1. Jehová, ¿chem cüdau elfalcünufi Pedro epe puulu ñi layal?

 TI APOSTOL Pedro fentren tripantu serfiquefui ta Jehová, compañquefui ta Jesús ñi amuldungual, amuldungulelquefui pu judiongenochi che ca coneltulefui ti troquiñ adniechequelu hunen siglo mu. Huelu epe puulu ñi layal, Jehová ca elfalcünuleyu quiñe falin cüdau ñi femal. Feichi 62 puulu 64 tripantu püle, Jehová adniefi Pedro ñi huirintucual epu carta. Pedro ayüquefui ñi feipin tüfachi epu carta ñi rumel quellunieafiel pu cristiano (2 Ped. 1:12-15).

2. Pedro ñi huirintucuel, ¿chumngechi quellufi pu cristiano?

² Ñi huirintucuel Pedro rume quellufi pu cristiano hunen siglo mu. ¿Chumngelu feipiqueiñ? Feichi mu pu cristiano ‘fill huesaque dungu rupaquefuingün’ (1 Ped. 1:6). Cafei ti trahunche mu mülequefui quiñeque che coilaque dungu quimeltuquelu ca huesaque dungu femquelu (2 Ped. 2:1, 2, 14). Cafei feichi mu, epe puucülefui ñi apümcangeal Jerusalén huaria ca ti templo (1 Ped. 4:7). Feimu Pedro ñi huirintucuel quellufi pu cristiano ñi cüme chaftuafiel huesaque dungu ca ñi pepicaucüleal cüpalechi huesaque dungu ñi rupayal. b

3. ¿Chumngechi quelluqueiñmu ñi huirintucuel Pedro?

³ Jehová elcünui ñi huirintucuel Pedro Biblia mu taiñ quelluaeteu (Rom. 15:4). Chumngechi ñi rupan hunen siglo mu, famülque mu pu che ca femngechi femquei huesaque  dungu, feimu cüdautuafuiñ taiñ cüdahuelafiel Jehová. Ca fülcülepai ñi apümcangeal huesaque dungu mapu mu, tüfa doyelai ñi rupan hunen siglo mu. Feimu, ¿chumngechi quelluafeiñmu ñi huirintucuel Pedro? Taiñ llihuatuleal acule Jehová ñi antü, taiñ llicanoafiel pu che ca taiñ doi piuqueyeafiel pu peñi ca pu lamngen. Pu loncolelu ca inaduamafuingün ñi huirintucuel Pedro, femngechi cüme cuidayafuingün ti trahunche.

4. ¿Chem hueluraquiduamelafeiñmu? (2 Pedro 3:3, 4).

⁴ Fentren che feyentuquelai ñi feipin Biblia ñi rupayal cüpalechi antü mu. Iñchiñ fentren tripantu mu feipiquefiyiñ pu che ñi afal huesaque dungu, huelu quiñeque che ayentuqueiñmu, turpu cüpalayai feichi antü piqueiñmu (papeltunge 2 Pedro 3:3, 4). Amuldungun mu, cüdau mu cam taiñ familia mu femngechi feipingeliyiñ, fei hueluraquiduamelafeiñmu. ¿Chem quelluafeiñmu? Peafiyiñ ñi feipin Pedro.

5. Ñi feipin Pedro, ¿chumngechi quelluafeiñmu taiñ cüme üngümafiel Jehová ñi antü? (2 Pedro 3:8, 9).

⁵ Quiñeque che raquiduamquei Chau Jehová alüñmaquei ñi apümafiel huesaque dungu. Huelu ñi feipin Pedro quelluafeiñmu taiñ femngechi raquiduamnoal (papeltunge 2 Pedro 3:8, 9). Jehová ñi adquiñ mu, huaranca tripantu quiñe antü reque felei. Cafei Jehová ñochi duamngei, ayünielai inei no rume ñi apümcangeal. Femfulu rume, tañi antü acuai llemai, fei apümcayafi com huesaque dungu. Feimu petu ñi acunon feichi antü, mülei taiñ amuldungulelafiel itrocom pu che. Rume falin cüdau tüfa.

6. ¿Chem quelluafeiñmu taiñ raquiduamtucunieafiel Jehová ñi antü? (2 Pedro 3:11, 12).

⁶ Pedro feipiqueiñmu taiñ ‘raquiduamtucunieafiel Chau Jehová ñi antü’ (papeltunge 2 Pedro 3:11, 12). ¿Chem quelluafeiñmu taiñ femal? Fill antü raquiduamafuiñ cüme mongen taiñ nieal ti hue mapu mu. Peniehuaiñ reque fentren cümeque dungu taiñ femal: iyaiñ cümeque iyael, taiñ piuqueyenieelchi che lalu huiñomongetuai, fei huiño pancocayafiyiñ, cafei pu cuifiqueche quimeltulelafiyiñ chumngechi ñi femtripan Biblia ñi feipin. Loncontucuniefiliyiñ tüfa, llihuatuleaiñ ca maneluucüleaiñ pichiñma mu ñi acual Jehová ñi antü, femngechi chem no rume huelulcalayaiñmu (2 Ped. 3:17).

7. ¿Chem rupayafui llicaleliyiñ?

⁷ Fülcülepalu am Jehová tañi antü eluucüleaiñ taiñ amuldungucheal, femngechi ñi quimal caquelu Jehová ñi cümeque dungu. Huelu quiñeque mu llicaleafuiñ, feimu cüdautuafuiñ taiñ amuldungucheal. Pedro ca llicalefui, feimu feichi pun ta juzgangelu ta Jesús, cüla rupa feipi ñi quimnofiel (Mat. 26:69-75). Huelu rupachi antü mu, Pedro llicahuelai. Feimu feipi: “Ngelai tamün llicanieafiel chem ñi llicalcaeteu caquelu che, fill raquiduamquelayaimün” (1 Ped. 3:14). Pedro reque, iñchiñ ca llicahuelayaiñ.

8. ¿Chem quelluaiñmu taiñ llicanoafiel pu che? (1 Pedro 3:15).

⁸ ¿Chem quelluaiñmu taiñ llicanoafiel pu che? Pedro feipi: “Tañi Ñidol ngen ta Cristo, piuque mu yamqueafimün” (papeltunge 1 Pedro 3:15). Feimu llicaleliyiñ, mülei taiñ raquiduamtucunieafiel Jesús taiñ Ñidol ngen ca fente ñi  nehuen-ngen. Amuldunguyauliyiñ huelu llicaleliyiñ, raquiduamaiñ Jesús mu. Raquiduamaiñ Jesús ñi ngüneniemequen huenu mu rangiñ fentren millonque cümeque püllü mu. Acordayaiñ Jesús ‘com ñi mülen ta huenu ca nag mapu mu elfalcünungei’, ca ‘müleai iñchiñ mu fentepuule mapu meu müleyechi dungu’ (Mat. 28:18-20). Pedro feipi taiñ rumel pepicaucüleal taiñ incañpeafiel taiñ feyentun. ¿Ayüafuimi tami amuldungual cüdau mu, colegio mu ca cheu rume? ¿Chumngechi pepicaucüleafuimi? Raquiduamnge chumül tami amuldungual ca chem tami feipial. Feipiafimi Jehová tami eluaeteu ta nehuen ca maneluunge Jehová tami quelluaeteu tami llicalenoal (Hech. 4:29).

9. Quiñe rupa Pedro pengel-lai tañi piuqueyechen, ¿chumi? (Ca inaduamnge ti adentun).

⁹ Pedro quimürpui chumngechi piuqueyecheal. Pedro allcütufi ta Jesús ñi feipin: “Eluhuayiñ quiñe hue huercün dungu: hueluquentu piuqueyehuaimün. Chumngechi iñche piuqueyehuiyiñ ta eimün, hueluquentu piuqueyehuaimün” (Juan 13:34). Huelu quiñe rupa Pedro pengel-lai tañi piuqueyeniefiel pu peñi, pu lamngen judiongenolu. ¿Chemu feipiafuiñ? Pedro am llicafilu pu cristiano judio  tuhun-ngelu, pihuelafui tañi iyal caquelu cristiano judio tuhun-ngenolu. Feimu Pablo feipi Pedro tañi “epu rume piuquengen” (Gál. 2:11-14). Pedro eluhui ñi norümtungeal. Feimu Pedro tañi epu carta ñi huirintucuel quimeltui re piuqueyelayafiyiñ müten taiñ pu peñi ca pu lamngen, doi mai pengelelafiyiñ taiñ piuqueyeniefiel.

10. Taiñ rüf piuqueyenieafiel pu peñi, pu lamngen, ¿chem mülei taiñ femal? (1 Pedro 1:22).

¹⁰ Pedro feipi taiñ rüf piuqueyeafiel taiñ pu peñi, pu lamngen chumngechi ñi piuqueyeuquen pu familia (papeltunge 1 Pedro 1:22). Taiñ piuqueyenieafiel pu peñi, pu lamngen, duamfali taiñ ‘inanieafiel ti rüf dungu’ Biblia mu mülelu. Quiñe rüf dungu ñi quimeltuel Biblia feita tüfa: “Chau Ngünechen dullintuchequelai” (Hech. 10:34, 35). Piuqueyefiliyiñ quiñeque müten taiñ pu peñi, pu lamngen, feyentulayafiyiñ ñi feipin ta Jesús. Cümei taiñ doi hueniyeafiel quiñeque peñi ca lamngen trahunche mu, Jesús ca femquefui (Juan 13:23; 20:2). Huelu Pedro feipieiñmu taiñ piuqueyenieafiel com pu peñi ca pu lamngen taiñ familia reque (1 Ped. 2:17).

11. Com piuque mu piuqueyefiliyiñ pu peñi ca lamngen, ¿chumaiñ?

¹¹ Pedro ca feipi: “Com piuque meu hueluquentu piuqueyeuqueaimün”. Quiñeque mu cüdautuafuiñ ñi piuqueyeafiel quiñeque peñi cam lamngen, huelu ca eluhuaiñ taiñ piuqueyenieafiel com piuque mu chumngechi ñi feipin Pedro. Huesa duameleliyiñmu quiñe peñi cam lamngen, iñchiñ ca femngechi ayüafuiñ taiñ huiñoleltuafiel. Huelu femngechi femliyiñ, ayühuel-layafuiñ ta Jehová. Jesús femngechi dungu quimelelfi ta Pedro (Juan 18:10, 11). Pedro feipi: “Huiñoleltulayafimün tamün huesa femeteu. Lucatulayafimün feiti tamün lucatueteu. Doi mai cümelcaqueafimün ta caquelu che” (1 Ped. 3:9). Feimu com piuque mu piuqueyeniefiliyiñ taiñ pu peñi, pu lamngen, cüme troquiafiyiñ huesalcaeliyiñmu rume.

12. 1) Rüf piuqueyefiliyiñ pu peñi, pu lamngen, ¿chumaiñ? 2) Deu tami pefiel ti video Yafültucunieaiñ taiñ quiñeucüleal, ¿chem eluhuaimi tami femal?

¹² Pedro ca feipi taiñ ‘rume piuqueyehual’. Femngechi femliyiñ, ‘rumel eluucüleaiñ ñi perdonacheal’ (1 Ped. 4:8). Huirintuculu tüfa, Pedro ¿acordapelai ñi feipin ta Jesús? Quiñe rupa Pedro feipi tañi perdonacheal regle rupa, ¿rume cümecünulu troquiupelafui? Huelu ¿chem pieyu Jesús? Feipi ñi perdonacheal “77 rupa”. ¿Chem pi Jesús? Taiñ rumel perdonacheal (Mat. 18:21, 22). ¿Cüdautuqueiñ taiñ perdonacheal? Quiñeque mu com iñchiñ cüdautuqueiñ, huelu fentecünulayaiñ taiñ femal. Eluucüleaiñ taiñ perdonacheal ca cümelcautuaiñ taiñ pu peñi ca pu lamngen iñchiñ. c

13. ¿Chemu cüdautuafui pu loncolelu ñi camañafiel pu peñi, pu lamngen?

¹³ Pedro ngoimalai ñi feipieteu ta Jesús: “Camañelen tañi pichique ufisa” (Juan 21:16). Eimi loncolelmi, quimnieimi tami inayafiel ñi feipin ta Jesús. Huelu cüdautuafuimi chi ñi entual ta tiempo ñi femal feitachi falin cüdau. Pu loncolelu fentren cüdau nieingün. Hunelu mu, pu loncolelu mülei ñi eluafiel tañi pu familia  tañi duamnieel ca ñi pengelelafiel fente tañi piuqueyeniefiel. Ca quelluquefingün tañi pu familia ñi fülconcüleal Jehová mu. Cafei ayühunquechi amuldunguqueingün ca cüme pepicauqueingün ñi quimeltucheal trahunche mu ca fütraque trahun mu. Ca quiñeque loncolelu quelluntucuqueingün cangelu cüdau mu. Quiñeque quellufingün ti Troquiñ Huentru ñi Quellual pu Cutrancülelu Pital mu. Caquelu quellufingün ti Troquiñche Adniequelu ti Rucan Dungu. Feimu feipiafuiñ pu loncolelu nieingün fentren cüdau.

14. ¿Chem quelluafeyu pu loncolelu ñi camañafiel pu peñi, pu lamngen? (1 Pedro 5:1-4).

¹⁴ Pedro feipifi pu loncolelu: “Camañfe reque cuidanieafimün Chau Ngünechen ñi pu ufisa” (papeltunge 1 Pedro 5:1-4). Pu loncolelu piuqueyeniefi tañi pu peñi, pu lamngen, feimu ayünieingün tañi cuidayafiel. Huelu fente tañi cansalen ca fentren cüdau tañi nieel engün, quiñeque mu femnoalu troquihuafuingün. Femngechi dungu mu rupalmi, ¿chumafuimi? Llellipuafimi ta Jehová tami chumlen. Pedro huirintucui: “Tati serfiquefilu ta caquelu che, recüluupe Chau Dios ñi nehuen mu” (1 Ped. 4:11). Quiñeque peñi ca lamngen ñi huesa rupan fentecünulayai, hue mapu mu müten cüme elcünungetuai. Huelu Jesús tati “fütra camañ ufisa” doi quelluafui pu huesaque dungu rupamequelu, quelluafeyu fachantü ca ti hue mapu mu. ¿Chem ayüquei ta Jehová ñi femal pu loncolelu? Mülei ñi piuqueyeafiel tañi pu peñi ca pu lamngen, camañafiel ca ñi inayentufalngeal.

15. ¿Chumquei quiñe loncolelu ñi cuidayafiel pu peñi, pu lamngen? (Ca inaduamnge ti adentun).

¹⁵ Peaiñ ñi rupan quiñe peñi loncolelu trahunche mu fentren tripantu mu, William pingelu. Quisu rume falintuquefi ñi camañafiel Jehová tañi pu ufisa. Hue conlu ti pandemia, ¿chumi quisu ca caquelu pu loncolelu tañi trahunche mu? Fill semana mütrümfingün pu peñi, pu lamngen tañi troquiñche amuldunguquelu. William feipi: “Fentrenque peñi quisulefui tañi ruca, feimu huesa duamcülequefuingün”. Quiñe peñi cam quiñe lamngen rupamequelu huesa dungu mu, quisu cüme allcütuquefi  fei ñi quimal chem ñi duamnieel ca tañi chum duamcülen. Feitachi peñi quintuquefui publicacion ca video taiñ pagina internet mu, femngechi ñi quelluafiel pu peñi ca pu lamngen. William feipi: “Fachantü doi falin-ngei ñi cuidangeal pu peñi, pu lamngen. Fachantü rume cüdauqueiñ taiñ quelluafiel caquelu che ñi quimafiel ta Jehová, ca femngechi mülei ñi quelluafiel pu peñi ca pu lamngen ñi püntütripanoal Jehová mu”.

16. Taiñ quimürpuel Pedro ñi epu carta mu, ¿chumngechi cüme inayafuiñ?

¹⁶ Epu carta ñi huirintucuel Pedro entuiñ falinque quimeltun. Ngüneduamimi chi cümeque dungu tami inayal. Raquiduamafuimi chi tami nietual doi cüme mongen ti hue mapu mu. Doi amuldunguafuimi chi tami colegio mu, tami cüdau ca cheu rume miyaulimi. Doi pengelafuimi tami piuqueyenieafiel pu peñi, pu lamngen. Ca loncolelmi trahunche mu, yafüluhuafuimi cüme duam mu tami cuidayafiel Jehová ñi pu ufisa. Cüme inaduamuhuaimi, huelu huesa duamquilnge tami norümtual quiñeque dungu. Taiñ Ñidol ‘cüme piuquengei’ ca quelluaimu tami doi cüme cristianongeal (1 Ped. 2:3). Pedro feipi: “Chau Ngünechen pepicayaimünmeu com dungu mu. Fei nehuentucuaimünmeu, yafültucuaimünmeu, quelluaimünmeu tamün cüme foliluucüleal reque” (1 Ped. 5:10).

17. Fentecünunoliyiñ taiñ serfinieafiel Jehová ca eluuliyiñ taiñ pepicayaeteu, ¿chem llohuaiñ?

¹⁷ Quiñe rupa Pedro falintuulafui Jesús tañi adquiñ mu tañi culpafe chengen mu (Luc. 5:8). Huelu piuqueyenquechi quellueyu Jehová ca Jesús. Tañi femngen mu inaniefi ta Jesús, feimu elungei ñi conpual cheu ñi ngünenien ta Jesús huenu mu (2 Ped. 1:11). Müna cüme dungu llohui ta Pedro. Fentecünunolmi tami serfinieafiel Jehová ca eluhulmi tami pepicayaeteu, ca elungeaimi afnoachi mongen. Femngechi ‘ayühun mu montulngeaimi fente tami feyentun’ (1 Ped. 1:9).