TROQUIÑ ÑI CHILLCATUNGEAL 45
ÜLCANTUN 138 Taiñ pu füchaqueche saquifalingün
¿Chem quimeltueiñmu ñi feipin cuifiqueche yem?
“Rangiñ pu fütaqueche meu, ¿mülenoafulu am ta quimün? Fente alütuhun ñi mongen, ¿nienoafulu adümuhun?” (JOB 12:12).
¿CHEM QUIMAIÑ?
Inanieliyiñ Chau Jehová ñi feipin, quelluaiñmu famülque mu ca cüpalechi antü mu eluaiñmu rumel mongen.
1. ¿Chumngelu am rume falin-ngei füchaqueche ñi ngülam?
COM iñchiñ duamtunieiñ taiñ ngülamtungeal, femngechi cüme femal taiñ mongen mu. Pu loncolelu ca pu quimque peñi ca lamngen cüme ngülamtuafeiñmu. Quiñe füchache ngülamtueliyiñmu pürüm famentufemlayafuiñ, doi mai allcütuafiyiñ. Jehová feipiqueiñmu taiñ allcütuafiel pu füchaqueche ñi ngülam. ¿Chumngelu am? Fei engün fentren mongen niei ca fentren quimün (Job 12:12).
2. ¿Chem peaiñ tüfachi troquiñ mu?
2 Cuifi mu, Jehová elfalcünufi putremque che ñi adnieafiel ca yafültucuafiel tañi troquiñche. Quiñeque tüfa engün fei ta Moisés, David ca ti apostol Juan. Tüfachi pu huentru caque rume tripantu mongelequefuingün ca fillque dungu mu rupaquefuingün. Epe puulu ñi layal, ngülamtufingün pu huechequeche. Feipingün tañi fente falin-ngen ñi inangeal Chau Dios ñi feipin. Jehová ñi duam mu com ñi feipin engün huiriconcülei Biblia mu. Femngechi huechengeliyiñ cam füchaleliyiñ rume, inaduamnieafuiñ tüfachi cüla huentru ñi ngülam (Rom. 15:4; 2 Tim. 3:16). Tüfachi troquiñ mu inaduamafiyiñ ñi feipin engün epe puulu ñi layal. Ca peaiñ chem quimürpuafuiñ tañi feipin mu engün.
“ALÜÑMA MÜLEAIMÜN TI MAPU MU”
3. ¿Chem cüdau niequefui Moisés tañi serfiafiel ta Jehová?
3 Moisés com tañi mongen mu cüdahuelfi ta Chau Jehová, fei profetangefui, juezngefui, adcünuquefui pu hueichafe ca huirintucuquefui. Moisés rupai fentren dungu meu, alün dungu quimürpui. Pu Israel che tripatulu Egipto mapu meu, Moisés adnieyu engün ca pei fentren afmatufal dungu ñi femün ta Jehová. Cafei Jehová ñi duam mu, Moisés huirintucui ti hunenque quechu lifru Biblia mu ca ti Salmo 90. ¿Ca huirintucupelai ti Salmo 91 ca Job pingechi lifru?
4. Moisés, ¿inei engün am yafültucufi? ¿Chumngelu femi?
4 Epe puucülei ñi layal Moisés, 120 tripantu niei, fei trahulfi com pu Israel che. Epe concülefuingün ti cüme mapu mu ñi elueteu Jehová. Feimu Moisés acordalfi com chumngechi ñi quellueteu ta Jehová engün. Quiñeque Israel che trahuluucülelu fei mu pequefuingün Jehová ñi femquen afmatufalchi dungu ca chumngechi ñi castigafiel pu Egipto che (Éx. 7:3, 4). Cafei feichi Jehová hudamfilu Quelü lafquen trecalen rupaingün fei mu, ca peingün ñi ürfilngen Faraón ca tañi pu hueichafe (Éx. 14:29-31). Petu mülelu huellin mapu mu engün, Jehová incañpequeyu ca cuidaqueyu engün (Deut. 8:3, 4). Tañi hueupin mu Moisés ayüi ñi yafültucuafiel pu Israel che. a
5. Moisés, ¿chem feipicünufi pu Israel che? (Deuteronomio 30:19, 20).
5 ¿Chem pi Moisés? (Papeltunge Deuteronomio 30:19, 20). Moisés feipifi pu Israel che cümeque dungu tañi rupayal engün. Jehová feipicünueyu engün tañi müleal quiñe cüme mapu mu, fei ti adelcalechi mapu mu fentren tripantu mongeleafulu engün. Moisés ca feipifi pu Israel che chumleal tüfachi mapu, feipi: “Feiti mapu meu mülei fütra cümeque huaria, eimi deumalafimi. Ca mülei ruca apolelu fillque cümeque chemcün meu, eimi cüdaulaimi tami nieafiel. Ca mülei rünganco tami deumanofiel, ofadentu ca olivo anümca tami anümcanofiel” (Deut. 6:10, 11).
6. Pu Israel che lefcontueteu caquelu troquiñche, ¿chumngelu incañpelaeyu Jehová?
6 Huelu Moisés ca feipifi pu Israel che ayülmün tamün müleal tüfachi cüme mapu mu, mülei tamün inayafiel chem ñi feipiel ta Jehová pifi. Moisés ngülamtufi pu Israel che tañi allcütuafiel chem ñi feipieteu Chau Jehová ca ñi maneluhual engün fei mu. Huelu pu Israel che feyentulafingün ta Jehová. Rupachi tripantu mu, pu Asiria che ca pu Babilonia che lefcontufingün pu Israel che ca yetufingün tañi mapu mu, huelu pu Israel che ñi feyentunon mu engün Chau Jehová incañpelaeyu (2 Rey. 17:6-8, 13, 14; 2 Crón. 36:15-17, 20).
7. ¿Chem quimeltuqueiñmu Moisés ñi feipin? (Ca inaduamnge ti adentun).
7 ¿Chem quimeltuqueiñmu tüfa? Inafiliyiñ Jehová ñi feipin, montulaiñ taiñ mongen. Pu Israel che epe concülepuingün ti cüme mapu mu ñi feipicünueteu ta Jehová. Famülque mu, ca pichilehuei taiñ müleal ti cüme mapu mu taiñ feipicünueteu ta Jehová (Is. 35:1; Luc. 23:43). Huecüfü ca pu huesaque püllü mülehuetulayai engün (Apoc. 20:2, 3). Mülehuelayai coilaque religion, feimu feipingehuelayai coilaque dungu Chau Jehová mu (Apoc. 17:16). Ngehuelayai huentru ñi gobierno huesalcaquefilu pu che (Apoc. 19:19, 20). Ca ngehuelayai che huesa dungu femquelu (Sal. 37:10, 11). Com che inayafi Jehová tañi huercün dungu, feimu com iñchiñ tüngcüleaiñ, piuqueyeniehuaiñ ca rüf hueluquentu maneluhuaiñ (Is. 11:9). ¿Cüme dungu no am tüfa? Ca raquiduamnge ta tüfa: feyentuniefiliyiñ Jehová, rumel mongeleafuiñ tüfachi mapu mu (Sal. 37:29; Juan 3:16).
Feyentufiliyiñ Jehová conpuaiñ ti hue mapu mu, fei nierpuaiñ rumel mongen. (Inaduamnge parrafo 7).
8. Quiñe misionero raquiduamlu tañi rumel mongeleal, ¿chem eluhui ñi femal? (Judas 20, 21).
8 Piuquentucuniefiliyiñ ti maneluhun taiñ elueteu ta Jehová, fei inayafiyiñ ñi feipin chem rupafuliyiñ rume (papeltunge Judas 20, 21). Feitachi maneluhun taiñ rumel mongeleal quelluqueiñmu taiñ connoal huesaque dungu mu. Peaiñ ñi rupan quiñe peñi, misionerongei África mapu mu. Taiñ peñi conturumequeyu huesaque raquiduam. Feipi: “Ngüneduamün feyentunofili Jehová, elungelayafun tañi rumel mongeleal. Tüfa quellueneu ñi cüme chaftuafiel ti huesa dungu ca tañi llellipuafiel ta Jehová. Fei tañi quellun mu huesa raquiduamhuelan”.
“CÜME TRIPAYAI COM TAMI FEMÜN”
9. ¿Chem huesaque dungu meu rupai David?
9 David cüme lonco ülmen-ngequefui. Dungulquefui instrumento, entuquefui ülcantun, aucafengequefui ca profetangequefui, huelu ca alün huesaque dungu mu rupai. Ti rey Saúl ayüfui tañi langümaeteu, feimu David fentren tripantu ellcauquefui. Lonco ülmen-ngerpulu David, tañi fotüm Absalón ayüfui ñi langümaeteu fei ñi reycünuhual, feimu David ca mülefui tañi ellcahual. David fentren huesaque dungu mu rupai ca huelulcahui, huelu turpu püntütripalai Chau Jehová mu. Feimu Jehová feipi David “ayühuelmaeneu tañi piuque” pi. Feimu falin-ngei taiñ inayal David tañi ngülam (Hech. 13:22; 1 Rey. 15:5).
10. David, ¿chumngelu ngülamtufi ta Salomón?
10 David elufi cümeque ngülam tañi fotüm Salomón, femngechi tañi cüme reyngerpual. Chau Jehová dullifi Salomón tañi deumayafiel ti ngillatuhue ruca (1 Crón. 22:5). Fütra cüdau tati, duamniefui Jehová tañi quellun. ¿Chem ngülamtueyu cai David? Peafiyiñ.
11. David, ¿chem feipifi Salomón ca chum tripai ñi mongen? (1 Reyes 2:2, 3; ca inaduamnge ti adentun).
11 ¿Chem pi David? (Papeltunge 1 Reyes 2:2, 3). David feipifi Salomón inafile Jehová ñi huercün dungu, cüme lonco ülmen-ngerpuafui ca Jehová cümelcayayu. Salomón femngechi femi, fei Jehová fentren tripantu cümelcaeyu (1 Crón. 29:23-25). Salomón deumafi quiñe fütra ngillatuhue ruca, huirintucui quiñeque troquiñ Biblia meu, cafei quiñeque dungu ñi feipin mülei caquelu lifru Biblia mu. Fill püle quimngerpui Salomón ñi nien fentren quimün ca fentren chemcün (1 Rey. 4:34). Huelu loncontucuaiñ David ñi feipin, Salomón inafile müten Jehová ñi feipin, cüme miyahuafui. Huelu füchalerpulu Salomón, eluhui ñi püramyeafiel coilaque dios. Jehová ayülai tañi femün, feimu cümelcahuelafi. Femngechi Salomón niehuetulai quimün tañi cüme ngünenieal (1 Rey. 11:9, 10; 12:4).
David ñi feipifiel tañi fotüm Salomón quimeltueiñmu feyentufiliyiñ Jehová, fei eluaiñmu quimün taiñ cüme dullial. (Inaduamnge parrafo 11, 12). b
12. ¿Chem quimeltuqueiñmu David ñi feipin?
12 ¿Chem quimeltueiñmu tüfa? Inafiliyiñ Jehová ñi feipin, fei cümelcayaiñmu ca quelluaiñmu (Sal. 1:1-3). Chau Jehová elulayaiñmu taiñ ricungeal ca taiñ falin chengeal Salomón reque. Huelu inafiliyiñ tañi feipin, quelluaiñmu taiñ quimchengeal ca taiñ cüme femal (Prov. 2:6, 7; Sant. 1:5). Jehová tañi ngülam quelluafeiñmu taiñ cüme dullial taiñ cüdau, chem taiñ estudiayal, cüme püneal ti plata ca quelluafeiñmu taiñ cüme raquiduamal chem mu taiñ cüme rupayal. Inafiliyiñ tañi ngülam, amuleai taiñ hueniyefiel ca nieaiñ rumel mongen (Prov. 2:10, 11). Nieaiñ cümeque hueni ca ayüucüleaiñ taiñ pu che engün.
13. ¿Chem chumi Carmen tañi nieal cüme mongen?
13 Peaiñ ñi rupan taiñ lamngen Carmen mülelu Mozambique mapu mu. Fei raquiduamquefui amuli universidad mu, doi cümelcalean piquefui, feimu coni universidad mu. Fei feipi: “Rume ayüquefun tañi estudiaquefel, huelu nielafun tiempo, ürcülequefun. Com antü reque mülequefun universidad mu. Rume pulihuen puuquefun, fei rume tarde tripaquefun. Cüdautuquefun amual trahun meu ca pichiquentu doi hueniyehuelafiñ Jehová. Fei ngüneduamün tañi inanofiel Jehová tañi ngülam” (Mat. 6:24). Taiñ lamngen Carmen llellipufi Jehová, fei quintui ngülam taiñ publicacion mu. ¿Chum tripai ñi femün? Fei feipi: “Pu loncolelu ca tañi ñuque cüme ngülamtueneu. Feimu elcünutufiñ ti universidad ca cüdahuelfiñ Jehová fill antü. Tañi femün rume cüme tripai, fei ayüucületun”.
14. ¿Chem doi falin ngülam huli Moisés ca David?
14 Moisés ca David rume piuqueyequefuingu Jehová ca rume falintuquefuingu inañmayafiel Chau Jehová ñi ngülam. Feimu ngülamtuquefingu ta caquelu tañi ca femngechi femal ca ñi elcünunoafiel ta Jehová. Fei engu ca feipingu tuchi rume püntütripale Jehová mu, fei cümelcahuelayayu ca hueniyehuelayayu. Fachantü ca femngechi falintufali tüfachi ngülam. Rupai fentren tripantu, fei quiñe huentru ca quimeltui ñi fente falin-ngen inañmangeal Jehová ñi ngülam. Peafiyiñ.
AYÜHUN-NGEI INAYAL JEHOVÁ ÑI FEIPIN
15. ¿Chem dungu pei Juan tañi mongen mu?
15 Ti apostol Juan rume cüme hueniyefi ta Jesús (Mat. 10:2; Juan 19:26). Juan compañquiyahulfi Jesús tañi amuldungun mu, pequefui afmatufalchi dungu ñi femün. Ca huesaque dungu mu rupalu Jesús, Juan quisucünulaeyu. Juan pefi Jesús tañi langümngen ca petufi deu ñi huiñomongetun. Cafei inaduami chumngechi ñi alün-ngerpun ti cristiano trahunche. Juan ca pefi chumngechi ñi amuldungungen ti cümeque dungu com mapu püle (Col. 1:23).
16. ¿Inei engün am yafültucuquefi Juan ñi cüla carta?
16 Juan rume füchalelu huirintucufi tüfachi falin lifru Apocalipsis (Apoc. 1:1). Ca huirintucui ti Evangelio yenielu quisu tañi üi. Cafei huirintucui cüla carta. Ti cülangechi carta huirintuculelfi quiñe peñi Gayo pingelu, piuqueyefi quiñe fotüm reque (3 Juan 1). Feichi mu, Juan fentren pu peñi fotüm reque piuqueyequefui. Juan tañi huirintucuel yafültucuquefi pu inaniefilu Jesús cuifi ca feula.
17. Ñi feipin 3 Juan 4, ¿chem am doi ayüfalngei?
17 ¿Chem huirintucui Juan? (Papeltunge 3 Juan 4). Juan feipi ñi ayüfalngen inayal Jehová tañi feipin. Feichi Juan huirintuculu tañi cülangechi carta quiñeque che quimeltuquefui coilaque dungu, feimu ti trahunche quiñeucülelafui. Huelu caquelu miyauquefui ti rüf dungu mu ca inaniequefui Jehová tañi feipin (2 Juan 4, 6). Tüfachi pu cristiano rume ayühuelfingün ti apostol Juan ca Jehová llemai (Prov. 27:11).
18. Juan tañi huirintucun mu, ¿chem quimeltueiñmu?
18 ¿Chem quimeltueiñmu tüfa? Püntütripanoliyiñ Jehová mu, müleai fentren ayühun (1 Juan 5:3). Ayühuelmafiliyiñ ñi piuque ta Jehová, fei ayüucüleaiñ. Famentuuliyiñ huesaque dungu mu ca inafiliyiñ Jehová ñi feipin, fei ayühuelafiyiñ (Prov. 23:15). Pu cümeque püllü huenu mu ca ayüuqueingün (Luc. 15:10). Cafei ayühuelqueiñmu taiñ pu peñi ca lamngen ñi püntütripanon Jehová mu, tunte inantucungele rume ca tunte dicümtucungele rume (2 Tes. 1:4). Fei afle Satanás ñi ngünenieel, ayüucüleaiñ taiñ püntütripanon mu Jehová mu.
19. Quiñe lamngen, ¿chum duamelqueyu quimeltucheal ti rüf dungu? (Ca inaduamnge ti adentun).
19 Quimeltufiliyiñ caquelu che Biblia ñi dungu, feita ca ayühuelqueiñmu. Peaiñ ñi femün ta Raquel, República Dominicana mu mülelu. Fei raquiduamquei rume falin cüdau quimeltucheal Chau Dios ñi dungu. Taiñ lamngen quelluquefi fentren che tañi serfirpuafiel Jehová, fei feipi: “Iñche rume ayühuelqueneu ñi pefiel tañi pu estudiante ñi piuqueyerpufiel engün ta Jehová, tañi maneluhun quisu meu ca ñi ayühuelfiel engün. Cüdaungefulu rume quiñeque mu, huelu rume ayüucülen”.
Ayühuelqueiñmu quimeltuafiel caquelu pu che ñi piuqueyeafiel ca feyentuafiel Jehová iñchiñ reque. (Inaduamnge parrafo 19).
ALLCÜTULIYIÑ, CÜMELCANGEAIÑ
20. ¿Chem mu trürcüleafuiñ Moisés, David ca Juan reque?
20 Moisés, David ca Juan fütra cuifiqueche yem, fei engün tañi mongen trürlai iñchiñ taiñ mongen mu. Huelu fei engün reque, iñchiñ ca serfiquefiyiñ ta Jehová, llellipuquefiyiñ, maneluuqueiñ quisu mu ca eluucüleiñ taiñ adnieaeteu. Cafei maneluuqueiñ Jehová ñi cümelcaquefiel tañi pu feyentunieteu.
21. Inafiliyiñ Moisés, David ca Juan ñi ngülam, ¿chem cümeque dungu llohuaiñ?
21 Feimu llemai, inanieafiyiñ tüfachi cüla huentru ñi ngülam ca femaiñ com taiñ feipiqueteu Jehová. Femliyiñ, cüme tripayai taiñ femqueel ca alüñma müleaiñ tüfachi mapu mu (Deut. 30:20). Cafei ayühuelafiyiñ taiñ Huenu Chau Jehová, feimu iñchiñ ca ayüucüleaiñ. Jehová rüf femtripayai ñi feipin, afmatufalchi dungu femai, fei fütra cümelcayaiñmu (Efes. 3:20).
ÜLCANTUN 129 ¡Afquilpe taiñ nehuentuleal!
a Fentren pu Israel che pefilu Jehová ñi afmatun dungu Quelü lafquen mu, conpulaingün ti Feipicünuelchi Mapu mu (Núm. 14:22, 23). Jehová feipi com pu huentru nielu 20 tripantu cam doi, mülei tañi layal engün ti huellin mapu mu (Núm. 14:29). Huelu Josué, Caleb, caquelu doi huechelelu ca fentren Leví che lalaingün. Fei engün trecalen noi ti Jordán leufü, femngechi conpuingün Canaán mapu mu chumngechi Jehová tañi feipicünufiel engün (Deut. 1:24-40).
b ¿CHEM PENGELI TI ADENTUN?: Huele püle: David ngülamtufi tañi fotüm Salomón. Man püle: Fentren peñi ca lamngen amuqueingün ti Escuela ñi Pepicangeam pu Precursor, fei mu allcütuqueingün Jehová ñi quimeltun.
