Choyüngen 1934 tripantu mu. Tañi chau ca ñi ñuque Suiza mu mülequefulu cüpaingu Canadá mu, quiñe pichi huaria mu Timmins pingelu. Feichi 1939, tañi ñuque eluhui ñi papeltual Ti Huerquen pingechi revista ca amui pu testigo ñi trahun mu. Fei iñchiñ yeeiñmu, tañi cüla lamngen, cüla peñi ca iñche. Pichiñma mu, testigongerpui ñi ñuque.

Tañi chau ayülafui ñi testigongerpun ñi ñuque. Huelu ñi ñuque rume falinturpufi ti rüf dungu ca turpu elcünulafi. Feichi 1940 tripantu püle, eluñmangehuelai pu testigo ñi amuldungual Canadá mapu mu, huelu ñi ñuque femcünuulai. Cafei tañi chau huesa dunguquefilu rume ñi ñuque, huelu ñi ñuque fürenequefeyu ca respetaquefeyu. Ñi femün mu ñi ñuque, quellueiñmu iñchiñ taiñ ca serfirpuafiel Jehová. Rupachi tiempo mu, tañi chau ñi raquiduam caletui, fei doi cüme troquirpueiñmu.

Feichi 1950 tripantu hualüng mu amun quiñe fütra trahun “Aumento de la Teocracia” pingelu, tüfa femngei Nueva York pingechi huaria. Feichi fütra trahun mu quimfiñ fentren peñi ca lamngen com püle cüpalu. Ca allcüfiñ ñi feipin pu peñi ca pu lamngen cüpalu Galaad pingechi Escuela mu. Feimu eluhun ñi doi cüdahuelafiel Jehová, raquiduamün ñi precursorngerpual. Puutulu ñi ruca mu iñche, apolfiñ chi solicitud ñi precursor regularngeal. Pu peñi mülelu Betel Canadá mu huercüleneu quiñe carta, feipieneu tañi hunelu mu ñi fautizahual. Feimu fautizahun 1 conchi octubre  cüyen mu 1950 tripantu. Quiñe cüyen rupai, fei precursorngerpun, fei feipingen ñi amual Kapuskasing pingechi huaria mu. Tüfachi huaria rume camapulei cheu ñi mülen iñche.

Ellaconlu chi tripantu 1951, pu peñi cüdauquelu Betel ruca mu ramtufingün quiñeque peñi quimfilu frances quehun ñi huiñamtuhual Quebec mapu mu, feichi mapu frances quehun dungungequefui ca pichin testigo mülequefui. Iñche quim dunguquefun frances ca gringo dungun, feimu feipin ñi amual. Fei mandangen Rouyn pingechi huaria mu. Inei no rume quimlafuiñ üyeu, re quimniefun cheu tañi puhual müten. Huelu com cüme tripai. Marcel ca iñche rume cüme hueniyehurpuyu, fei meli tripantu mu amuldunguyu Quebec huaria mu. Tiyeu, precursor especialcünungen.

Quebec mülelu iñche, mangelngen ñi amual Galaad pingechi Escuela mu, ti clase 26. Tüfachi Escuela femngei South Lansing huaria, Nueva York mapu mu. Rume ayüucülen. Ti Escuela afi 12 conchi febrero 1956 tripantu. Ca huercüngen ñi amual Ghana pingechi mapu mu, África Occidental mu. b Petu ñi amunon, huiñon Canadá mu ñi com cüme pepicayal ti documento ñi mülepual Ghana mapu mu. Epu cam cüla semana müten mülepuafulu Ghana mapu mu iñche.

Huelu rupai regle cüyen, fei petu elungelan ti documento. Com feichi regle cüyen mülepufun quiñe familia Cripps pingelu. Niefuingün quiñe ñahue, Sheila pingelu. Doi cüme quimuhuiyu, fei piuqueyerpuhuiyu. Petu ñi feipinofiel tayu niehual, huelu acurumei ti documento ñi amual ta Ghana mu. Fei Sheila iñchiu llellipufiyu Jehová tayu chumal. Feipihuiyu iñche tañi amual Ghana mu, huelu ca mandaleluhuafuyu carta, femngechi quimürpuafuyu tayu niehual cam tayu femnoal. Cüdaungefui ellaca mu, huelu com cüme triparpui.

 Quiñe cüyen miyaufun tren mu, barco ca avion mu, femngechi ñi puhual ta Accra pingechi huaria, Ghana mapu mu. Superintendente de distritocünungen. Ti Betel ruca elueneu quiñe auto ñi miyahual Ghana, Costa de Marfil ca Togo mapu mu. Quisuyauquefun, huelu rume ayüquefun ñi pemeafiel pu peñi, pu lamngen.

Sabado ca domingo mu niequefun hueupin fütraque trahun mu. Niequelafuiñ cheu taiñ trahuluhual fütraque trahun mu, feimu pu peñi deumaquefuingün quiñeque llamada reque felelu, deumangelu bambú ca palmera tapül mu, femngechi taiñ llaufeñtual. Mülelafui refrigerador, feimu pu peñi langümquefuingün quiñeque culliñ tañi eluafiel iyael pu trahuluucülelu.

Fütraque trahun mu ayüfalngechi dungu rupaquefui. Petu hueupimequelu quiñe misionero, Herb Jennings pingelu, c triparumei quiñe toro. Rangiñ mu rumei, quimlafui chuchi püle tañi amual, fei ti peñi Herb afmatulehuei. Fei hula, meli nehuen-ngechi peñi nüfingu ti toro, fei com pu trahuluucülelu cultrafcuhuingün.

Semana mu quiñeque huaria mu pengelquefun ti video La Sociedad del Nuevo Mundo en acción. Pültrücünuquefuiñ quiñe sabana epu mamüll mu, femngechi ñi pengeal ti video. Pu che rume ayühuelquefeyu, quiñeque engün turpu pequelafuingün quiñe pelicula. Video mu pengelngelu quiñeque che ñi fautizahun, com cultrafcuhuingün. Pefiel mu ti pelicula, pu che quimtucuingün pu testigo ñi quiñeucülen huall mapu mu.

Epu tripantu rupalu, fei 1958 mu amun Nueva York huaria mu quiñe fütra trahun. Fei mu pefiñ ta Sheila. Precursora especialngefui Quebec mapu mu, fei ca amui ti fütra trahun Nueva York mapu mu. Fentecünuquelafuyu tayu huercüleluhual carta, fei peutulu iñchiu feipifiñ tayu niehual. Niehuayu tati pieneu. Huirintuculelfiñ peñi Knorr, d ramtufiñ ¿amuafui Sheila Galaad pingechi Escuela mu, fei ñi huercüngeal África mu? Felepe pi. Fei Sheila puulu ta Ghana, niehuiyu 3 conchi octubre 1959 tripantu mu. Iñ chiu doyümquefuyu Jehová tayu mongen mu, feimu rume cümelcaeyumu.

Fei 1961 tripantu mu, huercüngeyu Camerún mapu, feipingen ñi quelluntucual ñi müleal quiñe hue Betel ruca. Fentren cüdau niequefun. Ca elfalcünungen ñi adcünuafiel pu testigo ñi cüdau Camerún mu, feimu pütrün dungu mülefui tañi quimal. Fei 1965 mu Sheila niepüñeñi. Afmatulehueyu, raquiduamquelafuyu tayu chaungeafel. Rupalu ta antü, ayürpufiyu tayu nieal ti pichiche, huelu eluulu iñchiu ñi huiñotual Canadá mu, rupai quiñe müna huesa dungu.

Petu tañi choyüngenon, lai tañi pichiche. Ti doctor feipieyumu ñi huentrungefel ti pichiche. Doi 50 tripantu rupai, fei petu ngoimalayu ñi lan tayu pichiche. Hueñancülefulu rume iñchiu, mülenagcüleyu Camerún mu. Rume ayüfiyu feitachi cüdau.

Pu peñi ca lamngen Camerún mu inacangequefuingün tañi coneltunon politica dungu mu. Puulu chi antü ñi dullingeal quiñe hue presidente, doi cüdaungefui ti dungu. Fei 13 conchi mayo 1970 tripantu, ti gobierno eluhui ñi catrütuafiel pu testigo ñi cüdau. Huesa dungu, huelu quimniefuiñ ñi rupayal. Ti gobierno müntuñmaeiñmu taiñ hue Betel ruca, quechu cüyen müten mülefuiñ üyeu. Quiñe semana mu müten com pu misionero huemünentungeiñ Camerún mu. Rume cüdautuyu tayu elcünual pu peñi ca pu lamngen, rume piuqueyefiyu engün ca raquiduamcülefuyu tañi chumngeal engün.

Puhuiyu Francia mapu mu, cayu cüyen mülepuyu ti Betel ruca mu. Camapulefulu rume ta iñche, fentecünulan tañi quelluntucuafiel pu peñi ca pu lamngen Camerún mu mülelu. Diciembre mu huercüngeyu ti Betel Nigeria mu mülelu. Feichi Betel adcünuquefui ti cüdau ñi femngequeel Camerún mu. Nigeria mu, pu peñi ca pu lamngen rume cüme llohueiñmu. Rume ayühuiyu tayu cüdahual Nigeria mu fentren tripantu.

Sheila müte cümelcalelafui, cutrancülefui. 1973 mu amuyu quiñe fütra trahun Nueva York huaria mu. Feichi mu Sheila feipieneu: “Yafüngehuelan. Fill antü cutrancülequen”. Sheila doi mari meli tripantu compañeneu África mu. Rume ayühun fente tañi cüdahun tañi domo, huelu duamniefuyu adcünutual tayu mongen. Nütramcahuiyu, com piuque mu llellipufiyu Jehová tayu chumal. Fei eluhuiyu tayu huiñotual Canadá mu, fei mu Sheila cüme lahuentungeafui. Rume ayühuiyu tayu misionerongeal ca tayu cüdahuelafiel Jehová fill antü, feimu rume hueñancüleyumu elcünual tayu cüdau.

Puulu iñchiu Canadá mu, pen quiñe cüdau. Quiñe cuifi hueni fendequefui auto quiñe huaria mu püllelelu Toronto mu, fei elueneu cüdau. Alquilafiyu quiñe pichi  ruca, ngillafiyu quiñeque mueble, conlayu rume defen dungu mu. Ayülayu nieal fentren chemcün. Raquiduamiyu quiñe antü ca huiño nietuafuyu ti falin cüdau tayu niequefel, tayu serfiafiel Jehová fill antü. Müchai müten acui feichi antü.

Deumangequefui quiñe fütra Trahunhue Ruca Norval huaria, Ontario mapu. Fei iñche fill sabado mu amuquefun ñi quelluntucual. Rupachi tiempo mu, feipingen ñi adcünual ti cüdau ñi femngequeel ti fütra Trahunhue Ruca. Feichi mu, Sheila doi tremotufui. Fei junio 1974 tripantu, mülepuyu feichi fütra Trahunhue Ruca. Rume ayüucüleyu tayu huiño serfiafiel Jehová fill antü.

Rupachi antü mu, Sheila doi chemtui. Epu tripantu rupalu, feipingen ñi huitrancontuafiel pu trahunche Manitoba mapu. Üye mu rume huesa hutrengefui. Huelu pu peñi, pu lamngen fente taiñ piuqueyenieteu mu eñumalmaqueiñmu reque taiñ piuque. Quimtucuyu falilai cheu taiñ cüdauquen, doi mai taiñ com piuque mu cüdahuelafiel ta Jehová cheu rume müleliyiñ.

Fentren tripantu huitrancontuquefiyiñ pu trahunche. Fei 1978 mu mangelngeyu tayu cüdahual ti Betel ruca mülelu Canadá mapu mu. Pichin tiempo rupalu, quimtucun quiñe falin dungu. Feipingen tañi hulal quiñe hueupin frances quehun mu quiñe falin trahun mu. Huelu müte cüme tripalai tañi hueupin. Fei quiñe peñi ngülamtueneu, ti peñi coneltulefui ti Troquiñche Adcünuquelu ti Amuldungun. Cüme yeuquelafuyu, re huesaque dungu feipieneu tañi hueupin mu. Ayülafiñ tañi feipieteu. Feula quimtucun iñche müte cüme adümuucülelan tañi hueupial. Huelu feichi mu, re raquiduamcülefun inei tañi ngülamtueteu ca chumngechi tañi ngülamtueteu, feimu famentufiñ tañi feipingeel.

Quiñeque antü rupalu, quiñe peñi coneltulelu ti Troquiñche Adcünuquelu Betel ruca nütramcaeneu. Huesa femün tati pifiñ, huesa duamcülen tañi femün mu. Fei hula, fülcontufiñ ti peñi tañi ngülamtueteu, perdonaen pifiñ. Fei cüme piuque mu perdonaeneu. Tüfa quimeltueneu quiñe falin dungu: rume falin-ngei tañi ñom piuquengeal (Prov. 16:18). Fentren rupa llellipuquefiñ Jehová tañi huelulcahun mu. Feimu chem rume ngülamtungeli, eluucülean ñi rumel cüme llohuafiel.

Doi 40 tripantu cüdauquen Betel Canadá mu. Feichi 1985 ca fantepu, coneltulen ti Troquiñche Adcünuquelu Betel ruca. Febrero 2021 tañi poyen domo lai, rume hueñancütufiñ. Cafei niequen quiñeque cutran. Huelu serfiniequefiñ Jehová, tüfa rume ayühulqueneu, feimu matu rupaquei ta antü (Ecl. 5: 20). Cüdaungechi dungu rupaquen tañi mongen mu, huelu ñi serfiniefiel mu Jehová doi ayühulqueneu. 70 tripantu mu cüdahuelquefiñ Jehová fill antü. Llellipuquefiñ Jehová com pu hueche ñi hunentucuafiel Jehová tañi cüdau, femngechi müten ayühun mongen nieafuingün.