimün”, “quintunieaimün”,  “mütrümqueaimün hulngiñ ruca meu”. Fei, ¿chumai Chau Jehová? “Eluafi ñi nehuen feichi che ñi llellipuqueteu” (Luc. 11:9, 13; Hech. 1:14; 2:4).

12. ¿Cheu cüpai ti chumpol lifru? Ca, ¿chem dungu nierquei? (Ezequiel 2:9-3:3).

¹² Chau Ngünechen ñi nehuen yafültucufi ta Ezequiel, huelu ca yafültucueyu Chau Ngünechen ñi huercün dungu. Quiñe afmatun dungu mu, pei quiñe cuhu yenielu quiñe chumpol lifru (papeltunge Ezequiel 2:9-3:3). ¿Cheu cüpai ti chumpol lifru? ¿Chem dungu nierquei? ¿Chumngechi yafültucueyu Ezequiel? Ti chumpol lifru cüpai Chau Ngünechen ñi ülmen huancu mu. Tati meli cümeque püllü ñi peel Ezequiel, ¿Chau Ngünechen huercüpelafi quiñe tañi eluafiel ti chumpol lifru? (Ezeq. 1:8; 10:7, 20). Ti chumpol lifru nierquei Chau Ngünechen ñi dungu, tüfa tati huercün dungu condenachequelu. Ezequiel mülefui ñi nütramcayafiel tüfachi dungu tati ngünefalnochi che, tuchi cañpüle yengelu (Ezeq. 2:7). Ti huercün dungu huiriconcülei epuñpüle ti chumpol lifru mu.

13. Jehová, ¿chem huercüfi ta Ezequiel? ¿Chumngelu cochüntufi ti chumpol lifru?

¹³ Jehová feipifi tañi huerquen: “Ifinge ti chumpol lifru […], fei apolfinge tami pütra”. Ezequiel feyentui, fei com ifi. ¿Chem cüpa feipi tüfachi dungu? Ezequiel mülefui ñi cüme adümafiel ti dungu, femngechi ñi amuldungulelafiel ti pu che. Duamfalngei Ezequiel ñi cüme raquiduamtucunieal ti huercün dungu ca tañi piuquentucunieafiel. Fei ruparumei quiñe dungu, Ezequiel “miel reque cochüntufi” (Ezeq. 3:3). ¿Chumngelu? Ezequiel rume ayühui ñi nütramcayal ineingen Chau Jehová (Sal. 19:8-11). Rume mañumcülei ñi dullieteu Chau Jehová ñi huerquen-ngeal.

14. ¿Chem quellueyu Ezequiel ñi enturpual tañi elfal cüdau?

¹⁴ Fei hula Jehová feipifi ta Ezequiel: “Allcütufinge ca piuquentucufinge com tüfachi dungu tami feipifiel” (Ezeq. 3:10). Jehová feipimequefi ta Ezequiel ñi loncontucual ca ñi raquiduamnieafiel com ñi feipilen ti chumpol lifru. Tüfa quellueyu ta Ezequiel ñi doi feyentuleal ca ñi cüme quimtucual ti huercün dungu ñi quimelelafiel tati pu che (Ezeq. 3:11). Ezequiel piuquentucufi ca cüme adümfi Chau Dios ñi dungu. Feula Ezequiel pepicaucülei ñi amuldungulelafiel tati pu che ca ñi enturpual tañi elfal cüdau (ca ngüneduamafuimi Salmo 19:14).

15. ¿Chumafuiñ taiñ elcünunoal taiñ amuldunguchequen?

¹⁵ Taiñ elcünunoal taiñ amuldunguchequen ca duamnieiñ taiñ yafültucuaeteu Chau Ngünechen ñi dungu. Duamnieiñ taiñ piuquentucual com ñi feipin Chau Jehová. Famülque mu, Chau Jehová dunguqueiñmu Biblia mu. ¿Chumafuiñ Chau Jehová ñi dungu ñi mülenagal taiñ piuque mu, raquiduam mu ca taiñ ayüqueel mu?

16. Chau Dios ñi dungu, ¿chumngechi puhuai taiñ piuque mu?

¹⁶ Taiñ ifiel ca cümecümetufiel ti iyael, taiñ cuerpo cülfüncülequei. Ca femngechi estudiafiliyiñ ca raquiduamfiliyiñ Chau Dios ñi dungu, doi nehuencüleai taiñ feyentun. Tüfachi dungu quimeltumequeiñmu Jehová tüfachi chumpolcülechi lifru mu. Chau Jehová ayülei taiñ ‘apolafiel reque taiñ pütra’, tüfa cüpa feipi  taiñ cüme adümafiel tañi huercün dungu. ¿Chumngechi femafuiñ? Mülei taiñ llellipual, papeltual, ca raquiduamal taiñ papeltuel mu. Hune, mülei taiñ llellipual, femngechi piuquentucuaiñ Chau Dios tañi raquiduam. Fei hula, papeltuaiñ quiñe troquiñ Biblia mu. Ca raquiduamaiñ chem taiñ papeltuel. ¿Chum tripayai taiñ femün? Raquiduamfiliyiñ taiñ papeltuel, Chau Dios ñi dungu puhuai taiñ piuque mu.

17. ¿Chumngelu falin-ngei taiñ raquiduamafiel Biblia?

¹⁷ ¿Chumngelu falin-ngei ñi papeltuafiel ta Biblia ca raquiduamal? Tüfa nehuentucuqueiñmu taiñ amuldungulelafiel ti pu che Chau Dios ñi cümeque dungu. Ca cüpalechi antü mu quelluaiñmu taiñ amuldungucheal ti huercün dungu condenachequelu. Ca raquiduamliyiñ ñi chumngechi chengen Jehová, doi hueniyeafiyiñ. ¿Chum tripayai taiñ femün? Tüngcüleaiñ ca cüme feleaiñ. Tüfa cüme duamelafeiñmu chumngechi taiñ cochüntufiel ti iyael (Sal. 119:103).

18. Tati pu che, ¿chem dungu quimtucuaingün? Ca, ¿chumngelu?

¹⁸ Iñchiñ Chau Dios ñi huerquen no. Huelu Ezequiel reque, Chau Ngünechen eluqueiñmu quiñe huercün dungu ñi amuldungucheal. Eluucüleaiñ taiñ amuldungucheal Chau Jehová feipile hula fentepuhui ti cüdau. Puule chi antü Jehová ñi condenayafiel ti pu che, inei no rume feipilayafui tañi quimeltulelngenon. Chau Dios duamtunielaeneu pilayaingün (Ezeq. 3:19; 18:23). Doi mai, quimtucuaingün taiñ amuldunguchequen Chau Dios ñi dungu.

19. ¿Cheu entuaiñ nehuen taiñ amuldungucheal?

¹⁹ ¿Cheu entuaiñ nehuen taiñ amuldungucheal? Nieiñ cüla dungu taiñ quelluaeteu. Ezequiel reque Jehová huercüeiñmu, feimu amuldunguchequeiñ. Chau Ngünechen ñi nehuen yafültucuqueiñmu. Ca Chau Ngünechen ñi dungu nehuentucuqueiñmu. Chau Ngünechen ñi quellun mu, amulei taiñ amuldunguchequen ca nehuentuleiñ “puule ñi afal ti müleyechi dungu mapu meu” (Mat. 24:13).