TROQUIÑ ÑI CHILLCATUNGEAL 46
ÜLCANTUN 49 Ayühuelmafiyiñ Jehová ñi piuque
Peñi, ¿eluucülepeimi mai tami siervo ministerialngerpual?
“Tati llouquelu ñi elungeel niei ayühun. Huelu doi niei ayühun tati hulquelu ñi nieel” (HECH. 20:35).
¿CHEM QUIMAIÑ?
Chumafui pu peñi fautizaucülelu tañi doi cüpa quellual, fei tañi siervo ministerialngeal.
1. Pablo, ¿chem raquiduamquefui pu siervo ministerial mu?
PU SIERVO ministerial falinque cüdau femquei trahunche mu. Ti apostol Pablo falintuquefui tüfachi pu manelfal peñi. Huirintuculelfilu Filipos trahunche, chalifi pu loncolelu ca tañi pu quelluqueteu, siervo ministerial ca pingequelu (Filip. 1:1).
2. ¿Chum duamcülei Luis tañi siervo ministerialngen?
2 Tunten tripantu rume niele pu siervo ministerial, ayühunquechi femquei tañi cüdau. Quiñe peñi Devan pingelu mari pura tripantu nielu, feipingei tañi siervo ministerialngeal. Cangelu peñi Luis pingelu nielu doi 50 tripantu, siervo ministerialcünungei. Quisu feipi: “Rume ayühuleneu ñi quelluafiel pu peñi ca pu lamngen trahunche mu. Fei engün rume piuqueyeneu, feula iñche ca pengelafun ñi piuqueyefiel engün”. Fentren siervo ministerial ca femngechi raquiduamqueingün.
3. ¿Chem ramtun ngüneduamaiñ tüfachi troquiñ mu?
3 Peñi, eimi fautizaucülelmi, huelu siervo ministerialngenolmi, ¿yafüluhuafuimi tami nierpual feichi cüdau? ¿Chem quelluafeimu? Tami siervo ministerialngeal, ¿chem pilei Biblia tami femal? Tüfachi troquiñ mu huiñoldungungeai tüfachi ramtun. Huelu hune ngüneduamaiñ chem cüdau femquei pu siervo ministerial.
¿CHEM CÜDAU FEMQUEI TATI PU SIERVO MINISTERIAL?
4. ¿Chem cüdau femquei pu siervo ministerial? (Ca inaduamnge ti adentun).
4 Chau Jehová ñi nehuen quelluquei ñi dullingeal quiñe peñi fautizaucülelu tañi siervo ministerialngeal. Fei engün quelluquefi pu loncolelu ñi femal falinque cüdau trahunche mu. Quiñeque siervo ministerial adcünuquei cheu püle ñi amuldungungeal ca ñi müleal fillque revista ca lifru trahunche mu. Caquelu quelluntucuquei ñi liftungeal ca ñi cüme elcünungetual ti Trahunhue Ruca. Caquelu quelluquei ñi cüme allcütungeal com ti trahun ca ñi cüme pengeal fillque video. Pu siervo ministerial cüme hueniyefi ta Chau Jehová, piuqueyefi ca inaniequei tañi huercün dungu. Cafei rume piuqueyeniefingün tañi pu peñi ca lamngen (Mat. 22:37-39). Quiñe peñi fautizaucülelu, ¿chumafui tañi siervo ministerialngeal? Peafiyiñ.
Pu siervo ministerial eluucüleingün ñi quellucheal, femngechi inayentuquefi ta Jesús. (Inaduamnge parrafo 4).
5. ¿Chumafui quiñe peñi tañi siervo ministerialngeal?
5 Biblia feipi chem ñi femal pu peñi tañi siervo ministerialngeal (1 Tim. 3:8-10, 12, 13). ¿Chumafuimi tami nierpual feichi elfal cüdau? Cüme inaduamaimi tüfachi dungu ñi feipin Biblia ca doi cüdahuaimi tami huechurpual. Huelu hune ramtuunge: “¿Chemu ayünien tañi siervo ministerialngeal?”.
¿CHEMU AYÜNIEIMI TAMI SIERVO MINISTERIALNGEAL?
6. ¿Chumngelu ayünieimi tami serfiafiel pu peñi ca lamngen? (Mateo 20:28; ca inaduamnge ti adentun).
6 Quimtucunieaiñ ñi femün Jesús. Fei piuqueyefi tañi Chau ca ti pu che, feimu cümeque dungu femi. Cafei ñom piuque mu femi fillque cüdau tañi serfiafiel caquelu che (papeltunge Mateo 20:28; Juan 13:5, 14, 15). Ca femngechi piuqueyenieafimi ta Chau Jehová ca tati pu peñi ca lamngen. Femülmi, Jehová quelluaimu tami siervo ministerialngeal (1 Cor. 16:14; 1 Ped. 5:5).
Tañi femün mu, Jesús quimelelfi tañi pu apostol ñi cüdahuelafiel caquelu che ñom piuque mu. (Inaduamnge parrafo 6).
7. Quiñe peñi ayülelu ñi siervo ministerialngeal, ¿chumngelu ngelai tañi checahun-ngeal?
7 Pu poyequenofilu Jehová afmatulqueyu pu che checahun-ngelu, huelu Chau Jehová ñi pu che femquelai. Quiñe peñi piuqueyechequelu Jesús reque, quintuquelai tañi doicülelu troquingeal, fei ñi ngünenieafiel caquelu che. Ñi cüme adniengeal Chau Jehová ñi pu che, duamniengei ñi femal fillque cüdau. Huelu quiñe peñi checahun-ngele, eluulayai chi ñi femal feichi cüdau. “Iñche rume falin che, feitachi cüdau femquelan” piafui tañi raquiduam mu (Juan 10:12). Chau Jehová fürenelayafi quiñe che doicülelu troquiuquelu ca mallma piuquengelu (1 Cor. 10:24, 33; 13:4, 5).
8. Jesús, ¿chem ngülamtufi tañi pu apostol?
8 Quiñeque mu, Jesús tañi pu hueni ca ayüfuingün tañi elungeal falinque cüdau tañi doicülelu troquingeal. Ngüneduamaiñ ñi femün Santiago ca Juan. Feipifingu ta Jesús elumuyu falinque cüdau ngünenietulmi ta mapu pifi. Huelu Jesús ayülafi ñi feipin engu, doi mai feipifi tañi mari epu apostol: “Inei rume ayüle ñi doicüleal eimün meu, mülei ñi cüdahuelafiel ta caquelu che. Ca inei rume ayüle ñi huneleal eimün meu, quiñe esclavo reque mülei ñi cüdahuelafiel ta caquelu che” (Mar. 10:35-37, 43, 44). Ca femngechi, pu peñi ayünielu ñi quelluafiel pu peñi ca lamngen, cümelcayafi ti trahunche (1 Tes. 2:8).
¿CHEM QUELLUAIMU TAMI DOI CÜPA QUELLUAL?
9. ¿Chem quelluafeimu tami doi cüpa quellual?
9 Eimi piuqueyefimi ta Chau Jehová ca cüpa quellufimi pu peñi ca lamngen. Huelu pu siervo ministerial nieingün alün cüdau, feimu müte ayülayafuimi chi tami femürpual. ¿Chem quelluafeimu? Raquiduamaimi fente tami ayühual quellufilmi pu peñi ca lamngen. Jesús feipi: “Tati llouquelu ñi elungeel niei ayühun. Huelu doi niei ayühun tati hulquelu ñi nieel” (Hech. 20:35). Jesús inafi tüfachi ngülam. Rume ayühuleyu ñi quellufiel ta caquelu, eimi ca ayüucüleafuimi.
10. Jesús, ¿chumngechi pengeli ñi ayühunquechi quelluchequen? (Marcos 6:31-34).
10 Jesús pengeli ñi ayühunquechi quelluquefiel ta caquelu che (papeltunge Marcos 6:31-34). Quiñe rupa, Jesús ca tañi pu apostol cansalefuingün. Amuingün cañpüle tañi pichi ürcütual, huelu fentren che huneluhuingün cheu ñi puhual Jesús, fei tañi quimeltuaeteu. Jesús ca tañi pu apostol pepi ilafuingün rume. Feimu Jesús quimeltulayan piafui chi. Cam matu quimeltulelafui quiñeque dungu müten, fei feipiafui tañi amutual engün. Huelu femlai. Doi mai ñi piuqueyefiel mu pu che ca ñi cutranpiuqueyefiel, “eluhui ñi quimeltulelafiel fentren dungu”. Nagantülu hula fentecünui (Mar. 6:35). Felei llemai, tañi piuqueyefiel mu ayüfui ñi quimeltuafiel engün. Jesús rume ayüuquefui tañi quelluafiel ta caquelu che.
11. Jesús, ¿chumngechi quellufi tañi pu inanieteu? (Ca inaduamnge ti adentun).
11 Jesús quimeltulafi müten tati fentren che mülelu fei mu, ca elufi ñi duamnieel engün. Elufi iyael tañi pu discipulo ca feipifi ñi hudamcalelafiel (Mar. 6:41). Femngechi femlu Jesús, quimeltufi tañi pu discipulo chumngechi ñi quelluafiel ta caquelu. Cafei pengelelfi engün fente ñi falin-ngen femngechi cüdau. ¿Rume ayüucülepelafui tati pu discipulo quiñentrür cüdaulu Jesús engün? (Mar. 6:42). Jesús rumel doyümquefui caquelu che tañi cümelcaleal ca eluucülefui tañi quelluafiel (Mat. 4:23; 8:16). Jesús rume ayüucülefui tañi quimeltuafiel ta caquelu ca ñi quelluafiel engün. Fachantü, pu siervo ministerial femquei fillque cüdau ñi quelluafiel ta caquelu. Feimu eimi ca femngechi femülmi, rume ayüucüleafuimi Jesús reque.
Piuqueyefilmi ta Jehová ca pu peñi ca lamngen, quelluntucuaimi chem dungu mu rume. (Inaduamnge parrafo 11). a
12. ¿Chumngelu ngelai taiñ feipial “iñche pepi quellulayafun trahunche mu”?
12 “Quimlafun chumngechi ñi quelluntucual trahunche mu” pilayaimi. ¿Adümuucülepelaimi quiñeque dungu mu tami quelluntucual? Raquiduamnge chem feipi Pablo 1 Corintios 12:12-30. Fei llellipuafimi Jehová ñi puhual tami piuque mu. Pablo feipi caque quiñeque iñchiñ falin-ngeiñ trahunche mu, feimu eimi ca falin-ngeimi llemai ca rume quelluntucuafuimi. Feula petu pepicaucülenolmi tami siervo ministerialngeal, huesa duamlayaimi. Doi mai chem cüdau rume femaimi tami serfiafiel ta Jehová ca quelluafiel pu peñi ca lamngen. Pu loncolelu ngüneduamaingün chem adümuhun nieimi tami eluaeteu cüdau (Rom. 12:4-8).
13. ¿Chemu müte cüdaungelai ñi siervo ministerialngeal quiñe peñi?
13 Raquiduamaimi tüfachi dungu: Biblia feipilei chem ñi femal pu peñi tañi siervo ministerialngeal, huelu com pu cristiano mülei tañi ca femngechi femal. Com iñchiñ mülei taiñ cüme hueniyeafiel Jehová, ayühunquechi quellucheal ca ayühulafiel Chau Dios taiñ mongen mu. Femmequelmi, quiñeque dungu müten faltafui chi tami siervo ministerialngeal, ¿chuchi am? Inaduamafiyiñ.
¿CHUMAFUIMI TAMI SIERVO MINISTERIALNGEAL?
14. ¿Chem cüpa feipi “yamfal huentrungeal”? (1 Timoteo 3:8-10, 12).
14 Ngüneduamaiñ quiñeque dungu ñi feipin 1 Timoteo 3:8-10, 12 (papeltunge). Tati pu siervo ministerial “mülei ñi yamfal huentrungeal”. Tüfachi palabra ca rulpadungungeafui ñi “nor chengeal” ca “manelfal huentrungeal”. Tüfa feipilai tañi ayecadungunoal (Ecl. 3:1, 4). Huelu pu siervo ministerial mülei ñi cüme enturpual chem cüdau rume tañi elungeel. Eimi femngechi femülmi, manelfal che pingeaimi, fei com pu peñi ca lamngen respetayaimu.
15. 1) ¿Chem cüpa feipi epu rume dungunoal? 2) ¿Chem cüpa feipi diñmatunoal quisu ñi cümelcahual?
15 Pu siervo ministerial “ngelai ñi epu rume dungual”. ¿Chem cüpa feipi? Coilatufengelai engün, doi mai rüf dunguquei ca manelfalngequei tañi feipin. Huechunentuquei tañi feipin ca ngünenca dunguquelaingün (Prov. 3:32). Pu siervo ministerial ca femngechi “diñmatulayai quisu ñi cümelcahual”, fei engañachequelaingün negocian ca plata dungu mu. Feimu allmalltuquelai tañi pu hueni trahunche mu tañi doi nieal ta plata.
16. 1) ¿Chem cüpa feipi ñi ‘putufengenoal’? 2) ¿Chem cüpa feipi “nieal lif cüme raquiduam”?
16 Pu siervo ministerial ngelai ñi ‘putufengeal’, feimu ngüneuquei putun dungu mu ca rume putuquei pingequelai. Cafei “mülei ñi nieal lif cüme raquiduam” inaquelu cai Jehová tañi huercün dungu. Huelulcauquefuingün rume, huelu cüme hueniyefingün Jehová, feimu cüme duamcüleingün.
17. ¿Chumngechi ‘ngüneduamngequei ñi pepicaucülen’ quiñe peñi? (1 Timoteo 3:10; ca inaduamnge ti adentun).
17 “Ngüneduamngepe ñi pepicaucülepen mai ñi femal tüfachi cüdau”. ¿Chumngechi femngequei? Pu loncolelu ngüneduamquei tami cüme femquen tami cüdau ca tami manelfal chengen. Feimu pu loncolelu eluelmu cüdau, inayafimi tañi ngülam ca ñi feipin Jehová tañi troquiñche. Cüme ngüneduamaimi tami chumal ca chumül entuafiel chi cüdau. Cüme femülmi tami cüdau, pu peñi ca lamngen ngüneduamai tami femquen, fei doi manelaimu. Eimün pu loncolelu, pepicayafimün pu fautizaucülechi peñi (papeltunge 1 Timoteo 3:10). Tami trahunche mu, ¿mülei huechequeche cam pichiqueche deu fautizaucülelu? ¿Eluucülepeingün mai tañi papeltual Biblia ca tañi pepicahual trahun mu? ¿Huiñoldunguquepeingün mai trahun mu ca amuldunguchequeingün? Femle engün, eluafimi cüdau tañi pepi femafel, femngechi pu huechequeche pengelafuingün tañi manelfal chengen ca ñi pepicaucülen ñi femal fillque cüdau. Femngechi nierpule mari regle tripantu cam doi, siervo ministerialngerpuafui.
Pu loncolelu eluquefi cüdau pu peñi fautizaucülelu, femngechi pepicaquefi. (Inaduamnge parrafo 17).
18. ¿Chem cüpa feipi ‘peñmangenoal huesa dungu’?
18 Pu siervo ministerial mülei ñi peñmangenoal chem huesa dungu no rume. Inei no rume feipintuculayafeimu tami rüf conquen culpan dungu mu. Rüfcünu, pu cristiano coila dalluntucungequei quiñeque mu. Jesús ca dalluntucungei, fei feipicünui tañi pu inanieteu ñi ca femngechi femngeal (Juan 15:20). Huelu cüme femülmi Jesús reque, cüme nütramyengeaimi trahunche mu (Mat. 11:19).
19. Biblia feipilu ‘niepe quiñe domo müten’, ¿chem cüpa feipi?
19 Pu siervo ministerial “mülei ñi nieal quiñe domo müten”. Chau Jehová deumafilu ti curehuen, elcünui tañi niehual quiñe huentru quiñe domo engu. Ca femngechi mülei ñi femal com pu cristiano (Mat. 19:3-9). Quiñe cristiano turpu conlayafui pod cudumuhun mu (Heb. 13:4). Feimu mülei tami piuqueyeafiel tami domo müten. Ngelai tami daquelcantuafiel caquelu domo (Job 31:1).
20. ¿Chumquei quiñe peñi ‘ñi cüme adnieafiel tañi pu che’?
20 “Mülei ñi cüme adnieafiel tañi pu yall ca quisu tañi pu che”. Chau Jehová loncocünueimu tami familia mu, feimu mülei tami cüme femal. Fill semana mülei tami estudiayal Biblia tami pu che engün, fill rupa trür amuldungucheaimi tami domo ca tami pu yall engün. Quelluafimi tami pu fotüm ca ñahue ñi cüme hueniyeafiel ta Jehová (Efes. 6:4). Quiñe peñi femngechi femle, pengelafui tañi cüme cuidayafiel ti trahunche (ca ngüneduamafuimi 1 Timoteo 3:5).
21. ¿Chumafuimi tami siervo ministerialngerpual?
21 Peñi, eimi petu siervo ministerialngenolmi, hune llellipuafimi ta Jehová, fei cüme ngüneduamaimi taiñ peel tüfachi troquiñ mu. Ngüneduamaimi ñi feipin Biblia ñi siervo ministerialngeal, fei yafüluhuaimi tami femngechi chengerpual. Raquiduamaimi fente tami piuqueyeniefiel ta Chau Jehová ca tami pu peñi ca lamngen. Doi piuqueyefilmi ti trahunche, doi cüpa quelluaimi (1 Ped. 4:8, 10). Siervo ministerialngerpulmi, rume ayüucüleaimi tami cüdahuelfiel pu peñi ca lamngen. Chau Jehová quelluaimu tami femürpual (Filip. 2:13).
ÜLCANTUN 17 ¡Mai, ayün!
a ¿CHEM PENGELI TI ADENTUN? Huele püle, Jesús cüdahuelfi tañi pu inanieteu ñom piuque mu. Man püle, quiñe siervo ministerial quellufi quiñe peñi füchalelu.
