1. ¿Chem cüdaungechi dungu mu rupai Jehoás, Uzías ca Josías?

 TAMI huechengen mu ngünenierpufilmi Chau Ngünechen tañi troquiñche, ¿chumngechi raquiduamcüleafuimi? ¿Cüme ngüneniepeafuimi mai pu che? Biblia nütramcaqueiñmu quiñeque rume huecheque huentru lonco ülmencünungerpui Judá pingechi mapu mu. Jehoás lonco ülmencünungei nielu regle tripantu. Uzías, mari cayu tripantu ca Josías, pura tripantu. Fei engün mu, ¿rume cüdaungepelafui ñi cüme ngünenieafiel pu che? Cüdaungefulu rume, huelu Jehová quellueyu ca caquelu pu che ñi cüme nentual ñi cüdau engün.

2. Ñi femün mu Jehoás, Uzías ca Josías, ¿chem quimeltueiñmu?

² Iñchiñ ta lonco ülmen-ngelaiñ, huelu quimeltuafeiñmu fentrenque dungu tüfachi cüla lonco ülmen. Fei engün femi cümeque dungu, huelu ca quiñeque mu huelulcahuingün. Fei engün ñi femün mu, ¿chem quimaiñ? Rume falin-ngei taiñ nieal cümeque hueni, mülei taiñ ñom piuquengeal ca taiñ quintunieafiel ta Jehová.

3. Jehoiadá, ¿chumngechi quellufi Jehoás ñi femal cümeque dungu?

³ Inayentuafimi ñi femün cümeque dungu ta Jehoás. Huechengelu lonco ülmen Jehoás, femi cümeque dungu. Pichicalu Jehoás, ñi chau lai. Ti hunen lonco sacerdote Jehoiadá tremümeyu ca quimeltueyu Jehová mu. Jehoás allcütufi ti ngülam tañi elueteu ta Jehoiadá, femngechi quimchengerpui. Eluhui ñi serfiafiel ta Jehová ca ñi quelluafiel pu che ca femngechi ñi serfiafiel engün ta Jehová. Jehoás ca cümelcacünutufi Jehová tañi ngillatuhue ruca (2 Crón. 24:1, 2, 4, 13, 14).

4. Piuqueyefiliyiñ Jehová ñi huercün dungu, ¿chumngechi quellueiñmu? (Proverbios 2:1, 10-12).

 ⁴ Quimelngelmi tami piuqueyeafiel ta Jehová ca tañi huercüelchi dungu, elungeimi ta quiñe falin dungu (papeltunge Proverbios 2:1, 10-12). Tami pu chau femafuingün fillque dungu tami quimeltuaeteu. Peafiyiñ ñi femün quiñeque chau. Katia ñi chau fill antü yequefeyu colegio mu, ngüneduamquefuingu ti texto diario. Katia feipi: “Rupan mu huesaque dungu mu ti nütram quellueneu ñi femal cümeque dungu”. Tami pu chau quimeltuelmu Biblia ñi ngülam, raquiduamafuimi chi tami eluñmangequenon chem dungu rume tami femal. ¿Chem quelluafeimu tami feyentuafiel? Peafiyiñ ñi rupan Anastasia. Tañi chau ca tañi ñuque quimeltueyu chumngelu ñi femal quiñeque dungu cam ñi femnoal quiñeque dungu. Anastasia feipi: “Ñi feipin tañi chau ca tañi ñuque quimürpun tañi piuqueyenieteu. Ayülelaingu tañi ngünenieaeteu, doi mai tañi cuidanieaeteu”.

5. Eluucülelmi tami quimeltungeal, ¿chem dungu rupayai? (Proverbios 22:6; 23:15, 24, 25).

⁵ Inaniefilmi ti ngülam tami elueteu tami pu chau, ayühuelafimi engün, doi mai ayühuelafimi ta Jehová ca cüme hueniyerpuafimi (papeltunge Proverbios 22:6; 23:15, 24, 25). Feimu rume cümei tami inayentuafiel ta Jehoás tami huechengen mu.

6. ¿Inei engün am allcütufi ta Jehoás ca chumlerpui tañi mongen? (2 Crónicas 24:17, 18).

⁶ Inayentuquefilnge Jehoás ñi femürpun huesaque dungu. Deu lalu Jehoiadá, Jehoás dullifi huesaque hueni ñi nieal (papeltunge 2 Crónicas 24:17,18). Jehoás eluhui ñi allcütuafiel ti pu principe Judá mu mülelu poyequenofilu ta Jehová. Müna huesa, fei engün femquelafui cümeque dungu, fei Jehoás ngelafui ñi allcütuafiel (Prov. 1:10). Huelu Jehoás huesa femi ñi allcütufiel ti huesaque hueni. Tañi primo Zacarías ayüfui ñi norümtuafiel ta Jehoás, huelu Jehoás allcütulai, fei eluhui ñi langümafiel ta Zacarías (2 Crón. 24:20, 21; Mat. 23:35). Müna huesa, hueluduami. Ellaca mu cüme yeniequefui tañi mongen, fei hula caiñetufi ta Chau Ngünechen Jehová mu ca langümchefengerpui. Rume huesalcalerpui tañi mongen, feimu cüpalechi antü mu quisu tañi cüdahuelqueteu langümeyu (2 Crón. 24:22-25). Jehoás püntütripanole Jehová mu, cüme mongen nierpuafui. ¿Chem quimeltuafeiñmu ñi rupan mu ta Jehoás?

7. ¿Chumngechi hueni mülei tami dulliafiel? (Ca inaduamnge ti adentun).

 ⁷ Ñi huesa femün mu ta Jehoás, ¿chem quimeltuafeiñmu? Mülei taiñ dullial cümeque hueni poyequefilu ta Jehová, fei engün quelluaiñmu taiñ femal cümeque dungu. Hueniyenieafiyiñ pu peñi ca pu lamngen tunten tripantu niele rume. Jehoiadá rume hunencülefui Jehoás mu. Raquiduamnge tami pu hueni mu, ca ramtuunge: “Tañi pu hueni, ¿quelluqueneu ñi doi hueniyeafiel ta Jehová? ¿Yafültucuqueneu engün ñi feyentuafiel ta Jehová? ¿Dunguqueingün Jehová mu? ¿Falintuquefingün ñi quimeltun ta Biblia? ¿Yamquefingün Jehová ñi feipin? ¿Ngülamtuqueneu engün chem tañi duamnien cam feipiqueneu engün ñi femal tañi ayüqueel müten?” (Prov. 27:5, 6, 17). Rüf dungu tüfa: tami pu hueni piuqueyenofile Jehová, duamquifilnge engün. Huelu tami pu hueni piuqueyeniefile Jehová, püntütripaquilnge fei engün mu, rume quellunieaimu (Prov. 13:20).

8. Pünefilmi redes sociales, ¿chem mülei tami raquiduamal?

⁸ Fachantü dunguafuiñ taiñ pu hueni ca taiñ familia internet mu, huelu quiñeque pünequefingün redes sociales re ñi afmatulafiel pu che. Feimu foto ca video mu pengelqueingün tañi nien ca chem dungu ñi femquen. Eimi pünefilmi redes sociales, ramtuunge: “¿Tucuquen foto ca video internet mu ñi afmatulafiel pu che? ¿Ayünien tañi yafültucucheal cam tañi püramyengeal? Pefiel mu ñi feipiel caquelu che internet mu, ¿inayentuquefiñ tañi feipin, tañi raquiduam ca chem dungu tañi femqueel?”. Peafiyiñ ñi feipin peñi Nathan Knorr, quisu coneltuquefui Troquiñ Adniechequelu. Quiñe rupa feipi: “Afmatul-layafimün pu che. Femülmün, inei no rume ayühuel-layafimün. Ayühuelfimün ta Jehová, femngechi ca ayühuelafimün Jehová ñi pu poyequeteu”.

9. Jehová ñi quellun mu, ¿chem cümeque dungu femi ta Uzías? (2 Crónicas 26:1-5).

⁹ Inayentuafimi ñi femün cümeque dungu ta Uzías. Huechengelu lonco ülmen Uzías, ñom piuquengefui ca respetaquefui ta Chau Dios. 68 tripantu mongelerpui ca epe com tañi mongen Jehová füreneeyu (papeltunge 2 Crónicas 26:1-5). Uzías hueufi fentren caiñe ca cüme adcünufi Jerusalén, femngechi ñi contunoaeteu pu caiñe (2 Crón. 26:6-15). Com ñi cüme femün Uzías Jehová quelluntucueyu, ¿müna ayüucülepelafui? (Ecl. 3:12, 13).

10. ¿Chumngechi af tripai ñi mongen Uzías?

¹⁰ Inayentuquefilnge Uzías ñi femürpun huesaque dungu. Uzías ñi lonco ülmen-ngen mu huimtulefui ñi feipiafiel caquelu pu che chem ñi femal, ¿feimu raquiduampelai ñi femal chem rume tañi ayüqueel? Feimu quiñe antü Uzías conpui ti ngillatuhue ruca mu ca lüpümfi incienso altar meu, tüfa ñi femnoafel pu lonco ülmen, pu sacerdote müten mülefui ñi femal (2 Crón. 26:16-18). Ti hunen lonco sacerdote Azarías norümfeyu, huelu Uzías rume illcui. Uzías püntütripai Jehová mu, fei Jehová elueyu lepra cutran (2 Crón. 26:19-21). Uzías ñom piuquengefule, ¿afquentu cüme mongen yeniepelayafui?

11. Ñom piuquengeliyiñ, ¿chumaiñ? (Ca inaduamnge ti adentun).

¹¹ Fentren poder nierpulu ta Uzías, ngoimanentui chumngechi quellufeyu Jehová. ¿Chem quimeltuqueiñmu tüfa? Ngoimalayaiñ com cümeque dungu taiñ nieel  Jehová ta elueiñmu. Feimu mallmaulayaiñ, Jehová müten püramyeafiyiñ (1 Cor. 4:7). b Mülei taiñ ñom piuquengeal ca quimtucunieaiñ taiñ culpafe chengen mu duamnieiñ taiñ norümtungeal. Quiñe peñi doi 60 tripantu nielu feipi: “Quimürpun ñi illcufemnoal norümtungeli, doyelchi mai eluuquen ñi cümecünutuafiel tañi femquen ca tañi doi cüdahuelafiel ta Jehová” pi taiñ peñi. Ñom chengeliyiñ ca respetaniefiliyiñ ta Jehová, cüme amuleai taiñ mongen (Prov. 22:4).

12. Hueche huentrungelu Josías, ¿chumi? (2 Crónicas 34:1-3).

¹² Inayentuafiyiñ ñi femün cümeque dungu ta Josías. Josías eluhui ñi quintuafiel Jehová hueche huentrungelu. Quisu ayüquefui ñi cüme quimafiel Jehová ca femal quisu ñi ayüqueel. Feichi antü mu epe com che poyequefui coilaque dios, feimu Josías mülefui ñi nehuen piuquengeal, femngechi pu che ñi huiño poyetuafiel Jehová. Fei Josías 20 tripantu nielu, eluhui ñi apümcayafiel com dungu nüucülelu coilaque dios mu (papeltunge 2 Crónicas 34:1-3).

13. Elufimi tami mongen ta Jehová, fei ¿chumaimi?

¹³ Huechengelmi, ¿chumngechi inayentuafuimi Josías? Eluhuaimi tami doi cüme quimafiel ta Jehová. Femngechi femülmi, elurpuafimi tami mongen ta Jehová. Femülmi, ¿chumaimi tami mongen mu? Quiñe hueche, Luke pingelu, fautizahui nielu 14 tripantu. Fei feipi: “Deu ñi fautizahun iñche, hunentucuquefiñ Jehová tañi mongen mu ca cüpa ayühuelquefiñ” (Mar. 12:30). Eimi hueche ca femngechi femülmi, Jehová cümelcayaimu.

14. Quiñeque hueche, ¿chumngechi inayentufingün ti lonco ülmen Josías?

¹⁴ Pu huechequeche poyequefilu Jehová, ¿chem huesaque dungu chaftuafuingün? Peafiyiñ ñi rupan Johan, quisu fautizahui nielu 12 tripantu. Tañi pu compañ colegio mu ngüchaltucuquefeyu ñi püneafiel cigarrillo electronico. ¿Chem quellueyu ñi huesa femnoal? Johan raquiduamquei femfule, quisutu huesalcahuafui  tañi mongen mu cafei hueniyehuelayafui ta Jehová. Ca peafiyiñ ñi rupan Rachel, fei fautizahui nielu 14 tripantu. ¿Chem quellueyu ñi chaftuafiel huesaque dungu ñi rupan tañi colegio mu? Com tañi rupan mu eluuquei ñi raquiduamal Jehová mu ca Biblia mu, fei feipi: “Chillcatulu historia, raquiduamquen quiñeque texto Biblia mu cam quiñeque profecia. Nütramcalu quiñe compañ colegio mu, raquiduamquen chem texto ñi pengelelafiel” pi. Eimi Josías reque, femngechi rupalayaimi chi, huelu quimchengerpuaimi ca serfinieafimi Jehová Josías reque. Fachantü tami huechengen mu cüme chaftufilmi huesaque dungu, ca femngechi femaimi cüpalechi antü mu.

15. ¿Chem quellueyu Josías ñi cüme cüdahuelafiel Jehová? (2 Crónicas 34:14, 18-21).

¹⁵ Ti lonco ülmen Josías 26 tripantu nielu, eluhui ñi cüme elcünutuafiel ti ngillatuhue ruca. Quiñeque huentru petu cüdaulu ti ngillatuhue ruca mu, pefingün ti lifru nielu Jehová tañi ley. Josías allcütulu ñi chem pin Jehová ñi ley, eluhui ñi feyentufemafiel (papeltunge 2 Crónicas 34:14, 18-21). ¿Ayüafuimi tami rumel chillcatuafiel ta Biblia? Deu femmequeimi chi, huelu ¿rüf ayühuelqueimu tami papeltuafiel? Quiñeque versiculo tami quelluaeteu, ¿chumqueimi tami loncontucuafiel? Luke, taiñ nütramcapeel parrafo 13 mu, huirintucuquei quiñe cuaderno mu chem tañi ayüfiel Biblia mu. Eimi, ¿ca femngechi femafuimi? Doi quimfilmi Biblia ca doi falintufilmi, doi ayüafimi tami cüdahuelafiel ta Jehová, fei Josías reque eluhuaimi tami cüme femal.

16. Josías, ¿chumngelu huesalcai ca chem quimeltuqueiñmu com tüfa?

¹⁶ Inayentuquefilnge Josías ñi femürpun huesaque dungu. Josías nielu 39 tripantu, huesa femi. Quintulai Jehová tañi quelluaeteu, doi mai quisutu maneluhui. Ñi huesa femün mu, lai (2 Crón. 35:20-25). ¿Chem quimeltueiñmu tüfa? Tunten tripantu  nieliyiñ rume cam fentren tripantu yenieliyiñ taiñ papeltuniefiel ta Biblia, quintunieaiñ Jehová taiñ adnieaeteu. ¿Chumngechi femafuimi? Ngillatuafimi Jehová tami quelluaeteu, papeltuafimi Biblia ca allcütuafimi quimque pu peñi ca pu lamngen. Femngechi femülmi, Jehová quelluaimu tami fütra culpanoal, ca doi ayüucüleaimi (Sant. 1:25).

17. ¿Chem quimürpuiñ ñi femün Jehoás, Uzías ca Josías?

¹⁷ Femafuimi fentren cümeque dungu tami huechengen mu. Ñi rupan Jehoás, Uzías ca Josías pengelqueiñmu pu huechequeche cümeque dungu femafuingün, femngechi ñi ayühuelafiel ta Jehová. Fei engün huesa dullingün, fei rume cutrancahuingün. Huelu eimi inayentuafuimi cümeque dungu ñi femün engün ca famentuafimi huesaque dungu ñi femün engün, femngechi cümeyahuaimi tami mongen mu.

18. Tami ayüucüleal, ¿inei engün ñi femün inayentuafuimi? (Ca inaduamnge ti adentun).

¹⁸ Biblia mu ca peafuiñ caquelu hueche fülconlu Jehová mu ca cüme mongen yenieingün. Quiñe tüfa, David. Petu ñi huechengen mu eluhui ñi poyeafiel ta Jehová, femngechi tañi lonco ülmen-ngen mu püntütripalay Jehová mu. David quiñeque mu huelulcahui. Huelu repentiulu, Jehová nor huentru troquinieyu (1 Rey. 3:6; 9:4, 5; 14:8). Doi quimfilmi ñi femün ta David, quelluaimu tami doi poyenieafiel ta Jehová. Ca papeltuafuimi ñi femün Marcos ca Timoteo. Fei engu petu ñi huechengen mu, eluhuingu ñi poyeafiel Jehová ca com ñi mongen mu püntütripalaingu quisu mu, feimu ayühuelfingu ta Jehová ca ayühun-ngechi mongen nierpuingu.

19. ¿Chem mongen yenieafuimi?

¹⁹ Tami mongen cüpalechi antü mu, ¿chumngechi ayüleimi ñi feleal? Famülque mu maneluhulmi Jehová mu, ayüucüleaimi. Quisutu maneluulayaimi, eluunge Jehová tami quelluaeteu cüme dullial tami mongen mu (Prov. 20:24). Ngoimaquilnge, Jehová rume falintuquei tami cüdahuelniefiel. Jehová rume piuqueyenieimu, feimu eluunge com tami piuque mu tami poyeafiel. ¡Ngelai doi cüme mongen!