TI SEGUNDA Guerra Mundial mu quiñe soltau nazi feipifi quiñeque Dunguquelu Ineingen Jehová: “Quehuatunofilmün Francia cam Inglaterra, langümngeaimün”. Püllelelu rume pu soltau nazi, quiñe testigo rume eluulaingün tañi quehuatual. Rume cümecünuingün. Ñi femün mu pu testigo cuifi, pengeli chem raquiduamqueiñ iñchiñ famülque mu tati hueichan mu. Tunte üyautungeliyiñ rume, iñchiñ conquelaiñ hueichan mu.

1. CHAU DIOS ÑI PU CHE QUIÑEUCÜLEI QUIÑE TROQUIÑCHE MU

Cuifi mu, Jehová dullifi pu Israel che quisu tañi troquiñchengeal. Jehová feipifi pu Israel che: ‘Eimün iñche tañi saquin pu che com tati troquiñ mapu mu’ (Éx. 19:5). Cafei Dios elufi mapu caque quisuque tañi ngen-ngeal. Feimu hueichan mu quehuatulafingün pu poyequefilu Jehová, huelu mai quehuatuquefingün poyequenofilu Jehová. a

Famülque mu, Jehová ñi pu che “itrofill troquiñche mu tuhui, itrofill tuhun niei, itrofill mollfüñ niei ca fillque quehun dunguquei” (Apoc. 7:9). Feimu Chau Dios ñi pu che famülque mu coneltuquele hueichan mu, langümtucuafui caquelu poyequefilu Jehová.

2. JEHOVÁ HUERCÜQUEFUI PU ISRAEL CHE ÑI HUEICHAYAL

Cuifi mu, Jehová feipiquefui pu Israel che chumül ñi amual hueichan mu ca chumngelu.  Por ejemplo, Jehová feipifi pu Israel che ñi hueichayafiel pu Canaán che. Fei engün am femquelu Jehová ñi üdequeelchi dungu, poyequefuingün huesaque püllü, femquefuingün ünufal cudumuhun ca langümtucuquefuingün pichiqueche ñi poyeafiel coilaque Dios. Feimu Jehová feipifi pu Israel che ñi langümafiel pu Canaán che. Femngechi ñi femequehuenoal huesaque dungu ca pu Israel che ñi inaconnoal (Lev. 18:24, 25). Cafei pu Israel che mülelu ti cüme mapu mu ñi elueteu Jehová, quisu eluñmaeyu engün tañi chaftuafiel tañi pu caiñe (2 Sam. 5:17-25). Huelu pu Israel che quisu ngüneunoafel tañi hueichayal. Jehová müten mülefui ñi feipiaeteu chumül ñi hueichayal. Quisu ngünehun mu hueichaingün, huesa tripaquefui (Núm. 14:41-45; 2 Crón. 35:20-24).

Famülque mu, Jehová feipiquelafi tati pu che tañi hueichayal. Fentren pais hueichaqueingün quisu engün tañi ayüelchi dungu. Por ejemplo, hueichaqueingün tañi nieal doi fentren mapu cam tañi huehual plata. Ca hueichaqueingün tañi quiñeucülenon mu politico dungu mu. Huelu quiñequentu hueichaqueingün Dios tañi üi mu, femngechi ñi incayal tañi religion cam ñi langümafiel Dios ñi pu caiñe. Huelu Jehová ayüñmaquelaeyu tañi femün engün, ¿chumngelu am? Jehová deu feipicünui quisu ñi incayafiel tañi pu che, huelu ñi apümcayafiel tañi pu caiñe cüpalechi antü meu Armagedón hueichan mu (Apoc. 16:14, 16). Feichi mu pu cümeque püllü müten hueichayai, pu che no (Apoc. 19:11-15).

3. PU ISRAEL CHE LANGÜM­QUELAFUINGÜN DIOS MU FEYENTULELU

Cuifi mu, Jehová feipilu ñi langümngeal quiñe troquiñche, pu Israel che langümquefuingün. Huelu montulquefingün com pu feyentulelu Jehová mu. Por ejemplo, Jehová feipifi pu Israel che ñi apümcayafiel Jericó huaria. Huelu pu Israel che montulfingün ta Rahab ca tañi  familia ñi feyentun mu Jehová mu (Jos. 2:9-16; 6:16, 17). Rupachi tripantu mu, pu Gabaón che montulngeingün tañi mongen tañi feyentun mu Jehová mu (Jos. 9:3-9, 17-19).

Famülque mu, hueichan mu langümngequei Dios mu feyentulelu rume ca laquei fentren che chumconcülenolu rume.

4. JEHOVÁ ADÜMEL­CÜNUQUEFUI PU ISRAEL CHE ÑI CHUMAL HUEICHAN MU

Cuifi mu, Jehová adümcünulelquefui pu soltau ñi chumal engün hueichan mu. Por ejemplo, quiñeque mu Jehová feipifi tañi pu soltau ñi cümelcaucüleal engün pu caiñe mu (Deut. 20:10). Jehová ca feipifi pu soltau tañi lifcüleal engün (Deut. 23:9-14). Ca feipifi pu soltau hueichafile engün tañi pu caiñe ñi nüntunoafiel tati pu domo. Fei hueichan mu pu Israel che hueufilu quiñe huaria ca quiñe huentru ayüfule ñi nieafiel quiñe domo feiti huaria mu mülelu, mülefui ñi üngümal quiñe cüyen (Deut. 21:10-13).

Famülque mu, quiñequentu pais nieingün quiñeque leyes tañi inangeal hueichan mu. Femngechi mu ñi cuñiutucuafiel tati pu che. Huelu feitachi ley feyentungequelai.

5. CHAU DIOS QUELLUQUEFUI PU ISRAEL CHE ÑI HUEHUAL HUEICHAN MU

Cuifi mu, hueichan mu Jehová compañquefi ca quelluquefi pu Israel che tañi huehual engün. Por ejemplo, Jehová quellufi engün ñi müntunentuafiel Jericó huaria. Pu Israel che huiraringün, fei tati fütra cura malal teifünagi (Jos. 6:20). Jehová ca quellufi pu Israel che ñi huehuafiel pu amorreos, ¿chumngechi am? Jehová ütrüfnacümpai fütraque pire cura quechilelu, femngechi langümi fentren che (Jos. 10:6-11).

PU RÜFNGECHI CRISTIANO CÜMELCAU­CÜLEQUEI COM CHE ENGÜN

Iñchiñ taiñ mülen antü trürlai Israel tañi antü meu. Deu inaduampeiñ chumngelu amuquelaiñ hueichan mu, huelu ca dungu mülei. Por ejemplo, Chau Dios feipicünui ti afaelchi antü mu tañi pu che conlayai hueichan mu (Is. 2:2-4). Jesús ca feipi tañi pu inanieteu trürlayai caquelu pu che poyequenofilu Jehová. Ca coneltulayaingün politico dungu mu (Juan 15:19).

Jesús ca feipifi tañi pu inanieteu ñi üdefechengenoal ca ñi illcufemnoal engün (Mat. 5:21, 22). Jesús ca quimeltufi tañi pu inanieteu ñi cümelcaucüleal com che engün ca ñi piuqueyeafiel tañi üdequeteu (Mat. 5:9, 44).

¿Chem quimeltueiñmu tüfa? Iñchiñ ayülaiñ amual hueichan mu. Huelu quiñe taiñ peñi cam lamngen trahunche mu, ¿peafuiñ taiñ caiñe reque? Feimu famentuafiyiñ feitachi raquiduam (Sant. 4:1, 11).

Iñchiñ coneltuquelaiñ ta hueichan mu. Iñchiñ ayüqueiñ taiñ cümelcaucüleal ca taiñ piuqueyehual com iñchiñ (Juan 13:34, 35). Feimu coneltuquiliyiñ hueichan mu. Acuai chi antü Jehová ta apümcayafi com tati hueichan (Sal. 46:9).