TROQUIÑ ÑI CHILLCATUNGEAL 44
ÜLCANTUN 33 Elcünunge tami duam Jehová mu
Huesa femngeliyiñ, ¿chumafuiñ?
“Eluulayaimi tami huehuaeteu huesaque dungu. Doi mai cümeque dungu femnge, fei huehuafimi ti huesaque dungu” (ROM. 12:21).
¿CHEM QUIMAIÑ?
Huesa femngen mu, quimaiñ chem chumal ñi doyelcülenoal ti dungu.
1, 2. ¿Chem norngenochi dungu femngeafuiñ?
JESÚS nütramcai quiñe lantu domo huesa femngelu, fei fentren rupa pemefi quiñe juez. Feichi mu, fentren che huesa femngequei, feimu pu discipulo rume quimniefuingün ñi chum duamcülen ti lantu domo (Luc. 18:1-5). Famülque mu, iñchiñ ca huesa femngequeiñ, feimu cüme quimnieiñ ñi chum duamcülen ti lantu domo.
2 Famülque mu pu che illamcachequei, huesalcachequei ca huesa duamelchequei, feimu afmatuquelaiñ taiñ huesa femngeal (Ecl. 5:8). Huelu afmatulqueiñmu huesa femeliyiñmu quiñe peñi cam quiñe lamngen. Fei culpafe chengeingün, feimu huesa duamelafeiñmu tañi pinon mu rume. Huelu Jesús ca caquelu che ca huesa femngequefui. Feimu ngüneduamliyiñ ñi femün engün, entuafuiñ cümeque quimeltun. Huesa femeteu taiñ pu caiñe, yafüluuqueiñ taiñ ñom piuquengeal. Doi mai ñom piuquengeaiñ taiñ huesa femeteu quiñe peñi cam quiñe lamngen, ¿felelai? ¿Chum duamcülei Chau Jehová huesa femngeliyiñ? ¿Ngüneduamniequepei mai?
3. Huesa femngen mu, ¿chumngelu quimnieiñ Chau Jehová taiñ duamtunieteu?
3 “Chau Jehová piuqueyefilu am tati norngechi dungu”, feimu cüme ngüneduamniequei chem taiñ femeteu pu che (Sal. 37:28). Jesús feipi Chau Dios puuchi antü mu ca “müchai müten nor dungu femafi” tañi pu serfiqueteu (Luc. 18:7, 8). Pichiñma mu, Chau Dios apümcayafi com ti cutrancahun, fei huesaque dungu femngehuelayaiñ (Sal. 72:1, 2).
4. ¿Chumngechi quelluqueiñmu Jehová fachantü?
4 Mülei taiñ üngümal Chau Jehová ñi norümcünutual ti huesaque dungu, huelu feula quellunieiñmu huesa femngeliyiñ (2 Ped. 3:13). Quelluqueiñmu doyelcünunoal ti dungu. Ca quimeltueiñmu ñi femün Jesús huesalcangelu, fei taiñ inayentuafiel. Ca eluqueiñmu falinque ngülam Biblia mu.
CUÑIUTUCUHUAIÑ TAIÑ CHEM CHUMAL
5. Huesa femngeliyiñ, ¿chumngelu mülei taiñ cuñiutucuhual taiñ chem chumal?
5 Rume huesa duamcüleafuiñ femngeliyiñ norngenochi dungu (Ecl. 7:7). Femngechi duamcülefui Job, Habacuc ca caquelu poyequefilu Jehová (Job 6:2, 3; Hab. 1:1-3). Huesa dungu no huesa duamcüleal, huelu mülei taiñ cuñiutucuhual taiñ huelulcaunoal.
6. ¿Chem quimeltueiñmu ñi femün Absalón? (Ca inaduamnge ti adentun).
6 Quiñe che huesa femeliyiñmu iñchiñ ca quiñe taiñ piuqueyenieelchi che, ayüafuiñ taiñ huiñoleltuafiel ñi huesa femün. Huelu femliyiñ, doyelcünuafuiñ ti dungu. Raquiduamaiñ ñi femün Absalón, fei tüfa David ñi fotüm. Tañi peñi Amnón pingelu nüntucafi tañi lamngen Tamar. Absalón quimlu tüfa, rume illcui. Amnón mülefui ñi layal chumngechi feipiquefui Moisés tañi ley (Lev. 20:17). Huesa dungu no Absalón ñi illculen, huelu huesa femi ñi langümfiel tañi peñi (2 Sam. 13:20-23, 28, 29).
Nüntucangelu tañi lamngen Tamar, Absalón ngünenieulai tañi illcun. (Inaduamnge parrafo 6).
7. Quiñe huentru poyefilu ta Chau Dios, ¿chum duamcülefui pefilu norngenochi dungu?
7 Quiñeque mu raquiduamafuiñ pu huesa femquelu cüme tripaquei ñi femün, feimu ramtuhuafuiñ: “¿Cümepei mai taiñ cüme femal?”. Quiñe poyequefilu ta Jehová pefi pu huesaque che ñi huesalcaquefiel cümeque che, huelu cüme amulei ñi mongen quechilefui. Fei feipi: “Mai, femngechi chengei pu huesaque che, quisu engün mu com ti dungu cüdaungelai” (Sal. 73:12). Rume huesa duamcülefui mülen mu norngenochi dungu, feimu ¿raquiduampelai ñi cümenon poyeafiel Chau Dios? Raquiduamlu tüfa, “rume huesa duameleneu” pi (Sal. 73:14, 16). Ca feipi: “Iñche cai, tañi namun epeque huelu amufui, tañi trecan epe trayaftucufui” (Sal. 73:2). Ca femngechi rupai quiñe peñi Alberto pingelu.
8. Taiñ peñi Alberto rupan mu quiñe norngenochi dungu, ¿chum duami?
8 Taiñ peñi Alberto feipingei ñi hueñefiel ti plata ti trahunche mu, huelu quisu femlafui. Rupan mu tüfa, loncolehuelai trahunche mu. Cafei quiñeque quimlu tüfachi dungu yamhuelaeyu. Quisu feipi: “Rume huesa duamnagün, illculefun ca hueñancülefun”. Fente tañi hueñancülen, Alberto püntütripai Chau Jehová mu ca quechu tripantu amuldunguhuelai. ¿Chem quimeltueiñmu tüfa? Norngenochi dungu femngeliyiñ huelu ngünenienoliyiñ taiñ piuque, huesa tripayaiñ.
INAYENTUAFIYIÑ TA JESÚS
9. ¿Chem norngenochi dungu femngei ta Jesús? (Ca inaduamnge ti adentun).
9 Jesús tañi cüme femün mu pengeleiñmu chem chumal huesa femngeliyiñ. Fentren norngenochi dungu femngei ta Jesús. Tañi familia feyentulaeyu ñi Mesías ngen ca huedhued che feipieyu engün. Pu loncolechi religioso feipingün Huecüfü mu cüpai tañi nehuen. Ca pu Roma hueichafe ayentufingün, ahucafingün ca langümfingün ta Jesús (Mar. 3:21, 22; 14:55; 15:16-20, 35-37). Huelu huesa femngelu rume ta Jesús, turpu huesa huiñoleltulai ñi huesa femngen. ¿Chem quimeltueiñmu tañi femün? Peafiyiñ.
Inayentuafiyiñ ñi femün ta Jesús huesalcangeliyiñ. (Inaduamnge parrafo 9, 10).
10. Huesa femngelu Jesús, ¿chumi? (1 Pedro 2:21-23).
10 (Papeltunge 1 Pedro 2:21-23). a Jesús rupan mu norngenochi dungu, inayentufali ñi femün. Jesús quimniefui chumül tañi dungual ca tañi ñücüfcüleal (Mat. 26:62-64). Quiñeque mu coilaque dungu feipingei quisu mu, huelu quisu chem pilai rume (Mat. 11:19). Eluulu ñi dungual, lelicaquelafi ca aneltuquelafi tañi pu caiñe. Jesús “elcünui ñi dungu tati nor juzgachequelu ñi cuhu meu”, feimu quim ngüneniefui tañi chem pial. Jesús quimniefui Chau Jehová ñi adquintueteu tañi huesa femngen ca maneluuquefui Chau Jehová mu ñi norümal ti dungu puuchi antü mu.
11. ¿Chumngechi ngüneniehuaiñ taiñ chem pial? (Ca inaduamnge ti adentun).
11 ¿Chumngechi inayentuafuiñ ta Jesús? Huesa femngeliyiñ, ngünehuaiñ taiñ chem pial. Quiñeque mu taiñ huesa femngen fütra dungungenole, rulpacünuafuiñ müten. Cafei dulliafuiñ chem pinoal rume ñi doyelcünunoal ti dungu (Ecl. 3:7; Sant. 1:19, 20). Quiñeque mu incayafuiñ quiñe che huesa femngelu ca incayafuiñ ti rüf dungu (Hech. 6:1, 2). Eluuliyiñ taiñ dungual, yamün mu ca cüme duam mu femaiñ (1 Ped. 3:15). b
Huesa femngeliyiñ, Jesús reque dulliafuiñ taiñ dungual cam taiñ ñücüfcüleal. (Inaduamnge parrafo 11, 12).
12. ¿Chumngechi elcünuafuiñ taiñ dungu Chau Jehová mu?
12 Cafei inayentuafuiñ ta Jesús, fei “elcünui ñi dungu tati nor juzgachequelu ñi cuhu meu”. ¿Chumngechi femafuiñ? Quiñe che huesa raquiduamle iñchiñ mu ca huesa duameleliyiñmu, maneluuqueiñ Chau Jehová quimniei com ñi rupan. Ca quimnieiñ Jehová ñi norcünutual ti dungu, fei tüfa quelluqueiñmu taiñ aguantayal. Elcünuliyiñ ti dungu Jehová ñi cuhu mu, rume illculehuelayaiñ. Huelu amulele taiñ illculen, huesa femürpuafuiñ, niehuetulayafuiñ ayühun ca hueniyehuelayafuiñ ta Chau Jehová (Sal. 37:8).
13. ¿Chem quelluaiñmu taiñ chaftuafiel norngenochi dungu?
13 Cüdaungei cüme inayafiel Jesús tañi femün. Quiñeque mu huesa duamcüleafuiñ quiñe dungu taiñ feipiel ca femün (Sant. 3:2). Quiñeque mu taiñ huesa femngeel rume hueñancülafeiñmu com taiñ mongen mu. Femngechi rupalmi, Chau Jehová cüme quimniei chem tami rupamequen. Jesús ca rupai norngenochi dungu, feimu cüme quimniei tami chum duamcülen (Heb. 4:15, 16). Jesús ñi femün rume quelluqueiñmu. Chau Jehová ca eluqueiñmu cümeque ngülam Biblia mu taiñ quelluaeteu femngeliyiñ norngenochi dungu. Inaduamaiñ epu versiculo mülelu Romanos lifru mu.
ELCÜNUAIÑ TI DUNGU CHAU JEHOVÁ MU
14. ¿Chumngechi inayafuiñ Romanos 12:19?
14 (Papeltunge Romanos 12:19). Ti apostol Pablo ngülamtufi pu cristiano: “Huiñoleltulayaimün huesa femün. Doi mai elcünumün ta Chau Ngünechen ñi femal tüfachi dungu, norngelu cai tañi illcun”. ¿Chumngechi inayafuiñ tüfachi ngülam? Elcünuaiñ Chau Jehová mu ñi dullial chem antü ca chumngechi norcünutual ti dungu. Tüfa ñi rupan taiñ peñi Juan pingelu. Huesa femeyu quiñe peñi, fei feipi: “Ngünehun tañi huesa illculenoal, fei quisu tañi duam mu norümnoal ti dungu. Romanos 12:19 quellueneu tañi ñom piuquengeal ca maneluhual Chau Jehová mu”.
15. ¿Chumngelu doi cümei elcünual Jehová ñi norcünutual ti dungu?
15 Doi cümeafui elcünual Chau Jehová mu ñi norcünutual ti dungu. Norümfiliyiñ ti dungu iñchiñ taiñ duam mu, huesa duamcüleafuiñ ca fill raquiduamcüleafuiñ. Jehová eluucülequei taiñ quelluaeteu. Feipiquei reque: “Elcünunge ti dungu iñche tañi cuhu mu, iñche norümcünuafiñ”. Maneluuliyiñ Jehová ñi juzgayafiel taiñ pu huesa femeteu, illcuhuelayaiñ. Quimnieiñ Chau Jehová ñi cüme femal. Tüfa rume quellueyu ta Juan taiñ deu nütramcael, fei feipi: “Iñche tañi duam mu norümtufili ti dungu ñi rupan, cüme tripalayafui. Huelu elcünufili ti dungu Jehová ñi cuhu mu, doi cüme tripayai”.
“HUEHUAFIMI TI HUESAQUE DUNGU”
16, 17. Llellipuliyiñ, ¿chumngechi quelluafeiñmu taiñ huehuafiel ti huesaque dungu? (Romanos 12:21).
16 (Papeltunge Romanos 12:21). Pablo feipi: “Cümeque dungu femnge, fei huehuafimi ti huesaque dungu”. Jesús feipi: “Piuqueyenieafimün tamün pu caiñe ca ngillatuñmanieafimün tamün pu caiñetuqueteu” (Mat. 5:44). Femngechi femi Jesús. Rume cutrancahui Jesús clafangelu orcon mamüll mu, illamcangei ca ahucangei. Iñchiñ quimlayafuiñ fente ñi cutrancahun Jesús.
17 Jesús hueufi ti huesaque dungu. Fei feipilafi ta Chau Jehová ñi castigayafiel tañi huesa femeteu, doi mai feipifi: “Fütra Chau, rulpacünuñmafinge ñi femün engün, quimlaingün ñi chem chummequen” (Luc. 23:34). Llellipufiliyiñ ta Chau Jehová ñi füreneafiel taiñ pu huesa femeteu, cüme duam mu peafiyiñ feichi che, illcuhuelayaiñ ca doi tüngcüleaiñ.
18. Ti llellipun, ¿chumngechi quellueyu ta Alberto ca Juan?
18 Huesa femngelu Alberto ca Juan, rume quellueyu ti llellipun. Alberto feipi: “Llellipufiñ ta Chau Jehová pu peñi ca pu lamngen tañi huesa femeteu. Fentren rupa llellipufiñ ñi illculehuenoal”. Rume ayühun-ngei Alberto ñi huiño poyefiel ta Chau Jehová. Juan ca feipi: “Fentren rupa llellipufiñ ta Jehová ñi quelluafiel ti peñi tañi huesa femeteu. Ti llellipun quellueneu tañi illcutunienoafiel tañi peñi ca perdonayafiel. Ca quellueneu tañi tüngcüleal tañi raquiduam” pi taiñ peñi.
19. Petu puunole Jehová ñi antü, ¿chem chumafuiñ? (1 Pedro 3:8, 9).
19 Petu puunole Jehová ñi antü, quimlaiñ chem norngenochi dungu rupayafuiñ. Huelu chem rupafule rume taiñ mongen mu, llellipunieafiyiñ ta Chau Jehová taiñ quelluaeteu. Inayentuafiyiñ Jesús ñi femün huesa femngelu ca inayafiyiñ Biblia ñi ngülam. Femliyiñ, maneluhuafuiñ Chau Jehová taiñ cümelcayaeteu (papeltunge 1 Pedro 3:8, 9).
ÜLCANTUN 38 Jehová nehuen eluaimu
a Hunen Pedro capitulo 2 ca 3 mu ti apostol Pedro nütramcai quiñeque norngenochi dungu ñi rupan pu hunenque cristiano. Quiñeque engün rume huesalcaeyu tañi pu ngen cüdau cam afcadi cristianongenolu (1 Ped. 2:18-20; 3:1-6, 8, 9).
b Pefinge ti video Poyehun mu doi hulquei tüngcülen jw.org mu.
