TROQUIÑ ÑI CHILLCATUNGEAL 38
ÜLCANTUN 25 Quiñe falin troquiñche
Jesús ñi feipin, ¿chem quimeltuqueiñmu?
“Fei epu huentru müleai ta lelfün meu: quiñe yengeai, huelu cangelu elcünungeai” (MAT. 24:40).
¿CHEM QUIMAIÑ?
Inaduamaiñ cüla pengelün dungu ñi feipin Jesús. Fei quimaiñ chumngechi Jesús juzgacheai ti fütra cutrancahun mu.
1. ¿Chumai Jesús pichiñma mu?
PICHIÑMA MU rupayai afmatufalngechi dungu, Jesús juzgayafi com pu che mülelu mapu mu. Jesús feipicünufi tañi pu discipulo chem ñi rupayal pichilehuechi antü mu petu ñi juzganofiel tati pu che (Mat. 24:3). Peafuiñ feitachi profecia Mateo capitulo 24 ca 25, ca Marcos capitulo 13, ca Lucas capitulo 21.
2. ¿Chem peaiñ tüfachi troquiñ mu, ca chumngechi quelluaiñmu?
2 Jesús quelluqueiñmu taiñ pepicaucüleal, feimu entui cüla pengelün dungu taiñ quelluaeteu. Nütramcai pu ufisa ca pu capüra, ti mari üllcha domo mu ca pu talento mu. Tüfachi cüla pengelün dungu quelluaiñmu taiñ quimal Jesús juzgayafi tati pu che tañi femün mu engün. Tüfachi troquiñ mu, quimaiñ chumngechi quelluafeiñmu. Hunelu mu, nütramcayaiñ ñi feipin Jesús pu ufisa ca pu capüra mu.
PU UFISA CA PU CAPÜRA
3. ¿Chumül juzgacheai ta Jesús?
3 Jesús nütramcalu pu ufisa ca pu capüra mu, ¿chem quimeltui? Fei juzgafile tati pu che, inaduamüñmayafi ñi lloupefiel mai ti cümeque dungu, ca ñi quelluntucupefiel mai engün pu dullinque cristiano (Mat. 25:31-46). Jesús juzgayafi tati pu che “fütra cutrancahun” mu, epe conle Armagedón hueichan. Fei feipiai quiñe che ñi ufisangen cam ñi capürangen (Mat. 24:21). Quiñe camañfe hudamentuquei ti ufisa pu capüra mu. Fei Jesús ca femngechi femai, hudamentuafi pu che quelluntucuquefilu pu dullinque cristiano ca tati femquenolu.
4. Ñi feipin Isaías 11:3, 4, ¿chumngelu maneluhuafuiñ ñi nor juzgacheal ta Jesús? (Inaduamnge ti adentun).
4 Biblia feipi Jehová juezcünufi ta Jesús, fei Jesús nor juzgayafi tati pu che (papeltunge Isaías 11:3, 4). Fei inaduamüñmayafi pu che tañi chumqueel, raquiduamqueel ca tañi feipiqueel engün ca chumngechi ñi troquifiel pu dullinque cristiano (Mat. 12:36, 37; 25:40). Feichi mu, Jesús deu quimai inei tañi quelluntucuquefiel pu dullinque cristiano ca tañi cüdau. a Quiñe che, ¿chumngechi quelluntucuafui pu dullinque cristiano? Tañi amuldungun mu. Tüfa rume falin-ngei. Tati femngechi femlu nor che pingeai, ca rumel müleafuingün mapu mu. ¡Rume cümelcangeaingün! (Mat. 25:46; Apoc. 7:16, 17). Fei engün püntütripanole Jehová mu ti fütra cutrancahun mu ca deu rupale, huirintucuñmangeai tañi üi engün “ti mongen ñi lifru mu” (Apoc. 20:15).
Pichilehuei Jesús ñi juzgacheal, fei feipiai pu che ñi ufisangen cam ñi capürangen. (Inaduamnge parrafo 4).
5. 1) Ñi feipin Jesús pu ufisa ca pu capüra mu, ¿chem quimeltueiñmu? 2) ¿Inei engün am mülei ñi inayafiel tüfachi ngülam?
5 Pengelaimi taiñ püntütripaquenon Jehová mu. Jesús entui tüfachi pengelün dungu ñi quelluafiel pu che rumel mülealu mapu mu. Fei engün, ¿chumngechi pengelqueingün tañi püntütripaquenon Jehová mu? Ñi quelluntucufiel mu pu dullinque cristiano amuldungun mu ca ñi cüme inaquefiel ñi feipin ti quim manelfal cüdaufe, Jesús tañi dulliel (Mat. 24:45). Pu maneluulu ñi amual huenu mu ca mülei ñi inaduamal ñi feipin Jesús pu ufisa ca pu capüra mu, ¿chumngelu? Jesús ca ngüneduamai ñi femqueel, ñi raquiduamqueel ca ñi feipiqueel engün. Feimu quisu engün ca pengelaingün tañi püntütripaquenon Jehová mu. Jesús ca entui cangelu epu pengelün dungu ñi quelluafiel pu dullinque cristiano. Tüfa mülei Mateo capitulo 25 mu. Hunelu, peafiyiñ ñi feipin Jesús mari üllcha domo mu.
TI MARI ÜLLCHAQUE DOMO
6. Ti quechu üllcha, ¿chumngechi pengelingün tañi quim domongen engün? (Mateo 25:6-10).
6 Cangelu pengelün dungu mu Jesús nütramcai mari üllchaque domo trafyemefingün quiñe novio (Mat. 25:1-4). Com engün ayüfuingün tañi conpual ti novio engün tati mafün mu. Jesús feipi quechu ‘quim domongefuingün’, caquelu quechu ‘quim domongelafuingün’. Tati quim domongelu pepicaucülefuingün ca llihuatulefuingün. ¿Chumngelu feipiafuiñ? Fei engün eluucülefuingün tañi esperayafiel tati novio tunte tarde rume acufule. Feimu tüfachi domo yeingün quiñeque lampara tañi pelontuhual, ca yeingün quiñeque fotilla nielu aceite, femngechi ñi chongnoal tati lampara tardeñmale ñi acual tati novio (papeltunge Mateo 25:6-10). Aculu tati novio, fei tati quimque domo conpuingün mafün mu tati novio engün. Pu dullinque cristiano ca mülei ñi pepicaucüleal ca llihuatuleal engün. Püntütripanole Jehová mu engün, cümelcangeaingün. ¿Chumngechi am? Acule tati novio, fei ta Jesús, conpuafuingün huenu mu tañi trür ngünenieal (Apoc. 7:1-3). b Pu domo cai quim raquiduamquenolu, ¿chumngeingün?
7. ¿Chem rupai tati pu quim domongenolu, ca chumngelu?
7 Tati pu quim domongenolu, pepicaucülelafuingün aculu tati novio. Doi fülcülepalu tati novio, inaduamingün tañi lampara ñi epe chongcülen, huelu nielafuingün aceite tañi apoltuafiel tati lampara, feimu amuingün tañi ngillameafiel ta aceite. Fei aculu tati novio ngelafuingün, ngillacayaulu engün am. Huelu “ti pu üllchaque domo pepicaucülelu, conpuingün ti novio engün tati mafün mu. Fei racümngei ti conhue” (Mat. 25:10). Acutulu tati pu quim domongenolu, ayüfuingün tañi conpual, huelu ti novio feipieyu “quimuulayiñ” (Mat. 25:11, 12). Feitachi quechu domo cüme pepicaucülelafuingün tañi esperayafiel ti novio. ¿Chem quimürpuafuingün pu dullinque cristiano?
8, 9. Pu dullinque cristiano, ¿chem falin dungu quimürpuafuingün pu mari üllcha domo mu? (Ca inaduamnge ti adentun).
8 Pengelaimi tami pepicaucülen ca tami llihuatulen. Ñi quimeltuel ta Jesús tüfa cüpa feipilai tañi mülen epu troquiñ dullinque cristiano: quiñe pepicaucülelu, cangelu pepicaucülenolu acule Jesús ti fütra cutrancahun mu. Feimu, ¿chem quimeltui Jesús? Pu dullinque cristiano pepicaucülenole, püntütripafule Jehová mu engün acule ta Jesús, cümelcangelayaingün (Juan 14:3, 4). Tüfa rume falifui. Maneluuliyiñ rume taiñ müleal mapu mu cam huenu mu, com iñchiñ mülei taiñ allcütuafiel ñi feipin Jesús ti mari üllcha domo mu. Tüfa quimeltueiñmu taiñ rumel llihuatuleal ca rumel pepicaucüleal puule ñi afal müleyechi dungu mapu meu (Mat. 24:13).
9 Ñi feipin Jesús ti mari üllcha domo mu pengeli tañi rume falin-ngen taiñ pepicaucüleal ca taiñ llihuatuleal. Rupan nütramcalu tüfa, ca nütramcai ñi femün cüla cüdaufe. Tañi feipin mu pengeli ñi rume falin-ngen taiñ cüdaufengeal.
¿Chumngechi inanieafuiñ ñi feipin Jesús pu mari üllchaque domo mu? Pepicaucüleaiñ, llihuatuleaiñ ca rumel nehuentuleaiñ. (Inaduamnge parrafo 8, 9).
PU TALENTO
10. Ti epu cüdaufe, ¿chumngechi pengelingu ñi manelfal chengen? (Mateo 25:19-23).
10 Jesús nütramcai cüla cüdaufe mu. Epu manelfalngefui, huelu quiñe manelfalngelafui (Mat. 25:14-18). Ti ngen cüdaufe petu ñi amunon ca mapu, elfalcünulelfi tañi pu cüdaufe fentren plata, talento pingequelu. Epu cüdaufe nehuentu cüdahuingu tañi doi huehual plata, femngechi pengelingu tañi manelfal chengen. Fei huiñotulu ti ngen cüdaufe, saquieyu, fei trür ayühuingün (papeltunge Mateo 25:19-23). Huelu, ¿chumi ti cangelu cüdaufe tañi elungeelchi plata mu?
11. ¿Chumngei ti huesa cüdaufe, ca chumngelu?
11 Ti cangelu cüdaufe elungei quiñe talento. Ti ngen cüdaufe ayüfui ñi doi huehual plata tañi cüdaufe, huelu femlai, cüdaulafi. Ti cüdaufe chofüngefui, fei deumai quiñe lolo ca rüngalcünufi ti talento. Fei huiñotulu ti ngen cüdaufe, huiñoleltufi müten ti talento. Feitachi cüdaufe huesaque raquiduam niefui, perdonaen pilafi rume tañi ñidol, feipintucufi tañi illcufengen. Fei, ¿chumi ti ngen cüdaufe? Lladcütueyu, müntuñmaeyu tañi talento ca quechaeyu tañi ruca mu (Mat. 25:24, 26-30).
12. ¿Inei engün adentulei ti epu manelfal cüdaufe?
12 Tüfachi epu manelfal cüdaufe adentulei pu dullinque cristiano püntütripaquenolu Jehová mu. Feimu Jesús feipifi caque quiñeque engün: “Cüpange, quiñentrür ayüucülenge tami ñidol engu”, fei elufi ñi huiñomongetual huenu meu. Tüfa tati hunen huiñomongetun (Mat. 25:21, 23; Apoc. 20:5b). Ñi huesa femün ti cüdaufe chofüngelu feipifi reque pu dullinque cristiano ñi femnoal engün.
13, 14. Ñi feipin Jesús ti talento mu, ¿chem quimeltufi pu dullinque cristiano? (Ca inaduamnge ti adentun).
13 Pengelaimi tami cüdaufengen. Ñi nütram ñi hulel Jesús ti talento mu feipilai pu dullinque cristiano ñi chofüngerpual. Doi mai Jesús ngüfetufi pu dullinque cristiano nehuentu cüdaucülenole engün, cümelu troquingelayai ca conpulayaingün huenu mu (2 Ped. 1:10).
14 Ti epu nütram ñi feipiel Jesús tati mari üllcha domo ca ti talento mu, Jesús cüme quimfalcünui com pu dullinque cristiano mülei ñi pepicaucüleal, llihuatuleal ca ñi cüme cüdaufengeal engün. Tüfachi dungu müten Jesús feipilafi pu dullinque cristiano. Ca peafiyiñ Mateo 24:40 ca 41.
Jesús ayüquei pu dullinque cristiano ñi rumel cüme cüdaufengeal. (Inaduamnge parrafo 13, 14). d
¿INEI ENGÜN AM “YENGEAI”?
15, 16. Pu dullinque cristiano, ¿chumngelu am falin-ngei ñi llihuatuleal engün? (Mateo 24:40, 41).
15 Jesús petu ñi feipinon tüfachi cüla pengelün dungu, hunelu mu nütramcai epu huentru mu cüdauquefilu ti mapu. Fei Jesús feipi “quiñe yengeai, huelu cangelu elcünungeai”. Ca nütramcai epu domo mu rüngümmequelu, fei Jesús ca feipi “quiñe yengeai, huelu cangelu elcünungeai” (papeltunge Mateo 24:40, 41). Rupan feipilu tüfa, Jesús feipifi tañi pu discipulo: “Llihuatulemün, quimnolu cai eimün chem antü cüpayai tamün Ñidol” (Mat. 24:42). Jesús ca femngechi dungu feipi rupan nütramcalu ti mari üllcha domo mu (Mat. 25:13). ¿Tüfachi epu nütram nüucülepelai? Pu dullinque cristiano püntütripaquenolu Jehová mu “yengeai”. Fei Jesús huenu meu llohuayu engün (Juan 14:3).
16 Pengelaimi tami llihuatulen. Quiñe dullin cristiano llihuatulenole, conpulayai cheu tañi mülen caquelu “dullinche” (Mat. 24:31). Com pu maneluucülelu ñi müleal mapu mu ca femngechi mülei ñi llihuatuleal ca püntütripanoal Jehová mu engün.
17. Famülque mu Jehová dullifule cristiano ñi amual huenu meu, ¿chumngelu afmatulayaiñ?
17 Iñchiñ am cüme quimfilu ta Jehová, feimu maneluuqueiñ tañi nor dungu femal. Feimu famülque mu Jehová dullifule quiñeque cristiano tañi amual huenu mu, tüfa afmatul-layaiñmu. c Loncontucuaiñ ñi feipin Jesús pu cüdaufe entuquelu ofad (Mat. 20:1-16). Quiñeque cüdaufe pulihuentu coningün ñi cüdahual, quiñeque rangiantü, caquelu nagantü. Huelu com llohuingün quiñe denario, tati inan-ngechi aculu ca ti hune aculu. Ca femngechi chumteñma dullin-ngefule rume pu dullinque cristiano cam hue dullin-ngefule rume, com amuai engün ta huenu meu püntütripanole engün Jehová mu.
INANIEFINGE ÑI QUIMELTUEL TA JESÚS
18, 19. ¿Chem quimeltueiñmu feitachi cüla pengelün dungu?
18 ¿Chem peiñ tüfachi troquiñ mu? Hunelu mu, inaduamiyiñ chem ñi feipin Jesús pu ufisa ca pu capüra mu, fei quimürpuiñ pu maneluulu ñi müleal mapu mu, mülei ñi püntütripanoal Jehová mu fachantü ca ti fütra cutrancahun mu. Fei acule ti fütra cutrancahun, Jesús juzgayafi pu che inei tañi püntütripanon Jehová mu, fei eluafi rumel mongen (Mat. 25:46).
19 Ca inaduamiyiñ epu pengelün dungu ñi inaduamafiel pu dullinque cristiano. Quiñe tati mari üllcha domo mu. Quechu pengeli tañi pepicaucülen ca ñi llihuatulen engün. Quim raquiduamingün ca pepicaucülefuingün ñi llohuafiel ti novio tunteñmafule rume. Ca quechu quim domongelafuingün ca pepicaucülelafuingün. Fei tati novio elulaeyu tañi conpual mafün mu. ¿Chem quimeltueiñmu feitachi pengelün dungu? Mülei taiñ pepicaucüleal feichi mu Jesús apümcafile huesaque dungu mapu mu, tunteñmafule rume. Jesús ca nütramcai ca pengelün dungu mu, tüfa mu epu cüdaufe nehuentu cüdahuingu, feimu ayühulfingu tañi ñidol. Huelu cangelu cüdaufe femlai, chofüi, feimu quechanentungei. ¿Chem quimeltueiñmu? Rumel nehuentu cüdahuelnieafiyiñ ta Jehová. Afchi troquiñ mu, inaduamiyiñ pu dullinque cristiano mülei ñi llihuatuleal, femngechi tañi “yengeal” ta huenu. Fei engün epechi aculniefingün ti antü ñi müleal Jesús engün. Fei rupale ta Armagedón, femngeai ti Cordero ñi mafün, fei pu dullinque cristiano Jesús tañi noviangeaingün (2 Tes. 2:1; Apoc. 19:9).
20. Inafiliyiñ taiñ feipieteu Jehová, ¿chumai quisu?
20 Pichilehuei Jesús ñi juzgayafiel pu che, huelu llicalelayaiñ. Püntütripanoliyiñ Jehová mu, fei eluaiñmu ñi nehuen, femngechi taiñ “huitraleal ti Huentru ñi Fotüm ñi adquiñ meu” (Luc. 21:36; 2 Cor. 4:7). Chem maneluhun nieliyiñ rume, amual huenu mu cam müleal mapu mu, com iñchiñ mülei taiñ ngüneduamal Jesús ñi feipin. Femliyiñ ayühuelafiyiñ ta Jehová, fei Jehová fente ñi cüme piuquengen mu huirintucuafi taiñ üi ti mongen ñi lifru mu (Dan. 12:1; Apoc. 3:5).
ÜLCANTUN 26 “Iñche ta fürenemun”
a Inaduamnge ti troquiñ “Chau Jehová, ¿chumngechi juzgacheai cüpalechi antü mu?” tripalu ti chillca Ti Huerquen mayo 2024.
b Tami doi quimal peafimi ti troquiñ “¿Logrará usted mantenerse alerta?” tripalu ti chillca La Atalaya 15 marzo, 2015.
d ¿CHEM PENGELI TI ADENTUN? Quiñe dullin lamngen pei quiñe domo amuldungun mu. Fei petu chillcatulelfi Biblia.
