TROQUIÑ ÑI CHILLCATUNGEAL 47
ÜLCANTUN 103 Pu loncolelu, yehun reque feleingün
Peñi, ¿eluucülepeimi mai tami loncolelungerpual?
“Quiñe huentru yafüluule ñi loncoleal trahunche mu, müna cüme cüdau ayüniei” (1 TIM. 3:1).
¿CHEM QUIMAIÑ?
Peaiñ chem pi Biblia ñi femal pu peñi ayülu ñi loncolerpual.
1, 2. ¿Chem cüdau femquei pu loncolelu?
DEU yenielmi quiñeque tripantu tami siervo ministerialngen, ¿pepicaucülepelaimi tami loncolerpual trahunche mu? ¿Ayüafuimi doi quelluafiel ti trahunche? (1 Tim. 3:1).
2 ¿Chumquei pu loncolelu? Hunelequei amuldungun mu, yafüluuquei ñi cuidayafiel ca quimeltuafiel pu peñi, pu lamngen. Tañi femün ca tañi feipin mu yafültucuquefi ti trahunche. Feimu Biblia feipi fei engün ‘adümuhun-ngechi huentrungeingün’ (Efes. 4:8).
3. ¿Chumngechi quiñe peñi loncolerpuafui trahunche mu? (1 Timoteo 3:1-7; Tito 1:5-9).
3 ¿Chumngechi quiñe peñi loncolerpuafui trahunche mu? Raquiduamnge tüfa mu: nielmi adümuhun ñi femal quiñe cüdau, ti ngen cüdau feipiafeimu: “Tüfachi cüdau eimingealu”. Huelu tami loncoleal re duamfal-lai tami adümuucüleal tami quimeltuchequen ca tami amuldunguchequen. Doi mai duamfalngei ñi inayal ñi feipin Biblia ñi femal pu loncolelu. Tüfa tripai 1 Timoteo 3:1-7 ca Tito 1:5-9 (papeltunge). Tüfachi troquiñ mu inaduamaiñ chem ñi femal pu loncolelu: ñi cüme troquingeal ti trahunche mu ca caquelu pu che mu, tañi cüme adnieafiel tañi pu che ñi inayentufalngeal, tañi eluucüleal ñi cüdahuelnieafiel ti trahunche.
QUIMFALNGEPE TAMI CÜME CHENGEN
4. ¿Chumafui pu loncolelu ñi huesa dunguyengenoal?
4 Quiñe peñi ñi loncoleal trahunche mu, “mülei ñi cüme yenieal ñi mongen, femngechi dunguyengelayai”. Cüme mongen yenielmi, inei no rume huesa troquilayaimu tami femün mu. Cafei “mülei ñi cüme nütramyeaeteu tati pu che feyentulenolu”. Pu feyentulenolu huesa dunguyeafeimu tami feyentun mu, huelu femlayafuingün tami cüme chengen ca tami femquen mu (Dan. 6:4, 5). Ramtuunge: “¿Cüme troquiquepeneu mai ti trahunche ca caquelu pu che?”.
5. ¿Chumngechi pengelafuimi tami piuqueyefiel ti cümeque dungu?
5 ‘Piuqueyefilmi ti cümeque dungu’, ngüneduamaimi caquelu ñi cüme chengen ca saquiafimi. Ayühuaimi tami cüme femafiel caquelu pu che feipingenolmi rume tami femal (1 Tes. 2:8). Rume falin-ngei pu loncolelu ñi piuqueyeafiel ti cümeque dungu. Entuqueingün fentren tiempo ñi cuidayafiel ti trahunche ca enturpual ñi cüdau trahunche mu (1 Ped. 5:1-3). Rume cüdaule rume engün, ayühuelqueyu ñi quelluafiel pu peñi, pu lamngen (Hech. 20:35).
6. ¿Chumngechi pengelafuimi tami poyechefengen? (Hebreos 13:2, 16; ca inaduamnge ti adentun).
6 Pengelnge tami ‘poyechefengen’ tami cümelcaquefiel pu che hueniyenofilmi rume (1 Ped. 4:9). Quiñe lifru feipi ñi chumquen pu poyechefengelu. Quiñe che poyechefengelu ayühunquechi llouquefi pu che tañi ruca mu quimnofile rume. Ramtuunge: “¿Pengelquen tañi poyechefengen acun mu huitran trahunche mu?” (papeltunge Hebreos 13:2, 16). Quiñe huentru poyechefengelu chumquei rume ñi cüme llohuafiel chem chengepe rume: pu pofrelelu, pu hueupife ca pu huitran-ngepaquechi loncolelu, ca caquelu peñi, lamngen nehuentu cüdauquelu (Gén. 18:2-8; Prov. 3:27; Luc. 14:13, 14; Hech. 16:15; Rom. 12:13).
Quiñe curehuen cüme lloufi ti huitran-ngepaquechi loncolelu ca ñi domo ñi ruca mu. (Inaduamnge parrafo 6).
7. Quiñe loncolelu, ¿chumngechi pengeli tañi diñmatunofiel plata?
7 Ngelai ñi “diñmatunoal plata no rume”. Tüfa pengeli tami doyümnofiel ti plata ca falinque fillem. Pofrengefulmi, ricungefulmi rume, doyümaimi Jehová ñi dungu tami mongen mu (Mat. 6:33). Cüme adcünuaimi tami tiempo, nehuen ca falinque fillem ñi cüdahuelafiel ta Jehová, cuidayafiel tami pu che ca tati trahunche (Mat. 6:24; 1 Juan 2:15-17). Ramtuunge: “¿Chem raquiduamquen ti plata mu? ¿Ayüucülen chem ñi nieel tañi mongeluhuam? Cam, ¿diñmatuquepefiñ mai ti plata ca ti falinque fillem?” (1 Tim. 6:6, 17-19).
8. ¿Chumngechi pengelafuimi tami ‘quim ngüneniehun’?
8 ‘Quim ngüneniehulmi’, pengelaimi tami ngünefalchengen tami mongen mu. Quiñe che quim ngünenieule, cüme ngüneuquei tañi in ca tañi putun mu. Cüme tucutuuquei ca cüme cupiluuquei. Ca cüme dulliquei chumngechi tañi cüme rupaleal. Quimfali tañi inayentunofiel ñi femquen ca ñi chumngen pu poyequenofilu ta Jehová (Luc. 21:34; Sant. 4:4). Huesa femeliyu caquelu che, ñom piuquengei. Cafei eimi “ngelai tami ngollifengeal”, fei rume putuquei pingelayaimi. Ramtuunge: “¿Quimfali tañi quim ngünenieuquen tañi mongen mu?”.
9. 1) ¿Chumngechi cüme raquiduam nieaimi? 2) ¿Chumngechi cüme adnieaimi tami mongen?
9 Eimi mülei tami ‘cüme raquiduam nieal’. Cüme ngüneduamniefilmi ñi feipin Biblia tami mongen mu, cüme raquiduam nieaimi. Feimu cüme adümuhuaimi fillque dungu mu ca cüme dulliaimi tami femal. Matucaulayaimi, doi mai cüme ngüneduamafimi com ti dungu petu tami dullinon (Prov. 18:13). Femngechi femülmi, quim dulliaimi ca inayafimi Jehová ñi raquiduam. Cafei mülei ñi ‘cüme adnieal tami mongen’, ca tami tardeñmanoal cheu tami puhual. Quimfalngepe tami manelfal chengen ca tami inaniefiel tami feipingeel. Femngechi chengelmi, cüme troquiaimu caquelu che. Feula peaiñ ca chem feipi Biblia ñi femal pu loncolelu.
CÜME ADNIEAFIMI TAMI PU CHE
10. ¿Chumngechi quiñe huentru ‘cüme adnieafui tañi pu che’?
10 Nielmi domo ca familia, tami pu che ca mülei ñi inayentufalngeal, fei tami loncolerpual trahunche mu. Feimu ‘mülei tami cüme adnieafiel tami pu che’. Cafei cuidayafiel, piuqueyeafiel ca cüme dullial chem ñi femal tami familia. Eluhuaimi tami estudiayal tami familia engün, tami quiñentrür amual trahun mu ca tami quelluafiel tami pu che ñi doi cüme amuldungucheal. Tüfa rume falin-ngei. Feimu ti apostol Pablo feipi: “Quiñe huentru quim adnienofile quisu tañi pu che, ¿chumngechi cuidayafui Chau Dios ñi trahunche?” (1 Tim. 3:5).
11, 12. Quiñe peñi ñi loncolerpual, ¿chumngelu falin-ngei ñi femquen tañi pu che? (Ca inaduamnge ti adentun).
11 Tami pu yall petu nienole mari pura tripantu, ‘mülei tami feyentuaeteu ca cüme miyahual’. Mülei tami piuqueyenquechi quelluafiel ñi cüme pepicaucüleal engün. Felei llemai, pichiqueche mülei ñi ayüucüleal, aucantual ca cüme rupaleal. Cüme quimeltufilmi engün, feyentuaingün, yamcheaingün ca cüme portaqueaingün. Cafei quelluafimi tami pu yall ñi cüme hueniyeafiel ta Chau Jehová, inayal Biblia ñi ngülam ca ñi quelluafiel ñi fautizahurpual engün.
12 Tami “pu yall feyentulepe ca ngelai ñi feipintucungeal engün tañi huedhuedquiyauquen mu cam tañi feyentuquenon”. Quiñe loncolelu niele fotüm, ñahue tañi ruca mu, fei fütra culpale ñi yall, ¿chem rupayafui? Ti chau cüme quimeltunofile ca norümtunofile tañi pu yall, loncolelungehuelayafui chi trahunche mu (inaduamnge ti chillca La Atalaya 15 octubre 1996, pag. 21, parr. 6, 7).
Pu chau quimeltufi tañi pu yall ñi femal cümeque dungu Jehová mu ca tati trahunche. (Inaduamnge parrafo 11).
QUELLUAFIMI TI TRAHUNCHE
13. ¿Chumngechi pengelafuimi tami ‘ñom piuquengen’?
13 Pu peñi cüme cristianongelu ca cüme piuquengelu rume quelluquefingün ti trahunche. Quiñe peñi ‘ñom piuquengelu’ yafüluuquei ñi quelluafiel ti trahunche ñi tüngcüleal ca quiñeucüleal. Eimi peñi ayülmi tami ñom piuquengeal, cüme allcütuafimi caquelu pu che ca falintuñmayafimi tañi raquiduam. Quiñe ejemplo, trahuluule pu loncolelu ca dullile quiñe dungu catrütunolu Biblia ñi feipin, ¿eluucüleaimi tami quiñehual chem ñi dulliel? Cafei “mülei ñi yafü piuquengenoal”. “Iñche tañi feipin müten femngepe” pilayaimi. Cafei rume falintuñmayafimi ñi ngülam caquelu che (Gén. 13:8, 9; Prov. 15:22). ‘Ngelai tami illcufengeal’. Huesa entuquelayaimi tami feipin, yamchequeaimi ca piuqueyen mu cüme duamelqueafimi pu che. Tüng chengeaimi. Mülele yafcahun ca caquelu huesaque dungu, eluucüleaimi tami cümelcautual caquelu che engün (Sant. 3:17, 18). Cüme entuaimi tami feipin, fei tüngduamelafimi pu illculelu ca tami pu caiñetueteu (Juec. 8:1-3; Prov. 20:3; 25:15; Mat. 5:23, 24).
14. 1) ¿Chumngelu ‘ngelai ñi elfalcünungeal quiñe hue feyentulelu’? 2) Quiñe peñi, ¿chumngechi pengelai tañi manelfal chengen?
14 Ñi loncoleal “ngelai ñi elfalcünungeal quiñe hue feyentulelu”. Duamfal-lai ñi yenieal fentren tripantu tañi fautizahun, huelu duamfali tiempo tañi cüme hueniyeafiel Jehová ca tañi adümafiel Biblia ca ñi inayafiel ñi feipin. Petu tami loncolelungenon, inayentuafimi Jesús tañi ñom chengen. Ayühunquechi üngümcüleaimi Jehová tami eluaeteu elfal cüdau (Mat. 20:23; Filip. 2:5-8). Pengelnge tami ‘manelfal chengen’, püntütripalayaimi Jehová mu ca tañi ngülam, ca inayafimi ñi feipin tañi troquiñche (1 Tim. 4:15).
15. Com pu loncolelu, ¿mülepei mai tañi cüme hueupifengeal?
15 Biblia feipi pu loncolelu mülei ñi ‘adümuucüleal tañi quimeltucheal’. Feimu, ¿com pu loncolelu mülei ñi rume cüme hueupifengeal? Femlai tati. Quiñeque müte cüme hueupiquelaingün, huelu cüme adümuucülei Biblia ñi amuldungual, quimeltucheal ca yafültucuafiel pu peñi, pu lamngen (1 Tim. 3:2; ca ngüneduamafuimi 1 Corintios 12:28, 29 ca Efesios 4:11). Femfulu rume, fentecünulayaimi tami doi adümuucüleal ñi quimeltucheal. ¿Chumngechi doi cüme quimeltucheaimi?
16. ¿Chumngechi doi cüme quimeltuchefengerpuafuimi? (Ca inaduamnge ti adentun).
16 “Chumngechi tañi quimeltuchequen, mülei ñi cüme inanieal tati rüfngechi dungu”. Tami cüme quimeltuchefengeal, Biblia mu entunge tami feipin ñi quimeltucheal ca ngülamtucheal. Cüme papeltuaimi Biblia ca taiñ fillque publicacion (Prov. 15:28; 16:23). Petu papeltufilmi Biblia, raquiduamnge chumngechi inayafiel chem ñi feipin. Quimeltulmi, yafüluhuaimi ñi puhual pu che tañi piuque mu. Tami doi cüme quimeltuchefengeal, pediafimi tati pu loncolelu tami ngülamtuaeteu (1 Tim. 5:17). Pu loncolelu mülei ñi ‘yafültucuafiel’ pu peñi, pu lamngen. Huelu quiñeque mu ca mülei ñi ngülamtuafiel ca ‘norümtuafiel’. Femle, piuqueyechen mu mülei ñi femal. Duamtucheaimi, piuqueyecheaimi ca Biblia mu entunge tami quimeltun. Inayentuafimi ta Jesús, tati doi cüme quimeltuchefe (Mat. 11:28-30; 2 Tim. 2:24).
Quiñe siervo ministerial compañfi quiñe loncolelu nielu doi quimün, quimelngei ñi doi cüme quimeltucheal Biblia mu. Ti siervo ministerial inafül ti espejo mu pepicaumequei tañi hueupin mu. (Inaduamnge parrafo 16).
YAFÜLUUNGE TAMI CÜDAUCÜLEN TRAHUNCHE MU
17. 1) ¿Chem quelluafeyu pu siervo ministerial ñi cüdaucüleal trahunche mu? 2) Pu loncolelu, ¿chem inaduamaingün inei ñi loncoleal? (Inaduamnge ti huichulechi dungu “ Pu loncolelu, ¿chem inaduamaimün inei ñi loncoleal?”).
17 Deu ngüneduampeiñ chumngechi ñi femal pu loncolelu. “Iñche chumcaunorume loncolelungerpulayafun” piafui quiñeque siervo ministerial. Huelu loncontucuaimi, Jehová ca tañi troquiñche feipilai tami turpu huelulcaunoal (Sant. 3:2). Cafei Jehová tañi nehuen quelluaimu llemai (Filip. 2:13). ¿Mülepei mai quiñe dungu tami cüdautuquen ñi femal? Ngillatuafimi ta Jehová. Ngüneduamaimi tüfachi dungu ca feipiafimi pu loncolelu tami quelluaeteu.
18. Pu siervo ministerial, ¿chem mülei ñi femal?
18 Pu siervo ministerial, pu loncolelu, com pu peñi mülei ñi inayafiel taiñ inaduampeel tüfachi troquiñ mu (Filip. 3:16). Eimi, ¿siervo ministerialngeimi? Amulepe tami cüdaucülen. Llellipuafimi Jehová tami pepicayaeteu ñi doi cüme serfiafiel Jehová ca tati trahunche (Is. 64:8). Yafüluhuaimi tami loncolelungerpual trahunche mu, fei Jehová quelluaimu tati.
ÜLCANTUN 101 Quiñentrür cüdaucüleiñ
