1. Pu cuifique poyequefilu Jehová, ¿cheu entui tañi nehuen?

 BIBLIA nütrami fentren poyequefilu Jehová ñi nieel yafüluhun. Huelu quiñeque mu, nehuen-ngenolu troquihuingün. Femngechi rupai ti rey David. Quiñeque mu, nehuen-ngefui “fütra huincul reque”, huelu ca rupa yafüngehuelafui, “müna llicaletun” pifui (Sal. 30:7). Cafei Sansón fütra nehuen-ngefui Chau Dios ñi quellun mu. Huelu ca quimniefui nienolu Jehová ñi nehuen, ‘ngañhuadcüleafui com caquelu huentru reque’ (Juec. 14:5, 6; 16:17). Tüfachi pu huentru, ¿cheu entui tañi nehuen? Chau Jehová mu llemai.

2. Ngañhuadcülelu Pablo, ¿chumngechi nehuencontui? (2 Corintios 12:9, 10).

² Ti apostol Pablo ca duamniefui Jehová ñi nehuen tañi yafüluucüleal (papeltunge 2 Corintios 12:9, 10). Pablo ca cutrancülefui (Gál. 4:13, 14). Quiñeque mu, cüdautuquefui ñi cüme femal (Rom. 7:18, 19). Ca quiñeque mu, fill raquiduamcülefui ca llicalequefui chem dungu ñi rupayal (2 Cor. 1:8, 9). Huelu ngañhuadcülelu rume, nehuencontui. ¿Chumngelu cai? Jehová elueyu nehuen ñi chaftuafiel huesaque dungu ñi rupan.

3. ¿Chem peaiñ tüfachi troquiñ mu?

³ Jehová ca feipi taiñ nehuentucuaeteu iñchiñ (1 Ped. 5:10). Huelu Jehová taiñ eluaeteu tañi nehuen, re anücünuulayaiñ müten, duamfali taiñ yafüluhual. Raquiduamnge  tüfa: deumacofquelmi, duamnieimi cüme rüngo ca cüme lefaura, huelu fei müten no. Ñi cüme tripayal ti cofque duamfali ñi nehuen mu cuhutuafiel. Ca femngechi ñi llohual Jehová ñi nehuen, duamnieiñ nehuen mu ñi quintuafiel tañi quellu. Tüfachi troquiñ peaiñ chem quellu elueiñmu Jehová taiñ nehuentuleal, ca chumaiñ taiñ llohual Jehová ñi nehuen. Cafei ngüneduamaiñ chumngechi Jehová yafültucufi Jonás, María ca Pablo, ca chumngechi quelluqueiñmu famülque mu.

4. ¿Chumaiñ taiñ llohual Jehová tañi nehuen?

⁴ ¿Chumaiñ taiñ llohual Jehová tañi nehuen? Llellipuqueafiyiñ ta Jehová, fei quisu eluaiñmu taiñ nehuentuleal (2 Cor. 4:7). Cafei papeltuqueafiyiñ tati Biblia ca raquiduamaiñ taiñ papeltupeel mu (Sal. 86:11). Chau Dios ñi huercün dungu “nehuen-ngei” (Heb. 4:12). Feimu ngillatulmi ca papeltufilmi Biblia, Jehová nehuentucuaimu. Femngechi ayühun mu serfiafimi ca huechunentuaimi chem cüdau rume tami elfalcünungeel. Feula peaiñ chumngechi Jehová yafültucufi ta Jonás.

5. ¿Chumngelu Jonás duamniefui ñi nehuentuleal?

⁵ ¿Chumngelu Jonás duamniefui ñi nehuentuleal? Jehová elfalcünueyu quiñe falin cüdau, huelu llicai. Fei cañpüle amutui, farcu mu pürapui. Ñi femün mu Jonás, tripai quiñe cürüftucu mahun, fei epe laingün com pu mülelu farcu mu. Fei pu cüdauquelu farcu mu lafquen mu ütrüfentufingün ta Jonás, fei quiñe fütra challhua ñi pütra meu puhui, com dumiñcülefui. ¿Llicapelafui Jonás? ¿Layan pipelai? ¿Quisucünueneu Jehová raquiduampelai? Feimu Jonás duamniefui nehuen.

6. ¿Chem quellueyu Jonás ñi nehuentuleal? (Jonás 2:1, 2, 7).

⁶ Jonás quisulefui ti fütra challhua ñi pütra meu, fei ¿chumi ñi nehuencüleal? Llellipufi ta Chau Jehová (papeltunge Jonás 2:1, 2, 7). Jonás feyentulafi ta Jehová, huelu repentiutui. Feimu maneluhui Jehová tañi allcütuaeteu. Jonás ca raquiduami Chau Dios ñi Dungu mu. ¿Chumngechi quimafuiñ tüfa? Ñi llellipun huirintucungelu Jonás capitulo 2 mu, trürümafuiñ ñi feipin tati Salmo. Feimu Jonás cüme quimürquei ñi chem pin ti lifru Salmos (ngüneduamnge ñi feipin Jonás 2:2, 5 ca Salmo 69:1; 86:7). Fei tüfa quellueyu ñi maneluhual Jehová ñi eluaeteu nehuen. Fei Jehová montuleyu tañi huesa rupan mu, fei hula pepicaucülefui ñi femürpual tañi elfalcünungeel (Jon. 2:10–3:4).

7, 8. ¿Chem quellueyu quiñe peñi ñi nehuentuleal rupalu cüdaungechi dungu?

⁷ Jonás ñi rupan yafültucueiñmu rupaliyiñ cüdaungechi dungu mu. Peaiñ ñi rupan quiñe peñi Taiwán mapu tuulu, Zhiming pingelu. b Rume cutrancülei ca tañi pu che catrütueyu ñi serfiafiel ta Chau Dios. ¿Chumquei ñi llohual Chau Jehová ñi nehuen? Ngillatuquei ca papeltuquefi tati Biblia. Feipi: “Quiñeque mu, fente tañi cutrantupiuquelen, pepi papeltuquelafiñ Biblia”. Huelu quisu afeluuquelai. “Hunelu mu ngillatuquefiñ ta Jehová” pi. “Ca allcütuquefiñ fillque ül  ñi püramyengeal Jehová, quiñeque mu ülcantuquefiñ. Cüme duamlu hula, fei eluuquen ñi chillcatuafiel Biblia”.

⁸ Taiñ peñi ñi papeltun Biblia eluqueyu nehuen. Quiñe rupa deu operangelu, ¿duampelayaimi ñi tuculelngeal mollfüñ? pingei. ¿Chem quellueyu taiñ peñi? Petu ñi operangenon, papeltui chem ñi rupan quiñe lamngen operangelu fei reque. Ti lamngen doi cutrancülefui, huelu tuculelngelai mollfüñ ca cüme tremotui. Papeltufiel feichi nütram, yafültucufi taiñ peñi ñi inayal Jehová ñi feipin.

9. Rupaliyiñ quiñe huesa dungu, ¿chumaiñ taiñ nehuentuleal? (Ca inaduamnge ti adentun).

⁹ Rupan mu quiñe huesa dungu, yafüngehuelayafuiñ. Pepi ngillatulayafuiñ chi ca cüdautuafuiñ chi taiñ papeltuafiel Biblia. Jehová cüme quimniei taiñ rupamequen. Alüñmanole rume taiñ ngillatuqueel, maneluhuafuiñ taiñ allcütuñmayaeteu (Efes. 3:20). Fente taiñ cutrancülen cam hueñancülen, doi cüdaungeafui taiñ papeltual ca estudiayal. Feimu cümeafui taiñ allcütual ti papeltun Biblia grabangelu cam taiñ fillque papel. Ca cümeafui allcütual quiñe ayüfalchi ül ca peal fillque video mülelu jw.org. Ngillatufiliyiñ ta Jehová ca ngüneduamliyiñ chem quellu taiñ elueteu, “füreneen eluen nehuen” feipimequeiñ.

10. Taiñ pu peñi ca lamngen, ¿chumngechi nehuentuqueiñmu?

¹⁰ Chau Jehová ñi duam mu, pu peñi ca lamngen eluqueiñmu nehuen. Rupaleliyiñ cüdaungechi dungu ca pepi femnoliyiñ quiñe elfal cüdau, taiñ pu peñi ca pu lamngen ‘rume yafültucuqueiñmu’ (Col. 4:10, 11). “Mülen mu hueñancün” doi duamtuquefiyiñ taiñ pu hueni (Prov. 17:17). Ngañhuadcüleliyiñ, ¿chumngechi quelluqueiñmu taiñ pu peñi, pu lamngen? Eluqueiñmu taiñ duamnieel, yafültucuqueiñmu ca quelluqueiñmu ñi serfinieafiel Jehová. Femngechi quellungei ta María, Jesús ñi ñuque. Peaiñ.

11. María, ¿chumngelu duamniefui nehuen?

 ¹¹ María duamniefui nehuen ñi inayal Jehová ñi feipin. Ti cüme püllü Gabriel feipifi ta María ñi niepüñeñal petu ñi fütangenon. María, ¿fill raquiduamcülefui peno? Quimlafui chumngechi ñi tremümafiel quiñe pichiche, huelu feula ti Mesías ñi ñuquengearquelu. Ca mülefui ñi feipiafiel tañi novio José ñi niepüñencülen. Fütra cüdaungechi dungu rupafui María (Luc. 1:26-33).

12. ¿Chumngechi nehuentucungei ta María? (Lucas 1:39-45).

¹² ¿Cheu entui nehuen ta María? Eluhui ñi quellungeal. Feipifi ta Gabriel ñi quelluaeteu, femngechi ñi doi quimafiel ti dungu tañi elfalcünungeel (Luc. 1:34). Cafei müchai müten pemefi tañi pariente Elisabet, fei amui “huinculcülechi mapu püle” Judá mapu mu. Puulu üyeu Elisabet saquieyu, ca feipieyu Jehová ñi feipicünuel (papeltunge Lucas 1:39-45). Feimu María feipi Jehová “afmatun dungu femquei quisu tañi nehuen meu” (Luc. 1:46-51). Gabriel ca Elisabet meu, Jehová nehuentucufi ta María.

13. Eluulu ñi quellungeal, ¿chum duamcületui Dasurí?

¹³ Chumngechi ñi rupan María, iñchiñ ca yafültucuafeiñmu taiñ pu peñi, pu lamngen. Peaiñ ñi rupan ti lamngen Dasurí, Bolivia mapu tuulu. Cutrani tañi chau, pital mu coni, layaimi pingei. Ñi cüme ñahuengen, cüpa dapifi tañi chau (1 Tim. 5:4). Huelu cüdaungefui, “pepil-layan” pi. Ellaca mu, ayülafui ñi quellungeal. “Feipilayafiñ inei no rume tañi rupamequen. Jehová müten quelluaeneu” pifui. “Fei hula ngüneduamün eluunolu iñche ñi quellungeal, fei quisutu chaftumequefiñ tüfachi huesa dungu” (Prov. 18:1). Feimu Dasurí feipifi tañi pu hueni chem ñi rupamequen. Quisu feipi: “Afmatulehuen fente tañi quellueteu tañi pu poyen lamngen. Pital mu cüpalelngen iyael ca yafültucupaeneu engün Biblia ñi feipin mu. Ayühun-ngei ñi quimal ñi quisulenon, com coneltuleiñ Chau Jehová ñi fütra familia mu. Taiñ pu lamngen cüpa quelluqueiñmeu, ina ngümaqueingün iñchiñ engu, yafültucuqueiñmeu taiñ quiñentrür poyeafiel ta Jehová”.

14. ¿Chumngelu mülei ñi llohual pu loncolelu ñi quellu?

¹⁴ Jehová ca adniequefi pu loncolelu taiñ nehuentucuaeteu, fei elcünufi engün taiñ yafültucuaeteu (Is. 32:1, 2). Feimu cüme duamcülenolmi, nütramcafinge engün. Llounge tañi quellu, femngechi Jehová nehuentuaimu.

15. ¿Chem ayüfalchi maneluhun nieingün pu cristiano?

¹⁵ Ti maneluhun Biblia mu cüpalu nehuentuqueiñmeu (Rom. 4:3, 18-20). Com pu cristiano maneluuqueingün ñi rumel mongeleal: quiñeque huenu meu, caquelu mapu meu. Tüfachi maneluhun nehuentuaiñmeu ñi chaftuafiel fill huesaque dungu, ñi amuldungual Chau Dios ñi cümeque dungu ca ñi huechunentual elfal cüdau trahunche mu (1 Tes. 1:3). Peaiñ chumngechi tüfachi maneluhun yafültucufi ti apostol Pablo.

16. Pablo, ¿chemu duamniefui ñi nehuentuleal?

¹⁶ Pablo duamniefui ñi nehuentuleal. Ti carta ñi huirintucufiel pu Corinto che, Pablo feipi ñi yafüngenon quiñe metahue reque. Pablo ca feipi ñi hualloñmanieteu fill huesaque dungu.  Quiñeque mu, ‘cüme quimlafui tañi chumal, inantucungei ca famnacümngei’, quiñeque mu, epe larpui (2 Cor. 4:8-10). Cülachi rupa ñi amun Pablo ñi misionerongen huirintucui tüfachi dungu. Rupalechi antü, doi huesaque dungu mu rupai: lefcontueyu pofolcalechi che, presungei, ñamconi lafquen meu, fei epe lai ca carceltucungei.

17. Pablo, ¿cheu entui tañi nehuen? (2 Corintios 4:16-18).

¹⁷ Pablo, ¿cheu entui nehuen? Raquiduami tañi nieelchi maneluhun (papeltunge 2 Corintios 4:16-18). Pablo huesalcalefulu rume tañi cuerpo, huelu afeluulai. Raquiduami ñi chumlerpual tañi mongen cüpalechi antü mu, rume falintufi tañi maneluhun ñi rumel müleal huenu mu. Feimu eluucülefui ñi chaftuafiel chem dungu rume puule hula ñi llohual tañi cümelcan. Pablo raquiduamtucuniefi tañi maneluhun, feimu “fill antü huengequetui” tañi piuque ca tañi raquiduam.

18. Tíjomir ca tañi pu che, ¿chumngechi quellueyu ñi maneluhun?

¹⁸ Quiñe peñi Tíjomir pingelu, Bulgaria mapu mu, rume nehuentucueyu tañi maneluhun. Quiñeque tripantu yeniei ñi lan tañi inan peñi, fei müna cutrantupiuquelefui. Tíjomir ca tañi pu che, ¿chem quellueyu ñi hueñancülen mu? Raquiduamingün ti huiñomongetun. Taiñ peñi feipi: “Nütramcaqueiñ huiñomongetule tañi peñi, fiestayaiñ. Ca feipiqueiñ cheu llohuafiyiñ, chem iyael pepicalelafiyiñ, inei compañaiñmu ca chem feipiafiyiñ ñi rupan afaelchi antü mu”. Piuquentucuniefiel ti huiñomongetun, quelluqueyu Tíjomir ca tañi pu che ñi nehuentuleal, ca ñi llihuatuleal huiño petufile hula tañi peñi.

19. ¿Chumafuimi tami doi maneluhual? (Ca inaduamnge ti adentun).

¹⁹ ¿Chumafuimi tami doi maneluhual?  Maneluhulmi ñi rumel mongeleal mapu meu, papeltunge Biblia ñi feipin chi hue mapu mu ca raquiduamnge tami mülen üye mu (Is. 25:8; 32:16-18). ¿Peyeniehuimi hue mapu mu? ¿Inei pequefimi? ¿Chem allcütuqueimi? ¿Chum duamimi? Femngechi ramtuhulmi, quelluaimu tami raquiduamal ti hue mapu mu. ¿Ca chem quelluafeimu? Peafuimi ti adentun tripalu taiñ fillque publicacion mu, ca fillque video nielu musica. Quiñeque tüfa: Peyeniehuaiñ tati hue Mapu mu, Pichiñma mu akuay ti Küme Mülewe ca Raquiduamnieafiyiñ tati hue Mapu. Huimtuleliyiñ ñi raquiduamal chumleai taiñ mongen ti hue mapu mu, taiñ cutrancahun “pichiñmayai müten” troquihuaiñ (2 Cor. 4:17). Chau Jehová ñi elueteuchi maneluhun nehuentucuaiñmu.

20. Ngañhuadcüleliyiñ, ¿cheu entuafuiñ nehuen?

²⁰ Ngañhuadcüleliyiñ rume, “Chau Dios ñi duam mu nieaiñ nehuen” (Sal. 108:13). Taiñ nehuentuleal, Jehová elueiñmeu com taiñ duamnieel. Feimu cüdaungele ñi femürpual quiñe elfal cüdau cam chaftuliyiñ quiñe huesa dungu, ¿chumaiñ ñi serfinieafiel Jehová ayühun mu? Ngillatuqueaiñ ca papeltuqueaiñ ta Biblia, femngechi llohuaiñ Jehová ñi quellu. Eluucüleaiñ taiñ quelluaeteu pu peñi, pu lamngen ca raquiduamtucunieaiñ taiñ maneluhun. Femngechi Chau Ngünechen ñi nehuen mu, llohuaiñ taiñ ‘duamnieelchi nehuen. Femngechi chem rupale rume, ayühunquechi amuleaiñ ñochi duam mu’ (Col. 1:11).