TROQUIÑ ÑI CHILLCATUNGEAL 39
Quiñe che huemünentungele trahunche mu, ¿chumafuiñ?
Fentrenque rupa hueñancülfingün ta Chau Dios (SAL. 78:40, 41).
ÜLCANTUN 102 Quelluafiyiñ tati pu ngañhuadcülelu
¿CHEM QUIMAIÑ? *
1. Huemünentungele quiñe che trahunche mu, ¿chum duamquei pu ngen familia?
QUIÑE familia mu quiñe che huemünentungele trahunche mu, pu ngen familia rume fentren hueñancün nieafuingün. Quiñe lamngen Hilda * pingelu feipi: “41 tripantu yeniefuyu tayu cureyeucülen tañi füta iñchiu, fei lai tañi füta. Lalu tañi füta rume huesa dungu mu rupafun. Huelu quiñe antü, tañi püñeñ elcünufi ti trahunche ca elcünufi tañi domo ca tañi pu yall. Fei trürümlafiñ chem dungu mu rume” pi taiñ lamngen.
Quiñe taiñ pu che püntütripale Jehová mu, Jehová quimniei ñi hueñancün-ngen tüfa. (Inaduamnge parrafo 2 ca 3). *
2, 3. ¿Chum duamquei Jehová quiñe che huemünentungen mu trahunche mu? (Salmo 78:40, 41).
2 Raquiduamnge chumngechi ñi fente huesa duamün ta Jehová elcünuelumu tañi pu püllü. Müna hueñancüpelafui (Judas 6). Ca raquiduamün-ngei müna cutrantupelafui ta Jehová fentrenque rupa tañi feyentunoeteu mu pu israelita (papeltunge Salmo 78:40, 41). Feimu eimi reque, Jehová ca müna hueñancüquei huemünentungen mu quiñe che trahunche mu. Feimu Jehová eluaimu yafüluhun ca quelluaimu.
3 Feimu huemünentungele quiñe taiñ pu che trahunche mu, ¿chumafuiñ taiñ quelluaeteu ta Jehová? Ca ¿chumngechi quelluafuiñ ta caquelu che niele quiñe familia huemünentungelu trahunche mu? Tüfachi troquiñ mu inaduamafiyiñ. Huelu hune peafiyiñ chem huesaque raquiduam mülei taiñ famentuafiel.
CULPATUULAYAIMI
4. Quiñe yall elcünufiel mu ta Jehová, ¿chum duamquei pu chau ca pu ñuque?
4 Pu yall elcünufiel mu ta Jehová, fentrenque chau ramtuuquei: “¿Ca chem mülefui tañi femal tañi elcünunoafiel Jehová engün?”. Peaiñ ñi rupan taiñ peñi Lucas. Tañi fotüm huemünentungefui trahunche mu. Taiñ peñi feipi: “‘Iñche ñi culpan mu’ piquefun. Cüme umautuquelafun. Feimu fente tañi hueñancün mu ngümacauquefun ca cutrantuquefui tañi piuque”. Taiñ lamngen Elizabeth ca femngechi dungu mu rupai, fei feipi: “Iñche ramtuuquefun ‘¿chemu huesa femün?’. Ca raquiduamquefun com cüme dungu ñi quimeltunofiel tañi püñeñ” pi taiñ lamngen.
5. ¿Inei niei tati culpa quiñe che ñi serfihuenofiel mu ta Jehová?
5 Quimtucunieaiñ: caque quiñeque iñchiñ Jehová elueiñmu taiñ dullial taiñ serfiafiel cam taiñ serfinoafiel. Quiñeque hueche tañi pu chau cüme quimeltulaeyu chumngechi ñi cüme serfiafiel ta Jehová, huelu quisu eluhuingün ñi serfiafiel. Huelu caquelu pu hueche cüme quimeltueyu engün tañi pu chau, femngechi mu rume eluulaingün ñi serfiafiel ta Jehová. ¿Chem quimeltuqueiñmu tüfa? Quisuque iñchiñ dulliaiñ taiñ serfiafiel ta Jehová cam taiñ serfinoafiel (Jos. 24:15). Feimu eimün pu chau, nielmün quiñe yall serfihuenofilu ta Jehová, culpatuulayaimün.
6. Pu chau serfihuenofiel mu ta Jehová, ¿chum duamafui pu yall?
6 Fentrenque yall respetaquefi ca inayentuquefi ñi femqueel tañi pu chau. Huelu tati pu chau püntütripayafuingün Jehová mu ca elcünuafuingün tañi pu che (Sal. 27:10). Tüfa müna hueñancülafeyu tati pu yall. Peaiñ ñi rupan ta Ester. Tañi chau huemünentungei trahunche mu. Ester feipi: “Tañi chau quisu tañi duam mu eluhui ñi serfihuenoafiel ta Jehová. Tüfa hueñancüleneu, fei rume ngümaquefun. Iñche piuqueyefiñ tañi chau, fei huemünentungelu raquiduamcülequen tañi chumlen. Müna huesa duamquefui tañi piuque”.
7. Quiñe hueche huemünentungele quiñe tañi pu chau trahunche mu, ¿chum duamquei Jehová ti hueche mu?
7 Pu hueche, quiñeque tamün pu chau huemünentungele trahunche mu, rume hueñancüleiñ eimün meu. Ca Jehová fente cüme quimniei tamün hueñancülen. Eimün fentecünulaimün tamün serfiafiel Jehová, feimu Jehová ayüucülei ca rume piuqueyeimünmu. Ca femngechi iñchiñ trahunche mu ayüucüleiñ. Loncontucunge: chumngechi taiñ ngüneduampeel, Jehová elueiñmu quisuque iñchiñ taiñ dullial taiñ poyeafiel cam taiñ poyenoafiel. Feimu tami pu chau eluule ñi serfihuenoafiel ta Jehová, eimi echaculpaulayaimi (Gál. 6:5).
8. Quiñe tami pu che petu huiñotunole trahunche mu, ¿chumafuimi? (Inaduamnge ti huichulechi dungu “ Huiñotunge Jehová mu”).
8 Huemünentungele quiñe tami pu piuqueyenieelchi che trahunche mu, raquiduamcülequeimi quiñe antü ñi huiñotual trahunche mu. Huelu petu acunole feichi antü, ¿chumafuimi? Eluunge tami doi cüme hueniyeafiel ta Jehová ca famentuulayaimi quisu mu. Femlimi, tami pu che ca feiti huemünentungelu cütu inayentuafeimu tami cüme femün. Ca femngechi nehuentuleaimi tami chaftuafiel tami huesa rupamequen. Feula peafiyiñ chem femafuimi tami doi cüme hueniyeafiel Jehová.
¿CHUMAFUIMI TAMI HUENIYENIEAFIEL JEHOVÁ?
9. ¿Chumafuimi tami cüme hueniyeafiel Jehová? (Inaduamnge ti huichulechi dungu “ Quiñeque troquiñ Biblia tami rüf quelluafeteu”).
9 Chumaimi rume tami doi cüme hueniyeafiel Jehová. Ca quelluafimi tami pu che ñi ca femngechi femal. ¿Chumngechi femafuimi? Papeltuafimi ta Biblia ca raquiduamaimi tami papeltuel mu, ca femngechi faltalayaimi ta trahun mu. Peaiñ ñi rupan ta Joanna. Tañi chau ca tañi lamngen poyehuelafingu Jehová. Fei feipi: “Iñche ngüneduamquen ñi rupan Abigaíl, Ester, Job, José ca Jesús. Tüfa tüngduameleneu. Tañi rupan engün nehuentucuqueneu ca quelluqueneu ñi cüme raquiduamal. Ca femngechi allcütufiel mu ti fillque ülcantun, müna yafültucuqueneu”.
10. ¿Chumngechi quelluafeimu ñi feipin Salmo 32:6-8?
10 Feipiafimi ta Jehová com tami huesa raquiduamelnieteu. Huesa rupamequelmi, ngillatunieafimi ta Jehová. Pediafimi Jehová tami quelluaeteu tami cüme raquiduamal quisu reque, tami quim ngüneduamal ca tami quelluaeteu quimal chem tami femal (papeltunge Salmo 32:6-8). Cüdautuafuimi chi tami feipiafiel ta Jehová tami huesa duamcülen, huelu Jehová quimniei tami huesa rupamequen. Quisu piuqueyenieimu ca feipieimu tami nütramcayafiel müten (Éx. 34:6; Sal. 62:7, 8).
11. Ñi feipin Hebreos 12:11, ¿chumngelu cümei ñi huemünentungeal quiñe che culpalu? (Inaduamnge ti huichulechi dungu “ Huemünentungen mu quiñe che, Jehová pengelqueiñmu taiñ piuqueyenieteu”).
11 Quelluntucuaimi ñi feipin tati pu loncolelu. Huemünentungen mu quiñe che trahunche mu, müna quelluafui tati trahunche. Huelu ca müna quelluafui tati culpalu, ¿chumngelu? Femngechi Jehová quelluqueyu ñi norümtual tañi mongen. Biblia feipi: “Rüfcünu mai, inei no rume ayüucülequelai tañi norümtungeel, doi mai hueñancün-ngei. Huelu tati pu eluucülelu ñi doi quimal, müna cümelcaqueyu, fei nieafuingün nor mongen ca cüme felen” (Hebreos 12:11, TNM). Huemünentungen mu quiñe che trahunche mu, quiñeque pu peñi ca pu lamngen feipiafuingün: “Cümecünulai ñi femün pu loncolelu”. Huelu feichi pu che feipiquelu feita, feipiquelaingün com ñi chumün tati culpalu. Iñchiñ com quimlaiñ chem ñi rupan. Iñchiñ mülei taiñ maneluhual tati pu loncolelu meu. Tati pu loncolelu inapelafingün Biblia ñi feipin ca “Jehová ñi duam” mu juzgapelafingün ti culpalu (2 Crón. 19:6).
12. ¿Chumngelu cümei taiñ trahuluuhuenoal pu huemünentungelu trahunche mu?
12 Huemünentungele quiñe tami pu piuqueyenieelchi che ca eimi quelluntucufilmi pu loncolelu, quelluafuimi tañi huiñotual ta Jehová mu. Taiñ lamngen Elizabeth, taiñ inaduampeel parrafo meli mu, feipi: “Iñchiu müna cüdautuyu tayu dunguhuenoafiel tayu püñeñ. Rupalu ta antü, tayu püñeñ huiñotui Jehová mu. Fei quisu feipi: ‘Cümecünungen tañi huemünentungen trahunche mu. Tañi rupan mu, cümeque dungu quimürpun’ pi. Iñche falinturpufiñ Jehová tañi norümtuquefiel ta che” pi taiñ lamngen. Elizabeth tañi füta, Marcos pingelu, feipi: “Tayu dunguhuenofiel mu tañi fotüm, tüfa quellueyu ñi huiñoraquiduamtual fei ñi huiñotual Jehová mu. Jehová quellueyumu tayu feyentuafiel ñi feipiel pu loncolelu, feimu rume ayüucüleyu”.
13. ¿Chumafuimi huesa duamülmi?
13 Nütramcayafimi cümeque hueni. Trahunche mu mülei cümeque hueni quelluaimu tami nehuencüleal (Prov. 12:25; 17:17). Taiñ lamngen Joanna, taiñ nütramcapeel parrafo ailla mu, feipi: “Quisulelu troquiuquefun. Huelu nütramcafiel mu tañi pu cümeque hueni, nehuentucuqueneu engün” pi taiñ lamngen. Huelu quiñeque tami pu peñi ca pu lamngen huesa duamelelmu tañi feipin mu, ¿chumafuimi? Peafiyiñ.
14. ¿Chemu mülefui taiñ hueluquentu perdonahual?
14 Paciencia nielafimi tami pu peñi ca pu lamngen. Esperalayaimi ñi huelulcaunoal engün tañi dungun meu (Sant. 3:2). Com huelulcauqueiñ, feimu afmatulayaimi quiñe che quimnole chem tami feipiaeteu. Ca afmatulayaimi huesa pirumeelmu quiñe peñi cam quiñe lamngen. Loncontucuaimi ñi feipin ta Pablo: “Hueluconquechi ngenoafelniehuaimün, ca huiñoduamahuaimün quiñeque femle huesa dungu ñi lladcülcayafiel ta cangelu” (Col. 3:13). Quiñe lamngen tañi huentru püñeñ huemünentungefui trahunche mu. Taiñ lamngen feipi: “Quiñeque tañi pu lamngen yafültucufeneu, huelu doi huesa duameleneu tañi feipin mu. Huelu Jehová quellueneu tañi perdonayafiel engün” pi taiñ lamngen. Quiñe peñi cam quiñe lamngen niele quiñe familia huemünentungelu trahunche mu, ¿chumngechi quelluafeyu tati trahunche? Peafiyiñ.
TATI TRAHUNCHE QUELLUNTUCUAFUI
15. ¿Chumngechi quelluafuiñ tati pu peñi ca pu lamngen huemünentuñmangelu quiñe familia trahunche mu?
15 Pengelaiñ taiñ duamtuchequen. Taiñ lamngen Miriam, hue huemünentuñmangelu tañi huentru lamngen, yehuelefui ñi amual ta trahun mu. Taiñ lamngen feipi: “Raquiduamcülefun tañi chem feipiaeteu caquelu pu lamngen. Huelu inaduamün quiñeque lamngen ca hueñancülefui ñi huemünentungen mu tañi huentru lamngen. Quisu engün, chem huesa dungu rume pilaeneu tañi lamngen mu. Tañi cüme femeteu mu engün, quisulelu troquiuhuelan” pi taiñ lamngen. Cangelu lamngen feipi: “Huemünentuñmangelu tañi püñeñ, acui quiñeque lamngen taiñ yafültucuaeteu. Quiñeque quimlafui ñi chem pial, huelu inaye ngümaingün iñchiñ mu. Ca caquelu pu lamngen mandaleiñmu carta taiñ yafültucuaeteu. Taiñ femeteu mu, rume quellueiñmu”.
16. ¿Chumafuiñ taiñ quisucünunoafiel taiñ pu peñi ca pu lamngen?
16 Turpu quisucünulayafiyiñ taiñ pu peñi ca pu lamngen huemünentuñmangelu quiñe familia trahunche mu. Quisu engün duamniefuingün ñi yafültucungeal engün (Heb. 10:24, 25). Quiñeque mu taiñ pu peñi ca pu lamngen huemünentuñmangelu quiñe familia trahunche mu, nehue dunguhuelaeyu tati trahunche, feimu ca huemünentungelu troquiuqueingün. ¡Turpu huesa duamel-layafiyiñ taiñ pu peñi ca pu lamngen! Ca yafültucuafiyiñ pu huechequeche nielu pu chau poyehuenofilu ta Jehová. Peaiñ chem ñi rupan taiñ lamngen María. Tañi füta huemünentungefui trahunche mu ca quisucünui tañi pu familia. Taiñ lamngen feipi: “Quiñeque tañi pu hueni pepaeneu, deumapai iyael engün. Ca quellueneu tañi estudiayal Biblia taiñ pu püñeñ iñchiñ. Peñmaeneu fente tañi hueñancülen, feimu inaye ngümaingün iñche mu. Ca incañpeeneu engün huesa dunguyengelu iñche. Tañi pu hueni yafültucueneu engün llemai” pi taiñ lamngen (Rom. 12:13, 15).
Ti trahunche pengelelafui tañi piuqueyeniefiel tati pu hueñancülelu. (Inaduamnge parrafo 17). *
17. Tati pu loncolelu, ¿chumngechi quelluafuingün tati pu hueñancülelu?
17 Eimün pu loncolelu, felei tamün yafültucuafiel ca quelluafiel pu peñi ca pu lamngen huemünentuñmangelu quiñe tañi familia trahunche mu (1 Tes. 5:14). Yafültucuafimün petu con-nole ti trahun ca afle ti trahun. Pemeafimün tañi ruca mu ca trür ngillatuaimün. Compañtuafimün tamün amuldungual. Quiñeque mu ca mangelafuimün tamün quiñentrür papeltual Biblia tami familia eimün. Tati pu loncolelu mülei ñi cuidayafiel pu hueñancülelu ca pengelelafingün tañi piuqueyeniefiel engün (1 Tes. 2:7, 8).
MANELUUCÜLENGE CA PÜNTÜTRIPALAYAIMI JEHOVÁ MU
18. ¿Chem ayüfui ñi femal Jehová pu püntütripalu quisu meu? (2 Pedro 3:9).
18 Chau Jehová ayülafui inei no rume tañi apümcangeal, doi mai tañi huiñoduamtual engün (papeltunge 2 Pedro 3:9). Quiñe che culpafule rume, huelu Jehová falintunieyu. Acordanienge, Jehová huli tañi saquin Fotüm caque quiñeque iñchiñ taiñ duam mu. Jehová piuqueyenquechi quelluquefi tañi pu che püntütripalu quisu mu, femngechi tañi huiñotual engün. Jehová ayüfui tañi huiñotual engün, chumngechi ñi femün tati ñamquiyauchi fotüm ñi feipiel ta Jesús (Luc. 15:11-32). Fentren taiñ pu peñi ca pu lamngen püntütripalu Jehová mu, huelu huiñotuingün feimu ti trahunche cüme lloutueyu. Taiñ lamngen Elizabeth, taiñ nütramcapeel, müna ayühui huiñotulu tañi püñeñ. Fei feipi: “Fentren taiñ pu lamngen quellueiñmu taiñ maneluhual ñi huiñotual tañi püñeñ, feimu rume mañumcülen”.
19. ¿Chumngelu maneluucüleafuiñ Jehová mu?
19 Iñchiñ rumel maneluucüleafuiñ Jehová mu. Tañi cümeque ngülam rumel quellunieaiñmu. Jehová fei taiñ cüme Chau, fei rume piuqueyenieiñmu caque quiñeque iñchiñ. Ngoimalayaimi: eimi hueñancülelmi, Jehová turpu quisucünulayaimu (Heb. 13:5, 6). Taiñ peñi Marcos, taiñ nütramcapeel, feipi: “Huemünentungelu tañi fotüm, Jehová quisucünulaeiñmu” pi taiñ peñi. Jehová elunieaimu llemai nehuen tami aguantayal (2 Cor. 4:7). Tami piuqueyenieelchi che rume elfile ta Jehová, maneluucüleafuimi tañi huiñotual. Ca püntütripalayaimi ta Jehová mu.
ÜLCANTUN 44 Ti hueñancülelu ñi llellipun
^ parr. 5 Quiñe taiñ pu familia huemünentungele trahunche mu, müna hueñancüafuiñ. Tüfachi troquiñ mu peaiñ chum duamquei Jehová quiñe che püntütripale quisu meu. Ca peaiñ chumafui tati hueñancülechi che ñi yafüluucüleal ca ñi hueniyenieafiel ta Jehová. Ca peaiñ chumafui tati trahunche ñi yafültucuafiel tati huesa rupamequelu.
^ parr. 1 Tüfachi troquiñ mu, ca üi tuculelngei ta quiñeque che.
^ parr. 79 ¿CHEM PENGELI TI ADENTUN? Quiñe peñi püntütripalu Jehová mu ca quisucünufi tañi familia, feimu müna cutrancahuingün.
^ parr. 81 ¿CHEM PENGELI TI ADENTUN? Epu loncolelu yafültucumefingün quiñe lamngen tañi püñeñ engün.
