1, 2. ¿Chumngelu cümeafui taiñ inaduamafiel Sansón ñi rupan?

 NÜTRAMCANGEN mu Sansón mu, ¿raquiduampelaimi fente ñi nehuen-ngen? Huelu Sansón fütra huelulcahui, feimu huesaque dungu mu rupai. Huelulcaufulu rume, Jehová loncontucuquefi Sansón chumngechi tañi cüme serfiquefeteu, feimu huirintucucünufi Biblia mu.

² Jehová elufi nehuen ta Sansón ñi femal afmatufalchi dungu ñi quelluafiel pu Israel che. Feimu Jehová elcünui ñi huirintucungeal Sansón ñi rume feyentulen (Heb. 11:32-34). Tañi femün ta Sansón yafültucuafeiñmu. Cüdaungechi dungu mu rume rupaquefulu, maneluuquefui Jehová mu. Tüfachi troquiñ mu peaiñ chem quimürpuaiñ ñi femün ta Sansón ca chumngechi quelluafeiñmu.

3. ¿Chem cüdau llohui ta Sansón?

³ Choyüngelu Sansón, pu Filistea che ngüneniefingün pu Israel che ca rume huesalcaquefingün (Juec. 13:1). Pu Israel che rume cutrancauquefuingün pu Filistea che ñi duam mu. Feimu Jehová dullifi Sansón ñi montulafiel pu Israel che (Juec. 13:5). Fütra cüdaufel tati. Ñi femürpual tüfachi cüdau, Sansón mülefui ñi maneluhual Jehová mu.

4. Jehová, ¿chumngechi quellufi Sansón ñi lifretripayal pu Filistea che mu? (Jueces 15:14-16).

⁴ Peafiyiñ Sansón chumngechi ñi maneluhun Jehová mu tañi quelluaeteu. Quiñe rupa pu Filistea che  amuingün Lehí mapu mu ñi nüafiel ta Sansón. Lehí, ¿mülepelai Judá mapu mu? Feimu pu judio fente tañi llican mu trarifingün Sansón epu hue llasu ca hultucufingün pu Filistea che mu (Juec. 15:9-13). Fei “Jehová ñi nehuen nehuentucufi ta Sansón”, fei quisutu reque catrücahui ti llasu. Fei Sansón ‘pei quiñe burro ñi trangatranga (traltri), nüfi ca fei mu langümfi huaranca huentru’ (papeltunge Jueces 15:14-16).

5. Sansón, ¿chumngechi pengeli tañi maneluucülen Jehová mu?

⁵ Sansón, ¿chumngelu am pünefi quiñe burro ñi trangatranga? Tüfa pünengequelafui ta hueichan mu. Sansón quimniefui chem hueichahue rume pünefule, fei hueutripayafui Jehová tañi quellun mu müten. Sansón pünefi chem tañi nieel müten tañi femal Jehová ñi ayüqueel. Fei tañi maneluucülen Jehová mu hueufi pu Filistea che.

6. ¿Chem quimürpuafuiñ Sansón ñi femün?

⁶ Iñchiñ ca eluafeiñmu nehuen ta Jehová taiñ femal chem cüdau rume taiñ elfalcünungeel. Cüdaungefulu rume, Jehová quelluafeiñmu turpu taiñ raquiduamquenofel rume. Maneluuliyiñ Jehová mu, fei quelluaiñmu taiñ femal quisu tañi ayüqueel, chumngechi ñi quellufiel ta Sansón (Prov. 16:3).

7. ¿Chumngelu am fente falin-ngei taiñ llellipuafiel Jehová taiñ adnieaeteu? Feipinge quiñe rupan dungu.

⁷ Fentrenque pu peñi, pu lamngen quelluntucuquelu ñi deumangeal Trahunhue Ruca maneluuqueingün Jehová mu. Cuifi mu, doi deumangequefui Trahunhue Ruca ca caquelu ruca poyengeam Jehová. Huelu Jehová tañi troquiñche am doi alün-ngerpulu, feimu duamngefui ñi cacünungetual ti dungu. Pu peñi loncolelu tüfachi cüdau mu llellipufingün Jehová tañi adnieaeteu. Fei, ¿chumingün? Ngillaquefingün  quiñeque ruca ca cüme elcünutufingün. Peafiyiñ ñi feipin Roberto, quisu quelluntucuquei ñi deumangeal fillque ruca poyengeam ta Jehová huall mapu mu. Quisu feipi: “Femngechi cüdau am femngequenofulu, feimu cüdautuiñ taiñ femal. Huimtulequefuiñ chumngechi taiñ cüdauquen, huelu cacünutuiñ chumngechi taiñ cüdauquefel, fei Jehová cümelcaeiñmu”. Tüfachi rupan dungu pengeli Jehová adcünufi tañi pu che tañi femal quisu tañi ayüqueel. Feimu iñchiñ mülefui taiñ ramtuhual: “¿Llellipuquefiñ ta Jehová tañi adnieaeteu? ¿Eluucülepen mai tañi cacünutual chumngechi ñi cüdauquen, femngechi ñi doi cüme cüdahuelafiel Jehová?”.

8. Huihulu ta Sansón, ¿chumi?

⁸ ¿Acordaimi quiñeque afmatufalchi dungu ñi femün ta Sansón? Quisu langümfi quiñe trapial ca langümfi 30 Filistea huentru Asquelón mapu mu (Juec. 14:5, 6, 19). Sansón quimniefui Jehová ñi quellun mu müten femquefui feitachi fütraque dungu. ¿Chumngechi quimiyiñ? Quiñe rupa Sansón langümfilu huaranca huentru, fei huihui. ¿Chumi? Quisu tripalai ñi quintual co, feipifi ta Jehová tañi eluaeteu (Juec. 15:18). Femngechi pengeli ñi maneluucülen Jehová mu.

9. ¿Chumi Jehová llellipueteu ta Sansón? (Jueces 15:19).

⁹ Jehová, ¿chumngechi huiñoldungufi ñi llellipueteu ta Sansón? Femi quiñe afmatun dungu, fei elufi co. Sansón pütocofilu ti co, nehuen-ngetui (papeltunge Jueces 15:19). Feitachi rünganco fentren tripantu mülefui. Samuel huirintuculu Jueces pingechi lifru, feitachi rünganco ¿petu mülepelafui? Feimu tati pu Israel che pefiel mu ti co, raquiduamquefuingün Jehová tañi elueteu chem tañi duamnieel engün. Feimu maneluuquefuingün Jehová tañi quelluaeteu.

10. ¿Chumafuiñ taiñ llohuafiel Jehová tañi quellun? (Ca inaduamnge ti adentun).

¹⁰ Tunte pepiluufuliyiñ rume ca chem falinque cüdau rume femfuliyiñ Jehová ñi troquiñche mu, rumel quintuaiñ Jehová taiñ quelluaeteu. Ñom piuque mu raquiduamaiñ Jehová tañi quellun mu müten femafuiñ com taiñ feipieteu, iñchiñ taiñ nehuen mu no. Ca raquiduamaiñ Sansón mu. Pütocofilu müten ti co Jehová tañi hulel, nehuencontui Sansón. Sansón reque, iñchiñ cüme llohuafiyiñ chumngechi taiñ quelluqueteu Jehová, femngechi taiñ serfinieafiel (Mat. 11:28).

11. ¿Chumngechi eluhuaiñ ñi quelluaeteu Jehová? Feipinge ñi rupan quiñe curehuen.

¹¹ Peaiñ ñi rupan ta Alexéi. Taiñ peñi mülei Rusia mu, tüfa mu inantucungequei pu testigo. Fei, ¿chem quellueyu taiñ peñi ñi nehuencüleal? Quisu ca tañi domo fillque dungu femquei ñi fülmanieafiel Jehová. Fei feipi: “Fill antü eluucülequen ñi papeltuafiel ca ngüneduamafiel ti Biblia. Tañi domo iñchiu fill antü pequefiyu tati texto diario ca trür llellipuquefiyu ta Jehová”. ¿Chem quimeltuafeiñmu ñi femün ta Alexéi? Quisutu maneluulayaiñ. Doi mai eluhuaiñ Jehová taiñ quelluaeteu. ¿Chumngechi femafuiñ? Fill antü femaiñ fillque dungu ñi doi feyentuleal Jehová mu: papeltuafiyiñ  ta Biblia, ngillatuafiyiñ Jehová, amuaiñ trahun mu ca amuldunguaiñ. Femngechi Jehová quellunieaiñmu taiñ serfinierpuafiel. Jehová elufi nehuen ta Sansón, iñchiñ ca femngechi eluaiñmu nehuen.

12. ¿Chem dungu mu huelulcahui Sansón? Ca, ¿chumngelu cümelafui ñi femün?

¹² Sansón eluucülefui tañi quelluaeteu ta Jehová. Quiñe rupa Sansón ayüfui ñi nieafiel quiñe Filistea domo. ¿Chumngelu femi? Jehová tañi adnieteu mu. Jehová ayüquefui tañi huehuafiel pu Filistea che, feimu adcünufi ta Sansón tañi nieafiel tüfachi domo. Ca rupa mu, Sansón amui quiñe cüri domo ñi ruca mu Filistea mapu mu. Feichi mu, Jehová nehuentucufi Sansón ñi ngedunentuafiel ti huaria ñi puerta ca ñi meñcu yeafiel, femngechi inei rume lefcontuafui ti huaria (Juec. 14:1-4; 16:1-3). Huelu quiñe rupa quintulai Jehová tañi quelluaeteu. Sansón “ayüfi quiñe domo mülelu Sorec ñi laf mapu mu. Tüfachi domo Dalila pingei” (Juec. 16:4). Dalila, ¿Israel tuhun-ngepelafui? Feimu nieule engu, quellulayafeyu ta Sansón tañi chaftuafiel pu Filistea che. Ñi femün ta Sansón quisu tañi ngünehun mu, Jehová tañi quellun mu no. Müna huesa tripai ñi femün ta Sansón.

13. Dalila tañi duam mu, ¿chem rupai ta Sansón?

¹³ Pu Filistea che feipifingün ta Dalila ngünencafilmi Sansón, cullihuaiñ pingei. Fei Dalila femi. Sansón ayüniefilu am ta Dalila, fei quisu ngüneduamlafui tañi chumaeteu. Dalila fentrenque rupa ramtufi ta Sansón cheu tañi  entuel ñi nehuen, fei Sansón feipieyu. Ñi femün ta Sansón rume huesalcahui, nehuen-ngehuelai ca Jehová ayüucülehuelai quisu mu (Juec. 16:16-20).

14. ¿Chem rupai ta Sansón tañi maneluhun ta Dalila mu?

¹⁴ Sansón rupafui rume huesaque dungu tañi maneluhun ta Dalila mu. Pu Filistea che nüfingün ta Sansón ca traumacünufingün. Ca presuntucufingün Gaza huaria mu. Feichi huaria mu Sansón illamcafi pu Filistea che cuifi mu, huelu feula quiñe esclavo reque yengei. Feipingei ñi huaichüfafiel ti cura rüngümquetranquelu. Rupachi antü mu, pu Filistea che fiestañmafingün ti coila dios Dagón. Raquiduamingün Dagón ñi quellun mu nüfingün ta Sansón, feimu cüpalingün ta Sansón fiesta mu, fei ayentufingün (Juec. 16:21-25).

15. ¿Ca chumngechi am ta Sansón quintufi Jehová tañi quelluaeteu? (Jueces 16:28-30; ca inaduamnge ti adentun hunen pagina mu).

¹⁵ Sansón huelulcaufulu rume, fentecünulai ñi serfinieafiel Jehová. Sansón quintui chumngechi ñi quehuayafiel pu Filistea che, femngechi ñi huechurpual tañi huercüeteu ta Jehová (papeltunge Jueces 16:28-30). Sansón llellipufi ta Jehová: “Eluen nehuen ñi huiñoleltuafiel pu Filistea che chem tañi femeteu”. Jehová allcütufi ta Sansón, fei huiñoleltufi tañi nehuen. Feichi mu Sansón doi alün Filistea che langümürpufi.

16. ¿Chem quimeltuafeiñmu tañi huesa femün ta Sansón?

¹⁶ Sansón tañi huesa femün mu huesaque dungu rupafui. Femfulu rume, amulei ñi serfiniefiel Jehová. Iñchiñ Sansón reque, ca fentecünulayaiñ taiñ serfinieafiel Jehová huesa femfuliyiñ rume, norümtungeliyiñ cam niehuenoliyiñ taiñ cüdau Jehová ñi trahunche mu. Loncontucuaiñ: Jehová eluucülei taiñ perdonayaeteu (Sal. 103:8-10). Huelulcauliyiñ rume, Jehová quelluaiñmu taiñ femürpual quisu tañi ayüqueel, chumngechi tañi femfiel ta Sansón.

17, 18. Tañi rupan ta Michael, ¿chumngechi yafültucuqueiñmu? (Ca inaduamnge ti adentun).

¹⁷ Peafiyiñ tañi rupan taiñ peñi Michael. Quisu rume cüdahuelquefui ta Jehová, siervo ministerial ca precursorngefui. Huelu huelulcahui, fei niehuelai  elfal cüdau trahunche mu. Michael feipi: “Femngechi dungu ñi rupan mu, cüdahuelhuenoafilu ta Jehová troquiuquefun. Quimniefun Jehová tañi quisucünunoaeteu, huelu ramtuuquefun: ‘¿Cüme hueniyeniepeafiñ mai ta Jehová? ¿Cüdahuelniepeafiñ mai chumngechi tañi femquefel ta cuifi?’”.

¹⁸ Huelu Michael fentecünulai ñi serfinieafiel Jehová. Feipi: “Eluhun tañi doi cüme hueniyeafiel ta Jehová, ngillatuquefiñ, papeltuquen ca raquiduamquefiñ tañi papeltuel mu”. Rupachi antü mu, Michael precursor regularngerpui ca loncolerpui trahunche mu. Feipi: “Tañi pu peñi yafültucueneu. Pu loncolelu ca quelluqueneu, femngechi quimürpun Jehová tañi piuqueyenieteu, fei cüme raquiduam mu serfinierpufiñ. Feita quimeltueneu com tati rüf repentiulu, Jehová ta perdonaquefi” pi. Huelulcauliyiñ rume, huelu norümuuliyiñ ca eluuliyiñ Jehová taiñ quelluaeteu, Jehová quellunieaiñmu taiñ femal quisu tañi ayüqueel ca cümelcayaiñmu (Sal. 86:5; Prov. 28:13).

19. ¿Chumngechi yafültucuqueiñmu Sansón tañi femün?

¹⁹ Tüfachi troquiñ mu peiñ afmatufalchi dungu ñi femün ta Sansón. Quisu culpan chengefui ca huelulcahui. Huelu fentecünulai ñi serfiniefiel Jehová, huelu Jehová famentulaeyu. Quelluniefi ñi femürpual quisu tañi ayüqueel ca elutufi tañi nehuen tañi niequefel. Jehová cüme troquiniefi ta Sansón tañi feyentulen mu. Fei huirintucucünui tañi üi caquelu huentru ca domo feyentulelu Hebreos capitulo 11 mu. Jehová feipicünui taiñ nehuentucuaeteu, doi mai rupaliyiñ cüdaungechi dungu mu. Tüfa rume yafültucuqueiñmu. Feimu Sansón reque, llellipunieafiyiñ ta Jehová taiñ nehuentucuaeteu (Juec. 16:28).