LUCÍA CÜNTRONGEI. Pichicalu Lucía contueyu quiñe tul cutran, poliomielitis pingelu, tüfa cutranülqueteu tañi sistema nervioso. Quisu nielu 16 tripantu, cüdahuelquefi quiñe domo, fei feipieyu: “Tami allcütunofiel mu ca tami ayühuelnofiel mu tami ñuque, Chau Dios castigaeimu tüfachi cutran mu”. Quiñeque tripantu rupalu, Lucía petu acordaniei feichi antü ñi huesa duamnagcülen.

QUIMLU DÁMARIS ÑI NIEEL CANCER LONCO MU, tañi chau feipieyu: “¿Chumimi am tami contueteu tüfa? Fempelaimi quiñe huesa dungu. Feimu Ngünechen castigaeimu”. Müna hueñancüleyu ta Dámaris allcütufiel tüfa.

Afquentu pu che feyentuquei Chau Dios ñi castigaquefiel pu che huesaque cutran mu. Quiñe lifru pengeli Jesús ñi antü mu, pu che troquiquefui “ñi contueteu quiñe cutran quisu cam quiñe tañi pu che ñi culpan mu, feimu castigangequei” (Modales y costumbres de las tierras bíblicas). Cangelu lifru pengeli fentren tripantu hula ñi mülepan Jesús Mapu mu, “pu che raquiduamquefui ñi contueteu fill tul cutran Chau Dios castigaeteu am tañi culpan mu” (Medieval Medicine and the Plague). Feimu 600 tripantu cuifi, fentren che lai Europa mapu mu contueteu am tul cutran, fei ¿feipiafuiñ mai Chau Dios ñi castigafiel feichi pu che? Cam chumngechi ñi ngüneduamqueel pu doctor, ¿pu che tañi re contueteu müten feichi tul cutran cüpalquelu pu bacteria? Ngüneduamlu tüfa eimi ramtuhuafuimi: “¿Rüfngepei mai Chau Dios ñi castigaquefiel pu huesaque che quiñe huesa cutran mu?”. *

NGÜNEDUAMNGE: Femfule Chau Dios ñi castigaquefiel pu che, fei ñi eluquefiel cutran ca cutrancahun, ¿chumngelu Jesús tremolfi tati pu cutran? Ñi femün Jesús, ¿pengelpei mai Chau Dios tañi femquenon nor dungu? ¡Femlai tati! (Mateo 4:23, 24). Jesús rumel feyentuquei tañi Chau, feimu feipi: “Iñche am rumel femquelu quisu ñi ayüqueelchi dungu” ca ‘iñche ñi femquen tañi Chau ñi huercüeteu’, pi Jesús (Juan 8:29; 14:31).

Chau Ngünechen “norngenochi dungu femquelai”, feipi ta Biblia (Deuteronomio 32:4). Feimu raquiduamnge tüfa: Chau Dios ñi castigayafiel quiñe che müten, ¿femcünupei mai ñi layal fentren che quiñe accidente mu? ¡Femlayafui llemai! Chau Dios norngei. Cuifi mu quiñe huentru, Abrahán pingelu, feipi Chau Dios turpu ‘apümcayafi tati pu lif mongen-ngelu quiñentrür ti culpafe engün’. Ca feipi: ‘Eimi, lleno am tati doi fütra Juez mülelu com mapu meu. ¿Cüme nor dungu anta femlayaimi?’ (Génesis 18:23, 25). Cafei Biblia feipi: “Ngünechen femquelai huesaque dungu”, ca ‘huesalcaquelai’ (Job 34:10-12).

Cutrancaulu iñchiñ, Chau Ngünechen castigaquelaeiñmeu taiñ culpan mu. Jesús cüme pengeli tüfa, quisu ca tañi pu inanieteu quimfingün quiñe huentru choyüngelu müten traumangefui. ‘Fei Jesús ñi pu discipulo ramtueyu: “Quimeltufe, ¿chumngelu am tüfachi huentru choyüngelu müten traumangei? ¿Quisu ñi fütaqueche ñi culpan meu pemai cam quisu ñi culpan meu?”. Jesús lloudungui: “Quisu ñi culpan meu no ca ñi chau ñi culpan meu no rume”’ (Juan 9:1-3).

 Jesús ñi pu discipulo huelulefui ñi raquiduam engün, feimu afmatulehuepelai, allcütulu am engün Jesús ñi feipiel ti huentru traumalelafui ñi culpan meu cam tañi chau ñi culpan meu no tati. Jesús tremoltufilu ti trauma, pengeli ñi huelulcalen pu che tañi raquiduamqueel Chau Dios ñi castigaquefiel pu che cutran mu (Juan 9:6, 7). Feimu contunieeliyiñmu quiñe huesa cutran, müna yafültucuqueiñmu quimal Chau Ngünechen taiñ castigaquenoeteu cutran mu.

Biblia feipi

• “Ngünechen am quintucaduamquenofilu inei no rume ca quintucaduamngequelai ta quisu tañi femal huesaque dungu” (SANTIAGO 1:13). Doi mai pichilehuei Chau Dios ñi apümcayafiel fill ‘huesaque dungu’: ti cutran, cutrancahun ca ti lan dungu.

• Jesucristo “tremolyefi caquelu pu cutran” (MATEO 8:16). Jesús tremoltufilu pu che, pengeli ñi chem chumal Chau Dios ngünenietule com Mapu meu.

• ‘[Jehová] ancümüñmatuafi engün tañi cülleñu, fei ngehuelayai ta lan, ngüman no rume, eyütun no rume, cutrantun no rume. Itrocom tati mülequefulu am ta cuifi deu ta mülehuetunolu’ (APOCALIPSIS 21:3-5).

Huelu, ¿chumngelu am cutrancaucüleiñ? Afquentu pu che ramtuuquei tüfa. Chau Dios castiganofile pu che, fei ¿inei am culpantucuafuiñ? Cüpalechi chillcatun mu huiñoldungungeai tüfa.