Paul: ¡Müna ayüucüleyu! Noviembre cüyen 1985 tripantu amuleyu Liberia mapu mu tayu misionerongeal. Tati avion hune anüpui Senegal mapu mu. Anne feipi: “¡Quiñe hora mu puhuayu Liberia mapu mu!”. Huelu feipingeiñ: “Pu che amulelu Liberia mapu mu mülei tañi tripayal avion mu. Catrücontungei ti gobierno, fei ti avion pepi anüpulayai tiye mu”. Feimu quiñeque misionero iñchiñ mülenagpuiñ mari antü Senegal mapu mu. Noticia mu allcütuiñ fentren che tañi langümngemequen ca elungelafui pu che ñi tripayal ruca mu pun mu. Fei tiyechi tripalu huecun langümngeafui.

Anne: Ayüquelayu tripayal tayu mapu mu. Petu pichicalu iñche, “Annie tati llicanchengelu” pingequefun. Llicaquefun tañi catrürumeal calle mu. Huelu feula ayünieyu tayu amual Liberia mapu mu cuñihun-ngefule rume.

Paul: Mür iñchiu tremiyu Inglaterra mapu mu, pichi camapulequefuyu. Tañi pu chau rume yafültucueneu tañi precursorngeal. Anne tañi ñuque ca femngechi femi. Feimu precursorngerpuyu quisuque tripalu colegio mu. Tayu familia ayüucülefuingün tayu precursorngeal com tayu mongen mu. Iñche nielu mari ailla tripantu, mangelngen cüdahual Betel mu. Fei 1982 tripantu niehuiyu Anne iñchiu ca mülenagiyu Betel mu.

Anne: Ayüucülefuyu cüdahual Betel mu, huelu ca ayüquefuyu amuldungual cheu ñi doi duamniengen quellu. Cüdahuiyu Betel mu cuifique misionero iñchiñ. Chumngechi rupan engün, quellueyumu tayu misionerongerpual. Cüla tripantu mu fill pun llellipuquefuyu Jehová tayu misionerongeal. Rume ayühuiyu tayu mangelngen 1985 tripantu mu amual Galaad pingechi Escuela mu, tati clase 79. Fei huercüngeyu Liberia mapu, África Occidental mu.

Paul: Acui ti antü huiñotual Liberia avion mu. Puulu iñchiu, ngüneduamiyu tati pu che rume llicalei. Petu pepi tripalai tañi ruca mu engün pun meu. Fente tañi llicalen  mu, raracün mu quiñe auto, huiraringün ca leftripaingün. Fill pun mu papeltuyu quiñeque troquiñ Salmo tayu tüngcüleal. Huelu cuñihun-ngechi dungu rupamequelu rume fei meu, iñchiu ayüucüleyu tayu cüdau mu. Anne fill antü amuldunguquefui ca iñche cüdaucülen Betel mu tati peñi John Charuk iñchiu. a Feichi peñi fentren tripantu yeniei Liberia mapu mu ca cüme quimniefui chumngechi rupan pu peñi ca pu lamngen, fei rume quimeltueneu.

Anne: ¿Chumngelu müchai ayüfiyu Liberia mapu? Pu peñi ca pu lamngen piuqueyeyumu ca rume fülcontuniefi Jehová engün. Hueniyefiyiñ ca taiñ familia reque felerpui. Cümeque ngülam elueyumu ca rume yafültucueyumu. Rume afmatufalngei ti amuldungun. Pu che ayüquelafui tayu pürüm amutual ñi ruca mu engün. Fei engün ayüquefuingün nütramcayal Biblia mu cheu püle rume. Cüdautuquelafuyu quiñehual tañi nütramcan mu. Fentren che duami tayu quimeltuafiel Biblia, feimu cüdautuquefuyu puhual com fei engün mu. ¡Müna ayühun-ngechi antü rupayu!

Paul: Meli tripantu huenche tüngcülefui pu che Liberia mapu mu. Huelu 1989 tripantu coni ti pu che quiñe guerra civil mu. Feimu com caletui. Feichi julio cüyen 1990 tripantu, pu caiñetuquefilu ti gobierno nüfingün quiñe troquiñ mapu inafül Betel. Cüla cüyen mu pepi dungulafiyiñ inei no rume, fütra Betel ruca ca taiñ familia no rume. Com püle mülei hueichan ca pofolcahun. Mülei pichin iyael müten ca fentren domo nüntucangei. Mari meli tripantu rume huesa rupai pu che com Liberia mapu mu.

Anne: Quiñeque troquiñqueche epuñpüle hueichamequei ca langümcaumequei. Rüpü mu miyahui pu hueichafe ca niei fillque tralca. Caque rume tucutuucülei, conturucayahuingün ca hueñei chem rume tañi ayüqueel. Quiñeque engün langümquefingün pu che achahuall reque tañi troquifiel. Tüfachi pu hueichafe catrütuquefingün pu che carretera mu ñi ngüneduamafiel. Fentren rupa pu pinolu ñi huitracünuhual langümfingün müten. Fei huircocünufingün fentren la, tüfa ca rupai inafül Betel ruca mu. Quiñeque taiñ pu lamngen ca langümngeingün, ca coneltulefui epu poyenque misionero.

Feichi pu hueichafe pefilu pu che coneltulelu quiñe tribu tañi üdequefiel, langümquefuingün. Fentren testigo eluucülefui ñi langümngeal  engün ellcalfiel mu tañi pu lamngen tuulu feichi tribu mu. Quiñeque betelita ca misionero ca femingün. Quiñeque lamngen lefmaulu ellcangeingün Betel mu. Tañi füta iñchiu umalfiyu tayu pieza mu regle pu lamngen.

Paul: Fill antü tati pu hueichafe cüpa contuquefuingün Betel ruca mu ñi inaduamal tañi ellcaucülen pu che. Huelu niequefuiñ meli che ñi inaduamngeal chem ñi rupayal: epu che ventana mu adquintulequei ca epu che porton mu llihuatulequefui. Feiti epu mülelu porton mu puñmaniequefui ñi cuhu, femngechi pengelquefui com cümelcalen. Huelu furi pülecünui ñi cuhu, fei pengelquefui ñi illculen tati pu hueichafe. Femngechi feichi epu che mülelu ventana mu matu lefqueingu ñi ellcalafiel tañi pu peñi ca lamngen.

Anne: Quiñe antü pu lamngen pepi catrütulafi pu hueichafe ñi conpual Betel mu. Pu hueichafe yenielu tralca inantucueneu. Quiñe lamngen iñchiu cerrantucuhuiyu tripatripatuhue mu. Feiti mu mülequefui quiñe pichi ellcaupeyüm. Fei mu ellcahui ti lamngen. Ti pu hueichafe fente ñi illculen engün, palolcafingün chi puerta. Tañi füta feipieyu engün: “Tañi domo mülei ponhuitu”. Pichi alüñman ñi cüme tacucünufiel ti ellcaupeyüm, feimu rume llican. Ayülefun ñi tüngcüleal, feimu ñücüfcülen llellipufiñ Jehová petu ñi nülanofiel chi puerta. Fei tüngcülen chalifiñ ti pu hueichafe. Fei quiñe ti hueichafe ültre famentueneu, fei conpui ñi inaduamal. Huelu chem rume pelai. Fei hula amutui ñi pu compañ engün inaduamalu cañpüle, huelu ca pelai chem rume.

Paul: Rupalechi cüyen mu müte niequelafuiñ iyael. Betel mu, fentrenque rupa desayuno meu niequelafuiñ iyael. Huelu allcütuquefuiñ ti adoracion matutina fei taiñ desayuno reque. Tüfa rume nehuentucuquefeiñmu.

Tripafuliyiñ yemeal co cam iyael, pepi cuñiutuculayafuiñ feiti pu ellcaucülelu, fei langümngeafuingün. Huelu Jehová eluquefeiñmu com taiñ duamnieel puuchi antü meu. Ñi femquefel rume afmatufalngequei. Femngechi Jehová cuñiutucueiñmu ca quellueiñmu taiñ tüngcüleal.

Doi huesa rupalu pu che Liberia mapu mu, huelu ti rüf dungu mülelu Biblia mu nehuentucueiñmu. Fentrenque pu peñi ca lamngen lefmauquefuingün tañi montuluhual, huelu fentecünuquelafuingün ñi maneluhun Jehová mu ca ñi nieal tüngcülen. Quiñeque engün feipiquefuingün: “Tüfachi hueichan pepicaqueiñmu ñi chaftuafiel tati fütra cutrancahun”. Trahunche mu fentrenque pu loncolelu ca huecheque peñi, nehuen piuque mu quellufingün caquelu peñi ca lamngen. Pu lefmauquiyauquelu hueluquentu quelluuquefuingün. Cheu ñi puhun mu amuldunguquefuingün ca trahuluuquefuingün rangi mahuidantu meu. Tüfa rume  yafültucuquefeyu engün. Yelelfilu iñchiñ iyael ca tacun, fentren pu peñi feipiquefuingün: “Duamün bolso ñi amuldunguam, tacun ta duamlan”. Ñi feipin mu engün rume yafültucuquefeiñmu. Fentren che rume cutrancaulu hueichan ñi duam mu, eluucülefuingün allcütual Biblia ñi cümeque dungu. Rume afmatuquefuingün ñi pefiel mu pu testigo ñi ayüucülen ca ñi poyeucülen engün, huesa rupalen mu rume. Huilüfcülequefuingün reque rangi dumiñ mu (Mat. 5:14-16). Tañi ayüfal cüdau ñi femquen mu engün, quiñeque pofolcalechi hueichafe testigongerpuingün.

Paul: Cüla rupa amutufuyu, huelu pichin antü mu huiñotuyu. Cafei ca epu rupa ca amutufuyu, huelu quiñe tripantu rupai tayu huiñotun. Quiñe misionera feipi tayu chum duamquen elcünutufiel mu chi pais: “Galaad mu quimeltungequeiñ ñi com piuque mu piuqueyeafiel taiñ pu lamngen cheu taiñ huercüngeel. Femngechi femiyiñ. Feimu elcünulu tañi pu lamngen huesa rupamequelu engün, rume hueñancün-ngei”. Huelu ca pais mu mülefulu rume, ca quelluniequefiyiñ pu peñi ca pu lamngen mülelu Liberia mapu mu.

Anne: Mayo cüyen 1996 tripantu mu, iñche, tañi huentru ca caquelu epu che püraiñ quiñe auto Betel mu mülelu ca yenieiñ fentren falinque papel. Tañi ellcangeal chi falinque papel, mülefui taiñ amual 16 kilometro taiñ puhual cheu ñi mülenon fente cuñihun-ngechi dungu. Huelu amulelu iñchiñ, pu hueichafe tralcatupüramingün, huitralfingün taiñ auto, fei entungeiñ. Paul müten mülehuei chi auto mu, fei yengei. Com pellquelehueiñ. Huelu huefrumetui Paul ñi treca cüpalen iñchiñ mu, fei mollfülei ñi lonco. Raquiduamiyiñ ñi tralcatungen, huelu ñi trecalen mu inaduamiyiñ ñi femngenon. Quiñe pichi allfen müten ürque. Quiñe hueichafe ültre entuelumu tuntucuhui.

Peiñ ñi epe tripalen quiñe camion militar, fei iñchiñ pültrühuiyiñ. Matu tripalu cai ti camion, epe ütrüfnagfuiñ. Llellipufiyiñ ti chofer ñi huitracünuhual. Fente tañi llicalen mu, allcütulaeiñmu. Femlu rume, pültrüucülecaiñ müten. Puulu chi camion cheu tañi puhual, rume ürcülehueiñ, trüntrüncülei taiñ cuerpo.

Paul: Ngüneduamiyiñ taiñ tacun ñi podcülen ca ñi huichafcülen, afmatulehueiñ taiñ petu mongelen mu. Umaiñ inafül quiñe helicoptero mu, huechodcaucülelu fentren bala mu. Ca antü yetueiñmu feichi helicoptero Sierra Leona mapu mu. Mañumfiyiñ Jehová taiñ petu mongelen mu, huelu rume raquiduamquefuiñ pu peñi ca pu lamngen petu mülelu Liberia mapu mu.

Anne: Acuiñ ti Betel Sierra Leona mapu mu, fei mu tüngcületuiñ ca cüme cuñiutucungeiñ, huelu acordarumequefun chem taiñ rupan. Fill antü raquiduamcülequefun chumngechi tañi huesa rupan ca llicalequefui tañi piuque. Pun meu pepi umauquelafun, arofcülen treperumequefun, llicalefun ñi rupayal doi huesaque dungu. Cüme neyühuelan. Tañi huentru rofülquefeneu ca llellipuquefuyu Jehová. Ülcantulelquefuyu Jehová tañi tüngnagal. Huedhuedalu troquiuquefun ca misionerangehuenoalu troquihun.

Feichi semana müten llohuiyu epu revista. Quiñe ti ¡Despertad! 8 conchi junio 1996 tripantu mu. Feichi revista mu tripai quiñe troquiñ feipilelu “Qué hacer ante los ataques de pánico”. Iñche papeltufilu ti revista, quimürpun chumngelu tañi femngechi rupamequen. Cangelu revista La Atalaya 15 conchi mayo 1996 tripantu. Tüfa mu tripai ti troquiñ feipilelu “¿De dónde proviene su fuerza?”. Fei mu tripalei adentun quiñe llampüdquen huesalcalelu quiñe tañi müpü. Ti revista feipi tati llampüdquen amuleafui tañi müpüyahun ca ñi quintual iyael, tunte huesalcalefulu rume tañi müpü. Ca femngechi iñchiñ Jehová ñi nehuen mu quelluafuiñ caquelu che, nehuen-ngehuenolu troquiuliyiñ taiñ huesa rupan mu. Femngechi Jehová pürümquechi elueneu chem tañi duamtunieel (Mat. 24:45). Cafei ngülümfiñ caquelu revista nielu feichi nütram, femngechi ñochiquechi doi cümelcaletun.

Paul: Ca huiñotun mu Liberia mapu mu, rume ayüucületuyu. Epe afchi 2004 tripantu mu, epe yenieyu 20 tripantu Liberia mapu mu. Deu mülehuelai ti hueichan ca mülefui ñi cüme elcünungetual ti Betel ruca. Huelu feipirumengeyu tayu amual ca mapu.

Rume piuqueyefiyiñ taiñ pu peñi ca pu lamngen Liberia mapu mu, feimu cüdautuyu tayu elcünuafiel. Cuifi deu quellueyumu Jehová elcünuafiel taiñ pu familia amulu iñchiu Galaad mu. Feimu eluucüleyu ñi huercüngeal püllelechi pais Ghana mapu mu.

Anne: Rume ngümayu elcünufilu Liberia mapu iñchiu. Huelu rume afmatulehueyu ñi feipin quiñe fücha lamngen nielu fentren quimün, Frank pingelu. Fei feipi: “Ngoimanentumuaiñ”. Ca feipi: “Quimnieiñ tamu femnoal, huelu rüf piuque mu mülei tamu piuqueyeafiel pu peñi ca pu lamngen Ghana mapu mu. Tüfachi elfal cüdau Chau Jehová mu cüpai, feimu cuidanieafimu engün”. Ñi feipin ti lamngen rume quellueyumu tayu nieal hueque hueni feichi pais mu tayu quimnofiel.

Paul: Pichin antü mu rume piuqueyerpufiyu pu peñi ca lamngen Ghana mapu mu. Mülefui fentren testigo feichi pais mu. Inayentufali pu peñi ca pu lamngen tañi nor piuqueyefiel ta Jehová ca tañi fütra feyentun mu. Huelu rupalu mari cüla tripantu feipingeyu ñi amual Betel ruca Kenia mapu mu, África Oriental mu mülelu. Rume hueñancütufiyu pu peñi ca lamngen Ghana ca Liberia mapu mu, huelu pürümquechi piuqueyerpufiyu pu peñi ca lamngen Kenia mapu mu. Fantepu mu petu müleyu fau, rume fentren cüdau mülei.

Anne: Tañi mongen mu rupafun rume huesaque dungu ca quiñeque mu llicalequefun. Rupan mu tüfachi dungu cutranafuiñ ca rume huesa duamcüleafuiñ. Jehová femlayai afmatufalchi dungu taiñ montulaeteu. Allcün mu tralcatun, müllmüllquen ca cutranquei reque tañi pütra, huelu Jehová eluqueneu nehuen tañi pu lamngen mu. Cafei chillcatual, llellipual, amual ta trahun ca amuldungun quelluqueneu ñi femürpual tañi elfal cüdau.

Paul: Quiñeque mu ramtungequeyu: “¿Ayüfimu cheu tamu mülen?”. Quiñeque pais rume cüme adngei, huelu ca cuñihun-ngeafui. Feimu doi falin-ngei iñchiu mu taiñ pu peñi ca pu lamngen, quiñe familia reque feleingün. Caque rume tuhun ca huimtun nieafuiñ, huelu quiñeucülei taiñ raquiduam Jehová mu. Raquiduamquefuyu tayu yafültucuafiel pu peñi ca pu lamngen, huelu fei engün mai ta yafültucueyumu.

Amulu iñchiu ca pais mu, pequefiyu taiñ pu peñi ca pu lamngen quiñe familia reque, tüfa afmatufali. Mülen mu trahunche mu, nieyu familia ca quiñe ruca. Rüf maneluucüleyu Chau Jehová mu, rumel nehuentucuayumu (Filip. 4:13).