Peafiyiñ ñi feipin ta Biblia.

Hechos 24:15 feipi “ñi huiñomongetual pu norngechi che ca pu norngenochi che”. ¿Inei am pu norngechi che? Feita pu feyentuquefulu Chau Dios petu tañi lanon, fei engün ñi üi huirintuculei ti mongen lifru mu (Mal. 3:16). ¿Inei engün am pu norngenochi che? Quimnofilu ta Chau Dios petu tañi lanon, fei engün ñi üi huirintuculelai ti mongen lifru mu.

Juan 5:28, 29 ca feipi pu norngechi che ca pu norngenochi che mu ñi feipin Hechos 24:15. Tüfa mu Jesús feipi: “Inei rume femlu cümeque dungu, llohuai rumel mongen. Huelu inei rume femlu huesaque dungu, juiciantucungeai”. Cümeque dungu femlu, fei engün tati pu norngechi che. Fei engün tañi üi huirintuculei ti mongen lifru mu, feimu llohuaingün rumel mongen. Huesaque dungu femlu, fei engün ta norngenochi che. Fei engün ñi üi huirintuculelai ti mongen lifru mu, feimu juiciangeai engün. Feichi juician antü mu, quimürpuafuingün ta Chau Dios. Fei feyentule engün, huirintuculerpuai tañi üi ti mongen lifru mu.

Apocalipsis 20:12, 13 feipi com pu huiñomongetualu mülei ñi inayafiel chem ñi “huirintuculen tati chumpolque lifru mu”. ¿Chem am tüfa? Tati hue ley dungu taiñ llohual ngünenietule ti mapu ta Chau Dios. Inei rume feyentunofile feitachi ley, huiño latuaingün (Is. 65:20).

Daniel 12:2 feipicünui chem ñi rupayal epe afle ti huaranca tripantu. Feipi pu layelu “nepeaingün, quiñeque ñi rumel mongeleal, ca caquelu ñi culpantucungeal ca ñi rumel illamcangeal”. Feimu juiciangele pu huiñomongetulu, pu feyentulu llohuaingün ‘rumel mongen’, huelu pu feyentunolu “rumel illamcangeai”, apümcangeai (Apoc. 20:15; 21:3, 4).

Raquiduamnge tüfa: pu norngechi che ca pu norngenochi che huiñomongetualu adentulei catripanche reque. Norngechi che trürümafuiñ feiti catripanche nielu permiso tañi cüdahual ca tañi müleal feiti pais mu, ca elungequei ñi femal caquelu dungu. Huelu pu norngenochi che trürümafuiñ pu catripanche pichintu müten müleafulu quiñe pais mu. Ñi mülenagal feiti pais mu, mülei ñi cumplial quiñeque requisito. Ca femngechi pu norngenochi che ayüle ñi rumel mongeleal tüfachi mapu mu, mülei ñi inayal Chau Ngünechen ñi huercün dungu ca ñi pengelcünual tañi nor chengen engün. Huelu ngoimalayaiñ tüfa: com pu catripanche cümeque dungu femle ca cumplile com ti requisito, mülenagafui feiti pais mu. Huelu cumplinole ti requisito ca cümeque dungu femnole, huemünentungeai ti pais mu. Ca femngechi com pu huiñomongetualu cümeque dungu femle engün ca feyentufile ta Jehová engün, rumel mongeleaingün tüfachi mapu mu.

Chau Jehová piuqueyequefi tati pu che, huelu ca nor Dios ngei (Deut. 32:4; Sal. 33:5). Chau Jehová huiñomongeltuafi pu nor che ca pu norngenochi che, femngechi pengelai tañi piuqueyechefengen. Huelu cafei ayüniei ñi inayafiel engün tañi huercün dungu. Tati pu che piuqueyenierpufilu ta Jehová ca feyentufilu, aflayai tañi mongen tüfachi mapu mu.