TROQUIÑ ÑI CHILLCATUNGEAL 47
Püntütripalayaiñ Jehová mu
“Ahuem Chau Jehová, eimi mu maneluuquen” (SAL. 31:14).
ÜLCANTUN 122 ¡Amulepe taiñ nehuentuleal!
¿CHEM QUIMAIÑ? a
1. ¿Chumngechi quimnieiñ Jehová ayüniei taiñ fülmanieaeteu?
JEHOVÁ mangelnieiñmu taiñ fülmanieafiel (Sant. 4:8). Ayülei taiñ Dios ngeal, taiñ Chau piafiel ca taiñ hueniyeafiel. Allcütuñmaqueiñmu taiñ ngillatun ca quelluqueiñmu taiñ rupamequen huesaque dungu mu. Cafei Jehová niei quiñe troquiñche, feitachi troquiñche mu Jehová cuñiutucuqueiñmu ca quimeltuqueiñmu. Huelu, ¿chem mülei taiñ femal taiñ fülmanieafiel?
2. ¿Chumngechi fülmanieafuiñ ta Chau Jehová?
2 Ngillatuniefiliyiñ ta Jehová ca cüme papeltuliyiñ Biblia, fei fülmanieafuiñ ta Jehová. Femngechi doi piuqueyenieafuiñ ta Jehová ca mañumafiyiñ, cafei feyentunieafiyiñ ca püramyenieafiyiñ (Apoc. 4:11). Doi quimfiliyiñ ta Jehová, doi maneluhuaiñ ta fei mu ca tañi troquiñche ñi elcünuel mu.
3. 1) ¿Chumquei ti Huecüfü taiñ püntünentuaeteu Jehová mu? 2) ¿Chem quelluaiñmu taiñ püntütripanoal quisu mu ca tañi troquiñche mu? (Salmo 31:13, 14).
3 Huelu ti Huecüfü ayülei taiñ püntünentuaeteu Jehová mu, ¿chumngechi femquei? Hueluraquiduamelqueiñmu, femngechi ñochiquechi taiñ maneluuhuenoal Jehová mu ca tañi troquiñche mu. Huelu mülei taiñ chaftuafiel ti Huecüfü. Maneluucüleliyiñ Jehová mu, püntütripalayaiñ fei mu ca tañi troquiñche mu (papeltunge Salmo 31:13, 14).
4. ¿Chem inaduamaiñ tüfachi troquiñ mu?
4 Tüfachi troquiñ mu, peaiñ cüla dungu ñi rupan fei yeafeiñmu taiñ maneluuhuenoal Jehová mu ca tañi troquiñche mu. Ca peaiñ chumngechi ta tüfa püntünentuafeiñmu Jehová mu ca chumngechi chaftuafuiñ tati Huecüfü.
RUPALIYIÑ HUESAQUE DUNGU MU
5. Huesa rupamequeliyiñ, ¿chumngechi huelulcayafeiñmu?
5 ¿Chem cüdaungechi dungu mu rupayafuiñ? Quiñeque mu caiñetueliyiñmu taiñ familia ca ñamümliyiñ taiñ cüdau. ¿Chumngechi huelulcayafeiñmu tüfachi dungu? Rume fentreñma rupaliyiñ huesaque dungu mu, yafüngehuelayafuiñ, raquiduamafuiñ chi ñi feleal müten ti dungu. Fei Huecüfü ayülei taiñ maneluuhuenoal Jehová mu, femngechi taiñ raquiduamal Jehová ¿piuqueyehuepeafeneu? Cafei Huecüfü ayülei taiñ culpatuafiel ta Jehová ca tañi troquiñche taiñ huesa rupamequen mu. Quiñeque Israel che femngechi dungu mu rupaingün, hune maneluhuingün Jehová ñi dullifiel Moisés ca Aarón tañi lifrenentuaeteu Egipto mapu mu (Éx. 4:29-31). Fei ti Faraón doi huesa femeteu engün, fei culpatufingün ta Moisés ca Aarón. Feipingün: “Eimu tamu femün mu, ti Faraón ca tañi pu cüdaufe üdequeiñmu ca elcünulelfimu tañi cuhu mu engün quiñe espada taiñ langümaeteu” (Éx. 5:19-21). ¡Müna huesa ñi culpatufiel ta Moisés ca Aarón! Feimu fentreñma huesa rupamequeliyiñ, ¿chumafuiñ taiñ maneluucüleal Jehová mu ca tañi troquiñche mu?
6. ¿Chem quimürpuiñ Habacuc ñi femün mu? (Habacuc 3:17-19).
6 Com piuque mu llellipuafiyiñ Jehová ca feipiafiyiñ taiñ quelluaeteu. Peafiyiñ chem dungu ñi rupan Habacuc. Fentren huesaque dungu mu ñi rupan mu, feimu Habacuc ramtuhui ¿rüf duamtuniepeneu mai Jehová? Fei, ¿chumi Habacuc? Llellipun mu, feipifi ta Jehová tañi chum duamcülen, feipi: “¿Tunteñma am, ahuem Jehová, mülei tañi huiraral quellun mu, fei tami allcünon? [...] Ca ¿chumngelu catrütuquelafimi ñi müleal ti illamcahun?” (Hab. 1:2, 3). Fei Jehová allcütuñmafi ñi llellipun ta Habacuc (Hab. 2:2, 3). Habacuc cüme raquiduami Jehová chumngechi ñi montulquefiel tañi pu che. Fei cüme raquiduamtulu, ayüucületui. Feula hula rüf maneluhun tañi duamtueteu Jehová ca tañi quelluqueteu pi Habacuc (papeltunge Habacuc 3:17-19). ¿Chem quimürpuiñ? Rupaliyiñ huesaque dungu mu, llellipuafiyiñ Jehová ca feipiafiyiñ taiñ chum duamcülen. Maneluhuaiñ Jehová taiñ quelluaeteu nehuencüleal. Fei inaduamliyiñ chumngechi taiñ quellueteu Jehová, doi feyentuleaiñ quisu mu.
7. ¿Chem feipingei Shirley? Ca, ¿chem quellueyu ñi maneluucüleal Jehová mu?
7 Fentecünulayaiñ taiñ fülmanieafiel ta Jehová. Peafiyiñ chem dungu ñi rupan quiñe lamngen Papúa Nueva Guinea mapu mu, Shirley pingelu. b Taiñ lamngen rume pofrelefui, quiñeque mu tañi familia niequelafui chem tañi iyal. Quiñe tañi familia ayüfui tañi huesa raquiduamelaeteu, feipieyu: “Eimi Ngünechen quellueneu piqueimi, huelu ¿rüf quellueimu? Eimün ta rume pofreleimün. Fente amuldunguqueimi, huelu quelluquelaeimu tami amuldungun”. Shirley feipi: “Ramtuhun ¿rüf duamtuniepeiñmu mai Chau Jehová?, feimu ngillatufiñ ta Jehová feipifiñ com ñi chum duamcülen. Elcünulan tañi papeltuafiel Biblia ca taiñ publicacion, cafei amulen tañi amuldungucheal ca fill trahun mu amuquen”. Shirley quimürpui Jehová tañi quellueteu ca tañi familia, ngüñülehuelaingün ca ayüucüleingün. Shirley feipi: “Jehová allcütuñmanieneu tañi ngillatun” (1 Tim. 6:6-8). Rupaliyiñ huesaque dungu mu, ¿chem quelluaiñmu? Shirley reque, fentecünulayaiñ taiñ femal cümeque dungu taiñ fülmanieafiel Jehová.
INACANGELE PU LONCOLELU
8. ¿Chem dungu mu rupayafui pu loncolelu Jehová ñi troquiñche mu?
8 Internet mu, radio mu ca television mu, taiñ pu caiñe feipiqueingün coilaque dungu, ayüqueingün taiñ huesa raquiduamal taiñ pu loncolelu mu (Sal. 31:13). Quiñeque taiñ pu peñi presungequei ñi juiciantucungeal quiñe hueñefe reque. Femngechi dungu mu rupai Pablo hunen siglo mu. Feipintucungei ca presungei ñi huesa femnon mu rume, fei ¿chumingün pu peñi pu lamngen feichi antü mu?
9. Presungelu Pablo, ¿chumingün quiñeque peñi ca lamngen?
9 Apostol Pablo presungelu Roma mapu mu, quiñeque peñi ca quiñeque lamngen quisucünueyu (2 Tim. 1:8, 15). ¿Chumngelu am? ¿Yehuepeingün mai Pablo ñi presulen mu quiñe huesa che reque? (2 Tim. 2:8, 9). Cam, ¿llicapelaingün ca femngechi ñi presungeal? Pablo rume huesaque dungu mu rupai. Ca cuñihun-ngen mu rume, fei rume cüdahui tañi pu peñi ca pu lamngen mu. Feimu, ¿rume hueñancüpelai Pablo tañi femün mu engün? (Hech. 20:18-21; 2 Cor. 1:8). Femlayaiñ feitachi pu cristiano reque. Huelu, ¿chem mülei taiñ loncontucunieal inacangele taiñ pu loncolelu?
10. Inacangele pu loncolelu, ¿chem loncontucunieaiñ? Ca, ¿chumngelu?
10 Loncontucunieaiñ inei am ca chumngelu caiñetungequeiñ. Epungechi Timoteo 3:12 feipi: “Caiñetungeai com pu inaniefilu ta Cristo Jesús ayünielu ñi püramyeafiel ta Chau Dios tañi mongen meu”. Feimu afmatulayaiñ Huecüfü tañi inacayafiel tati pu loncolelu. Huecüfü ayüniei pu loncolelu ñi püntütripayal Jehová mu ca iñchiñ taiñ llicayal (1 Ped. 5:8).
Presulefulu rume Pablo, Onesíforo llicalai tañi quelluafiel. Famülque mu, pu peñi pu lamngen ca femngechi quelluquefingün caquelu peñi ca lamngen presulelu. (Inaduamnge parrafo 11 ca 12).
11. ¿Chem quimeltueiñmu ñi femün Onesíforo? (2 Timoteo 1:16-18).
11 Püntütripalayaiñ taiñ pu peñi mu, quellunieafiyiñ (papeltunge 2 Timoteo 1:16-18). Hunen siglo mu, quiñe peñi Onesíforo pingelu, quisucünulafi ta Pablo ñi presulen mu. Pablo feipi Onesíforo ‘yehuelai ñi presulen iñche’. Cafei presulelu Pablo, Onesíforo quintuyahuleyu. Fei pefilu, quellufi chem tañi duamnieel cuñihun-ngefulu rume ñi femün. ¿Chem quimeltueiñmu tüfa? Llicaleliyiñ rume, huelu quellunieafiyiñ taiñ pu peñi ca pu lamngen ñi inacamequengen mu engün. Eluunge tami incayafiel ca tami quelluafiel (Prov. 17:17). Fei engün duamnieingün tañi yafültucungeal ca ñi quellungeal.
12. ¿Chem quimeltueiñmu ñi femquen pu peñi ca pu lamngen Rusia mapu mu?
12 Raquiduamaiñ ñi femquen pu peñi ca pu lamngen Rusia mapu mu. Quiñe peñi cam quiñe lamngen yengele tribunal mu ñi juiciangeal, pu peñi ca pu lamngen amuingün tañi yafültucumeafiel. ¿Chem quimeltueiñmu tüfa? Quiñe loncolelu dallucan dungu mu tucungele cam presungele, llicalayaiñ. Ngillatuaiñ fei mu, quelluafiyiñ quisu ca tañi familia (Hech. 12:5; 2 Cor. 1:10, 11).
HUESA PINGELIYIÑ
13. Huesa pingeliyiñ, ¿chumngechi hueluraquiduamelafeiñmu?
13 Taiñ pu che, taiñ compañ cüdau mu cam colegio mu huesa piafeiñmu taiñ amuldungun mu ca taiñ inaniefiel Jehová ñi huercün dungu (1 Ped. 4:4). Fei engün feipiafeiñmu: “Eimi tami chumngechi chengen tutequeen, huelu tami religion ayüquelafiñ”. Ca feipiafeiñmu taiñ huesa femquefiel pu huemünentungelu pu trahunche mu, ¿chumngelu am piuqueyechequen piqueimün? piafeiñmu. Femngechi feipingeliyiñ, hueluraquiduamcüleafuiñ, ramtuafuiñ: “¿Cümepei mai Jehová ñi huercün dungu? ¿Jehová mai feipiquepeneu ñi femal cüdaungechi dungu?”. Ca feipiafuiñ: “Jehová ñi troquiñche eluñmaquelaeneu ñi femal chem dungu rume”. Femngechi dungu mu rupaliyiñ, ¿chumafuiñ taiñ fülmanieafiel Jehová ca tañi troquiñche?
Job feyentulai tañi feipieteu coilatufe huesaque hueni. Job püntütripalai Jehová mu huesa pingen mu rume. (Inaduamnge parrafo 14).
14. Huesa pingeliyiñ taiñ inaniefiel mu Jehová ñi huercün dungu, ¿chumaiñ? (Salmo 119:50-52).
14 Inanieafiyiñ Jehová ñi huercün dungu. Job inaniefi müten Jehová ñi huercün dungu huesa pingen mu rume. Quiñe tañi huesa hueni huesa raquiduamelfi ta Job “Jehová falintuñmaquelaeimu tami femquen cümeque dungu” pieyu (Job 4:17, 18; 22:3). Huelu Job feyentulafi ti coilatun. Job quimniefui ñi norngen Jehová ñi huercün dungu ca inaniefi, ca eluulai chem no rume ñi püntünentuaeteu Chau Jehová mu (Job 27:5, 6). Huesa pingeliyiñ rume, huesa raquiduamlayaiñ Jehová ñi huercün dungu mu. Raquiduamaiñ fente taiñ cümelcaqueteu taiñ inaniefiel Jehová ñi huercün dungu. Quelluntuculeaiñ Jehová tañi troquiñche mu. Femngechi huesa pieliyiñmu rume pu che, püntütripalayaiñ Jehová mu (papeltunge Salmo 119:50-52).
15. ¿Chumngelu am huesa pingei Brizit?
15 Peaiñ ñi rupan taiñ lamngen Brizit, India mapu mu mülelu. Tañi familia huesaque dungu feipiquefeyu tañi testigongen mu. Taiñ lamngen fautizahui 1997 tripantu mu, tañi füta testigongelafui ca pichin antü mu niehuelafui ta cüdau. Tañi füta feipifi ta Brizit ñi huiñamtuhual cangelu huaria mu tañi pu püñeñ engu, cheu ñi mülen tañi füta ñi familia. Huelu fei müten no. Brizit mülefui ñi cüdahual fill antü ca com antü ñi eluafiel tañi pu che chem ñi duamnieel. Cafei ti doi püllelechi trahunche rume alü camapulefui, 350 kilometro. Huelu tañi füta ñi pu che caiñetufingün ta Brizit tañi testigongen mu. Fente ñi caiñetungen mu Brizit, huiñamtuhui cañpüle. Rupachi antü mu, larumei ñi füta. Ca femngechi quiñe tañi püñeñ 12 tripantu nielu, lai cancer cutran mu. Brizit tañi pu che culpatueyu tañi huesaque dungu mu ñi rupan mu: “¡Testigongenofulmi femngechi dungu mu rupalayafuiñ!” pingei ta Brizit. Huelu fei amulei tañi maneluucülen Jehová mu ca tañi troquiñche mu.
16. ¿Chem cümelcan llohui Brizit ñi fülmaniefiel ta Jehová ca tañi troquiñche?
16 Taiñ lamngen rume camapulefui ti trahunche mu, feimu quiñe huitran-ngepaquechi loncolelu feipieyu ñi nieal trahun ñi ruca mu ca ñi amuldungual tañi lof mu. Hune, Brizit rume cüdaungelu troquifi, huelu allcütufi ti ngülam ñi elungeel. Eluhui ñi amuldungual ca niei trahun tañi ruca mu, cafei quimeltulelquefi Biblia tañi pu püñeñ. Fei, ¿chum tripai tañi cüdau? Quimeltulelfi Biblia alünque che ca quiñeque fautizahuingün. 2005 tripantu mu, precursor regularngerpui. Brizit maneluhui Jehová mu ca püntütripalai tañi troquiñche mu, femngechi llohui fentren cümeque dungu. Ñi pu püñeñ serfiniefingün ta Jehová ca feula mülei epu trahunche ñi lof mu. Brizit quimtucui Jehová tañi elueteu nehuen, femngechi chaftufi tati huesaque dungu ca ñi huesa femeteu tañi pu che.
PÜNTÜTRIPALAYAIÑ JEHOVÁ MU CA TAÑI TROQUIÑCHE MU
17. ¿Chem eluucüleaiñ taiñ femal?
17 Huecüfü ayülei taiñ raquiduamal Chau Jehová taiñ quellunoaeteu. Ca ayülei taiñ raquiduamal quelluntuculiyiñ Jehová ñi troquiñche mu, doi cüdaungeafui taiñ mongen. Quiñeque pu loncolelu inacangele, dallucantucungele huesaque dungu mu ca presuntucungele, femngechi ayülei ti Huecüfü taiñ llicalcayaeteu. Huelu iñchiñ cüme quimnieiñ ñi femquen ta Huecüfü taiñ hueluraquiduamelaeteu, feimu ngünencalayaiñmu (2 Cor. 2:11). Famentuafiyiñ Huecüfü tañi coilatun ca turpu püntütripalayaiñ Jehová ca tañi troquiñche mu. Quimtucunieiñ Jehová taiñ turpu quisucünunoaeteu (Sal. 28:7). Feimu llemai, chem no rume püntünentulayaiñmu Jehová mu (Rom. 8:35-39).
18. ¿Chem peaiñ cüpalechi troquiñ mu?
18 Tüfachi troquiñ mu, pefiyiñ huesaque dungu taiñ femqueteu quiñeque che poyequenofilu Jehová, femngechi taiñ maneluuhuenoal Jehová mu ca tañi troquiñche mu. Huelu trahunche mu, ca chaftuafuiñ cüdaungechi dungu, ¿chem quelluafeiñmu taiñ chaftuafiel? Cangelu troquiñ mu peafiyiñ.
ÜLCANTUN 118 Elumuiñ doi mupiltuleal
a Maneluucüleliyiñ Jehová mu ca tañi troquiñche mu, femngechi chaftuafiyiñ huesaque dungu ca püntütripalayaiñ Jehová mu. Huecüfü ayülei taiñ maneluuhuenoal Jehová mu ca tañi troquiñche mu. Tüfachi troquiñ mu, peaiñ cüla dungu ñi femqueel tati Huecüfü ca chumafuiñ taiñ chaftuafiel.
b Tüfachi troquiñ mu, ca üi tuculelngei ta quiñeque che.
