1. Pedro entulu fentren challhua, ¿chem raquiduami?

 QUIÑE pun Pedro ca quiñeque huentru petu entuchallhuamequefuingün, huelu quiñe challhua no rume entulaingün. Fei Jesús feipieyu: “Amuaiñ llufülechi lafquen, fei ütrüftucumün ti challhuahue” (Luc. 5:4). Amuli, nücayafun chi challhua ¿pipelai Pedro? Femfulu rume, amui müten. Fei tuculu tañi challhuahue engün, Pedro ca ti pu huentru fentren challhua nüfingün. Fentren challhua tañi entun engün, ti challhuahue epeque huicüri. ¡Afmatufali! Pedro ca caquelu huentru lelilehuingün, feimu Pedro feipi: “Culpafe huentrungen iñche, Ñidol. Püntütripange iñche mu” (Luc. 5:6-9). Fei Pedro, ¿inei am ta iñche tañi müleal Jesús engu? pipelai tañi raquiduam mu.

2. Inaduamliyiñ ñi rupan ta Pedro, ¿chumngechi quelluafeiñmu?

² Felei llemai, Pedro culpafe huentrungefui. Biblia feipi Pedro quiñeque mu huelulcauquefui tañi feipiqueel ca tañi femqueel mu. Eimi, ¿Pedro reque rupaqueimi cai? ¿Ayüafuimi tami norcünutual tami chumngechi chengen? ¿Cam alüñma chaftuqueimi huesaque raquiduam? Femngechi dungu mu rupamequelmi, huesa duamquilnge. Inaduamaimi ñi rupan ta Pedro. Raquiduamnge tüfa, Pedro fentrenque rupa huelulcauquefui, huelu Jehová ellcacünulafi feichi dungu, huirintucucünufi mai Biblia mu taiñ quimeltuaeteu falinque dungu (2 Tim. 3:16, 17). Inaduamliyiñ Pedro tañi huelulcauquefel iñchiñ reque, fei quimaiñ Jehová raquiduamcülequelai taiñ huelulcaunoal ta iñchiñ. Doi mai, Jehová ayüquei taiñ serfinieafiel culpan chengefuliyiñ rume.

3. ¿Chumngelu am fente falin-ngei taiñ serfinieafiel Jehová huelulcauliyiñ rume?

 ³ Rume falin-ngei taiñ serfinieafiel Jehová huelulcaufuliyiñ rume, ¿chumngelu feipiqueiñ? Raquiduamnge tüfa, quiñe che ayüle tañi quim trutrucatual, alüñma quimcantumequeafui. Petu quimcantumequele, huelulcahuai llemai. Quim trutrucatufule rume, quiñeque mu cüme dungul-layafui. Femfulu rume, quisu amulei tañi dungulmequefiel ti trutruca. ¿Chem enseñalqueiñmu tüfa? Huelulcauliyiñ, femhuelayan piafuiñ chi, huelu ca huiño huelulcautuafuiñ. Huelu fentecünuquelaiñ, amuleiñ taiñ doi cüme cristianongeal. Com iñchiñ femqueiñ taiñ femnoafel, huelu fentecünunoliyiñ, Jehová quelluaiñmu taiñ doi cümelcayal (1 Ped. 5:10). Feula peafiyiñ Pedro ñi serfiniefiel Jehová huelulcaufulu rume. Ca peaiñ Jesús chumngechi ñi cutranpiuqueyefiel ta Pedro, fei tüfa quelluafeiñmu taiñ fentecünunoal taiñ serfiafiel Jehová.

4. Pedro, ¿chumngechi troquiuquefui? Huelu, ¿chem pieyu Jesús? (Lucas 5:5-10).

⁴ Pedro feipilu “culpafe huentrungen”, quimlaiñ chumngelu am tañi feipin (papeltunge Lucas 5:5-10). Feipinofulu rume, huelu ¿fütra huelulcauquepelafui Pedro? Cafei Pedro llicalefui, ¿falinolu troquiupefui mai? Feimu Jesús piuqueyenquechi feipieyu: “Llicahuelayaimi”. Pedro turpu ngoimalai Jesús tañi maneluucülen quisu mu. Rupachi antü mu, Pedro ca tañi peñi, Andrés pingelu, elcünuingu ti cüdau tañi niequefel engu, fei coningu Jesús tañi amuldungun mu. Femngechi Jehová rume cümelcaeyu engu (Mar. 1:16-18).

5. ¿Chem cümeque dungu llohui Pedro?

⁵ Pedro inafilu ta Jesús, pei afmatufalchi dungu Jesús mu. Pefi Jesús chumngechi ñi tremoltufiel pu cutran, ñi huemünentuquefiel huesaque püllü ca ñi huiñomongeltufiel quiñeque che (Mat. 8:14-17; Mar. 5:37, 41, 42). b Cafei quiñe vision mu, Pedro pei Jesús ñi lonco ülmencüleal Jehová tañi Gobierno mu. Pedro turpu ngoimanentulai tañi peel (Mar. 9:1-8; 2 Ped. 1:16-18). Pedro inanofule ta Jesús, pelayafui com feitachi afmatufalchi dungu. Feimu Pedro huelulcaufulu rume ca huesaque raquiduam niefulu rume, huelu com cüme chaftufi, feimu llohui com feitachi cümeque dungu. ¿Rume mañumcülepelafui ta Pedro?

6. Pefilu rume fentren afmatufalchi dungu, ¿chem mu huelulcahui Pedro?

 ⁶ Pefilu rume com feitachi cümeque dungu, Pedro ca huelulcauquefui. Peafiyiñ quiñeque dungu. Jesús feipilu tañi sufrial ca tañi layal chumngechi ñi feipin Biblia, fei Pedro feipieyu: “Eimi femngechi dungu mu rupalayaimi” pieyu (Mar. 8:31-33). Cafei fentrequen rupa, Pedro ca caquelu apostol notucauquefuingün inei tañi hunencülen (Mar. 9:33, 34). Feichi pun petu ñi langümngenon Jesús, Pedro entui tañi espada, fei catrünentuñmafi ñi pilun quiñe huentru (Juan 18:10). Feichi pun, Pedro cüla rupa quimlafiñ ta Jesús pi (Mar. 14:66-72). Inaduamlu ñi femün, Pedro ngümacahui fente tañi hueñancün (Mat. 26:75).

7. Deu huiñomongetulu Jesús, ¿chem cümeque dungu llohui Pedro?

⁷ Pedro rume huesa duamcülefui tañi femün mu, huelu Jesús quisucünulaeyu. Huiñomongetulu ta Jesús, pengelelfi ta Pedro fente tañi piuqueyeniefiel, ¿chumngechi? Feipifi tañi cuidañmayafiel tañi pu ufisa (Juan 21:15-17). Pedro eluucülefui tañi femal, feimu Pedro mülerpui ti Pentecostés pingechi fiesta mu Jerusalén mapu mu. Ca feichi mu, dullingei ñi amual huenu mu.

8. ¿Chem mu huelulcahui Pedro Antioquía huaria mu?

⁸ Dullin cristianongefulu rume, Pedro ca huelulcauquefui. Peaiñ tañi rupan ti tripantu 36 mu. Feichi mu, Chau Dios huercüfi ta Pedro Cornelio mu, quisu judio tuhun-ngelafui. Fei Chau Dios dullin cristianocünufi ta Cornelio, tüfa pengeli epu dungu: “Chau Dios dullintuchequelai” ca pu judiongenochi che conafuingün Jehová ñi trahunche mu (Hech. 10:34, 44, 45). Feichi mu müten, Pedro eluhui tañi trahuluhual pu judiongenochi che engün, cuifi turpu femquelafui (Gál. 2:12). Huelu rupai quiñe dungu. Feichi mu, mülequefui quiñeque cristiano judiongelu petu raquiduamquefuingün ñi trahunoal pu judiongenochi che engün. Fei quiñeque cristiano femngechi raquiduamquelu puhuingün Antioquía huaria mu, fei mu Pedro iquefui pu cristiano judiongenolu. ¿Chumi ta Pedro puulu tati pu judio? Pedro püntünentuhui pu judiongenochi cristiano mu. ¿Llicalefui chi ta Pedro tañi chem pingeal? Ti apostol Pablo pefi tañi huesa femün ta Pedro, fei norümtufi com che ñi adquiñ mu (Gál. 2:13, 14). Huelulcaulu Pedro, huelu fentecünulai tañi serfinieafiel Jehová, ¿chem quellueyu? Peafiyiñ.

9. ¿Chumngechi pengeli Pedro tañi püntütripaquenon Jesús mu? (Juan 6:68, 69).

⁹ Pedro turpu püntütripalai Jesús mu, chem no rume famentulaeyu tañi inanieafiel ta Jesús. Quiñe rupa Jesús feipi quiñe dungu, fei tañi pu discipulo entedelafingün (papeltunge Juan 6:68, 69). Cüme entendenolu engün am, feimu quiñeque püntütripai Jesús mu. Huelu Pedro femlai, doi mai feipifi ta Jesús: “Eimi tami feipin hulquei rumel mongen”.

10. Jesús, ¿chumngechi pengeli tañi maneluucülen ta Pedro mu? (Ca inaduamnge ti adentun).

¹⁰ Jesús quisucünulafi ta Pedro. Feichi pun petu ñi lanon Jesús, Jesús quimniefui Pedro ca caquelu pu apostol tañi quisucünuaeteu. Femfulu rume, Jesús maneluhui Pedro mu tañi huiñotual tañi serfinieafiel ta Jehová (Luc. 22:31, 32). Jesús quimniefui quiñe che tunte ayüfule rume ñi femal cümeque dungu, huelu huelulcahuafui  (Mar. 14:38). Feimu Pedro quimlafiñ ta Jesús pilu rume, Jesús maneluucülefui quisu mu. Feimu huiñomongetulu Jesús, peufaluhui ta Pedro mu (Mar. 16:7; Luc. 24:34; 1 Cor. 15:5). Pedro rume huesa duamcülequefui, feimu ¿rume yafültucupelaeyu tañi peel?

11. Jesús, ¿chumngechi pengelelfi ta Pedro Jehová ñi quelluaeteu?

¹¹ Jesús pengelelfi ta Pedro Jehová tañi quelluaeteu. Huiñomongetulu Jesús, ca quiñe rupa quellufi tañi pu discipulo ñi entual fentren challhua (Juan 21:4-6). Tüfachi dungu ñi rupan, Pedro quimtucui Jehová ñi eluaeteu com tañi duamnieel. Feichi mu Pedro, ¿ca acordarumepelai ñi feipin ta Jesús? Jesús feipi com pu doyümquelu Jehová ñi dungu fei Jehová cuidanieaeyu (Mat. 6:33). Feimu Pedro doyümlafi tañi challhuayal, doi mai ñi cüdahuelafiel ta Jehová com ñi mongen mu. Ca llicanon mu, amuldungui Pentecostés 33 tripantu mu, ca quellufi fentren che ñi inayentuafiel ta Jesús (Hech. 2:14, 37-41). Rupachi antü mu, ca quellufi pu Samaria che ca judiongenochi che ñi inayafiel ta Jesús (Hech. 8:14-17; 10:44-48). Jehová ñi quellun mu, Pedro quellufi fillque tuhun-ngechi che ñi conal Jehová ñi troquiñche mu.

12. Cüdautuliyiñ taiñ femhuenoal huesaque dungu, ¿chumngechi quelluafeiñmu Pedro ñi rupan?

¹² Cüdautuliyiñ taiñ femhuenoal huesaque dungu, huesa duamcüleafuiñ. Huelu Jehová quelluaiñmu taiñ amuleal (Sal. 94:17-19). Peafiyiñ ñi rupan quiñe peñi. Petu ñi quimnofiel ta Jehová, fentren tripantu mu cudumuuquefui chaf huentru engu. Quimfilu ti rüf dungu, cümelcünutui tañi mongen. Femfulu rume, quiñeque mu petu niequefui huesaque raquiduam, ¿chem quellueyu tañi amuleal? Quisu feipi: “Jehová yafültucuchequei. Quimürpun Jehová tañi nehuen mu iñche cüme yenieafun tañi mongen chumngechi ñi ayüqueel ta Jehová. Chau Jehová ñi duam mu, iñche serfiniequefiñ. Quisu nehuentucuqueneu culpafe chengelu rume iñche”.

13. ¿Chumngechi inayentuafuiñ ta Pedro? (Hechos 4:13, 29, 31; ca inaduamnge ti adentun).

¹³ Chumngechi peiñ, Pedro quiñeque mu huelulcahui llicafilu tati pu che.  Huelu ca llellipuquefui Jehová tañi nehuen piuquengeal (papeltunge Hechos 4:13, 29, 31). Iñchiñ ca femngechi nehuen piuquengeafuiñ. Peaiñ ñi rupan quiñe peñi Horst pingelu. Hueche huentrungelu, mülequefui ti Alemania nazi mu, feichi mu pu che mülefui ñi feipial chaliulu engün: “¡Hitler montulaiñmu!”. Horst tañi pu profesor ca tañi pu compañ colegio mu, dicümtucuquefeyu tañi femngechi feipial. Horst quimniefui ñi cümenon tüfa, huelu quiñeque mu fente ñi llicaniefiel mu engün, femngechi chali. Fei tañi pu chau illcutulaeyu engu, doi mai quiñentrür ngillatufingün Jehová ñi nehuen piuquengeal ti hueche. Pu chau ca Jehová tañi quellun mu, feitachi hueche nehuen piuquecünuhui. Fei feipi: “Jehová turpu quisucünulaeneu”. c

14. Pu loncolelu, ¿chumngechi yafültucuafuingün pu ngañhuadcülelu?

¹⁴ Jehová ca Jesús quisucünuquelaeiñmu. Rupan ñi feipiel Pedro ñi quimnofiel ta Jesús, ¿chumafui? ¿Inanieafui ta Jesús cam fentecünuafui? Jesús ngillatufi ta Jehová Pedro ñi duam mu, femngechi ñi fentecünunoal tañi feyentun. Rupachi antü mu, Jesús iñche ngillatuñmaeyu pifi ta Pedro, ca feipifi ñi yafültucuafiel pu peñi ca pu lamngen. Femngechi pengelelfi tañi maneluucülen quisu mu (Luc. 22:31, 32). Raquiduamlu Pedro ñi feipieteu ta Jesús, ¿rume yafültucupelaeyu? Ca femngechi, Jehová ñi duam mu, pu loncolelu quelluafeiñmu taiñ cüme femal, femngechi taiñ serfinieafiel Jehová (Efes. 4:8, 11). Peafiyiñ ñi femquen quiñe loncolelu Pablo pingelu. Fentren tripantu yeniei tañi loncolen ca eluucülequei ñi yafültucuafiel pu peñi ca pu lamngen.  Quisu pefiel mu ñi ngañhuadcülen engün, fülcontuquefi. Ca nütramcalelfi pu peñi ca pu lamngen Jehová chumngechi fültucupaeyu engün quisu tañi trahunche mu. Ca feipiquefi fente ñi piuqueyeteu Jehová ca quisucünulayaeyu engün. Quisu feipi: “Pequen fentren peñi ca lamngen ngañhuadcülelu, huelu Jehová ñi quellun mu poyeniefingün”.

15. Ñi rupan Pedro ca peñi Horst, ¿chumngechi pengeli ñi femtripaquen Mateo 6:33?

¹⁵ Jehová elufi Pedro ca caquelu pu apostol com ñi duamnieel engün. Ca femngechi eluaiñmu com taiñ duamnieel doyümliyiñ taiñ amuldungual (Mat. 6:33). Peaiñ ñi femün taiñ peñi Horst taiñ nütramcapeel. Deulu ti Epungechi Fütra Hueichan com Mapu püle, taiñ peñi ayüniefui ñi precursorngeal, huelu taiñ peñi pofrelefui. Feimu ramtuuquefui: ¿niepean mai tañi duamnieel ñi hunelerpual amuldungun mu? Fei, ¿chumi? Mülepalu ti huitran-ngepaquechi loncolelu, taiñ peñi eluhui com feiti semana ñi amuldungual. Femngechi quimafui ñi rüf quelluafeteu ta Jehová. Aflu chi semana, ti huitran-ngepaquechi loncolelu elueyu quiñe sobre nielu plata, huelu feipilaeyu inei ñi huercületeu ti plata. ¡Afmatulehuei taiñ peñi! Feitachi plata mu fentren cüyen mu precursorngeafui. “Feulaque ta cüme quimnien Jehová turpu tañi quisucünunoaeteu” pi. Feichi mu, eluhui ñi hunecünuafiel Jehová ñi dungu (Mal. 3:10).

16. ¿Chumngelu cümeafui taiñ inaduamal Pedro ñi femün ca ñi huirintucuelchi carta?

¹⁶ Pedro, ¿rume ayüucülepelafui Jesús ñi quisucünunoeteu? Jesús pepicacünufi ta Pedro ñi cüme apostolngeal ca ñi inayentufalngeal. Ca iñchiñ fentren cümeque quimeltun nentuafuiñ Jesús chumngechi ñi pepicafiel ta Pedro. Cüpalechi troquiñ mu, peaiñ quiñeque quimeltun. Ngüneduamafiyiñ epu carta ñi huirintucuel Pedro ca chumngechi quelluqueiñmu famülque mu.